អាជ្ញាធរចុះបង្ក្រាបកន្លែងចម្រាញ់រ៉ែមាស នៅស្រុកគាស់ក្រឡ ក្រោយ ពីប្រជាពលរដ្ឋប្តឹងកាសែត

បាត់ដំបង៖ សេចក្តីរាយការណ៍របស់ប្រជាពលរដ្ឋ បានបំបែកកន្លែងចម្រាញ់រ៉ែមាស​ខុស​ច្បាប់មួយកន្លែងនៅភូមិបន្ទាយចា ឃុំឆ្នាល់មាន់ ស្រុកកោះក្រឡ ខេត្តបាត់ដំបង។ កន្លែង​ច​ម្រាញ់រ៉ែមាសនេះ បានធ្វើសកម្មភាពយូរហើយ តែមិនបានរំខានដល់មេភូមិ មេឃុំ ឬ​មេ​ស្រុកនោះទេ។ 

កាលពីថ្ងៃទី២៧ ខែមេសា កន្លងទៅនេះ ប្រជាពលរដ្ឋនៅឃុំឆ្នាល់មាន់ បានសុំឲ្យកាសែតហ្វ្រេសញូ ជួយផ្សាយរឿងក្លិនស្អុយចេញពីកន្លែងចម្រាញ់រ៉ែមាសស្ថិតនៅ​ទីតាំង​ខាង​​លើបង្កការរំខានដល់ការរស់នៅរបស់ប្រជាពលរដ្ឋ។បន្ទាប់មក នៅថ្ងៃទី២៨ ខែមេសា ឆ្នាំ២០២៦ គេបានក្រុមការងារ នៃ​មន្ទីរ​បរិស្ថានខេត្តបាត់ដំបង សហការជាមួយមន្ទីររ៉ែ និងថាមពលខេត្តបាត់ដំបង ព្រមទាំង​អាជ្ញាធរមូលដ្ឋានមានមន្ត្រីសាលាឃុំឆ្នាល់មាន់ អភិបាលរងស្រុកគាស់ក្រឡ បាន​ចុះត្រួត​ពិនិត្យទីតាំងចម្រាញ់រ៉ែមាសខាងលើ។ សមត្តកិច្ចបានរកឃើញកន្លែងចម្រាញ់រ៉ែមាសដែលគ្មានច្បាប់អនុញ្ញាតនោះ​ម្ចាស់ទីតាំងមានឈ្មោះ ណែត សំណាង។

ក្រោយឃើញបែបនោះ អាជ្ញាធរមិនបានចាត់វិធានការច្បាប់អ្វីនោះទេ គឺគ្រាន់តែណែនាំ​ម្ចាស់ទីតាំង និងបញ្ឈប់សកម្មភាពចម្រាញ់រ៉ែមាស ហើយណែនាំឱ្យធ្វើកិច្ច​សន្យា​បញ្ឈប់​សកម្មភាព និងឱ្យរុះរើឧបករណ៍កែច្នៃរ៉ែមាសនោះ។

ក្រុមការងារក៏បានណែនាំឱ្យសំអាតសារធាតុគីមី ដែលអាចបណ្ដាលឱ្យមានផល​ប៉ះពាល់​ដល់មនុស្ស សត្វ រុក្ខជាតិ នៅជុំវិញទីនោះ តាមលក្ខណៈបច្ចេកទេស ក្នុងរយៈពេលមួយ​សប្តាហ៍ជាកំហិត។

ពាក់ព័ន្ធនឹងសកម្មភាពលួចចម្រាញ់រ៉ែមាសបង្កផលប៉ះពាល់ដល់ប្រជាពលរដ្ឋនេះ។ ប្រជាពលរដ្ឋបានដាក់ជាចម្ងល់ថា បើតាមប្រជាពលរដ្ឋសកម្មភាពចម្រាញ់រ៉ែមាសនេះ មានសកម្មភាពយូរហើយ ហេតុអ្វីអាជ្ញាធរមូលដ្ឋានដូចជាមេភូមិ មេឃុំ និងអភិបាលស្រុកមិនដឹងនូវសកម្មភាពនេះ?

ប្រភពបានសរសេររៀបរាប់យ៉ាងដូច្នេះ «នេះជាសកម្មភាពចម្រាញ់មាសខុសច្បាប់ ដែល​ប្រព្រឹត្តឡើងនៅចំណុចភូមិចាស់ ស្ថិតក្នុងភូមិបន្ទាយចារ ឃុំឆ្នាល់មាន់ ស្រុកគាស់ក្រឡ ខេត្ត​បាត់ដំបង។ សកម្មភាពនេះប្រព្រឹត្តឡើងជាង ៣ខែហើយ ដោយឈ្មោះ ភិន ជី ត្រូវ​ជា​បងប្រុសអនុភូមិបន្ទាយចារ ឈ្មោះ ភិន ជីប។ សកម្មភាពនេះ ធ្វើ​ដោយ​កូន​ប្រុសលោក ភិន ជី ឈ្មោះ សម្បត្តិ ជាអ្នកដឹកជញ្ជូនរ៉ែមាសដែលជីករកបាន មកធ្វើការចម្រាញ់​កណ្តាល​ភូមិតែម្ដង ដែលវាជះក្លិនស្អុយខ្លាំង និងធ្វើឱ្យមាន់ទា និងគោ នៅផ្ទះជាប់នោះ​ងាប់​ជា​បណ្តើរៗ»។

ប្រភពបានបញ្ជាក់ទៀតថា កាលពីពេលចូលឆ្នាំខ្មែរថ្ងៃទី២ ក្លិនស្អុយខ្លាំងចេញពីកន្លែងច​ម្រាញ់​ ធ្វើឱ្យក្មេងៗថប់ដង្ហើម រត់ទៅនៅដើមភូមិ នៅពីលើខ្យល់) ដើម្បីគេចពីក្លិន។ប្រភពបានបន្តទៀតថា គ្មាន​​​អ្នកភូមិហ៊ាននិយាយអ្វីពីសកម្មភាពចម្រាញ់រ៉ែនេះឡើយ ដោយ​គេត្រូវដងត្រូវផ្លែជាមួយអាជ្ញាធរមូលដ្ឋាន និងអាជ្ញាធរស្រុករួចអស់ហើយ។