ដកទណ្ឌកម្មពីក្រុមហ៊ុនគាំទ្ររបបភូមា ក្រុមការងារប្រធានាធិបតីអាមេរិកពិចារណាលើសំណើ ដើម្បីចូលប្រើរ៉ែដីកម្ររបស់មីយ៉ាន់ម៉ា
29-July-2025 / សេដ្ឋកិច្ច
វ៉ាស៊ីនតោន៖ រដ្ឋការលោកប្រធានាធិបតីឌូណាល់ត្រាំកំពុងពិនិត្យមើលសំណើថ្មី ដែលអាចផ្លាស់ប្តូរគោលនយោបាយរបស់សហរដ្ឋអាមេរិក ចំពោះប្រទេសមីយ៉ាន់ម៉ា ក្នុងគោលបំណងកាត់បន្ថយការគ្រប់ គ្រងរបស់ប្រទេសចិនលើការផ្គត់ផ្គង់រ៉ែកម្រពិភពលោក។ នេះបើតាមការចេញផ្សាយរបស់ទីភ្នាក់ងារសារព័ត៌មាន Reuters។
ទោះបីជាមិនមានការសម្រេចចិត្តណាមួយត្រូវបានធ្វើឡើងក៏ដោយ ហើយបញ្ហាប្រឈមសំខាន់ៗនៅតែមាន ប៉ុន្តែគំនិតដែលកំពុងពិភាក្សាបង្ហាញថា សហរដ្ឋអាមេរិកអាចពិចារណាធ្វើការជាមួយក្រុមឧទ្ទាមជនជាតិភាគតិច កងទ័ពឯករាជ្យ Kachin (KIA) ដែលគ្រប់គ្រងភាគច្រើននៃធនធានរ៉ែកម្រដ៏មានតម្លៃរបស់មីយ៉ាន់ម៉ា។
សំណើសំខាន់ចំនួនពីរ នឹងត្រូវលើកយកមកពិភាក្សា៖ ទី១. ការអំពាវនាវឱ្យសហរដ្ឋអាមេរិកចូលរួមកិច្ចពិភាក្សាជាមួយរបបយោធាកាន់អំណាចរបស់មីយ៉ាន់ម៉ា ដើម្បីទទួលបានកិច្ចព្រមព្រៀងសន្តិភាពជាមួយកងទ័ពឯករាជ្យ Kachin (KIA) ដែលជាក្រុមឧទ្ទាមជនជាតិភាគតិច និងទី២. គឺការអំពាវនាវឱ្យសហរដ្ឋអាមេរិក ធ្វើការដោយផ្ទាល់ជាមួយក្រុមឧទ្ទាមជនជាតិភាគតិច KIA ដោយមិនមានការចូលរួមពីរបបយោធា។
បច្ចុប្បន្ននេះ សហរដ្ឋអាមេរិក បានចៀសវាងទំនាក់ទំនងផ្លូវការជាមួយរបបដឹកនាំយោធាមីយ៉ាន់ម៉ា ដែលបានដណ្តើមអំណាចពីរដ្ឋាភិបាលជាប់ឆ្នោតក្នុងឆ្នាំ ២០២១។នៅក្នុងសំណើរនេះ ក៏រួមបញ្ចូលផងដែរនូវការកាត់បន្ថយ ឬដកពន្ធ ៤០% ដែលត្រូវបានដាក់ ដោយប្រធានាធិបតី Trump, ការបន្ធូរបន្ថយទណ្ឌកម្មលើយោធាមីយ៉ាន់ម៉ា និងសម្ព័ន្ធមិត្ត, សហការជាមួយប្រទេសឥណ្ឌា ដើម្បីកែច្នៃរ៉ែដីកម្ររបស់មីយ៉ាន់ម៉ា និងតែងតាំងបេសកជនពិសេសរបស់សហរដ្ឋអាមេរិក ដើម្បីអនុវត្តលើកិច្ចការទាំងនេះ។
លោក Adam Castillo អតីតប្រធានសភាពាណិជ្ជកម្មអាមេរិកនៅមីយ៉ាន់ម៉ា និងបច្ចុប្បន្នជានាយកប្រតិបត្តិក្រុមហ៊ុនសន្តិសុខនៅមីយ៉ាន់ម៉ា ដែលបានចូលរួមពិភាក្សានៅក្នុងកិច្ចប្រជុំកាលពីថ្ងៃទី ១៧ ខែកក្កដា ជាមួយក្រុមមនុស្សជំនិត និងទីប្រឹក្សារបស់លោកអនុប្រធានាធិបតី JD Vance បាននិយាយថា លោកបានស្នើថា សហរដ្ឋអាមេរិកអាចដើរតួជាអ្នកសម្របសម្រួលស្វែងរកសន្តិភាពក្នុងប្រទេសមីយ៉ាន់ម៉ា និងជួយចរចាបង្កើតកិច្ចព្រមព្រៀងចែករំលែកអំណាចរវាងរបបយោធា និងក្រុមឧទ្ទាមជនជាតិភាគតិច Kachin ដើម្បីត្រួសត្រាយផ្លូវសម្រាប់កិច្ចសហប្រតិបត្តិការលើគម្រោងទាញយកធនធានរ៉ែដីកម្រ។
សូមបញ្ជាក់ថាសហរដ្ឋអាមេរិកបានប្រកាសដកទណ្ឌកម្មចេញពីក្រុមហ៊ុនភូមាមួយចំនួន និងអ្នកជំនួញជាច្រើននាក់ដែលស្និទ្ធ ស្នាលនឹងរបបសឹកភូមា។ នេះបើតាមសេចក្តីប្រកាសរបស់ក្រសួងសេដ្ឋកិច្ចអាមេរិកចុះផ្សាយនៅថ្ងៃទី២៤ កក្កដា។ ក្រសួងសេដ្ឋកិច្ចអាមេរិកពុំបានបញ្ជាក់លម្អិតពីមូលហេតុដែលលើកលែងទណ្ឌកម្មនោះឡើយ ហើយសេតវិមានអាមេរិកក៏ពុំបានពន្យល់អ្វីដែរ។ តែអ្វីដែលគេកត់សម្គាល់ គឺមានការឆ្លើយឆ្លងលិខិតរវាងលោកប្រធានាធិបតីអាមេរិក ដូណាល់ ត្រាំ និងលោកឧត្តមសេនីយ៍ មីន អ៊ុងឡាំង មេដឹកនាំរបបសឹកភូមា។
កាលពីដើមខែកក្កដានេះ ចៅហ្វាយសេតវិមានអាមេរិកបានបញ្ជូនលិខិតមួយទៅរដ្ឋាភិបាលទីក្រុងណៃពិដោរ ដោយប្រាប់ពីដំណឹងត្រូវដំឡើងពន្ធគយ ៤០% ចំពោះភូមា ចាប់ពីថ្ងៃទី១ សីហាខាងមុខ ប្រសិនបើគ្មានកិច្ចព្រមព្រៀងជាមួយគ្នាទេ។ លិខិតរបស់លោកដូណាល់ត្រាំនោះ ត្រូវគេចាត់ទុកថា ជាការទទួលស្គាល់ លើកទី១របស់រដ្ឋអំណាចក្រុងវ៉ាស៊ីនតោនចំពោះរបបសឹកភូមា គិតចាប់ពីរដ្ឋប្រហារយោធា ឆ្នាំ២០២១ មក។២សប្តាហ៍ក្រោយមក មេដឹកនាំរបបសឹក លោក មីន អ៊ុងឡាំង បានឆ្លើយតបលិខិត ដោយសរសេរបញ្ជោរលើកជើងលោក ដូណាល់ ត្រាំ។ ក្នុងលិខិតដដែលនោះ មេដឹកនាំរបបសឹកភូមាបានថ្លែងអំណរគុណយ៉ាងជ្រាលជ្រៅ និងយ៉ាងស្មោះស្ម័គ្រចំពោះសារលិខិតរបស់ប្រធានាធិបតីអាមេរិក ព្រមទាំងថ្លែងកោតសរសើរអំពីភាពដឹកនាំដ៏អស្ចារ្យរបស់លោក ដូណាល់ ត្រាំ។ មិនតែប៉ុណ្ណោះ លោក មីន អ៊ុងឡាំង ក៏បានអបអរសាទរចំពោះវិធានការរបស់លោក ត្រាំ ក្នុងការបិទប្រព័ន្ធផ្សព្វផ្សាយអាមេរិកដែលធ្លាប់តែធ្វើសេចក្តីរាយការណ៍បែបអវិជ្ជមានពីបញ្ហាជម្លោះនៅភូមា។
បណ្តាក្រុមហ៊ុនភូមាដែលអាមេរិកសម្រេចដកទណ្ឌកម្ម មានឈ្មោះ KT Services and Logistics, ក្រុមហ៊ុន The Myanmar Chemical and Machinery Company និងក្រុមហ៊ុន Suntac Technologies។ ម្ចាស់ក្រុមហ៊ុនទាំងអស់នោះ ក៏រួចផុតពីបញ្ជីខ្មៅរបស់វ៉ាស៊ីនតោនដែរ។ លោក Jonathan Myo Kyaw Thaung ជាអគ្គនាយកក្រុមហ៊ុន KT Services and Logistics បានត្រូវរដ្ឋាភិបាលក្រុងវ៉ាស៊ីនតោនដាក់ក្នុងបញ្ជីទណ្ឌកម្មកាលពីឆ្នាំ២០២២ ពីព្រោះតែរូបលោកបានជួលកំពង់ផែមួយនៅទីក្រុងរ៉ង់ហ្គូនទៅឲ្យពួកយោធាភូមាក្នុងតម្លៃទឹកប្រាក់ ៣លានដុល្លារក្នុងមួយឆ្នាំ។
ចំណែកក្រុមហ៊ុន The Myanmar Chemical and Machinery Company និងម្ចាស់ក្រុមហ៊ុន ឈ្មោះ Aung Hlaing Oo, រួមទាំងក្រុមហ៊ុន Suntac Technologies និងថៅកែ ឈ្មោះ Sit Taing Aung បានជាប់ក្នុងបញ្ជីទណ្ឌកម្មអាមេរិកកាលពីឆ្នាំ២០២០ ពីព្រោះតែបានចូលរួមផលិតគ្រឿងសព្វាវុធ តួយ៉ាងរថក្រោះ និងគ្រាប់ប្លោង។ រីឯ អ្នកជំនួញភូមា លោក Tin Latt Min ជាម្ចាស់ក្រុមហ៊ុនជាច្រើន និងធ្លាប់ត្រូវវ៉ាស៊ីនតោនចាត់ទុកជាមនុស្សដ៏ស្និទ្ធនឹងរបបសឹកភូមា ហើយក៏ត្រូវអាមេរិកដាក់ក្នុងបញ្ជីខ្មៅ។ ពេលនេះ អ្នកជំនួញភូមារូបនេះក៏រួចខ្លួនពីបញ្ជីទណ្ឌកម្មអាមេរិកដែរ។
មេដឹកនាំរបបសឹក លោកឧត្តមសេនីយ៍ មីន អ៊ុងឡាំង បានធ្វើរដ្ឋប្រហារនៅឆ្នាំ២០២១ ទម្លាក់រដ្ឋាភិបាលស៊ីវិលរបស់លោកស្រី អ៊ុង សានស៊ូជី ជ័យលាភីរង្វាន់ណូបែលសន្តិភាព។ ចាប់ពីពេលនោះមក ប្រទេសនៅអាស៊ីអាគ្នេយ៍មួយនេះ ជួបកលិយុគកាន់តែខ្លាំង។ កម្លាំងចលនាប្រដាប់អាវុធប្រឆាំងរបបសឹកភូមា បានរីកដុះដាលស្ទើរគ្រប់ទីកន្លែង ពិសេសនៅតំបន់ព្រំដែន។ សង្គ្រាមស៊ីវិលដែលឆាបឆេះជាច្រើនឆ្នាំមកនេះ បានបណ្តាលឲ្យពលរដ្ឋភូមា យ៉ាងតិច ៣,៥លាននាក់ ផ្លាស់ទីលំនៅក្នុងស្រុក និងធ្លាក់ខ្លួនក្រីក្រ៕
