ខឹមចិត្រាមេប៉ុស្តិថ្មីនគរបាលច្រកទ្វារប៉ោយប៉ែតប្រឹងរកលុយសងថ្លៃសេវាដោយសារអាងលោកគៀតចន្ទ័ថារិទ្ធ?!
04-March-2019 / ព័ត៌មានជាតិ
ខេត្តបន្ទាយមានជ័យ ៖ប្រជាពលរដ្ឋនៅក្រុងប៉ោយប៉ែត និងពលករខ្មែរចូលទៅធ្វើការនៅប្រទេសថៃនិយាយថាគេ សង្ឃឹមថា ការផ្លាស់ប្តូរមេប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែតអាចនឹងមានការកែទម្រង់ការងារពិសេសគឺ កាត់បន្ថយការគាបសង្កត់យកលុយរបស់មន្ត្រីនគរបាល ប្រចាំច្រកនេះ ។
ប៉ុន្តែមិននឹកស្មានថាលោកប្រធានថ្មីស៊ីលុយធំជាងលោកប្រធានចាស់ចឹងឡើយ!។ បើតាមការសង្កេតរបស់ប្រជាពលរដ្ឋនិយាយថា៖ចាប់តាំងពីលោក ខឹម ចិត្រា បានមកឡើងកាន់តំណែង ជាប្រធាននគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ជំនួសលោក ស៊ឹម សំអាត ដែលល្បីខាងប្រព្រឹត្តអំពើពុករ លួយហើយថែម ទាំងសូកប៉ាន់ពន្យាកំណើត ដើម្បីបានកាន់ តំណែង ធ្វើជាអនុប្រធាននាយកដ្ឋានទទួលទិសទី១នៅអគ្គនាយកដ្ឋាននគរបាលអន្តោរប្រវេសន៍ ដើម្បីឈានទៅពង្រឹងអំណាចជាបន្តទៀត។
ចំណែកលោក ខឹម ចិត្រា វិញក៏មិនណយដែរព្រោះចាយសេវាក៏មិនធម្មតាដែរដើម្បីបានមកកាន់ប៉ូស្តិខ្លាញ់មួយនេះនោះ។ចឹងលោក ខឹម ចិត្រា មិនត្រឹមតែបន្តដើរតាមគំរូអាក្រក់របស់លោក ស៊ឹម សំអាត ប៉ុណ្ណោះទេ គឺថែមទាំងបង្កើនអំពើពុករលួយកាន់តែខ្លាំងទ្វេរឡើងផងក៏ថាបានដែរ។
ជាក់ស្តែងបន្ទាប់ពីលោកវរ:សេនីយ៍ទោ ខឹម ចិន្ត្រា ឡើងកាន់តំណែងជាមេប៉ុស្តិ៍នគរបាលប្រចាំច្រកទ្វារអន្តរជាតិប៉ោយប៉ែត គេសង្កេតឃើញថា លោកនៅមិនទាន់មានវិធានការទៅលើលោក សេម មករា នាយផ្នែកសេនាធិការនគរបាលប៉ុស្តិ៍អន្តោរប្រវេសន៍ ច្រកទ្វារអន្តរជាតិប៉ោយប៉ែតនៅឡើយ ខណៈលោក សេម មករា កំពុងឃុបឃិតគ្នាជាមួយលោក ម៉ៅ ម៉យ និងមន្ត្រីក្រោមឱវាទមួយចំនួនទៀត ជំរិតទារប្រាក់ពីកម្មករអូសរទេះពីប្រទេសថៃមកកម្ពុជា និងពីកម្ពុជាទៅប្រទេសថៃ។
បច្ចុប្បន្ននេះ លោក ម៉ៅ ម៉យ កំពុងដាក់ប៉ុស្តិ៍ជជុះ នៅចំណុចមាត់ទ្វាអន្តរជាតិ ជំរិតទារប្រាក់ពីកម្មករអូសរទេះពីថៃមកកម្ពុជា ដោយយកក្នុង ១រទេះ ចាប់ពី ៥០០០រៀល រហូតដល់ ២០០០០រៀល។ មិនត្រឹមតែប៉ុណ្ណោះលោក សេម មករា បានចាត់ឲ្យមន្ត្រីក្រោមឱវាទ ដាក់កុងត្រូលជជុះមួយកន្លែងទៀត នៅចំណុចរង្វង់មូលក្រុងប៉ោយប៉ែត ជាប់កន្លែងវាយប័ណ្ណឆ្លងដែន (Boarder Pass) ជំរិតទារប្រាក់ពីកម្មករអូសរទេះពីប្រទេសកម្ពុជាចូលទឹកដីថៃ ធ្វើមានធ្វើបានបក្ខពួកនិយម។
ប្រភពដដែលបានឲ្យដឹងថា ទិដ្ឋាការភ្ញៀវទេសចរដែលកំណត់យកត្រឹម៣០ដុល្លារឬស្មើជាង១២ម៉ឺនរៀលនោះ គឺលោក ឯក បូរ៉ា និងបក្ខពួកតម្រូវឲ្យភ្ញៀវទេសចរបង់លុយ១២០០បាតឬស្មើនឹង៣៦,៣ដុល្លារ។ សម្រាប់ទិដ្ឋាការធម្មតាដែលកំណត់យកត្រឹម៣៥ដុល្លារបែរជាឲ្យបង់ដល់ទៅ១៥០០បាតប្រហែល៤៥,៥ដុល្លារ ហើយទិដ្ឋាការពិសេសដែលត្រូវកំណត់លើកលែងទិដ្ឋាការមិនយកលុយបែរជា តម្រូវឲ្យភ្ញៀវបង់លុយដល់១០០០បាត។តាមប្រភពដែលស្និទ្ធនឹងលោក ឯក បូរ៉ា បានឲ្យដឹងថាក្រៅពីនោះ លោក ឯក បូរ៉ា មានការ កាងភ្ញៀវនៅស្រុកអារញ្ញប្រាថេត ខេត្តស្រះកែវ ប្រទេសសៀម យកប៉ាស្ព័រមកប្រថាប់ត្រាមុនហើយតម្រូវឲ្យបង់លុយជាក្រោយផងដែរ។
ពាក់ព័ន្ធនឹងរឿងអាស្រូវពុករលួយរបស់លោកឃឹម ចិត្រា កាលពីពេលថ្មីនេះលោកធ្លាប់បានបកស្រាយជាសាធារណៈរួចម្ដងហើយ ថាលោក យកសេវ៉ា តែ១០០រៀល ប៉ុណ្ណោះ តែការបកស្រាយនេះក៍ត្រូវបានមហាជនរិះគន់យ៉ាងចាស់ដៃផងដែរព្រោះប្រជាពលរដ្ឋនិងអាជីវករអ្នករកស៊ីចេញ ចូលតាមច្រកនេះមិនដែលចំណាយលុយត្រឹម១០០រៀលដូចលោកឃឹម ចិត្រា បកស្រាយនោះទេ ។
ការមិនព្រមកែទម្រង់បែបនេះប្រភពពីមន្ត្រីនគរបាលនៅក្នុងអគ្គនាយកដ្ឋានអន្តោប្រវេសន៍ក្រសួងមហាផ្ទៃ មួយចំនួនបង្ហើបឲ្យដឹងថា ការដែលលោក ខឹម ចិត្រា ហ៊ានធ្វើអ្វីៗតាមអំពើចិត្ត គឺដោយសារអាងមាននាយឧត្តមសេនីយ៍ គៀត ច័ន្ទថារិទ្ធអគ្គនាយកនៃអគ្គនាយកដ្ឋានអន្តោប្រវេសន៍ ជាបង្អែកដ៏រឹងមាំ។ ព្រោះប្រសិនបើគ្មាននាយឧត្តមសេនីយ៍ គៀត ច័ន្ទថារិទ្ធ ជាបង្អែករឹងមាំទេនោះ គឺលោក ខឹម ចិត្រា នាយប៉ុស្ដិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត មិនហ៊ានប្រើតួនាទីនិងអំណាចរបស់ខ្លួនប្រព្រឹត្តអំពើពុករលួយយ៉ាងកំរោលដូចសព្វថ្ងៃនេះឡើយ។
គួររំលឹកដែរថា ថ្មីៗកន្លងទៅនេះថ្នាក់ដឹកនាំក្នុងអគ្គនាយកដ្ឋានអន្តោប្រវេសន៍ បានកោះហៅលោក ខឹម ចិត្រា មកសាកសួរជុំវិញរឿងអាស្រូវពុករលួយដែលបណ្ដាញព័ត៌មាននានាបានចុះផ្សាយនិងផ្សព្វផ្សាយជាបន្តបន្ទាប់។ ក៏ប៉ុន្តែក្រោយថ្នាក់ដឹកនាំអគ្គនាយកដ្ឋានអន្តោប្រវេសន៍ កោះហៅលោក ខឹម ចិត្រា គឺលទ្ធផលសូន្យលោក ខឹម ចិត្រានៅតែ ហ៊ានប្រព្រឹត្តអំពើពុករលួយកាន់តែខ្លាំងក្លាថែមទៀត ហើយលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ កំពុងរក្សាភាពស្ងៀមស្ងាត់។ហេតុនេះហើយទើបលោក ខឹម ចិត្រា នាយប៉ុស្ដិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត និងបក្ខពួកកំពុងបង្កើនសកម្មភាពនៃអំពើពុករលួយយ៉ាងកំរោលដោយគ្មានញញើតអ្វីទាំងអស់។
មានការអំពាវនាវឲ្យសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចាត់វិធានការទប់ស្កាត់ទង្វើមិនប្រក្រតីនិងអំពើពុករលួយរបស់លោក ខឹម ចិត្រា ជាបន្ទាន់ផងដែរ៕
