ក្រុមមេដឹកនាំអឺរ៉ុបរួមគ្នាបង្ហាញការគាំទ្រអ៊ុយក្រែន ក្នុងឱកាសជំនួបកំពូលនៅប្រទេសអង់គ្លេស
03-March-2025 / ព័ត៌មានអន្តរជាតិ
អង់គ្លេស៖ ក្រុមមេដឹកនាំអឺរ៉ុបសំខាន់ៗ រួមមាន អាល្លឺម៉ង់ បារាំង អង់គ្លេស អេស្ប៉ាញ ប៉ូឡូញ និងហូឡង់ បាននាំគ្នាបង្ហាញបង្ហោះសារគាំទ្រប្រធានាធិបតីអ៊ុយក្រែន លោក Volodymyr Zelensky ចំពោះកិច្ចពិភាក្សារបស់លោកជាមួយលោកដូណាល់ត្រាំកាលពីពេលថ្មីៗ ក្រោយពីលោកបានរងការវាយប្រហារពាក្យសម្ដីខ្លាំងៗរបស់លោកដូណាល់ត្រាំ ហើយនិងគូកន គឺអនុប្រធានាធិបតី លោក JD Vance លើបញ្ហាសង្គ្រាមនៅអ៊ុយក្រែន។
ការរួមគ្នាបង្ហាញសារគាំទ្រអ៊ុយក្រែនរបស់ក្រុមមេដឹកនាំអឺរ៉ុបពេលនេះ កើតឡើងស្របពេលដែលអឺរ៉ុបគ្រោងនឹងរៀបចំកិច្ចប្រជុំកំពូលនៅថ្ងៃអាទិត្យនេះ ដើម្បីជជែកស្វែងរកដំណោះស្រាយបញ្ចប់សង្គ្រាមនៅអ៊ុយក្រែន តាមរយៈលក្ខខណ្ឌកិច្ចចរចាមួយដែលមានភាពច្បាស់លាស់ និងអាចធានាសន្តិសុខជាតិរបស់អ៊ុយក្រែនបានយូរអង្វែង ជាជាងអ្វីដែលរដ្ឋបាលរបស់លោកដូណាល់ត្រាំកំពុងព្យាយាមបញ្ចុះបញ្ចូលអ៊ុយក្រែនឱ្យព្រមព្រៀងគ្នាជាមួយរុស្ស៊ី។
គួររំលឹកថា នៅក្នុងការជជែកវែកញែកគ្នាយ៉ាងតឹងសរសៃករវាង លោកដូណាល់ត្រាំ និងលោក JD Vance ជាមួយលោកហ្សេលេនស្គីនៅក្នុងការិយាល័យប្រធានាធិបតីអាម៉រិកកាលពីថ្ងៃសុក្រកន្លងទៅ លោកដូណាល់ត្រាំបានព្រមានបង់បោះបង់ចោលអ៊ុយក្រែន ប្រសិនបើលោកហ្សេលេនស្គីមិនព្រមបង្កើតកិច្ចព្រមព្រៀងជាមួយរុស្ស៊ីឱ្យបានឆាប់ៗ។
បន្ថែមពីនេះ លោកដូណាល់ត្រាំនិងរដ្ឋមន្ត្រីការបរទេសរបស់លោក ក៏បាននាំគ្នាវាយប្រហារពាក្យសម្ដីលើលោកហ្សេលេនស្គី ថាជាបុគ្គលខ្វះការដឹងគុណចំពោះការលះបង់របស់អាម៉េរិកនាពេលកន្លងមក និងបានស្តីបន្ទោសលោកហ្សេលេនស្គី ថាកំពុងតែលេងល្បែងសង្គ្រាមដ៏គ្រោះថ្នាក់ ដែលអាចបង្កឱ្យវិបត្តិសង្គ្រាមលោកលើកទី ៣កើតឡើង រវាងរុស្ស៊ីនិងក្រុមប្រទេសខាងលិច។ដោយឡែក ក្រៅពីទទួលបានសារគាំទ្ររបស់ក្រុមមេដឹកនាំអឺរ៉ុប បណ្តាប្រទេសធំៗក្រៅតំបន់មួយចំនួនផ្សេងទៀត ដូចជា៖ កាណាដា អូស្ត្រាលី និងណូវែលសេឡង់ដ៍ ក៏បាននាំគ្នាបង្ហោះសារគាំទ្រដល់អ៊ុយក្រែនផងដែរ និងត្រូវបានហ្សេលេនស្គីបង្ហាញក្តីអំណរគុណយ៉ាងជ្រៀរជ្រៅ។លោក ប្រធានាធិបតីបារាំង លោក Emmanuel Macron បានបង្ហោះសារលើបណ្តាញសង្គមថា៖ ”រុស្ស៊ីគឺជាអ្នកឈ្លានពាន ចំណែកអ៊ុយក្រែនគឺជាអ្នករងគ្រោះ” ខណៈលោកបានបន្ថែមទៀតថា ការជួយអ៊ុយក្រែនគឺជារឿងត្រឹមត្រូវ ដូច្នេះអឺរ៉ុបនឹងបន្តជួយអ៊ុយក្រែន និងដាក់ទណ្ឌកម្មលើប្រទេសរុស្ស៊ីដូចអ្វីដែលខ្លួនបានធើ្វអស់រយៈពេលជាង ៣ឆ្នាំមកនេះ។
ក្រោយពីបានសំណេះសំណាលគ្នា ថ្នាក់ដឹកនាំទាំង២បានចូលរួមជាអធិបតីក្នុងពិធីចុះហត្ថលេខា លើកិច្ចសន្យាកម្ចី ដែលអង់គ្លេសនឹងផ្តល់ទៅឲ្យអ៊ុយក្រែន នូវទឹកប្រាក់ចំនួន ២,២៦ពាន់លានលីវ្រស្ទែរលីង ដែលស្មើនឹងប្រមាណ ២,៧៤ពាន់លានអឺរ៉ូ ដើម្បីចំណាយលើវិស័យការពារជាតិអ៊ុយក្រែន។ ហើយប្រាក់នេះនឹងត្រូវសងត្រលប់មកវិញ តាមរយៈការប្រាក់ដែលបានមកពីទ្រព្យសកម្មរបស់រុស្ស៊ី ដែលគេបានបង្កកទុក។នៅលើទំព័រតេឡេក្រាម លោកហ្សេឡេនស្គី បានអះអាងថាប្រាក់នេះ គឺអ៊ុយក្រែននឹងយកទៅប្រើ ដើម្បីផលិតគ្រឿងសព្វាវុធ ប្រយុទ្ធដេញចោរឈ្លានពានរុស្ស៊ី។ លោកហ្សេឡេនស្គី បានថ្លែងអរគុណចំពោះបរជាជននិងរដ្ឋាភិបាលអង់គ្លេស ដែលបន្តជួយគាំទ្រទំនុកបម្រុងដល់អ៊ុយក្រែន។នៅព្រឹកថ្ងៃអាទិត្យទី២មីនា ព្រះចៅ ស្ហាលទី៣ ព្រះមហាក្សត្រអង់គ្លេស បានអញ្ជើញលោកហ្សេឡេនស្គី ឲ្យចូលគាល់ ដើម្បីបញ្ជាក់អំពីការស្វាគមន៍ដ៏កក់ក្តៅពីសំណាក់អង់គ្លេស។ នេះគឺជារឿងកម្របំផុត ដែលព្រះមហាក្សត្រអង់គ្លេស បង្ហាញជំហរពាក់ព័ន្ធនឹងនយោបាយការទូត ហើយវាក៏អាចជាសារ ប្រាប់ទៅលើលោកដូណាល់ ត្រាំ ថាទោះសហរដ្ឋអាមេរិកបោះបង់អ៊ុយក្រែន ក៏អ៊ុយក្រែនមិនឯកោដែរ។
កាលពីថ្ងៃអាទិត្យ ទី២ ខែមីនា នាយករដ្ឋមន្ត្រីចក្រភពអង់គ្លេស លោក Keir Starmer បាននិយាយថា រូបលោកមិនទទួលយកឡើយថា សហរដ្ឋអាមេរិក ក្រោមការដឹកនាំរបស់ប្រធានាធិបតី លោក ដូណាល់ ត្រាំ គឺជាសម្ព័ន្ធមិត្តមួយ ដែលមិនអាចជឿទុកចិត្តបាន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។អំឡុងសន្និសីទសារព័ត៌មាន នៅទីក្រុងឡុងដ៍ លោក Starmer បានឆ្លើយ ថា «គ្មាននរណាចង់ឃើញ អ្វីដែលបានកើតឡើង កាលពីថ្ងៃសុក្រសប្តាហ៍មុនឡើយ ប៉ុន្តែខ្ញុំមិនទទួលស្គាល់នោះទេថា អាមេរិកគឺសម្ព័ន្ធមិត្តមិនអាចជឿទុកចិត្តបាន។ អាមេរិកគឺជាសម្ព័ន្ធមិត្តគួរឱ្យជឿទុកចិត្ត សម្រាប់ចក្រភពអង់គ្លេស អស់រយៈពេលច្រើនទសវត្សរ៍មកហើយ ហើយនឹងនៅតែបន្តបែបនោះ។ មិនមានប្រទេស២ណាផ្សេងទៀត ដែលជិតស្និទ្ធនិងត្រូវរ៉ូវគ្នា ដូចជាប្រទេសនិងយោធាយើងទាំងពីរនោះទេ ហើយសន្តិសុខនិងចារកម្មរបស់ពួកយើង គឺជាប់ពាក់ព័ន្ធគ្នា ក្នុងរបៀបមួយ ដែលគ្មានប្រទេស២ណាផ្សេង ដូចឡើយ»។អំឡុងស្ថិតនៅក្នុងទីក្រុងឡុងដ៍ ដែរនាយករដ្ឋមន្ត្រីកាណាដា លោក ចាស្ទីន ទ្រូដូ (Justin Trudeau) បានរម្លឹកឡើងវិញនូវការគាំទ្ររបស់លោក ចំពោះប្រធានាធិបតីអ៊ុយក្រែន លោក វ្លូឌីមៀរ ហ្សេលែនស្គី (Volodymyr Zelenskiy) និងប្រទេសអ៊ុយក្រែនទាំងមូល។
សូមបញ្ជាក់ថាកាលពីថ្ងៃអាទិត្យ ទី២ ខែមីនា លោក វ៉ូឡូឌីមៀ ហ្សេលេនស្គី បានប្រាប់ប្រព័ន្ធផ្សព្វផ្សាយអង់គ្លេសថា វានឹងមិនមែនជារឿងងាយស្រួលឡើយ ដើម្បីជំនួសរូបលោក ជាប្រធានាធិបតីអ៊ុយក្រែន ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ក្រុមសមាជិកកំពូលៗនៃគណបក្សសាធារណរដ្ឋ ដែលជាសម្ព័ន្ធមិត្តរបស់ប្រធានាធិបតិអាមេរិក លោក ដូណាល់ ត្រាំ បាននាំគ្នាជំរុញ ឱ្យលោក ហ្សេលេនស្គី ផ្លាស់ប្តូរគោលជំហររបស់លោក ចំពោះសង្គ្រាមជាមួយរុស្ស៉ី ឬក៏លាលែងចេញពីតំណែង បន្ទាប់ពីលោក ត្រាំ និងលោកប្រធានាធិបតីអ៊ុយក្រែន បានឈ្លោះប្រកែកគ្នាយ៉ាងខ្លាំង ចំពោះមុខក្រុមអ្នកកាសែត នៅឯសេតវិមាន កាលពីសប្តាហ៍មុន ជុំវីញបញ្ហាសង្គ្រាមនៅអ៊ុយក្រែន។
លោក ហ្សេលេនស្គី បញ្ជាក់ថា «ដោយសំអាងលើអ្វីដែលកំពុងកើតឡើង បូករួមជាមួយទំហំនៃការគាំទ្ររបស់ខ្ញុំ ប្រសិនបើពួកគេចង់ជំនួសខ្ញុំ គឺមិនអាចជារឿងងាយស្រួលឡើយ។ រៀបចំការបោះឆ្នោតតែមួយមុខ នឹងមិនទាន់គ្រប់គ្រាន់នោះទេ គឺអ្នកត្រូវហាមមិនឱ្យខ្ញុំឈរឈ្មោះ ដែលរឿងនេះនឹងពិបាកបន្តិចហើយ។ មើលទៅ អ្នកនឹងត្រូវតែចរចាជាមួយខ្ញុំ។ ខ្ញុំធ្លាប់និយាយរួចហើយថា ខ្ញុំសុខចិត្តដោះដូរដើម្បីសមាជិកភាព NATO»។គួរបញ្ជាក់ថា លោក ហ្សេលេនស្គី បានប្រឹងប្រែងអំពាវនាវឱ្យអ៊ុយក្រែន ទទួលបានសមាជិកភាពនៅក្នុងអង្គការ NATO ក្រោមកិច្ចព្រមព្រៀងនានា ដែលចង់បិទបញ្ចប់សង្គ្រាមឈ្លានពានរបស់រុស្ស៉ី ប៉ុន្តែបក្សសម្ព័ន្ធយោធាលោកខាងលិច ដែលដឹកនាំដោយអាមេរិកមួយនេះ បានស្ទាក់ស្ទើរក្នុងការសន្យាធ្វើបែបនោះ។ កាលពីខែកុម្ភៈ លោក ត្រាំ បាននិយាយថា អ៊ុយក្រែនគួរបំភ្លេចចោលទៅ នូវក្តីស្រមៃចង់ក្លាយជាសមាជិក NATO ក្រោមកិច្ចព្រមព្រៀងបញ្ចប់សង្គ្រាម ដោយលោកលើកហេតុផលថា វាគឺជាមូលហេតុចម្បង ដែលបានបង្កឱ្យសង្គ្រាមផ្ទុះឡើងដំបូង។ រុស្ស៉ីបានចាត់ទុក លទ្ធភាពអ៊ុយក្រែនចូលជាសមាជិក NATO គឺជាហេតុផលមួយ ដែលជំរុញឱ្យខ្លួនចាប់ផ្តើមសង្គ្រាមឈ្លានពាន កាលពី៣ឆ្នាំមុន៕
