កម្ពុជា បដិសេធ ការចុះផ្សាយទូរទស្សន៍កូរ៉េថា ពលរដ្ឋខ្លួនត្រូវបានបង្ខាំងធ្វើការខុសច្បាប់ និងចាប់ជំរិតនៅកម្ពុជាបន្ទាប់ពីមានពត៍័មានចាប់កប៉ាលដឹកធ្យូងថ្ម
24-October-2024 / ព័ត៌មានជាតិ
ភ្នំពេញ៖ នាយឧត្តមសេនីយ៍ ស ថេត អគ្គស្នងការនគរបាលជាតិ តាមរយៈបណ្ដាញព័ត៌មាន នៅថ្ងៃទី២៤ ខែតុលា ឆ្នាំ២០២៤នេះ បានចេញមកបដិសេធយ៉ាងដាច់អហង្កាចំពោះការចុះផ្សាយរបស់ទូរទស្សន៍កូរ៉េមួយ ដែលបានចោទប្រកាន់ថា ពលរដ្ឋរបស់ខ្លួនរងគ្រោះដោយអំពើបង្ខាំងធ្វើការខុសច្បាប់ និងចាប់ជំរិតនៅកម្ពុជា។
នាយឧត្តមសេនីយ៍ ស ថេត បានអះអាងថា ក្រោយឃើញការចែកចាយរបស់សារព័ត៌មានកូរ៉េ ដោយអនុវត្តតាមបទបញ្ជារបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងឧបនាយករដ្ឋមន្ដ្រី នេត សាវឿន លោកបានបញ្ជាកម្លាំងជំនាញបើកការស្រាវជ្រាវបន្ទាន់ភ្លាម។ នាយឧត្តមសេនីយ ស ថេត បានឲ្យដឹងថា កាលពីថ្ងៃទី០៥ ខែសីហា ឆ្នាំ២០២៤កន្លងទៅ មានជនជាតិកូរ៉េម្នាក់ បានទំនាក់ទំនងមកប្រព័ន្ធទូរស័ព្ទទាន់ហេតុការណ៍ និងបានអះអាងថា ប្ដីរបស់ខ្លួនធ្វើការនៅអគារអាយខន ស្ថិតក្នុងខណ្ឌសែនសុខ ដោយទំនាក់ទំនងមិនបានឡើយ។
សមត្ថកិច្ចបានរកឃើញ និងប្រគល់ជនជាតិកូរ៉េនោះ ទៅអគ្គនាយកដ្ឋានអន្ដោប្រវេសន្ដ ដើម្បីធ្វើការសួរនាំបន្ដ។ បន្ទាប់ពីសួរនាំ ជនជាតិកូរ៉េខាងលើបានអះអាងថា ខ្លួនមិនត្រូវបានចាប់ជំរិត ឬបង្ខាំងឲ្យធ្វើការដោយខុសច្បាប់អ្វីឡើយ។នាយឧត្តមសេនីយ៍ ស ថេត បានបន្ថែមទៀតថា ក្រោយបញ្ចប់ការសួរនាំតាមនីតិវិធី នៅថ្ងៃទី០៨ ខែសីហា ឆ្នាំ២០២៤ ស្នងការដ្ឋាននគរបាលរាជធានីភ្នំពេញ បានបញ្ជូនទៅកាន់អគ្គនាយកដ្ឋានអន្ដោប្រវេសន្ដ រួចហើយនៅថ្ងៃទី២៨ ខែសីហា ឆ្នាំ២០២៤ អគ្គនាយកដ្ឋានអន្តោប្រវេសន៍ បានបញ្ជូនជនជាតិកូរ៉េខាងលើទៅកាន់ប្រទេសដើមវិញរួចរាល់។
នាយឧត្តមសេនីយ៍ ស ថេត បានសង្កត់ធ្ងន់ថា ចំពោះការផ្សព្វផ្សាយព័ត៌មានរបស់ទូរទស្សន៍កូរ៉េនោះ មិនមែនជាការពិតនោះឡើយ ហើយអគ្គស្នងការដ្ឋាននគរបាលជាតិ សូមធ្វើការបដិសេធយ៉ាងដាច់អហង្កា និងច្រានចោលទាំងស្រុង។
សូមបញ្ជាក់ថាកាលពីពេលថ្មីៗនេះ មានសេចក្តីរាយការណ៍របស់វីអូអេជាភាសាកូរ៉េថា រដ្ឋាភិបាលកម្ពុជាបានរឹបអូសកប៉ាល់ចិនដែលដឹកធ្យូងថ្មរបស់កូរ៉េខាងជើងកាលពីដើមឆ្នាំនេះ។អ្នកតាមដានភូមិសាស្ត្រនយោបាយលោក សេង វណ្ណលី ប្រាប់វីអូអេថា មួយរយៈកាលចុងក្រោយនេះទំនាក់ទំនងរវាងរដ្ឋាភិបាលទីក្រុងភ្នំពេញនិងរដ្ឋកុម្មុយនិស្តកូរ៉េខាងជើង មានការឃ្លាតឆ្ងាយ ដោយសារតែកម្ពុជាចង់បានទំនាក់ទំនងជិតដិតជាមួយកូរ៉េខាងត្បូង និងជប៉ុនដែលជាសម្ព័ន្ធមិត្តរបស់សហរដ្ឋអាមេរិក។
លោកបញ្ជាក់ថា៖ «ដូច្នេះយើងឃើញថា ក្រោយអំពីការចរចាឱ្យមានកិច្ចព្រមព្រៀងពាណិជ្ជកម្មសេរីទ្វេភាគីរវាងកូរ៉េខាងត្បូងនិងកម្ពុជាអី យើងឃើញថា ជំហររបស់កម្ពុជាចំពោះកូរ៉េខាងជើងរាងមានភាពតឹងរ៉ឹង ជាពិសេសការគោរពនូវសេចក្តីសម្រេចរបស់អង្គការសហប្រជាជាតិ ដាក់ទណ្ឌកម្មទៅលើកូរ៉េខាងជើងហ្នឹង។ យើងឃើញថា កម្ពុជាហាក់មានការអនុវត្តបានគ្រាន់បើជាងមុន»។អ្នកជំនាញរូបនេះបន្ថែមថា សេចក្តីរាយការណ៍ដែលថា កម្ពុជារឹបអូសកប៉ាល់ដឹកធ្យូងថ្មកូរ៉េខាងជើង ទំនងជាការណ៍ពិត ដែលឆ្លើយតបទៅនឹងជំនួបរបស់ប្រធានព្រឹទ្ធសភាលោក ហ៊ុន សែន និងឯកអគ្គរដ្ឋទូតកូរ៉េខាងជើងប្រចាំនៅទីក្រុងភ្នំពេញថ្មីៗនេះ ដែលបានលើកឡើងពាក់ព័ន្ធនឹងការអនុវត្តទៅតាមទណ្ឌកម្មរបស់អង្គការសហប្រជាជាតិ។
វីអូអេបានព្យាយាមសុំការការអត្ថាធិប្បាយពីស្ថានទូតកូរ៉េខាងជើងប្រចាំនៅទីក្រុងភ្នំពេញ ប៉ុន្តែអ្នកលើកទូរស័ព្ទបាននិយាយថា៖ «អត់មានព័ត៌មានផ្តល់ជូនទេ។ អរគុណ ជម្រាបលា»។វីអូអេភាសាកូរ៉េបានយោងតាមឯកសារនៃក្រសួងយុត្តិធម៌របស់កម្ពុជាដែលថា ឆ្មាំសមុទ្ររបស់កម្ពុជាបានរឹបអូសយកកប៉ាល់ទង់ជាតិចិនឈ្មោះ Hang Jun Lun និងធ្យូងថ្មកូរ៉េខាងជើងចំនួន ១២.០០០តោន កាលពីខែកុម្ភៈឆ្នាំ២០២៤នេះ។
សំណើរឹបអូសកប៉ាល់ និងធ្យូងថ្ម ត្រូវបានអនុម័តដោយក្រសួងយុត្តិធម៌កម្ពុជា កាលពីថ្ងៃទី ២៤ ខែកុម្ភៈ ហើយទាំងកប៉ាល់និងធ្យូងថ្មនោះត្រូវបានបង្កកតាមរយៈអង្គភាពស៊ើបការណ៍ហិរញ្ញវត្ថុកម្ពុជា។
វីអូអេភាសាកូរ៉េបានលើកឡើងដោយយោងតាមក្រសួងយុត្តិធម៌ថា ការរឹបអូសបានធ្វើឡើងស្របតាមច្បាប់ស្តីពីការរីកសាយភាយអាវុធប្រល័យលោកឆ្នាំ ២០២០ របស់រដ្ឋាភិបាលកម្ពុជា។
សេចក្តីសម្រេចលេខ ២៣៧១ របស់ក្រុមប្រឹក្សាសន្តិសុខអង្គការសហប្រជាជាតិបានហាមប្រាមការជួញដូរធ្យូងថ្មរបស់កូរ៉េខាងជើង ហើយសេចក្តីសម្រេច ២២៧០ តម្រូវឱ្យត្រួតពិនិត្យទំនិញដែលធ្វើដំណើរទៅកាន់ ឬមានប្រភពមកពីប្រទេសកូរ៉េខាងជើង។រដ្ឋលេខាធិការក្រសួងយុត្តិធម៌លោក ជិន ម៉ាលីន បដិសេធមិនផ្តល់ការអត្ថាធិប្បាយដោយប្រាប់អ្នកយកព័ត៌មានវីអូអេថា លោកលែងជាអ្នកនាំពាក្យក្រសួងទៀតហើយ ដោយបានស្នើឱ្យទាក់ទងទៅលោក សេង ឌីណា អ្នកនាំពាក្យថ្មីរបស់ក្រសួង ប៉ុន្តែលោក សេង ឌីណា បានប្រាប់វីអូអេកាលពីថ្ងៃចន្ទឱ្យទាក់ទងទៅលោក ជិន ម៉ាលីនវិញ ព្រោះលោកកំពុងជាប់បេសកកម្ម។វីអូអេក៏មិនទាន់អាចសុំការអត្ថាធិប្បាយបន្ថែមពីអ្នកនាំពាក្យក្រសួងការបរទេសកម្ពុជាលោក ជុំ សុន្ទរី បានដែរ។
អ្នកស្រាវជ្រាវនៅមជ្ឈមណ្ឌលខ្មែរសិក្សាកិច្ចការតំបន់លោក ឯក ប៊ុនលី ប្រាប់វីអូអេតាមប្រព័ន្ធតេឡេក្រាមថា សកម្មភាពនាពេលថ្មីៗនេះរបស់រដ្ឋាភិបាលកម្ពុជាឆ្លុះបញ្ចាំងពីការប្តេជ្ញាចិត្តចំពោះច្បាប់អន្តរជាតិ ជាពិសេសទាក់ទងនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ UNSCR 2371 ដែលហាមប្រាមការជួញដូរធ្យូងថ្ម ដែក និងសំណជាមួយកូរ៉េខាងជើង។
នៅក្នុងជំនួបជាមួយឯកអគ្គរដ្ឋទូតកូរ៉េខាងជើងប្រចាំនៅកម្ពុជាលោក ចាង យ៉ុងហ្គុនកាលពីថ្ងៃទី ៤ ខែតុលា ឆ្នាំ ២០២៤ លោក ហ៊ុន សែន ប្រធានព្រឹទ្ធសភា បានសុំការយោគយល់ពីកូរ៉េខាងជើង ដែលកម្ពុជាត្រូវបង្ខំចិត្តអនុវត្តសេចក្តីសម្រេចរបស់ក្រុមប្រឹក្សាសន្តិសុខនៃអង្គការសហប្រជាជាតិចំពោះទណ្ឌកម្មទៅលើកូរ៉េខាងជើង ខណៈថា កម្ពុជាគឺជារដ្ឋសមាជិករបស់អង្គការសហប្រជាជាតិ ហេតុនេះ កម្ពុជាត្រូវតែបង្ខំចិត្តអនុវត្តតាមសេចក្តីសម្រេចចិត្តនានារបស់ក្រុមប្រឹក្សាសន្តិសុខនេះ។លោក ហ៊ុន សែន បានប្រាប់ឯកអគ្គរដ្ឋទូតរូបនោះថា ការដាក់ទណ្ឌកម្មនេះមិនត្រឹមតែប៉ះពាល់ដល់កូរ៉េខាងជើងប៉ុណ្ណោះទេ ប៉ុន្តែក៏បានប៉ះពាល់ដល់ប្រទេសនានារួមទាំងកម្ពុជាផងដែរ៕
