បាតុកម្មដោះលែងលោករ៉ុងឈុនបាតុករត្រូវចាប់ខ្លួនបន្តបន្ទាប់
07-September-2020 / ផ្សេងៗ
ភ្នំពេញ៖ភិក្ខុ កើត សារ៉ាយដែលប្រកាសផែនការធ្វើបាតុកម្មសុំដោះលែងលោករ៉ុងឈុន ត្រូវបានចាប់ផ្សឹក មុននឹងត្រូវបញ្ជូនទៅតុលាការរាជធានីភ្នំពេញជាមួយយុវជនម្នាក់ទៀតឈ្មោះ មាន ព្រហ្មមុនី នៅព្រឹកថ្ងៃ៧ ខែកញ្ញា ឆ្នាំ២០២០។ នេះបើតាមលោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិ ប្រាប់កាសែត។
ឧត្តមសេនីយ៍ឯក ឆាយ គឹមខឿន ថា អ្នកទាំងពីរត្រូវបានចោទពីបទញុះញង់បង្កឲ្យមានភាពវឹកវរដល់សន្តិសុខសង្គម។ តេជគុណ កើត សារ៉ាយ និងយុវជន មាន ព្រហ្មមុនី ដែលជាសមាជិកនៃក្រុមយុវជនខ្មែរថាវរៈ ត្រូវបានសមត្ថកិច្ចចូលទៅចាប់កាលពីរសៀលថ្ងៃម្សិលមិញ (៦កញ្ញា) ក្នុងទីស្នាក់ការរបស់សមាគមនិស្សិតបញ្ញវន្តខ្មែរ ស្ថិតនៅជាប់ផ្សារស៊ីខេ (CK Market) ខណ្ឌពោធិ៍សែនជ័យ រាជធានីភ្នំពេញ។ អ្នកទាំងពីរត្រូវចាប់ខ្លួន បន្ទាប់ពីប្រកាសជំហរថា នៅតែចូលរួមដឹកនាំធ្វើបាតុកម្មទាមទារឲ្យដោះលែងលោក រ៉ុង ឈុន និងទាមទារឲ្យមានយុត្តិធម៌សង្គម ខណៈអាជ្ញាធរ ប្រាប់ថា មិនអនុញ្ញាត។
ទោះជាយ៉ាងណានៅព្រឹកថ្ងៃទី៧ ខែកញ្ញាមាន ក្រុមយុវជន នៅតែនាំគ្នាធ្វើដំណើរឆ្ពោះទៅកាន់ទីលានប្រជាធិបតេយ្យ ដើម្បីសម្តែងមតិ។ តែពួកគេ ចូលមិនដល់ទីលានប្រជាធិតេយ្យទេទើសកម្លាំងសមត្ថកិច្ច។ ទន្ទឺមគ្នាន៉ក៏មានយុវជនម្នាក់ទៀតឈ្មោះ ថា ឡាវី ត្រូវបានឃាត់ខ្លួន តែគេមិនទាន់ដឹងថា បញ្ជូនទៅទីណាឡើយ។សូមរំឭកជូនថា យុវជន ថា ឡាវី ដែលបានចុះហត្ថលេខាលើលិខិតមួយប្រកាសជំហធ្វើបាតុកម្មនេះក៏ធ្លាប់ត្រូវបានសមត្ថកិច្ចឃាត់ខ្លួនម្តងហើយ តែដោះលែងវិញ កាលពីពាក់កណ្តាលខែសីហា ខណៈរូបគេចូលរួមទាមទារតវ៉ាឲ្យដោះលែង លោក រ៉ុង ឈុន។
សូមជម្រាបថា ក្រុមយុវជនដែលហៅខ្លួនឯងថា«ពលរដ្ឋសកម្ម ដើម្បីយុត្តិធម៌» បានប្រកាសជំហធ្វើបាតុកម្មរយៈពេលជាងមួយសប្តាហ៍ចាប់ពីថ្ងៃទី៧កញ្ញាតទៅ ដើម្បីរកយុត្តិធម៌ជូន លោក រ៉ុង ឈុន និងសកម្មជន៤នាក់ទៀតដែលត្រូវបានចាប់ខ្លួនពាក់ព័ន្ធនឹងការអត្ថាធិប្បាយរឿងព្រំដែន។
ប៉ុន្តែសាលារាជធានីភ្នំពេញមិនអនុញ្ញាតឲ្យធ្វើបាតុកម្មនៅទីលានប្រជាធិបតេយ្យនោះទេ ដោយនិយាយថាអ្នករៀបចំ កៀងគរមនុស្សឲ្យចូលរួមលើសពីអ្វីដែលបានព្រមព្រៀងគ្នា ជាមួយអាជ្ញាធរដែលកំណត់ត្រឹមចំនួន២០០នាក់។
មកទល់ពេលនេះ មានសកម្មជនសង្គមជិត១០នាក់ហើយត្រូវបានចាប់ខ្លួនជាបន្តបន្ទាប់ ខណៈពួកគេតវ៉ាទាមទារឲ្យដោះលែង លោក រ៉ុង ឈុន។ រួមមាន កញ្ញា ឈឿន ដារ៉ាវី លោក ហ៊ុន វណ្ណៈ កញ្ញា ស កន្និកា លោក មាន ព្រហ្មមុនី លោក ថា ឡាវី ព្រះតេជគុណ កើត សារាយ ជាសមាជិកនៃក្រុមខ្មែរថាវរៈ និងលោក សួង សោភ័ណ្ឌ ប្រធានគណបក្សខ្មែរឈ្នះជាដើម។
ក្រសួងមហាផ្ទៃ ចោទថា ក្រុមយុវជនខ្មែរថាវរៈ និងក្រុមយុវជនចលនាមាតាធម្មជាតិ កំពុងសកម្មភាបំផុស ញុះញង់ធ្វើឲ្យប៉ះពាល់ស្ថិរភាព សន្តិសុខ សណ្តាប់ធ្នាប់សាធារណៈ និង បង្កចលាចល វឹកវរក្នុងសង្គម តាមរយៈការប្រើប្រាស់បណ្តាញសង្គម និងបណ្តាញព័ត៌មានមួយចំនួនទៀត ដើម្បីផ្សព្វផ្សាយអត្ថបទ ខិត្តប័ណ្ណ រូបភាពនានា វីដេអូ ព្រមទាំងបានធ្វើបាតុកម្ម ដោយគ្មានច្បាប់អនុញ្ញាតថែមទៀត។
តាមរយៈសេចក្តីប្រកាសព័ត៌មាន នៅថ្ងៃទី៧ ខែកញ្ញា ឆ្នាំ២០២០ ក្រសួងមហាផ្ទៃ ស្នើឲ្យអាជ្ញាធរមានសមត្ថកិច្ចពាក់ព័ន្ធ ចាត់វិធានការផ្លូវច្បាប់ ដើម្បីធានារក្សាសណ្តាប់ធ្នាប់សាធារណៈ និងសន្តិសុខជាតិ ជាពិសេសទប់ស្កាត់រាល់ការបង្កភាពអាណាធិបតេយ្យ និងបង្កចលាចលក្នុងសង្គម ក្នុងអំឡុងប្រជាពលរដ្ឋខ្មែរ កំពុងរៀបចំពិធីបុណ្យភ្ជុំបិណ្ឌ។ ជាមួយគ្នានេះ ក្រសួងមហាផ្ទៃ អំពាវនាវកុំឲ្យប្រជាពលរដ្ឋ ចូលរួមក្នុងសកម្មភាពខុសច្បាប់ទាំងនេះផងដែរ។
