មនុស្សលោក ម៉ក់ ជីតូ ចាត់ទុកស្រ្តី ម្នាក់នៅក្រៅប្រទេសដែលភ្ជាប់បញ្ហាជាមួយថៅកែឡេលូវរីយ៉ាប្រៀបដូចចេះឆ្កែព្រុស
25-February-2025 / ព័ត៌មានជាតិ
ភ្នំពេញ៖ មន្ត្រីថ្នាក់ឩទ្ទមសេនីយ៍នគរបាលដែលជាក្រុមជំនួយការរបស់លោកនាយឧត្តមសេនីយ៍ ម៉ក់ ជីតូ រដ្ឋលេខាធិការក្រសួងមហាផ្ទៃ និងជាប្រធានគណៈកម្មការបង្ការ ទប់ស្កាត់ និងបង្ក្រាបគ្រឿងញៀន តាមបណ្តាខេត្តជាប់ព្រំដែន និងតាមច្រកទ្វារព្រំដែន នៅថ្ងៃទី២៥ ខែកុម្ភៈ ឆ្នាំ២០២៥ បានចេញសេចក្តីបំភ្លឺដោយច្រានចោទាំងស្រុងចំពោះការចោទប្រកាន់គ្មានមូលដ្ឋាន និងជាការប្រឌិតទាំងស្រុងពីសំណាក់ស្រ្តី ម្នាក់នៅក្រៅប្រទេស ដែលបានធ្វើឲ្យប៉ះពាល់ដល់កិត្តិយសយ៉ាងធ្ងន់ធ្ងរដល់លោក ម៉ក់ ជីតូថាជាសកម្មភាពឆ្កែព្រុសមនុស្សចេះតែដើរ!។
ស្រ្តីប្រឆាំងម្នាក់នោះមានឈ្មោះ សំ សុខា កំពុងរស់នៅប្រទេសកាណាដា ត្រូវបានក្រុមជំនួយការរបស់លោកនាយឧត្តមសេនីយ៍ ម៉ក់ ជីតូ ថាប្រឌិតរឿង ចោទប្រកាន់ និងការមួលបង្កាច់ខុសពីការពិតដែលថា លោក ម៉ក់ ជីតូ នៅពីក្រោយអ្នកលក់ឡេតាមអនឡាញ និងចោទប្រកាន់យ៉ាងធ្ងន់ធ្ងរបំផុតថា លោក ម៉ក់ ជីតូ ជាមេគ្រឿងញៀនទៀតផង ដោយភ្ជាប់រូបភាពមានខ្លឹមសារថា ជាក្រុមប្រដាប់អាវុធប្លន់រំដោះអ្នកទោសគ្រឿងញៀន និងជាអ្នករកស៊ីអនឡាញខុសច្បាប់ជាមួយចិន ជាពិសេសចោទប្រកាន់ថា មិនមានភក្ដីភាព និងបំផ្លាញកិត្តិយសគ្រួសារសម្ដេចតេជោទៀតផង។
ពាក់ព័ន្ធនឹងការផ្សព្វផ្សាយគ្មានការពិត និងជាការចោទប្រកាន់យ៉ាងធ្ងន់ធ្ងរបែបនេះ ក្រុមជំនួយការរបស់លោក ម៉ក់ ជីតូ បានបញ្ជាក់ដូចខាងក្រោម៖ទី១៖ នេះមិនមែនជាលើកទី១ទេ ដែលពួកឧក្រិដ្ឋជន ពួកប្រឆាំង ពួកអមិត្តដែលមានឧបាយកលទុច្ចរិតប្រឌិត មូលបង្កាច់វាយប្រហារមកលើរូបឯកឧត្ដម ដូចជាកន្លងមកក៏មានជនបរទេសឈ្មោះ ប្រេត អាដាំជាដើម។
ទី២៖ មិនមានអ្វីប្លែកទេចំពោះមាយាទថោកទាប អសីលធម៌ ជេរបញ្ចោរ អាសអាភាស ប្រឌិតមួលបង្កាច់របស់បុគ្គលឈ្មោះ សំ សុខានេះ។ បុគ្គលថោកទាបនេះជាញឹកញាប់ធ្លាប់ផ្សព្វផ្សាយព័ត៌មានមិនពិត មួលបង្កាច់វាយប្រហារថ្នាក់ដឹកនាំ បង្កការញុះញង់ រហូតត្រូវបានតុលាការផ្ដន្ទាទោសដាក់ពន្ធនាគារ២ដងរួចមកហើយដែរ។
ទី៣៖ យើងសូមបដិសេធទាំងស្រុងចំពោះព័ត៌មានរបស់បុគ្គលថោកទាបរូបនេះ។ នេះជាការប្រឌិតផ្សព្វផ្សាយព័ត៌មានមិនពិតស៊ីឈ្នួលបម្រើឧបាយកល និងកេងយកប្រយោជន៍របស់ពួកអមិត្ត ឧក្រិដ្ឋជនតែប៉ុណ្ណោះ។ទី៤៖ ប្រាកដណាស់ថាបុគ្គលនេះ ពិតជាបានទទួលព័ត៌មានពីពួកអមិត្ត ជនអគតិ ឧក្រិដ្ឋជន ដែលមានឧបាយកលបំបែកបំបាក់មួលបង្កាច់បង្ខូចកិត្តិយស៕
សូបញ្ជាក់ថាស្រ្តីឈ្មោះសំសុខាត្រូវបានចាតុទុកថា ជាសកម្មជនអតីតបក្សសង្គ្រោះជាតិ ដែលយកស្បែកជើងគប់រូបសម្ដេចតេជោ ហ៊ុន សែន និងសម្តេច ហេង សំរិន ដែលត្រូវបានកម្លាំងនគរបាលក្រសួងមហាផ្ទៃ ចាប់ខ្លួន ត្រូវបានបញ្ជូនទៅឃុំខ្លួននៅពន្ធនាគារ ខេត្តកំពង់ស្ពឺ កាលពីថ្ងៃទី៩ ខែកុម្ភៈ ឆ្នាំ២០១៨នេះ។កាលនោះ នៅពេលនាំខ្លួនទៅកាន់ពន្ធនាគារនោះ គេសង្កេតឃើញមានសាច់ញាតិ និងមន្ត្រីរបស់ UN ប្រចាំនៅកម្ពុជា ទៅសួរសុខទុក្ខផងដែរ។ ស្ត្រីរូបនេះត្រូវបានចាប់ខ្លួន នៅតាមព្រំដែនកម្ពុជា-ថៃ នាថ្ងៃទី៨ ខែកុម្ភៈ ឆ្នាំ២០១៨ បន្ទាប់ពីបានរត់គេចខ្លួន ទៅសម្ងំនៅក្នុងប្រទេសថៃអស់រយៈពេលជាយូរខែមកនោះ។ការចាប់ខ្លួនស្ដ្រីរូបនេះត្រូវបានធ្វើឡើង ក្រោយលោក ស៊ឹង វុទ្ធី ចៅក្រមស៊ើបសួរសាលាដំបូងខេត្តកំពង់ស្ពឺ បានចេញដីកាបង្គ្រាបឲ្យចាប់ខ្លួន នៅថ្ងៃទី២៧ ខែមិថុនា ឆ្នាំ២០១៧កន្លងទៅ។
ដីកាដដែលបញ្ជាក់ថា ស្ដ្រីឈ្មោះ សំ សុខា អាយុ៣៨ឆ្នាំ ត្រូវបានដាក់ស្ថិតក្រោមការពិនិត្យពីបទ «ប្រមាថ និងញុះញង់ឲ្យមានការរើសអើង» ប្រព្រឹត្តទៅនៅភូមិអុង ឃុំរាម ស្រុកព្រៃនប់ ខេត្តព្រះសីហនុ កាលពីថ្ងៃទី០១ ខែមេសា ឆ្នាំ២០១៧ នៅចំណុចផ្លូវលេខ៤៥ ចន្លោះគីឡូម៉ែត្រលេខ ៤-៥ ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ។ កាលពីពេលកន្លងទៅ ស្ត្រី សំ សុខា បានចេញវីដេអូឃ្លីបដោយជេរប្រមាថធ្ងន់ៗ ទៅលើថ្នាក់ដឹកនាំជាន់ខ្ពស់របស់គណបក្សប្រជាជន ថែមទៀតរួមមាន សម្តេចតេជោ ហ៊ុន សែន សម្តេចពញាចក្រ ហេង សំរិន និងសម្តេចក្រឡាហោម ស ខេង ជាដើម។ គេមិនដឹងថាតើហេតុអីបានជាស្ត្រីរូបនេះអាចចេញទៅរស់នៅប្រទេសកាណាដាបាននោះឡើយ។
