ប្រទេសសម្ពន្ធ័អារ៉ាបស្វែងរកមតិឯកភាពគ្នាវបណ្តេញអ៊ីស្រាអែលចេញពីអសប
13-November-2024 / ព័ត៌មានអន្តរជាតិ
ប្រទេសអារ៉ាប៖ពេលបើកកិច្ចប្រជុំកំពូលដែលផ្តោតលើសំណុំរឿងសង្គ្រាមនៅតំបន់ហ្កាហ្សា និងនៅលីបង់ រាជទាយាទអារ៉ាប៊ីសាអូឌីតព្រះអង្គម្ចាស់ បេន សាលម៉ានបានមានបន្ទូលដោយប្រើពាក្យ “អំពើប្រល័យពូជសាសន៍” ដែលសំដៅទៅប្រតិបតិ្តយោធារបស់អ៊ីស្រាអែលនៅតំបន់ហ្កាហ្សា។ ចំណែកមេដឹកនាំក្រុមប្រទេសអារ៉ាប់ និងប្រទេសអ៊ីស្លាមបានប្រកាសរួមគ្នាថ្កោលទោសលើអំពើប្រល័យពូជសាសន៍ និងអំពើព្រៃផ្សៃរបស់កងទ័ពអ៊ីស្រាអែលនៅភាគខាងជើងតំបន់ហ្កាហ្សាដែនដីប៉ាឡេស្ទីន។ ទន្ទឹមគ្នានេះ ថ្នាក់ដឹកនាំទាំងអស់ក៏បានលើកឡើងពីការធ្វើទារុណកម្ម ការសម្លាប់ ការបាត់ខ្លួន និងសកម្មភាពបោសសម្អាតជាតិសាសន៍ពីសំណាក់ទាហានអ៊ីស្រាអែល។ នេះបើយោងតាមសេចក្តីថ្លែងការណ៍ចុងក្រោយនៃកិច្ចប្រជុំកំពូល។
ព្រះអង្គម្ចាស់បេន សាលម៉ានដែលជាម្ចាស់ផ្ទះរៀបចំកិច្ចប្រជុំកំពូលក៏បានអំពាវនាវឲ្យអ៊ីស្រាអែលគោរពអធិបតេយ្យភាពប្រទេសអ៊ីរ៉ង់ និងបញ្ឈប់ការវាយប្រហារលើទឹកដីអ៊ីរ៉ង់។ សមាជិកភាគច្រើននៃសម្ព័ន្ធអារ៉ាប់ និងអង្គការនៃសហប្រតិបតិ្តការអ៊ីស្លាមបានប្រកាន់ជំហររួមគ្នាយ៉ាងមុតមាំចំពោះសេចក្តីថ្លែងការណ៍នេះ។ តាមរាជទាយាទអារ៉ាប៊ីសាអូឌីត អ៊ីរ៉ង់ជាបងប្អូននឹងអារ៉ាប៊ីសាអូឌីតដែលបង្ហាញពីទំនាក់ទំនងយ៉ាងស្អិតរមួតរវាងមហាអំណាចទាំងពីរនៅតំបន់មជ្ឈិមបូព៌ា។ គួររម្លឹកថា បន្ទាប់ពីបានផ្តាច់ការទូតរវាងគ្នាអស់ជាង ៧ឆ្នាំ អ៊ឺរ៉ង់ដែលជាប្រទេសកាន់សាសនាអ៊ីស្លាមនិកាយស៊ីអ៊ីត ហើយអារ៉ាប៊ីសាអូឌីតដែលជាប្រទេសកាន់សាសនាអ៊ីស្លាមនិកាយស៊ុយនីតបានប្រកាសចងសម្ព័ន្ធភាពការទូតនឹងគ្នាឡើងវិញកាលពីខែមីនា ឆ្នាំ២០២៣ ក្រោមការផ្សះផ្សារបស់ចិន។
ដោយឡែក នៅក្នុងកិច្ចប្រជុំកំពូលនៃបណ្តាប្រទេសអារ៉ាប់ និងប្រទេសអ៊ីស្លាមនេះដែរ លោកអនុប្រធានាធិបតីអ៊ីរ៉ង់ Mohammad Reza Aref បានចាត់ទុកអំពើឃាតកម្មមេដឹកនាំក្រុមហាម៉ាសប៉ាឡេស្ទីន និងហេសបូឡាលីបង់ថាជាអំពើភេវកម្មដែលបានរៀបចំទុកជាមុនរបស់អ៊ីស្រាអែល។ ពីខាងភាគីលីបង់វិញ លោកនាយករដ្ឋមន្ត្រី Najib Mikati បានបញ្ជាក់ថា វិបត្តិនេះបានគំរាមកំហែងដល់ប្រទេសលីបង់។ ក្នុងន័យនេះ នាយករដ្ឋមន្ត្រីលីបង់បានអំពាវនាវដល់សហគមន៍អន្តរជាតិឲ្យបន្តផ្តល់ជំនួយដល់លីបង់ និងបញ្ឈប់ការជ្រៀតជ្រែកកិច្ចការផ្ទៃក្នុងរបស់លីបង់។ នៅចុងបញ្ចប់ មេដឹកនាំអារ៉ាប់ និងអ៊ីស្លាមបានប្រកាសរួមគ្នាថា បើអ៊ីស្រាអែលចង់បានសន្តិភាព អ៊ីស្រាអែលត្រូវតែដកខ្លួនចេញពីទឹកដីដែលខ្លួនកំពុងកាន់កាប់។
ទាក់ទងកិច្ចប្រជុំនេះកាលពីថ្ងៃចន្ទ ទី១១ ខែវិច្ឆិកាកន្លងទៅ អគ្គលេខាធិការអង្គការសម្ព័ន្ធអារ៉ាប់ (Arab League) លោកអាម៉េដ អាប៊ូល ហ្គេត (Ahmed Aboul Gheit) បានអះអាងនៅក្នុងសន្និសីទសារព័ត៌មានមួយថា សមាជិកអង្គការសហប្រជាជាតិកំពុងពិចារណាធើ្វការបោះឆ្នោតផ្អាកសមាជិកភាពរបស់អ៊ីស្រាអែលនាពេលឆាប់ៗខាងមុខ ដើម្បីឆ្លើយតបទៅនឹងអំពើឧក្រិដ្ឋកម្មសង្គ្រាមរបស់អ៊ីស្រាអែលនៅតំបន់ហ្គាហ្សា។
នៅក្នុងឱកាសសន្និសីទសារព័ត៌មានខាងលើនេះ ទ្រង់ ហ្វាហាន អាល់ សាដ ក៏បានមានបន្ទូលបញ្ជាក់ផងដែរថា “បច្ចុប្បនេះ មានប្រទេសតូចធំដែលជាសមាជិករបស់អង្គការសហប្រជាជាតិកាន់តែច្រើនឡើង បានកំពុងមូលមតិគ្នាលើវិធានការប្រឆាំងតបនឹងអ៊ីស្រាអែល តាមរយៈការបោះឆ្នោតផ្អាកសមាជិកភាពរបស់ប្រទេសមួយនេះ ដើម្បីបញ្ជាក់ជំហរគាំទ្រឡើងវិញលើដំណោះស្រាយ “រដ្ឋពីរ” របស់អង្គការសហប្រជាជាតិលើបញ្ហាអ៊ីស្រាអែលនិងប៉ាឡេស្ទីន”។
ជុំវិញវិបត្តិសង្គ្រាមនៅតំបន់ហ្គាហ្សានេះដែរ កាលពីចុងខែតុលាកន្លងទៅ ប្រទេសអារ៉ាប៊ីសាអូឌីតបានជំរុញឱ្យមានបទឈប់បាញ់ ដើម្បីបើកឱកាសសម្រាប់ការអនុវត្តន៍ដំណោះស្រាយ ”រដ្ឋពីរ” របស់អង្គការសហប្រជាជាតិលើបញ្ហាជម្លោះអ៊ីស្រាអែលនៅប៉ាឡេស្ទីន ប៉ុន្តែហាក់ត្រូវបានអ៊ីស្រាអែលបន្តព្រងើយកណ្តើយ៕
