ប្រតិបត្តិការបង្ក្រាបទីតាំប្រើប្រាស់ថ្នាំញៀនដ៏ធំនៅកណ្តាលរាជធានីភ្នំពេញចាប់ខ្លួនជនជាតិចិន វៀតណាម និងខ្មែរ ជាង៣០០នាក់តែមិនដឹងថៅកែមួយណា

ភ្នំពេញ៖ នគរបាលប្រឆាំងបទល្មើសគ្រឿងញៀន បានឡោមព័ទ្ធ និងឃាត់ខ្លួនមនុស្សប្រុសស្រី ជនជាតិចិន វៀតណាម និងខ្មែរ ជាង៣០០នាក់ ដោយដកហូតថ្នាំញៀនជាច្រើន នៅចំណុចទីតាំងសំណង់អគារ១កន្លែង ដែលមិនទាន់សាងសង់រួចរាល់ក្បែរកោះពេជ្រ កាលពីវេលាម៉ោង ១២:៣០នាទីរំលងអធ្រាត្រ ឈានចូលថ្ងៃទី១៦ ខែតុលា ឆ្នាំ២០២៥ រហូតដល់ព្រឹកព្រលឹម។ទីតាំងនេះ ស្ថិតនៅអាគារមានស្លាកយីហោ ពេជ្រលើមេឃ ដែលស្ថិតនៅតាមបណ្ដោយផ្លូវ សបិត សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

សមត្ថកិច្ច បានឲ្យដឹងទៀតថា មន្ទីរប្រឆាំងបទល្មើសគ្រឿងញៀន បន្ទាប់ពីមានការស្រាវជ្រាវអស់រយៈពេលជាយូរ សមត្ថកិច្ចក៏បានសង្ស័យថា ទីតាំងដែលមានស្លាកយីហោ ពេជ្រលើមេឃ នេះ ជាកន្លែងជួញដូរចែកចាយ និងប្រើប្រាស់គ្រឿងញៀន ទើបកម្លាំងសមត្ថកិច្ចជំនាញចុះធ្វើការឡោមព័ទ្ធ និងឆែកឆេតាំងខាងលើតាំងពីវេលារំលងអធ្រាត្រ រហូតដល់វេលាម៉ោងប្រមាណជាង ៩ព្រឹក ទើបចប់ប្រតិបត្តិការ។

លោកឧត្តមសេនីយ៍ឯក ឃឹង សារ៉ាត នាយកមន្ទីរប្រឆាំងបទល្មើសគ្រឿងញៀន ដែលដឹកនាំក្នុងប្រតិបត្តិការនេះបានឲ្យដឹងថា ទីតាំងខាងលើមើលនេះបើមើលពីក្រៅដូចជាការដ្ឋានដែលកំពុងតែសាងសង់ ដើម្បីបន្លំភ្នែកមហាជន និងសមត្ថកិច្ច ប៉ុន្តែតាមការពិតនៅខាងក្នុងស្អាតមិនធម្មតា ។

នាយកមន្ទីរប្រឆាំងបទល្មើសគ្រឿងញៀន បានបន្តថា​នគរបាលមន្ទីរប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិ សហការជាមួយនគរបាលមូលដ្ឋានខណ្ឌចំការមន បានចុះឡោមព័ទ្ធទីតាំងអគារដែលមានស្លាកយីហោ ពេជ្រលើមេឃ នៅក្បែរស្ពានហង្ស ត្រូវបានបង្ក្រាបគ្រឿងញៀនដោយឃាត់ខ្លួនជនជាតិចិន វៀតណាម និងខ្មែរ ប្រុសស្រីជាង៣០០នាក់ ព្រមទាំងបានដកហូតគ្រឿងញៀន ប្រភេទកេតាមីនជាច្រើនផងដែរ។សម្តិច្ចមិនបានឲ្យដឹងថាតើទីតាំងខាងលើថៅកែជាអ្នកណានោះទេ?។

បច្ចុប្បន្នជនសង្ស័យប្រុសស្រីចម្រុះជាតិសាសន៍ដែលត្រូវបានឃាត់ខ្លួនក្នុងក្លឹបនោះត្រូវបានសមត្ថកិច្ចបញ្ជូនតាមរថយន្តដឹកអ្នកដំណើរ ទៅកាន់អគ្គស្នងការដ្ឋាននគរបាលជាតិដើម្បីសាកសួរនាំ និងបន្តអនុវត្តតាមនីតិវិធីច្បាប់៕