តើការបាញ់ប្រហារនាំឲ្យគ្រោះរបស់ លោក ដូណាល់ ត្រាំ ក្លាយទៅជាលាភ?
16-July-2024 / ព័ត៌មានអន្តរជាតិ
សហរដ្ឋអាម៉េរិក៖ បេក្ខជនប្រធានាធិបតីអាម៉េរិកមកពីគណបក្សសាធារណរដ្ឋ លោក ដូណាល់ ត្រាំ (Donald Trump) បានបង្ហាញខ្លួនជាសាធារណៈជាលើកដំបូង នាដើមសប្តាហ៍នេះ ដោយគេឃើញ លោកត្រាំមានរុំបង់នៅលើត្រចៀកខាងស្តាំ ខណៈកំពុងចូលរួមនៅក្នុងសន្និបាតរបស់គណបក្សនៅឯទីក្រុងមីលវ៉ាគី (Milwaukee) រដ្ឋវីសខូស៊ីន (Wisconsin) រយៈពេល ៤ ថ្ងៃ ។
ការបង្ហាញខ្លួនជាសាធារណៈរបស់លោកត្រាំ ពេលនេះ បានធ្វើឡើងបន្ទាប់ពីទទួលបានជ័យជម្នះផ្នែកច្បាប់ដ៏សំខាន់មួយគឺទទួលបានការតែងតាំងបេក្ខជនប្រធានាធិបតី និងបន្ទាប់ពីលោករងការប៉ុនប៉ងបាញ់សម្លាប់ពីសំណាក់ខ្មាន់កាំភ្លើងអាយុ ២០ ឆ្នាំម្នាក់ឈ្មោះ ថូម៉ាស ម៉ាត់ធ្យូ ក្រុក (Thomas Matthew Crooks) កាលពីថ្ងៃសៅរ៍ចុងសប្តាហ៍កន្លងទៅ អំឡុងលោកត្រាំ កំពុងជួបជុំឃោសនាជាមួយអ្នកគាំទ្រនៅឯរដ្ឋភែនស៊ីលវ៉ានី (Pennsylvania) ។
សម្រាប់ការបោះឆ្នោត លោកត្រាំ ក៏បានតែងតាំងសមាជិកព្រឹទ្ធសភាបក្សសាធារណរដ្ឋមកពីរដ្ឋអូហៃយ៉ូ (Ohio) លោក ជេម ដាវីដ វែន (James David Vance) ឬស្គាល់ថា ជេឌី វែន (J.D. Vance)ជាអ្នកនយោបាយមួយរូបដែលធ្លាប់តែរិះគន់អតីតប្រធានាធិបតីយ៉ាងចាស់ដៃ ឱ្យធ្វើជាអនុប្រធានាធិបតី ។ ការជ្រើសរើស លោក ជែម ដាវីដ វែន (James David Vance) ដែលជាអ្នកនិពន្ធសៀវភៅ ហ៊ីលប៊ីលី អេលីជី "Hillbilly Elegy" (ជាប្រភេទសៀវភៅនិយាយអំពីជីវប្រវត្តិ បញ្ហាប្រឈម សង្គម និងសេដ្ឋកិច្ចអាម៉េរិក ដែលលក់ដាច់បំផុត)អាចនឹងជួយបង្កើនចំនួនអ្នកបោះឆ្នោតគាំទ្រលោកត្រាំ សម្រាប់ការបោះឆ្នោតនាថ្ងៃទី៥ ខែវិច្ឆិកា ។ទោះធ្លាប់បោះពាក្យសម្តីវាយប្រហារលោកត្រាំ ក្នុងឆ្នាំ២០១៦ក៏ពិតមែន ប៉ុន្តែចាប់តាំងពីពេលនោះមក លោកបានទទួលយករបៀបវារៈប្រជាភិថុតិរបស់អតីតប្រធានាធិបតីអាមេរិករូបនេះ ហើយទទួលយកការតែងតាំងពីលោក ត្រាំ ឈរឈ្មោះប្រជែងតំណែងព្រឹទ្ធសភា។
លោក Vance បានប្រាប់ Fox News កាលពីខែមុនថា “ខ្ញុំបានយល់ខុសចំពោះ ដូណាល់ ត្រាំ។ ខ្ញុំគិតមិនដល់សោះថា គាត់នឹងក្លាយជាប្រធានាធិបតីដ៏ល្អបែបនេះ។ គាត់គឺជាប្រធានាធិបតីដ៏អស្ចារ្យ ហើយវាជាហេតុផលមួយដែលធ្វើឲ្យខ្ញុំខិតខំប្រឹងប្រែង ដើម្បីជួយឲ្យគាត់ទទួលបានអាណត្តិទីពីរ”។សូមបញ្ជាក់ថា បន្ទាប់ពីបញ្ចប់ការសិក្សានៅវិទ្យាល័យ លោក Vance បានចុះឈ្មោះចូលរួមក្នុងកងម៉ារីនអាមេរិក ហើយបម្រើការជាអ្នកឆ្លើយឆ្លងព័ត៌មានសមរភូមិជាមួយកងម៉ារីនទី២ដែលកំពុងដាក់ពង្រាយនៅប្រទេសអ៊ីរ៉ាក់។ ក្រោយមក គាត់បានទទួលសញ្ញាប័ត្រច្បាប់ពីសាកលវិទ្យាល័យ Yale។
បុរសម្នាក់នេះហើយ គឺជាសមាជិកម្នាក់ក្នុងចំណោមអ្នកសាធារណរដ្ឋកំពូលៗដំបូងគេ ដែលចោទប្រកាន់ចំៗទៅលើវោហារសាស្ត្រញុះញង់របស់យុទ្ធនាការឃោសនាបក្សប្រជាធិបតេយ្យថាជាដើមចម ជំរុញឲ្យមានការប៉ុនប៉ងធ្វើឃាតលោក ត្រាំ នៅឯពិធីជួបជុំអ្នកគាំទ្រកាលពីថ្ងៃសៅរ៍។
ក្រៅពីជ្រើសមនុស្សដែលធ្លាបរិះគន់មកជាអ្នកជួយការពារបើរំលឹកពីពេលឃោសនាហើយត្រូវគេលួចបាញ់លោក ដូណាល់ ត្រាំ នៅតែមានភាពឆ្លាតវៃ បើទោះជាលោកស្ថិតក្នុងស្ថានការណ៍គ្រោះថ្នាក់ក៏ដោយ។ កងការពារ Secret Service បានជំរុញឱ្យលោកភៀសខ្លួនចុះពីលើវេទិកា នៅបន្ទាប់ពីគ្រាប់កាំភ្លើងមួយគ្រាប់របស់ខ្មាន់កាំភ្លើងហោះប៊ិះត្រូវក្បាលរបស់លោក និងធ្វើឱ្យលោករបួសត្រង់ស្លឹកត្រចៀកខាងស្ដាំ។ ប៉ុន្តែ លោក ត្រាំ ដែលមានឈាមប្រឡាក់លើផ្ទៃមុខ មិនបាន បណ្ដោយឱ្យឱកាសល្អកន្លងផុតទៅនោះទេ។ លោកបានប្រឹងប្រវេប្រវានៅក្នុងរង្វង់ដៃកងអង្គរក្ស និងបានលើកក្ដាប់ដៃស្ដាំលើកឡើងលើ ព្រមទាំងស្រែកទៅកាន់អ្នកគាំទ្រនៅឯ យុទ្ធនាការឃោសបោះឆ្នោតក្នុងរដ្ឋ Pennsylvania កាលពីថ្ងៃទី១៣ ខែកក្កដាថា «ប្រយុទ្ធ ប្រយុទ្ធ»។
រូបភាពដែលលោក ដូណាល់ ត្រាំ ក្ដាប់ដៃស្ដាំលើកឡើងលើនេះត្រូវបានចុះផ្សាយយ៉ាងព្រោងព្រាតនៅតាមក្របទំព័រមុខនៃសារព័ត៌មានអន្តរជាតិធំៗ និងត្រូវបានចែករំលែកលើ បណ្ដាញទំនាក់ទំនងសង្គម។ ភ្លាមៗនោះមេដឹកនាំគណបក្សសាធារណរដ្ឋបានចេញមុខបង្ហាញការគាំទ្រចំពោះលោក ត្រាំ ហើយសូម្បីតែមហាសេដ្ឋីអាមេរិកដូចជាលោក Bill Ackman និងលោក Elon Musk ក៏បានចេញមុខប្រកាសគាំទ្រលោក ត្រាំ ជាសាធារណៈក្នុងការប្រកួតប្រជែងយកតំណែងជាប្រធានាធិបតី តទល់ជាមួយលោក ចូ បៃដិន ខណៈអ្នកបោះឆ្នោតដែលមិនទាន់បាន សម្រេចថាតើត្រូវបោះឱ្យនរណា ក៏ប្រហែលជាអាចដូរចិត្តបោះឱ្យលោក ត្រាំ ផងដែរ។
លោក Matthew Wilson ជាសាស្ត្រាចារ្យវិទ្យាសាស្ត្រនយោបាយមកពីសាកលវិទ្យាល័យ Southern Methodist University យល់ថារូបភាពបង្ហាញពីភាពក្លាហានរបស់លោក ដូណាល់ ត្រាំ ជាមួយឈាមប្រឡាក់លើផ្ទៃមុខ និងការក្ដាប់ដៃលើកឡើងលើ គឺជាការផ្សព្វផ្សាយពាណិជ្ជកម្មមួយដ៏ប៉ិនប្រសប់ ដែលអាចនឹងជួយលោក ដូណាល់ ត្រាំ យ៉ាងហោចណាស់ក៏មួយរយៈពេលដែរ នៅក្នុងចំណោមអ្នកបោះឆ្នោតដែលមិនទាន់សម្រេចចិត្តបោះឱ្យនរណា។
សូមបញ្ជាក់ថា មុនមានការប៉ុនប៉ងធ្វើឃាតលើរូបលោក លោកដូណាល់ ត្រាំ បានប្រឈមមុខនឹងព្រឹត្តិការណ៍អាស្រូវជាច្រើនដែលសុទ្ធតែអាច បំផ្លាញមហិច្ឆតានយោបាយចង់ក្លាយជាប្រធានាធិបតីអាមេរិកសាជាថ្មី ក្នុងការបោះឆ្នោតនៅថ្ងៃទី៥ ខែវិច្ឆិកាខាងមុខរបស់លោក។ កាលពីឆ្នាំ២០២១ លោក ត្រាំ បានដើរចេញពីសេតវិមានដោយបន្សល់ទុកនូវភាពចម្រូងចម្រាស ក្រោយក្រុមអ្នកគាំទ្ររបស់លោកបានសម្រុកចូលអុកឡុកវិមាន Capitol កាលពីថ្ងៃទី៦ ខែមករា ដើម្បីរារាំងការប្រកាសជ័យជម្នះរបស់លោក ចូ បៃដិន ក្នុងការបោះឆ្នោតកាលពីឆ្នាំ២០២០។ ចូលដល់ខែសីហា ឆ្នាំ២០២២ ប៉ូលិស FBI បានចុះឆែកឆេរភូមិគ្រឹះ Mar-a-Lago របស់លោក ក្រោម ក្របខណ្ឌនៃការស៊ើបអង្កេតជុំវិញការចោទប្រកាន់ថាលោក ត្រាំបានលាក់ទុកឯកសារសម្ងាត់ជាតិ ក្រោយចុះចេញពីតំណែង។
នៅឆ្នាំ២០២៣ ចៅក្រមក្រុងញូវយ៉កម្នាក់បានរកឃើញថា លោក ត្រាំ បានបៀតបៀនផ្លូវភេទលើអ្នកនិពន្ធម្នាក់ គឺលោកស្រី E. Jean Carroll និងបានបង្គាប់ឱ្យលោកសងជំងឺចិត្ត ៥លានដុល្លារ។ ក្នុងខែមករា ឆ្នាំដដែល លោក ត្រាំ ត្រូវបានចៅក្រមបង្គាប់ឱ្យបង់ប្រាក់ ៨០លានដុល្លារដល់អ្នកនិពន្ធរូបនោះពីបទបរិហារកេរ្តិ៍។ លើសពីនេះទៅទៀត កាលពីជាង៦សប្ដាហ៍កន្លងទៅនេះ លោក ត្រាំ ត្រូវបានតុលាការរកឃើញថាមានពិរុទ្ធលើបទចោទព្រហ្មទណ្ឌចំនួន ៣៤បទចោទ ពាក់ព័ន្ធនឹងការក្លែងបន្លំឯកសាររកស៊ី ដើម្បីសូកលុយបំបិទមាត់អតីតតារាថតកុនកូនជ្រូកម្នាក់កុំឱ្យនិយាយពីរឿងអាស្រូវផ្លូវភេទរវាងអ្នកទាំង២។
ក៏ប៉ុន្តែ ឧបទ្ទវហេតុនៅឯទីក្រុង Butler រដ្ឋ Pennsylvania បានបង្ហាញពីភាពប៉ិនប្រសប់របស់លោក ត្រាំ ក្នុងការប្រែ «គ្រោះទៅជាលាភ»។ ការប៉ុនប៉ងធ្វើឃាតមិនបានសម្រេច បានជួយពង្រឹងឥទ្ធិពល របស់លោក ត្រាំ នៅក្នុងគណបក្សសាធារណរដ្ឋ ដែលត្រៀមប្រកាសតែងតាំងរូបលោកជាបេក្ខជនប្រធានាធិបតីជាផ្លូវការ នៅឯសមាជជាតិរបស់បក្ស ចាប់ផ្ដើមពីថ្ងៃទី១៥ ដល់ថ្ងៃទី១៨ ខែកក្កដានេះ ក្នុងរដ្ឋ Wisconsin។ បើតាមទិន្នន័យពីស្ថាប័ន PredictIt នៅបន្ទាប់ពីមានការបាញ់ប្រហារកាលពីថ្ងៃសៅរ៍ ថ្ងៃទី១៣ ខែកក្កដា ឱកាសឈ្នះនៅក្នុងការបោះឆ្នោតប្រធានាធិបតីអាមេរិករបស់លោក ត្រាំ បានកើនឡើងគួរឱ្យកត់សម្គាល់។
លោក Darrell Scott ដែលជាទីប្រឹក្សាក្រៅផ្លូវការនៃក្រុមយុទ្ធនាការឃោសនាបោះឆ្នោតរបស់លោក ត្រាំ បានកត់សម្គាល់ថាលោក ត្រាំ នឹងទទួលបានការអាណិតសូរ និងការយល់ចិត្តកាន់តែច្រើនពីប្រជាជនអាមេរិក ពីព្រោះមនុស្សគ្រប់គ្នាដឹងយ៉ាងច្បាស់ថា ការប៉ុនប៉ងធ្វើឃាតគឺជារឿងមិនត្រឹមត្រូវ។មកទល់នឹងពេលនេះ ចេតនាប៉ុនប៉ងធ្វើឃាតលោក ត្រាំ របស់ខ្មាន់កាំភ្លើងឈ្មោះ Thomas Matthew Crooks មានអាយុ២០ឆ្នាំដែលត្រូវបានបាញ់សម្លាប់នៅកន្លែង កំពុងស្ថិតនៅក្រោមការស៊ើបអង្កេត នៅឡើយ។
