អ្នកទេសចរជនជាតិវៀតណាម ៣៨ នាក់រត់គេចខ្លួនបង្កការបារម្ភពីវៀតណាមថាកូរ៉េនឹងរឹតបន្តឹងទិដ្ឋាកា
09-December-2024 / ព័ត៌មានអន្តរជាតិ
កូរ៉េខាងត្បូង៖ មន្ត្រីទេសចរណ៍កោះចេជូ (Jeju) កូរ៉េបានបញ្ជាក់កាលពីថ្ងៃអង្គារថា ភ្ញៀវទេសចរវៀតណាមចំនួន ៣៨ នាក់ក្នុងចំណោម ៩០ នាក់ដែលបានមកដល់ទីនេះ តាមជើងហោះហើរសម្រាប់ក្រុមអ្នកទេសចរពីទីក្រុងញ៉ាចាង (Nha Trang) កាលពីថ្ងៃទី ១៤ ខែវិច្ឆិកា ស្រាប់តែរត់គេចខ្លួន ក្នុងអំឡុងកាលវិភាគដំណើរកម្សាន្តនាពេលចុងក្រោយ មុនចាកចេញនៅថ្ងៃទី១៧ ខែវិច្ឆិកា នេះបើយោងតាមកាសែត Korea Times ។
អ្នកទេសចរទាំងអស់នោះ បានធ្វើដំណើរមកកាន់កោះចេជូ ក្រោមកម្មវិធីមិនតម្រូវទិដ្ឋាការរបស់កូរ៉េខាងត្បូង ដោយអនុញ្ញាតឱ្យពលរដ្ឋមកពី ៦៤ ប្រទេស រួមទាំងវៀតណាម អាចស្នាក់នៅលើកោះនេះ បានរហូតដល់ ៣០ថ្ងៃដោយពុំចាំបាច់មានទិដ្ឋាការ ។
បន្ទាប់ពីអ្នកទេសចរវៀតណាមចំនួន ៣៨ នាក់ បានបាត់ខ្លួននៅពេលធ្វើដំណើរនៅកោះចេជូ (Jeju) បានធ្វើឱ្យពលរដ្ឋ និងឧស្សាហកម្មក្នុងស្រុកវៀតណាម ព្រួយបារម្ភថា ប្រទេសកូរ៉េខាងត្បូង អាចនឹងរឹតបន្តឹងនីតិវិធីទិដ្ឋាការ ដែលនឹងប៉ះពាល់ដល់គម្រោងធ្វើដំណើររបស់ប្រជាជនវៀតណាមដទៃទៀត ។មិញងិ (Minh Nghi) ជាអ្នករស់នៅក្នុងទីក្រុងព្រៃនគរ (ហូជីមិញ) គ្រោងនឹងស្នើសុំទិដ្ឋាការកូរ៉េខាងត្បូង សម្រាប់ក្រុមគ្រួសាររបស់នាង ដែលមានសមាជិកបួននាក់ ដើម្បីធ្វើដំណើរកម្សាន្តក្នុងឱកាសបុណ្យចូលឆ្នាំថ្មីរបស់ចិន/វៀតណាមនាឆ្នាំ ២០២៥ ។សមាជិកទាំងអស់នៃគ្រួសាររបស់នាង មានលិខិតឆ្លងដែនដែលគ្មានត្រាអ្វីទាំងអស់ ដោយសារតែគ្មាននរណាម្នាក់ធ្លាប់ធ្វើដំណើរចេញទៅក្រៅប្រទេស ។
ប៉ុន្តែឥឡូវនេះ បន្ទាប់ពីកើតមានឧប្បត្តិហេតុអ្នកទេសចរបាត់ខ្លួនរួចមក អ្នកស្រុកហូជីមិញរូបនេះ បានបង្ហាញនូវក្ដីព្រួយបារម្ភថា ពួកគេប្រហែលជាមិនអាចទទួលបានទិដ្ឋាការកូរ៉េខាងត្បូងបានស្រួលៗឡើយ ខណៈពួកគេក៏មិនទាន់បានទិញសំបុត្រយន្តហោះនៅឡើយដែរ ។ក្រៅពីពលរដ្ឋរបស់ខ្លួន ភ្នាក់ងារទេសចរណ៍វៀតណាមមួយចំនួន ក៏មានក្ដីព្រួយបារម្ភដែរថា កូរ៉េខាងត្បូង អាចនឹងរឹតបន្តឹងនីតិវិធីអនុម័តទិដ្ឋាការ បន្ទាប់ពីកើតមានឧប្បត្តិហេតុនេះ ។
លោក ង្វៀង កុងហ័ន (Nguyen Cong Hoan) អគ្គនាយកក្រុមហ៊ុន Flamingo Redtours ដែលមានមូលដ្ឋាននៅរដ្ឋធានីហាណូយ បាននិយាយថា មនុស្សមួយចំនួន បានធ្វើដំណើរទៅកាន់កូរ៉េខាងត្បូង តាមរយៈកញ្ចប់ដំណើរកម្សាន្ត ប៉ុន្តែបន្ទាប់មក ក៏បានគេចខ្លួនដោយលួចស្នាក់នៅប្រទេសកូរ៉េខាងត្បូងវិញ ដើម្បីធ្វើការដោយខុសច្បាប់ ដែលសកម្មភាពនេះ បានដាក់សម្ពាធដល់ទីភ្នាក់ងារទេសចរណ៍នានា ឱ្យពិនិត្យមើលព័ត៌មានផ្ទាល់ខ្លួនរបស់អ្នកដំណើរឱ្យបានហ្មត់ចត់បំផុត ខណៈការពិនិត្យហ្មត់ចត់ខ្លាំងពេក ក៏បានធ្វើឱ្យអ្នកដំណើរមានអារម្មណ៍មិនសូវជាមានផាសុខភាពទៅវិញ ។
លោក ផាម អាញ់វូ (Pham Anh Vu) អគ្គនាយករងក្រុមហ៊ុន Viet Media Tourism បាននិយាយថា កេរ្តិ៍ឈ្មោះរបស់ក្រុមហ៊ុនទេសចរណ៍នៅវៀតណាម កំពុងតែធ្លាក់ចូលទៅក្នុងស្ថានភាពហានិភ័យ ជាមួយនឹងដៃគូនៅឯកូរ៉េខាងត្បូង ដែលចោទសួរពីសមត្ថភាពគ្រប់គ្រងអតិថិជនប្រកបដោយប្រសិទ្ធភាព ។លោក វូ (Vu) បានលើកឡើងជាបន្តទៀតថា ទោះបីជាមិនមានការប្រកាសជាផ្លូវការណាមួយត្រូវបានធ្វើឡើងក៏ដោយ ប៉ុន្តែវាអាចទៅរួច ដែលកូរ៉េខាងត្បូង នឹងអាចកំណត់ឡើងវិញនូវតម្រូវការលើនិតិវិធីទិដ្ឋាការសម្រាប់អ្នកទេសចរវៀតណាម ទៅកាន់កោះចេជូ (Jeju) ។
ទីភ្នាក់ងារទេសចរណ៍ដ៏ធំមួយទៀតនៅក្រុងព្រៃនគរ ឬ HCMC បាននិយាយថា «កូរ៉េខាងត្បូង គឺជាគោលដៅទេសចរណ៍ដ៏កំពូលមួយសម្រាប់ជនជាតិវៀតណាម ប៉ុន្តែនីតិវិធីទិដ្ឋាការកាន់តែពិបាកទៅៗ ប្រហាក់ប្រហែលនិងស្មុគស្មាញដូចការស្នើសុំទិដ្ឋាការជប៉ុនដូចគ្នាដែរ» ។ក្រោយកើតមានករណីបាត់ខ្លួន(រត់គេច)នេះ ភ្នាក់ងារទេសចរណ៍វៀតណាម កំពុងចាត់វិធានការយ៉ាងតឹងរ៉ឹង ដើម្បីទប់ស្កាត់ការកើតឡើងក្នុងរូបភាពដដែលៗ ។
លោកស្រី លូ ធីធូ (Luu Thi Thu) នាយិការងក្រុមហ៊ុន Hoang Viet Travel បានរៀបរាប់ថា ក្រុមហ៊ុនរបស់លោកស្រី កំពុងពង្រឹងសមត្ថភាពផ្នែកត្រួតពិនិត្យលើពាក្យសុំទិដ្ឋាការរបស់ខ្លួន ដើម្បីការពារសិទ្ធិរបស់ភ្ញៀវទេសចរស្របច្បាប់ ។នៅឆ្នាំ ២០២៤ កូរ៉េខាងត្បូង រំពឹងថានឹងទទួលបានភ្ញៀវវៀតណាមចំនួន ៥៥ម៉ឺននាក់ ស្មើនឹងចំនួនមុនជំងឺរាតត្បាតកូវីដ១៩ ៕ប្រភព៖ VN Express
