រឿងនួនជាស្លាប់តើអាចបញ្ចប់បណ្តឹងអាជ្ញាដាក់គុកគាត់មួយជីវិតដែរ?
05-August-2019 / សន្តិសុខសង្គម
ភ្នំពេញ៖ លោក នួន ជា អតីតបងធំទី២ នៃរបបខ្មែរក្រហមដែលជាជនជាប់ចោទនៅតុលាការកាត់ទោសមេដឹកនាំខ្មែរក្រហម(អវតក) បានទទួលមរណភាពហើយ នៅវេលាម៉ោង៦៖០០ល្ងាច ថ្ងៃទី៤ ខែសីហា ឆ្នាំ២០១៩ នៅមន្ទីរពេទ្យសហភាពខ្មែរ -សូវៀត ក្នុងជន្មាយុ៩៣ឆ្នាំ បន្ទាប់ពីបានបញ្ជូនពីមន្ទីរឃុំឃាំង ដើម្បីសម្រាកព្យាបាលនៅមន្ទីរពេទ្យនេះ អស់រយៈពេល១ខែ។
សពលោក នួន ជា ត្រូវបានគ្រួសាររបស់គាត់ដឹកចេញពីមន្ទីរពេទ្យមិត្តភាពខ្មែរ-សូវៀត នៅម៉ោង ៤៖៤៧នាទីព្រឹកព្រលឹមថ្ងៃទី៥ ខែសីហា ឆ្នាំ ២០១៩ ហើយបានទៅដល់ទីកន្លែងពិធីបុណ្យ នាខេត្តប៉ៃលិន នៅម៉ោង ១២៖៣០នាទីថ្ងៃត្រង់ថ្ងៃដដែលនេះ។
លោក នេត្រ ភក្ត្រា អ្នកនាំពាក្យអង្គជំនុំជម្រះវិសាមញ្ញក្នុងតុលាការកម្ពុជា (សាលាក្តីខ្មែរក្រហម)បានថ្លែងប្រាប់បណ្តាញព័ត៌មាន ថា «សពលោក នួន ជា នឹងត្រូវបូជានៅយប់ថ្ងៃទី៩ ខែសីហា ឆ្នាំ២០១៩ នៅវត្តព្រំគិរីមរកត ស្ថិតនៅភូមិផ្សារព្រហ្ម ឃុំស្ទឹងកាច់ ស្រុកសាលាក្រៅ ខេត្តប៉ៃលិន។ ពិធីបុណ្យសពលោក នួន ជា នឹងបញ្ចប់នៅព្រឹកថ្ងៃទី១០ ខែសីហា ធ្វើបុណ្យ ៧ ថ្ងៃជាកិច្ចបង្ហើយបុណ្យ»។
សូមបញ្ជាក់ថា ជនជាប់ចោទ នួន ជា នួន ជា កើតនៅថ្ងៃទី០៧ ខែកក្កដា ឆ្នាំ១៩២៦ មានតួនាទីជាអនុលេខាបក្សកុម្មុយនីស្តកម្ពុជា សមាជិកគណៈកម្មាធិការអចិន្រៃ្តយ៍ និងគណៈកម្មាធិការមជ្ឈិមបក្សកុម្មុយនីស្តកម្ពុជា និងជាប្រធានសភាតំណាងប្រជាជននៃ របបកម្ពុជាប្រជាធិបតេយ្យ។ គាត់ត្រូវបានចាប់ខ្លួននៅថ្ងៃទី១៩ ខែកញ្ញា ឆ្នាំ២០០៧។
នួន ជា ត្រូវបានរកឃើញថា មានពិរុទ្ធភាពពីបទឧក្រិដ្ឋកម្មប្រឆាំងនឹងមនុស្សជាតិ និងត្រូវបានផ្តន្ទាទោសដាក់ពន្ធនាគារអស់មួយជីវិតនៅក្នុងសំណុំរឿង ០០២/០១ កាលពីថ្ងៃទី០៧ ខែសីហា ឆ្នាំ២០១៤។តែលោកនួនជាប្តឹងតវ៉ា។ នៅថ្ងៃទី២៣ ខែវិច្ឆិកា ឆ្នាំ២០១៦ អង្គជំនុំជម្រះតុលាការកំពូល បានបដិសេធពិរុទ្ធភាពមួយចំនួន ប៉ុន្តែតម្កល់ការផ្តន្ទាទោសរបស់អង្គជំនុំជម្រះសាលាដំបូងឲ្យជាប់ពន្ធនាគារអស់មួយជីវិត។
នៅថ្ងៃទី១៦ ខែវិច្ឆិកា ឆ្នាំ២០១៨ នួន ជា ត្រូវបានផ្តន្ទាទោសពីបទប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការរំលោភបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវ ឆ្នាំ១៩៤៩ នៅក្នុងសំណុំរឿង ០០២/០២ ជាមួយ ខៀវ សំផន។ នេះបើតាមការប្រកាសរបស់ សាលាក្តីខ្មែរក្រហម។អង្គជំនុំជម្រះសាលាដំបូង បានរួមបញ្ចូលទោសជាប់ពន្ធនាគារអស់មួយជីវិតនៅក្នុងសំណុំរឿង ០០២/០១ និងសំណុំរឿង ០០២/០២ ទៅជាការផ្តន្ទាទោសដាក់ពន្ធនាគារអស់មួយជីវិតតែមួយ។
ពេលស្លាប់ជនជាប់ចោទ នួន ជា និងខៀវ សំផន កំពុងជាប់បណ្ដឹងសារទុក្ខទាំងពីរប្រឆាំងនឹងការផ្ដន្ទាសចំពោះក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋសង្គ្រាម ដែលជនជាប់ចោទទាំងពីរត្រូវបានផ្ដន្ទាទោសនៅក្នុងការជំនុំជម្រៈលើកទី២កាលពីចុងឆ្នាំ២០១៨។ សម្រាប់ នួន ជា បណ្ដឹងសារទុក្ខបានផុតរលត់ហើយ ក្រោយមរណៈភាពរបស់គាត់នៅវេលាម៉ោង៦ល្ងាចម្សិលមិញ ត្រូវនឹងថ្ងៃទី៤ខែសីហា។មេធាវីលោកនួនជាឲ្យកាសែតដឹងថាលោកឲ្យគ្រួសារលោកបន្តបណ្តឹងសារទុក្ខតទៀត!។
សារព័ត៌មានដ៏ធំរបស់ប្រទេសអង់គ្លេស BBC ក្រោមចំណងជើងថា «នួន ជា អតីតមេដឹកនាំរងនៃរបបខ្មែរក្រហមបានស្លាប់» BBC រៀបរាប់បន្ថែម ថា លោក នួន ជា មិនព្រមទទួលយកការទទួលខុសត្រូវ ឬ មានវិប្បដិសារីអ្វីចំពោះឧក្រិដ្ឋកម្មដែលបានកើតឡើងក្នុងសម័យខ្មែរក្រហមនោះឡើយ ។ BBC បានលើករំលឹកបង្ហាញពីការនិយាយរបស់ លោក នួន ជា ប្រាប់ទៅលើអ្នកកាសែតកាលពីពេលកន្លងថា «បើយើងមិនសម្លាប់អ្នកក្បត់ផ្ទៃក្នុងបក្សយើងទេ យើងមិនអាចវាយបំបែកសត្រូវបានទេ ហើយវាក៏នឹងគ្មានប្រទេសកម្ពុជាសព្វថ្ងៃនេះដែរ»៕
