សម្តេចធិបតី នាយករដ្ឋមន្ត្រីកម្ពុជាបានចេញបទបញ្ជាឲ្យកងវិស្វកម្មខិតខំពុះពារឈូសផ្លូវសម្រេចឲ្យទៅដល់តំបន់មុំ ៣ កន្ទុយនាគព្រំប្រទល់ ៣ ប្រទេស (កម្ពុជា ឡាវ និងវៀតណាម)។
07-August-2024 / សេដ្ឋកិច្ច
ភ្នំពេញ៖សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងបញ្ជាក់ថា នៅតាមបន្ទាត់ព្រំដែន យើងត្រូវធ្វើផ្លូវពីរ មានផ្លូវប្រើសម្រាប់សេដ្ឋកិច្ច និងផ្លូវសម្រាប់ក្រវាត់ព្រំដែន ដែលប្រើក្នុងគោលដៅការពារបូរណភាពទឹកដី ហើយផ្លូវក្រវាត់ព្រំដែន គឺធ្វើកៀកទៅនឹងព្រំដែន ខណៈដែលផ្លូវសម្រាប់ធ្វើសេដ្ឋកិច្ច គឺយើងធ្វើនៅខាងក្នុងព្រំដែនរបស់យើង។សម្ដេចមហាបវរធិបតី ហ៊ុន ម៉ាណែត បានថ្លែងដូចនេះនៅព្រឹកថ្ងៃទី០៦ ខែសីហា ឆ្នាំ២០២៤នេះ ក្នុងឱកាសអញ្ជើញចែកសញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ ដែលបញ្ចប់ការសិក្សាដោយជោគជ័យចំនួន ៥៦១នាក់។
សម្ដេចមហាបវរធិបតី «ព្រំដែនយើងធ្វើផ្លូវពីរ ផ្លូវមួយខ្សែគឺផ្លូវសេដ្ឋកិច្ច ហើយផ្លូវសេដ្ឋកិច្ចយើងធ្វើនៅខាងក្នុង អាចមួយគីឡូម៉ែត្រ ពីរគីឡូម៉ែត្រ ឫបួនគីឡូម៉ែត្រ ជាក់ស្តែងនៅទិសព្រំដែនថៃ យើងធ្វើផ្លូវ១ខ្សែចាក់ពីកូនដំរី ចាក់ទៅប៉ៃលិន និងកន្លែងផ្សេងៗ នេះគេហៅផ្លូវសេដ្ឋកិច្ចខាងក្នុង ប៉ុន្តែព្រំដែនមួយទៀត គឺផ្លូវព្រំដែនក្រវ៉ាត់ព្រំដែន ផ្លូវនេះគឺធ្វើកៀកខ្លាំងនឹងព្រំដែន យើងធ្វើកន្លែងខ្លះ ប្រទេសជិតខាងដាក់ទ័ពមកប្តឹងមកឱ្យយើងធ្វើការ ព្រោះវាកៀកព្រំដែនពេក»។
សម្ដេចមហាបវរធិបតី ហ៊ុន ម៉ាណែត រំលឹកថា យុទ្ធសាស្ត្រព្រំដែននេះសម្តេចតេជោ ហ៊ុន សែន អតីតនាយករដ្ឋមន្ត្រី ធ្លាប់បានលើកឡើងតាំងពីជាងឆ្នាំ១៩៩០ មកម្លេះ និងបានបញ្ជាក់ថា ការការពារព្រំដែន មិនមែនកែប្រែព្រំដែនឱ្យក្លាយជាកន្លែងមានទាហានទាំងអស់នោះទេ គឺកែប្រែព្រំដែនទៅជាព្រំដែនសន្តិភាព និងមានសហប្រតិបត្តិការ តាមរយៈការដកកងទ័ពចេញ ហើយបើកច្រកអន្តរជាតិ ដែលនេះជាគោលដៅហើយយើងបានធ្វើជាប្រចាំផងដែរ។សម្ដេចមហាបវរធិបតី បញ្ជាក់ទៀតថា នេះគឺជាអ្វីដែលយើងបន្តធ្វើ និងការបោះបង្គោលព្រំដែន ដើម្បីបើកច្រកអន្តរជាតិ រុញការវិនិយោគ ទាំងវិនិយោគិនខ្មែរ និងបរទេសដើម្បីធ្វើការវិនិយោគនៅតាមបន្ទាត់ព្រំដែន។
សូមបញ្ជាក់ដែរថាក្នុងឱកាសអញ្ជើញជាអធិបតីក្នុងពិធីសំណេះសំណាល និងពិសាភោជនាហារ រៀបចំឡើងដោយសមាគមឧកញ៉ាកម្ពុជា និងសមាគមអ្នកអភិវឌ្ឍន៍លំនៅឋានកម្ពុជា នារសៀលថ្ងៃទី ០២ ខែសីហា ឆ្នាំ២០២៤ សម្តេចធិបតីបានគូសបញ្ជាក់ថា សម្ដេចបានចារឱ្យកងវិស្វកម្ម ធ្វើយ៉ាងម៉េចឈានទៅដល់ការធ្វើផ្លូវឲ្យទៅដល់តំបន់កន្ទុយនាគផងដែរ។
សម្ដេចបានបញ្ជាក់យ៉ាងដូច្នេះថា «ទីនោះខ្ពស់ណាស់កន្លងទៅត្រូវចូលពីទឹកដីវៀតណាម។ យើងត្រូវពុះពារ ចំណាយយ៉ាងណាក៏ដោយ សាងសង់សម្រេចឲ្យបាន។ ទៅថ្ងៃអនាគតត្រូវឲ្យកូនខ្មែរ អាចឡើងទៅតំបន់កន្ទុយនាគតាមទឹកដីខ្មែរតែម្តង ដែលនេះជាមហិច្ឆតារបស់យើង»។ទាក់ទងការស្ថាបនាផ្លូវក្រវាត់ព្រំដែន សម្តេចធិបតីបានឲ្យដឹងថា រដ្ឋាភិបាលបានស្ថាបនាប្រវែងរាប់រយដល់រាប់ពាន់គីឡូម៉ែត្រ ខណៈដែលផ្លូវខ្លះធ្វើចេញពីបន្ទាត់ព្រំដែនតែ ១០ ម៉ែត្រ ទៅ ៣០ ម៉ែត្រប៉ុណ្ណោះ។
សម្តេចបានឲ្យដឹងថាការសម្រេចបានការសាងសង់ផ្លូវក្រវាត់ព្រំដែនដោយលើកឡើងតែនៅក្នុងភូមិសាស្ត្រខេត្តចំនួន ៣ នៅភូមិភាគឦសាន ដោយខេត្តក្រចេះសាងសង់បានប្រវែង ៧៨ គីឡូម៉ែត្រដែលបញ្ចប់ទាំងស្រុង។ ខេត្តមណ្ឌលគិរីបានសាងសង់បានប្រវែង ១៥៥ គីឡូម៉ែត្រលើ ៣១៩ គីឡូម៉ែត្រ និងបន្តធ្វើខាងមុខឲ្យចប់ និងខេត្តរតនគីរីបានប្រវែង ៨៩ គីឡូម៉ែត្រលើ ២២០ គីឡូម៉ែត្រ និងបន្តធ្វើតទៅទៀតនិងសម្តេចបានបញ្ជាឲ្យបន្តធ្វើឲ្យទៅដល់តំបន់កន្ទុយនាគតែម្តង។សម្តេចបានអះអាងថា កិច្ចការពារបូរណភាពទឹកដី មិនចាំបាច់ទៅធ្វើរបងខ្ពស់ៗគឺត្រូវរុញការអភិវឌ្ឍរុញពលរដ្ឋឲ្យទៅរស់នៅឲ្យបានច្រើនដែលជាខឿនការពារជាតិដ៏រឹងមាំ។សូមបញ្ជាក់ថាផ្លូវបតាមបណ្តោយព្រុំដែនកម្ពុជាធ្វើបាន៩០ភាគរយហើយនាពេលកន្លងមក។ប្រជាពើរដ្ឋអាចសាកល្បងធ្វើដំណើរបានគ្រាន់តែមានកន្លែងខ្លះនៅលំបាកតិចតួចតែអាចធ្វើដំណើរបាន។នេះបើតាមការលើកឡើងរបសសលោកនាយឧត្តមសេនីយ៍ឈុំសុជាតិអ្នកនាំពាក្យក្រសួងការពារជាតិ។
