សម្តេចធិបតី ហ៊ុន ម៉ាណែតពន្យល់ពីមូលហេតុមិនរវល់រឿង កោះគុត មានជំហរពីរ គឺភាពចាស់ទុំខាងនយោបាយ និងការទទួលខុសត្រូវចំពោះជាតិ ?!
22-November-2024 / ព័ត៌មានជាតិ
ភ្នំពេញ៖ ថ្លែង ក្នុងឱកាសអញ្ជើញចែកសញ្ញាបត្រ ជូននិស្សិតសាកលវិទ្យាល័យភូមិន្ទភ្នំពេញ នៅថ្ងៃទី២១ ខែវិច្ឆិកា ឆ្នាំ២០២៤សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថាបញ្ហាកោះគុត ហេតុអ្វីរាជរដ្ឋាភិបាលនៅស្ងៀម? ចម្លើយផ្អែកលើមូលដ្ឋាន២ គឺទី១) ភាពចាស់ទុំខាងនយោបាយ និងទី២) ការទទួលខុសត្រូវចំពោះជាតិ និងប្រជាជន ចំពោះបូរណភាពទឹកដី និងអធិបតេយ្យជាតិ។
សម្តេចមហាបវរធិបតី ហ៊ុន ម៉ាណែត បានពន្យល់ថា៖* ភាពចាស់ទុំខាងនយោបាយ មាន៣ រួមមាន៖ ទី១ ការប្រកាន់គោលការណ៍មិនយកភ្លើងចូលផ្ទះ, ទី២ ការដោះស្រាយបញ្ហាប្រកបដោយភាពចាស់ទុំ និងទី៣ ប្រកាន់ភាពជាក់ស្តែងនិយម ដែលមុននឹងធ្វើអ្វីមានការស្រាវជ្រាវ។* ការទទួលខុសត្រូវចំពោះជាតិ និងប្រជាជន ចំពោះបូរណភាពទឹកដី និងអធិបតេយ្យជាតិ រួមមាន៖ ទី១ រឿងព្រំដែន ជារឿងរយៈពេលវែង ដែលរាជរដ្ឋាភិបាល ប្តេជ្ញាការពារបូរណភាពទឹកដី និងអធិបតេយ្យជាតិ និងទី២ ការដោះស្រាយបញ្ហាព្រំដែនដោយមិនប្រើហិង្សា។
សម្តេចមហាបវរធិបតី ហ៊ុន ម៉ាណែត ក៏បានថ្លែងឲ្យដឹងថា ព្រំដែនសមុទ្ររវាងកម្ពុជា និងថៃ មិនទាន់មានការឯកភាពគ្នានោះទេ។ជាមួយនឹងលើកឡើងអំពីបញ្ហាគុត ដែលជាចំណុចត្រួតស៊ីគ្នារវាងកម្ពុជា-ថៃ ហើយកំពុងត្រូវបានបំផុសបំផុលបង្កើតជម្លើយដោយក្រុមជ្រុលនិយម សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសជំហរជាថ្មីថា រាជរដ្ឋាភិបាលកម្ពុជា នឹងមិនធ្វើឱ្យបាត់បង់ទឹកដីនោះឡើយ។
សម្តេចបវរធិបតី បានលើកឡើងដូច្នេះថា៖ «ការចរចាព្រំដែនេះ គឺយើងត្រូវការពេលវេលា និងត្រៀមលក្ខណៈគ្រប់ពេល នេះគឺជាការទទួលខុសត្រូវរបស់យើង ហើយយើងមិនធ្វើឱ្យបាត់នូវដែនដីរបស់យើង ឬអធិបតេយ្យភាពរបស់យើងទេ កិច្ចការព្រំដែន និងសូមការធានាមួយនេះ សូមបងប្អូនជឿទុកចិត្តចុះ»។
សម្តេចបានថ្លែងថា អ្នកដែលស្រែកថា រាជរដ្ឋាភិបាលមិនមាត់មិនអើពើ គឺយើងចង់ប្រាប់ត្រឡប់ទៅវិញថា គឺរាជរដ្ឋាភិបាលប្រកាន់យកជំហរចាស់ទុំ មិនចេះតែលោតលិចកើតតាមគេនោះទេ បើអ្នកនយោបាយចាស់វស្សាដែលបន្តិចលោតចុះលោតឡើង សូមកុំឱ្យក្មេងលោតតាម ទុកចរិតនេះសម្រាប់ប្រើខ្លួនឯងទៅបានហើយ។សម្តេចបានលើកឡើងដែរថា ពាក់ព័ន្ធនឹងបញ្ហាកោះគុត គឺរដ្ឋាភិបាលប្រទេសទាំងពីរ កំពុងចរចា ហើយមិនទាន់មានឯកភាពគ្នានៅឡើយ។ ដូច្នេះការនិយាយថា កោះគុតបាត់បង់ទៅខាងភាគីថៃនោះ គឺជារឿងមិនត្រឹមត្រូវ តើបាត់ទៅណាបើភាគីទាំងពីរមិនទាន់ឯកភាពគ្នាផងនោះ?។
សម្តេចបានបញ្ជាក់ទៀតថា ចំពោះបញ្ហាក្រុមប្រឆាំងមួយចំនួនដែលចង់ឱ្យគណៈកម្មការព្រំដែនចេញមុខបកស្រាយតាមបច្ចេកទេសនោះ ក៏ពុំទាន់ចាំបាច់នោះដែរ ដោយសារតែគណៈកម្មការជំនាញនេះកំពុងរៀបចំ និងមានឯកសារ សម្រាប់ការចរចា បើសិនជាបង្ហាញឯកសារបច្ចេកទេសទាំងនោះ ជាទង្វើល្ងង់ខ្លៅ ដែលប្រៀបបីដូចជាបើកសន្លឹកបៀរឱ្យដៃគូប្រកួតបានឃើញមុន។
សូមបញ្ជាក់ថាបើតាមមតិក្រុមមិនគាំទ្រជំហររាជរដ្ឋាភិបាលបានលើកឡើងថាសព្វថ្ងៃនេះស្ថានភាពសមុទ្ទខ្មែរយើងគ្មានអ្នកណាដឹងថាស្ថិតក្នុងស្ថានភាបបែបណានោះទេក្នុងពេលដែលកោះត្រល់ត្រូវបានវៀតណាមកានកាន់កាប់ហើយខ្សែប្រេវិយ៉េដែលកម្ពុជាតាំងពីរដ្ឋាភិបាលជំនាន់មុនចាត់ទុកថាជាព្រុំដែនមិនត្រុវបានវៀតណាមទទួលស្គាល់ទេ។ផ្ទុយទៅវិញវៀតណាមទាមទាព្រុំដែនសមុទ្ធជាមួយកម្ពុជាគិតតាមច្បាប់សមុទ្ធគឺគិតសមចម្ងាយពីដែនគោគ!។
ដោះស្រាយបញ្ហានេះកម្ពុជាវៀតណាមកន្លងមកកម្ពុជាឆ្នាំ១៩៨២ក៏បានយល់ព្រមបង្កើតដែនទឹកសមុទ្ទប្រវត្តិសាស្ត្រដែលបើកឲ្យវៀតណាមប្រើប្រាស់រួមគ្នាបាត់ទៅហើយ។ឯកោះគុជឬកោះគុតសព្វថ្ងៃបាននិងកំពុងត្រូវបានប្រជាជននិងអាជ្ញាធរថៃកាន់កាប់គ្រប់គ្រងជាក់ស្តែងបាត់ទៅហើយ។ទាក់ទងរឿងនេះសម្តេចមហាបវរធិបតី ហ៊ុន ម៉ាណែត បានចោទជាសំណួរថា តើកោះគុតបាត់ទៅណា ខណៈខាងប្រឆាំងថៃ ចោទរាជរដ្ឋាភិបាលថៃធ្វើឱ្យបាត់មកខ្មែរ រីឯខាងប្រឆាំងខ្មែរចោទថា រាជរដ្ឋាភិបាលកម្ពុជា ធ្វើឱ្យបាត់ទៅថៃ គឺមិនឡូហ្ស៊ិក (Logic)នោះឡើយ។
សូមបញ្ជាក់ថាបើតាមការចុះផ្សាយរបស់កាសែតថៃ បាងកកប៉ុស្តិ៍...បានឲ្យដឹងថាអភិបាលកោះគុត លោក ផៃរ៉ាត់ សយសាំង (Phairat Soysang) បានព្រមានកុំឱ្យមានបាតុកម្មនៅលើកោះផ្ទាល់ ដោយកត់សម្គាល់ថា ការតវ៉ាអាចប៉ះពាល់ដល់វិស័យទេសចរណ៍ ដែលជាប្រភពចំណូលចម្បងសម្រាប់សហគមន៍មូលដ្ឋាន។ លោកបន្ថែមថា ភ្ញៀវទេសចរថៃ និងបរទេសជាង៣០ម៉ឺននាក់ មកលេងកោះគុតក្នុងមួយឆ្នាំៗ បង្កើតចំណូលបានច្រើនពាន់លានបាត។
មេទ័ពជើងទឹកថៃ (RTN) លោក ជីរ៉ាប៉ូល វង្សវិត (Jirapol Wongwit) បានទៅទស្សនាកោះគុត ហើយបានធានាដល់ប្រជាជនថៃថា កាតព្វកិច្ចរបស់កងទ័ពជើងទឹក គឺការពារផលប្រយោជន៍ជាតិ និងអធិបតេយ្យភាពឱ្យបានពេញលេញ។ ដោយលើកឡើងក្ដីកង្វល់ជុំវិញជម្លោះដែនសមុទ្ទជាមួយប្រទេសជិតខាងកម្ពុជា ប្រមុខកងទ័ពជើងទឹក បានរំលឹកឡើងវិញថា តំបន់ទាមទារត្រួតស៊ីគ្នា (OCA) រវាងប្រជាជាតិទាំងពីរមិនបាននាំឱ្យមានជម្លោះនោះទេ ដោយបន្ថែមថា តំបន់នេះនៅតែមានសន្តិភាព ដោយអ្នកនេសាទថៃ និងកម្ពុជា ធ្វើការនៅក្នុងដែនទឹករៀងៗខ្លួន។ លោក ណុបផាដុន ប៉ាតាម៉ា (Noppadon Pattama) សមាជិកសភាមកពីគណបក្សភឿថៃ ថ្លែងថា ជំហររបស់រាជរដ្ឋាភិបាលជុំវិញជម្លោះកោះគុតរវាងប្រទេសថៃ និងកម្ពុជា កំពុងត្រូវបានលាបពណ៌។
«កោះគុតនៅតែជាកម្មសិទ្ធិរបស់ប្រទេសថៃ នោះជាការពិត គ្មាននរណាបានប្រគល់កោះនោះឱ្យកម្ពុជាទេ ខ្ញុំមិនដែលឮកម្ពុជាអះអាងទាមទារទឹកដីលើកោះគុតទេ» នេះបើតាមការលើកឡើងរបស់លោក ណុបផាដុន អតីតរដ្ឋមន្ត្រីក្រសួងការបរទេស។ លោកបន្តថា៖«ឈប់ចែកចាយព័ត៌មានមិនពិតថា ថៃបាត់កោះទៀតទៅ។ រាជរដ្ឋាភិបាលមានកាតព្វកិច្ចការពារទឹកដីថៃ ហើយគ្មាននរណាម្នាក់ត្រូវបានអនុញ្ញាតឱ្យប្រគល់ដីណាមួយឡើយ»។ លោកសង្កត់ធ្ងន់ថា ជនណាដែលចោទប្រកាន់បក្សភឿថៃ ថាបានប្រគល់កោះគុត ឬទឹកដីណាមួយទៅឱ្យបរទេស នឹងត្រូវប្រឈមមុខនឹងច្បាប់។ លោកថា...ព័ត៌មានមិនពិតអំពីថៃបាត់បង់កោះគុតឱ្យកម្ពុជា គឺនឹកឃើញដល់ពេលដែលលោកត្រូវបានគេចោទប្រកាន់ថា ប្រគល់ប្រាសាទព្រះវិហារឱ្យកម្ពុជា ពេលលោកធ្វើជារដ្ឋមន្ត្រីការបរទេស។
កោះគុត បានក្លាយជាប្រធានបទក្ដៅនៅពេលដែលឥស្សរជនសំខាន់ៗនៃគណបក្សផាឡាង ប្រាឆារ៉ាត់ (PPRP) ធ្វើសន្និសីទសារព័ត៌មានកាលពីថ្ងៃសប្តាហ៍មុន ដើម្បីប្រឆាំងនឹងការពិភាក្សា ស្តីពីការអភិវឌ្ឍរួមគ្នានៃធនធានប្រេង និងឧស្ម័ននៅឈូងសមុទ្ទ ក្រោមក្របខណ្ឌអនុស្សរណៈនៃការយោគយល់ (MoU) ឆ្នាំ២០០១ ដែលពួកគេអះអាងថា អាចបណ្តាលឱ្យប្រទេសថៃបាត់បង់ទឹកដី។ គណបក្សផាឡាង ប្រាឆារ៉ាត់ នឹងដាក់លិខិតចំហមួយទៅកាន់លោកស្រីនាយករដ្ឋមន្ត្រី ផែថងថាន ស៊ីណាវ៉ាត្រា ដោយជំរុញឱ្យលោកស្រីបញ្ឈប់កិច្ចចរចាទាំងនេះ។
អនុស្សរណៈ(MoU)ថៃ កម្ពុជាដើមឡើយត្រូវបានចុះហត្ថលេខាក្រោមរាជរដ្ឋាភិបាល ដឹកនាំដោយអតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា។ លោក ធីរ៉ាឆៃ ភូវ៉ាណាតណារ៉ានូបាឡា អតីតរដ្ឋមន្ត្រីក្រសួងហិរញ្ញវត្ថុ និងជាប្រធានគណៈកម្មាធិការសិក្សារបស់បក្ស ផាឡាំង ប្រាឆារ៉ាត់ បានអះអាងថា MoU រួមមាន៖ ការទាមទារទឹកដីដោយប្រទេសកម្ពុជា ដែលផ្ទុយនឹងសន្ធិសញ្ញាបារាំង-សៀម ឆ្នាំ១៩០៧ ធ្វើឱ្យ MoU ខុសច្បាប់។
