ការប្រកាសលាលែងរបស់មហាធាពីនាយករដ្ឋមន្ត្រីបង្ហាញពីការបែកបាក់ផ្ទៃក្នុងបក្សកាន់អំណាច!
25-February-2020 / ព័ត៌មានអន្តរជាតិ
ម៉ាឡេស៊ី៖ ព្រះមហាក្សម៉ាឡេស៊ីព្រះចៅ អាប់ឌុលឡាហ៍ ប៊ីលឡាហ៍ ហ្សាហ៍( Sultan Abdullha Sultan Ahmad Shah) បានសម្រេចព្រះទ័យយល់ព្រមឲ្យលោក មហាធៀ មហាម៉ាត់ លាលែងចេញពីតំណែងហើយនៅថ្ងៃទី២៤កុម្ភៈនេះ ប៉ុន្តែទ្រង់ក៏បានសម្រេចឲ្យលោក ស្ថិតនៅជានាយករដ្ឋមន្ត្រីបណ្តោះអាសន្នសិន រហូតដល់គណៈរដ្ឋមន្ត្រីថ្មីត្រូវបង្កើតឡើងដែលជាធម្មតាគឺឧបនាយករដ្ឋមន្ត្រីត្រូវឡើងបន្ត។
សារព័ត៌មាន CNA នាយប់ថ្ងៃចន្ទ ទី២៤ ខែកុម្ភៈ ឆ្នាំ២០២០បានឲ្យដឹងថាការសម្រេចព្រះទ័យរបស់ព្រះមហាក្សត្រម៉ាឡេស៊ីខាងលើនេះ ត្រូវបានធ្វើឡើង ស្របទៅនឹងរដ្ឋធម្មនុញ្ញមាត្រា ៤៣ ដោយក្នុងនោះបានបញ្ជាក់ផងដែរថា នាយករដ្ឋមន្ត្រីស្តីទី ឬបណ្តោះអាសន្ននឹងត្រូវកាន់ការយ៉ាងយូរបំផុតរយៈពេល ១០ថ្ងៃ រហូតដល់គណៈរដ្ឋមន្ត្រី ព្រមទាំងនាយករដ្ឋមន្ត្រីថ្មីត្រូវជ្រើសតាំង។ បន្ថែមពីនេះ ព្រះមហាក្សត្រក៏បានត្រាស់បង្គាប់ឲ្យកងកម្លាំងប៉ូលិស ថែរក្សាសណ្តាប់ធ្នាប់ និងសន្តិសុខនៅក្នុងប្រទេសទាំងមូលផងដែរ។
មានការកត់សម្គាល់់ថាការលាលែងរបស់លោក Mahathir កើតមានឡើងក្រោយពីមានការចរចាកាលពីចុងសប្តាហ៍រវាងសមាជិកនៃគណបក្សរបស់លោកឈ្មោះបេសាទូ( Bersatu ) និងក្រុមគណបក្សប្រឆាំងផ្សេងទៀត អំពីការបង្កើតរដ្ឋាភិបាលថ្មីមួយ ដើម្បីរារាំងផ្ទេរអំណាចរបស់លោកឲ្យទៅលោក Anwar Ibrahim ដែលលោក Mahathir បានជ្រើសរើសដោយខ្លួនលោក។
សូមបញ្ជាក់ថាលោកបណ្ឌិត Mahathir Mohamad នាយករដ្ឋមន្ត្រីអាយុ៩៤ឆ្នាំបានលាលែងពីតំណែងជានាយករដ្ឋមន្ត្រីម៉ាឡេស៊ី កាលពីថ្ងៃចន្ទ ទី២៤កុម្ភៈដែលបង្ហាញថាផ្ទៃក្នុងគណបក្សចំរុះកំពុងកាន់អំណាច Pakatan Harapan (PH) មានការបែកបាក់ព្រោះលោកមហាធាមិនបានផ្ទេរអំណាចឲ្យលោកអាន់វ៉ាអ៊ីប្រាហ៊ីមដូចការសន្យា។ជាក់ស្តែងបន្ទាប់ពីសាលែងពីតំណែងនាយករដ្ឋមន្ត្រី លោកក៏បានលាឈប់ពីតំណែងជាប្រធានគណបក្សដឹកនាំរដ្ឋាភិបាលចម្រុះបន្តទៀត។
មានការរំពឹងទុកថាក្រោយពីលាលែង លោកនឹងដឹកនាំគណបក្សរបស់លោកឈ្មោះបេសាទូ( Bersatu )ចាកចេញពីសម្ព័ន្ធភាពដែលកំពុងកាន់អំណាចដែលបង្កើតមុនការប្រោះឆ្នោតឈ្មោះប៉ាកាតាន់ហារ៉ាប៉ាន់( Pakatan Harapan) (PH)ទៅបង្កើតរដ្ឋាភិបាលថ្មីជាមួយគណបក្សអង្គការជាតិម៉ាឡេស៊ី (UMNO), Parti Islam Se-Malaysia (PAS) និងគណបក្សដទៃទៀត។ នៅព្រឹកថ្ងៃច័ន្ទដដែលនេះ លោកអាន់វ៉ា( Anwar) និងឧបនាយករដ្ឋមន្ត្រី លោកស្រី Wan Azizah Wan Ismail ដែលជាភរិយាបានជួបជាមួយលោកបណ្ឌិតមហាធា( Mahathi) នៅឯគេហដ្ឋាន រួមជាមួយអគ្គលេខាធិការគណបក្សសកម្មភាពប្រជាធិបតេយ្យ (DAP)។
សូមបញ្ជាក់់ថា៖លោកមហាធាម៉ូហាម៉ាត់( Mahathir Mohamad )អាយុ៩៤ឆ្នាំ និងលោកអាន់វ៉ាអ៊ីប្រាហ៊ីម( Anwar Ibrahim) អាយុ៧២ឆ្នាំ បានរួមកម្លាំងគ្នាកាលពីឆ្នាំ២០១៨ ដើម្បីយកជ័យជម្នះនៅក្នុងការបោះឆ្នោតលើសម្ព័ន្ធភាពគណបក្សកាន់អំណាចរបស់លោកណាជីបរ៉ាហ្សាក់នៅពេលនោះ ដោយអ្នកនយោបាយបានដាក់លក្ខខណ្ឌថា លោក Mahathir នឹងត្រូវផ្ទេរអំណាចឲ្យលោកអាន់វ៉ា( Anwar)។
បើតាមក្រុមអ្នកវិភាគព្រះមហាក្សត្រម៉ាឡេស៊ីមានអំណាចផ្តល់សំឡេងភាគច្រើនក្នុងសភាឲ្យគណបក្សណាមួយ បើពុំដូច្នេះទេ ព្រះមហាក្សត្រអាចរំលាយសភា ដើម្បីឲ្យមានការបោះឆ្នោតឆ្នោតថ្មី។បច្ចុប្បន្ននេះ ភរិយារបស់លោក Andwar គឺលោកស្រី Wan Azizah Ismail ជាឧបនាយករដ្ឋមន្ត្រីម៉ាឡេស៊ី ហើយលោកស្រីនឹងក្លាយជាមន្ត្រីរដ្ឋាភិបាលជាន់ខ្ពស់ជាងគេដែលគេរំពឹងថាលោកស្រីនឹងក្លាយជានាយករដ្ឋមន្ត្រីថ្មី!៕
