ក្រុមប្រឹក្សាសន្តិសុខនិងសម័យប្រជុំ UN អនុម័តជំហរអព្យាក្រឹតតាមសំណើរអាមេរិកចំពោះសង្គ្រាមអ៊ុយក្រែន
26-February-2025 / ព័ត៌មានអន្តរជាតិ
អាមេរិក៖ ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ ទី២៤ ខែកុម្ភៈ បានបោះឆ្នោតអនុម័តសេចក្ដីព្រាងនៃដំណោះស្រាយមួយរបស់សហរដ្ឋអាមេរិក ដែលបានប្រកាន់យកជំហរអព្យាក្រឹតចំពោះសង្គ្រាម អ៊ុយក្រែន នាឱកាសខួបគម្រប់៣ឆ្នាំ នៃសង្គ្រាមដែលបង្កចេញពីការឈ្លានពានរបស់រុស្ស៉ី តាមសំណើអាមេរិក ។ នេះបើតាមការចេញ ផ្សាយដោយទីភ្នាក់ងារសារព័ត៌មាន Reuters។ដំណោះស្រាយដ៏ខ្លីមួយខាងលើ បានឆ្លុះបញ្ចាំងពីការបិទបញ្ចប់ទាំងស្រុងនៃគោលនយោបាយរបស់សហរដ្ឋអាមេរិកដែលចង់ផ្សះផ្សារជាមួយរុស្ស៉ីចំពោះសង្គ្រាមអ៊ុយក្រែន ចាប់តាំងពីលោក ត្រាំ បានឡើងកាន់តំណែងជាប្រធានាធិបតីជាងមួយខែមកនេះ ។
ឯកអគ្គរដ្ឋទូតរុស្ស៉ីប្រចាំ UN លោក Vassily Nebenzia ក៏បានទទួលស្គាល់ដែរថាវាជាការផ្លាស់ប្ដូរប្រកបដោយលក្ខណៈស្ថាបនានៅក្នុងគោលជំហររបស់សហរដ្ឋអាមេរិកពាក់ព័ន្ធនឹងសង្គ្រាមអ៊ុយក្រែន។ លោកបានប្រាប់ ក្រុមប្រឹក្សាសន្តិសុខទៀតថាដំណោះស្រាយរបស់សហរដ្ឋអាមេរិកនៅពេលនេះ គឺជាចំណុចចាប់ផ្ដើមសម្រាប់អនាគតនៃកិច្ចប្រឹងប្រែងឆ្ពោះទៅរកការផ្សះផ្សារដោយសន្តិវិធី។គួរបញ្ជាក់ថា នៅក្នុងដំណោះស្រាយដែលស្នើឡើងដោយសហរដ្ឋអាមេរិក បានសម្ដែងមរណទុក្ខចំពោះការបាត់បង់អាយុជីវិតមនុស្សក្នុងសង្គ្រាមរវាងរុស្ស៉ី និងអ៊ុយក្រែន ជាមួយការគូសបញ្ជាក់ឡើងវិញពីគោលការណ៍របស់ UN ក្នុងការ ថែរក្សាសន្តិភាពអន្តរជាតិ សន្តិសុខ និងការផ្សះផ្សារជម្លោះដោយសន្តិវិធី ព្រមទាំងជំរុញឱ្យមានការបិទបញ្ចប់ជម្លោះឱ្យបានឆាប់រហ័ស និងសន្តិភាពយូរអង្វែង។
ដំណោះស្រាយនេះត្រូវបានបោះឆ្នោតអនុម័តដោយ ក្រុមប្រឹក្សាសន្តិសុខដែលមានសមាជិក១៥ប្រទេស ក្នុងសំឡេងគាំទ្រ១០សំឡេង ខណៈបារាំង ចក្រភពអង់គ្លេស ដាណឺម៉ាក ក្រិក និងស្លូវ៉េនី អនុបវាទ។ រុស្ស៉ីវិញបានបោះឆ្នោតគាំទ្រដំណោះស្រាយរបស់អាមេរិក ក្រោយ វេតូប្រឆាំងការប៉ុនប៉ងរបស់អឺរ៉ុបដែលចង់បន្ថែមពាក្យពេចន៍គាំទ្រអ៊ុយក្រែន។កាលពីថ្ងៃចន្ទ ទី២៤ ខែកុម្ភៈ សហរដ្ឋអាមេរិក បានបដិសេធចូលរួមថ្កោលទោសរុស្ស៉ី សម្រាប់ការឈ្លានពានអ៊ុយក្រែន ក្នុងការបោះឆ្នោត នៅមហាសន្និបាតនៃអង្គការសហប្រជាជាតិ (UN) នាឱកាសគម្រប់ខួប៣ឆ្នាំនៃសង្គ្រាម។ នេះបើតាមការផ្សាយ ដោយទីភ្នាក់ងារព័ត៌មាន AP។
នៅមហាសន្និបាត UN អាមេរិក បានចូលរួមជាមួយរុស្ស៉ី បេឡារុស កូរ៉េខាងជើង និងប្រទេសមួយចំនួនទៀត បោះឆ្នោតប្រឆាំងសេចក្តីសម្រេចមួយផ្តួចផ្តើមរួមគ្នា ដោយអឺរ៉ុបនិងអ៊ុយក្រែន ដែលថ្កោលទោសការឈ្លានពានរបស់រុស្ស៉ី ប្តេជ្ញាចំពោះបូរណភាពទឹកដីរបស់អ៊ុយក្រែន ហើយទាមទារឱ្យកងទ័ពរុស្ស៉ី ដកចេញពីអ៊ុយក្រែនជាបន្ទាន់។ ទោះជាបែបនេះក្តី សេក្តីសម្រេចនោះ ត្រូវបានអនុម័តជាមួយសំឡេង៩៣គាំទ្រ ១៨ជំទាស់ និង៦៥អនុប្បវាទ។ លទ្ធផលនេះ បង្ហាញឱ្យឃើញ ការគាំទ្រថយចុះសម្រាប់អ៊ុយក្រែន ដ្បិតការបោះឆ្នោតលើកមុនៗ មានប្រទេសច្រើនជាង១៤០ នាំគ្នាថ្កោលទោសទីក្រុងមូស្គូ និងទាមទារឱ្យរុស្ស៉ីដកកងទ័ពជាបន្ទាន់ ចេញពីអ៊ុយក្រែន។
មុនឈានដល់ការបោះឆ្នោតសហរដ្ឋអាមេរិក កំពុងព្យាយាមស្នើឱ្យប្រទេសនានា ជាសមាជិកមហាសន្និបាតអង្គការសហប្រជាជាតិ (UN) ផ្តល់ការគាំទ្រដល់សេចក្តីសម្រេចដែលខ្លួនស្នើឡើង សម្រាប់ឱកាសខួប៣ឆ្នាំ នៃសង្គ្រាមឈ្លានពានរបស់រុស្ស៉ីនៅអ៊ុយក្រែ ហើយជំទាស់រាល់ការចង់កែសម្រួលណាមួយ ព្រមទាំងបោះឆ្នោតប្រឆាំង សេចក្តីសម្រេចដាច់ដោយឡែកមួយទៀត ដែលព្រាងឡើងដោយអ៊ុយក្រែន និងក្រុមប្រទេសអឺរ៉ុប។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃចន្ទ ទី២៤ ខែកុម្ភៈ ឆ្នាំ២០២៥។
សេចក្តីសម្រេចរបស់អាមេរិក ដែលស្នើឡើងកាលពីថ្ងៃសុក្រសប្តាហ៍មុន ប្រជែងគ្នាជាមួយសេចក្តីសម្រេចដាច់ដោយឡែក ផ្សេងមួយទៀត របស់សហភាពអឺរ៉ុបនិងអ៊ុយក្រែន ដែលបន្ទរសាជាថ្មី នូវការទាមទារកន្លងមករបស់ UN ឱ្យរុស្សីដកកងទ័ព និងបញ្ឈប់អរិភាព ហើយប្តេជ្ញាចំពោះបូរណភាពទឹកដីរបស់អ៊ុយក្រែន។ មហាសន្និបាត UN ដែលមានសមាជិកចំនួន១៩៣ប្រទេស បានបោះឆ្នោតគាំទ្រលើសលប់ម្តងហើយម្តងទៀត ចំពោះអធិបតេយ្យនិងបូរណភាពទឹកដីរបស់អ៊ុយក្រែន ចាប់តាំងពីសង្គ្រាមផ្ទុះឡើង។ដោយឡែក សេចក្តីព្រាងនៃសេចក្តីសម្រេចរបស់អាមេរិកថ្មីនេះ មិនមានលើកឡើងអំពីរឿងទាំងនោះឡើយ។ ខ្លឹមសារនៅក្នុងនោះ លើកតែអំពីការបាត់បង់ជីវិត ដែលបង្កឡើងដោយសង្គ្រាមរុស្ស៉ី-អ៊ុយក្រែន, បញ្ជាក់ជាថ្មីថា គោលដៅស្នូលរបស់ UN គឺរក្សាសន្តិភាពនិងសន្តិសុខអន្តរជាតិ ហើយដោះស្រាយជម្លោះដោយសន្តិវិធី។
យ៉ាងណាមិញ បារាំងបានស្នើការកែសម្រួលមួយចំនួន ចំពោះសេចក្តីសម្រេចរបស់ទីក្រុងវ៉ាស៉ីនតោន រួមមានការបន្ថែមថា ជម្លោះនោះ គឺបង្កឡើងដោយការឈ្លានពានរបស់រុស្ស៉ីលើអ៊ុយក្រែន ហើយប្តេជ្ញាចំពោះអធិបតេយ្យ ឯករាជ្យ សាមគ្គីភាព និងបូរណភាពទឹកដីរបស់អ៊ុយក្រែន ព្រមទាំងអំពាវនាវរកសន្តិភាពមួយ ដែលគោរពធម្មនុញ្ញរបស់ UN។ សេចក្តីសម្រេច ដែលត្រូវបានកែសម្រួលនោះ ទទួលបានការគាំទ្រ៩៣សំឡេង អនុបវាទ៧៣សំឡេង និងប្រឆាំង៨សំឡេង ដោយមានអ៊ុយក្រែន បោះឆ្នោតគាំទ្រ រុស្ស៉ីបោះឆ្នោតប្រឆាំង ហើយអាមេរិកខ្លួនឯងផ្ទាល់ បោះឆ្នោតអនុបវាទ។
ទោះជាបែបនេះក្តី សេចក្តីសម្រេចជាមួយខ្លឹមសារដើមរបស់អាមេរិក ត្រូវបានអនុម័តដោយក្រុមប្រឹក្សាសន្តិសុខ UN ដែលជាស្ថាប័នសម្រេចចិត្តកំពូលរបស់ UN ហើយមានអាមេរិកនិងរុស្ស៉ី ស្ថិតក្នុងចំណោមសមាជិកអចិន្ត្រៃយ៍ ដែលមានអំណាចវេតូ។ ក្រុមប្រឹក្សាសន្តិសុខ UN ដែលមានសមាជិកសរុបចំនួន១៥ បានអនុម័តសេចក្តីសម្រេចរបស់អាមេរិក ក្នុងសំឡេង១០គាំទ្រ និងគ្មានសំឡេងប្រឆាំងឡើយ ប៉ុន្តែប្រទេសអឺរ៉ុបចំនួន៥ គឺចក្រភពអង់គ្លេស បារាំង ដាណឺម៉ាក ក្រិក និងស្លូវេនី បានធ្វើអនុបវាទ។
គួរបញ្ជាក់ថា ចាប់តាំងពីសង្គ្រាមផ្ទុះឡើង កាលពីថ្ងៃទី២៤ ខែកុម្ភៈ ឆ្នាំ២០២២ មហាសន្និបាត UN បានក្លាយជាស្ថាប័នសំខាន់ជាងគេរបស់ UN សម្រាប់វិបត្តិអ៊ុយក្រែន ដោយសារក្រុមប្រឹក្សាសន្តិសុខ បានជាប់គាំងធ្វើអ្វីមិនកើត ព្រោះតែអំណាចវេតូរបស់រុស្ស៉ី។ ទោះបីជាសេចក្តីសម្រេច ដែលអនុម័តដោយមហាសន្និបាត មិនមានលក្ខណៈតម្រូវឱ្យអនុវត្តតាមក៏ដោយ ប៉ុន្តែមានទម្ងន់ផ្នែកនយោបាយ ព្រោះវាស្តែងឱ្យឃើញ ទស្សនៈរបស់ប្រទេសនានា នៅលើពិភពលោក៕
