ផ្ទុះមីនតោន១គ្រាប់ទៀត នៅស្រុកសំពៅលូន ខេត្តបាត់ដំបង ស្លាប់ម្នាក់ និងម្នាក់ទៀតរងរបួសស្រាល
18-January-2025 / សន្តិសុខសង្គម
បាត់ដំបង៖ នាថ្ងៃទី១៧ ខែមករា ឆ្នាំ២០២៥ មានករណីផ្ទុះមីនតោន១គ្រាប់ថ្មីមួយករណីយ៍ទៀត នៅស្រុកសំពៅលូន ខេត្តបាត់ដំបង បណ្តាលឱ្យជនរងគ្រោះម្នាក់បានស្លាប់បាត់បង់ជីវិត បន្ទាប់ពីបានបញ្ជូនភ្លាមៗទៅកាន់មន្ទីរពេទ្យ និងជនរងគ្រោះម្នាក់ទៀតរងរបួសស្រាលព្យាបាលរបួសនៅឯផ្ទះរបស់ខ្លួន ។
បើតាម មន្ត្រីសាខាកាកបាទក្រហមកម្ពុជា ខេត្តបាត់ដំបង នៅព្រឹកថ្ងៃទី១៨ ខែមករា ឆ្នាំ២០២៥បានឲ្យដឹងថា៖ នាថ្ងៃទី១៧ ខែមករា ឆ្នាំ២០២៥ នៅវេលាម៉ោង ១៥និង០០នាទី មានករណីផ្ទុះគ្រាប់មីនតោន ចំនួន១គ្រាប់ ដែលសេសសល់ពីសម័យសង្គ្រាម ស្ថិតនៅចំណុចភូមិកូនភ្នំខាងត្បូង ឃុំតាស្តា ស្រុកសំពៅលូន ខេត្តបាត់ដំបង ខណៈពេលប្រជាពលរដ្ឋចំនួន២នាក់ បានបើកបររថយន្តប្រភេទកែច្នៃ សម្រាប់ដឹកកសិផលដំឡូងមួយគ្រឿង បានជាន់ ។
មនុស្សរងគ្រោះមានចំនួន២នាក់ ទី១.ឈ្មោះ ថៃ សឿន ភេទប្រុស នៅភូមិកូនភ្នំខាងត្បូង ឃុំតាស្តា ស្រុកសំពៅលូន ខេត្តបាត់ដំបង (របួសធ្ងន់) ហើយបានស្លាប់នៅតាមផ្លូវ ក្នុងពេលបញ្ចូលទៅកាន់មន្ទីរពេទ្យ ។ ទី២.ឈ្មោះ ផាន់ ភាព ភេទប្រុស នៅភូមិទួលជ្រៃ ឃុំសំពៅលូន ស្រុកសំពៅលូន ខេត្តបាត់ដំបង រងរបួសស្រាល ចំណែករថយន្តកែច្នៃ ត្រូវដាច់កង់ខាងឆ្វេង និងខូចខាតក្បាលមួយចំនួនធំ ។
ករណីយ៍នេះកាកបាទក្រហមកម្ពុជា ដឹកនាំដោយលោក យូ ឡាណា អគ្គលេខាធិការរងទី២ កាកបាទក្រហមកម្ពុជា តាមរយៈការចាត់តាំងពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានិងប្រតិភូអមដំណើរបានចុះសួរសុខទុក្ខក្រុមគ្រួសារជនរងគ្រោះ និងជនរងគ្រោះ ដោយបានចូលរួមក្នុងពិធីបុណ្យសព នូវថវិកាចំនួន៥លានរៀល និងអ្នករងបួសចំនួន២លានរៀលផងដែរ ។
សូមបញ្ជាក់ថាកាលពី ថ្ងៃទី១៦ ខែមករាឆ្នាំ២០២៥មន្ត្រីអង្គការស៊ីម៉ាក់ចំនួន២រូប ខណៈពេលចុះបំពេញបេសកកម្មបោសសំអាតគ្រាប់មីនស្ថិតនៅក្នុងចំណុចចំការដំឡូង ភូមិត្រពាំងប្រីយ៍ ឃុំបាក់អន្លូង ស្រុកត្រពាំងប្រាសាទ ខេត្តឧត្តរមានជ័យក៏ត្រូវបាន ពលីជិវិតដោយសារការផ្ទុះមីនផងដែរ ។ជនរងគ្រោះទាំង២រូបខាងលើ ទី១-ឈ្មោះអឿន ចាន់ដារា និងទី២-ឈ្មោះពៅនេពីន ។ ជនរងគ្រោះទាំង២រូបបម្រើការងារក្នុងហេឡូត្រាសបោសសម្អាតគ្រាប់មីន ។មន្ត្រីដែលបម្រើការងារក្នុងស្រុកត្រពាំងប្រាសាទបានឲ្យដឹងថា គ្រាប់មីនតោនដែលដែលសេសសល់កាលពីសង្រាមមិនទាន់ផ្ទុះ ប្រជាពលរដ្ឋម្ចាស់ស្រែ បានប្រទះឃើញស្ថិតនៅក្នុងដីស្រែរបស់ពួកគាត់ ខណៈនោះប្រជាពលរដ្ឋបានរាយការណ៍ជូនដំណឹងដល់ក្រុមអាជ្ញាធរផងដែរ បន្ទាប់មកក្រុមអាជ្ញាធរបានបន្តស្នើសុំដល់ក្រុមហេឡូត្រាសបោសសម្អាតគ្រាប់មីន។
សូមបញ្ជាក់ថាសម្ដេចអគ្គមហាសេនាបតីតេជោ ហ៊ុន សែន ដែលបានបង្កើតមូលនីធីដោះគ្រាប់មីនកាលនៅជានាយករដ្ឋមន្ត្រីកម្ពុជា ធ្លាប់បានមានប្រសាសន៍ឲ្យដឹងថា បងប្អូនជនរួមជាតិជាទីគោរពស្រឡាញ់! ថវិកាចំនួន១៨៤៧៣៥៧០ដុល្លារដែលចេញពីព្រះរាជអំណោយរបស់ព្រះមហាក្សត្រ និងសម្តេចម៉ែ និងសប្បុរសជន សម្រាប់ការដោះមីន ត្រូវចំណាយអស់នៅត្រឹមព្រឹកថ្ងៃ១ធ្នូ២០២២។
សម្ដេចតេជោនាយករដ្ឋមន្ត្រី បានថ្លែងបន្តថា ដើម្បីធានាថាឆ្នាំ២០២៥ កម្ពុជានឹងអស់គ្រាប់មីន ខ្ញុំបានពិភាក្សាជាមួយឯកឧត្តមអូន ពន្ធមុនីរត្ឋ័ បញ្ចេញថវិកាសន្សំរបស់រាជរដ្ឋាភិបាលចំនួន៣០លានដុល្លារភ្លាម ដាក់ទៅជាមូលនិធិបំផ្លាញចោលគ្រាប់មីន និងគ្រាប់មិនទាន់ផ្ទុះគ្រប់គ្រងដោយក្រសួងសេដ្ឋកិច្ចនិងហិរញ្ញវត្ថុ។
ថវិកានេះរួមជាមួយថវិកាពីដៃគូរអភិវឌ្ឍអាចបន្តប្រើប្រាស់បានក្នុងឆ្នាំ២០២៣។ ក្នុងករណីខ្វះនិងសម្រាប់ឆ្នាំ២០២៤ និង២០២៥ អាជ្ញាធរមីន ត្រូវធ្វើការជាមួយក្រសួងសេដ្ឋកិច្ចនិងហិរញ្ញវត្ថុ ដើម្បីរៀបចំថវិកាប្រចាំឆ្នាំ។ដើម្បីឲ្យឆ្នាំ២០២៥ កម្ពុជាគ្មានមីន ការផ្តល់ដីដោយសុវត្ថិភាព និងដោយស្នាមញញឹម ខ្ញុំសូមអំពាវនាវសប្បុរសជនមេត្តាបន្តចូលរួមឧបត្ថម្ភទៅតាមលទ្ធភាព។ សូមឲ្យឆ្នាំ២០២៥ ក្លាយជាឆ្នាំគ្មានមនុស្សស្លា.ប់ របួសនិងជាឆ្នាំប្រកបដោយស្នាមញញឹមបន្ទាប់ពីរងគ្រោះដោយគ្រាប់មីនរយៈពេល៥៥ឆ្នាំ(១៩៧០.២០២៥)៕
