អាជ្ញាធរុស្ស៊ីប្រគល់សពរបស់មេដឹកនាំបក្សប្រឆាំង ឲ្យស្ត្រីជាម្តាយក្នុងពេលអាមេរិកប្រកាសគាំទ្រ
25-February-2024 / ព័ត៌មានអន្តរជាតិ
រុស្ស៊ី៖ អ្នកនាំពាក្យគណបក្សប្រឆាំងរុស្ស៊ីលោកស្រីគីរ៉ាយ៉ាមីស្ស( Kira Yarmysh) បានឱ្យដឹងថា សាកសពរបស់លោកអាឡិចសីណាវ៉ាលនី( Alexei Navalny )ដែលបានស្លាប់នៅក្នុងពន្ធនាគារដាច់ស្រយាល IK-3 ស្ថិតនៅតំបន់អាកទិកភាគខាងជើងចម្ងាយជាង ១៩០០គីឡូម៉ែត្រពីទីក្រុងមូស្គូ ត្រូវបានអាជ្ញាធររុស្ស៊ីយល់ព្រមប្រគល់ជូនស្ត្រីជាម្តាយដើម្បីរៀបចំធើ្វពិធីបុណ្យទៅតាមប្រពៃណី។
តែគេមិនទាន់ដឹងថា តើពិធីបុណ្យសពរបស់លោក Navalny នឹងអាចធើ្វឡើងបានជាសាធារណៈឫក៏យ៉ាងណានោះទេ ខណៈអាជ្ញាធររុស្ស៊ីធ្លាប់បានទាមទារម្តាយរបស់លោកឱ្យយល់ព្រមរៀបចំពិធីបូជាសពរបស់លោក Navalny ជាលក្ខណៈជនឯកដើម្បីទប់ស្កាត់ពលរដ្ឋរុស្ស៊ីកុំឱ្យចូលរួម។មន្ត្រីអ្នកនាំពាក្យដដែលនេះក៏បានបន្តថ្លែងអំណរគុណចំពោះការចូលរួមបញ្ចេញមតិរបស់ពលរដ្ឋរុស្ស៊ីដែលបានដាក់សម្ពាធឱ្យអាជ្ញាធររុស្ស៊ីយល់ព្រមប្រគល់សពរបស់លោក Navalny ទៅឱ្យម្តាយនៅពេលនេះ។
ម្តាយរបស់លោក Navalny គឺលោកស្រីលីយូដមីឡា( Lyudmila )នៅមិនទាន់ប្រកាសអំពីកាលបរិច្ឆេទពិធីបុណ្យសពរបស់កូនលោកស្រីនៅឡើយទេ។លោកស្រីលីយូដមីឡា( Lyudmila )បានចំណាយពេលជាងមួយសប្តាហ៍នៅក្បែរពន្ធនាគារ IK-3 ដើម្បីទទួចរកការពិតចំពោះមូលហេតុនៃការស្លាប់របស់លោក Navalny និងបានបង្ហាញជំហរមិនចុះញ៉ោមទៅនិងការគំរាមគំហែងរបស់អាជ្ញាធររដ្ឋាភិបាលលោកពូទីន។ លោកស្រី Lyudmila ធ្លាប់ត្រូវបានអាជ្ញាធររុស្ស៊ីបង្ខំឱ្យចុះហត្ថលេខាលើសំបុត្រមរណៈភាពរបស់លោក Navalny ហើយនិង បង្ខំឱ្យលោកស្រីរៀបចំពិធីសពរបស់លោកជាលក្ខណៈជន បើមិនដូច្នេះទេអាជ្ញាធររុស្ស៊ីនឹងធើ្វការបញ្ចុះសពរបស់លោកនៅឯពន្ធនាគារខាងលើនេះផ្ទាល់តែម្តង។ពាក់ព័ន្ធទៅនិងការរៀបចំពិធីបុណ្យសពរបស់លោក Navalny នៅថ្ងៃខាងមុខនេះដែរ មន្ត្រីអ្នកនាំពាក្យបក្សប្រឆាំងខាងលើបានបង្ហាញការព្រួយបារម្ភថា អាជ្ញាធររុស្ស៊ីអាចនឹងបង្កការរំខានប្រសិនបើពិធីបុណ្យសពមួយនោះធើ្វឡើងជាសាធារណៈ។
សូមបញ្ជាក់ថានៅរដ្ឋកាលីហ្វ័រញ៉ាអាមេរិកលោក ប្រធានាធិបតីអាមេរិក ចូ បៃដិន បានទទួលជួបបុត្រី និង ភរិយាមេម៉ាយរបស់លោក អាឡិចសី ណាវ៉ាល់នី។ លោក ចូ បៃដិន ក៏ថ្លែងមរណៈទុក្ខជាថ្មីចំពោះគ្រួសារសពលោក ណាវ៉ាល់នី ហើយនិងប្រកាសគាំទ្រភរិយាមេម៉ាយរបស់លោក ណាវ៉ាល់នី ដែលបន្តស្មារតីសុឆន្ទៈរបស់ស្វាមី ក្នុងការតស៊ូប្រយុទ្ធដើម្បីសិទ្ធិមនុស្សនិងប្រជាធិបតេយ្យនៅរុស្ស៊ី។ ប្រធានាធិបតីសហរដ្ឋអាមេរិក បានសង្កត់ធ្ងន់ថា លោក ណាវ៉ាល់នី ជាបុរសមានសេចក្តីក្លាហានយ៉ាងខ្លាំង ហើយជាការប្រសើរខ្លាំងណាស់ ដែល បុត្រីនិងភរិយារបស់លោក ណាវ៉ាល់នី នៅតែបន្តវីរភាពនេះ។
ក្រោយពីជំនួបនេះ រដ្ឋបាលរបស់លោក ចូ បៃដិន បានប្រកាសដាក់ទណ្ឌកម្មថ្មីបន្ថែមចំពោះរុស្ស៊ី។ ក្រុមហ៊ុនសហគ្រាសនិងបុគ្គលឯកជនរុស្ស៊ី ចំនួន ៥០០ ត្រូវជាប់ក្នុងបញ្ជីទណ្ឌកម្មអាមេរិក។ នេះបើតាមការបញ្ជាក់របស់អ្នកនាំពាក្យក្រសួងរតនាគារអាមេរិក។ ឈ្មួញ សហគ្រាសនិងបុគ្គលឯកជនរុស្ស៊ី ចំនួន ៥០០ ត្រូវជាប់ទណ្ឌកម្ម ក៏ពីព្រោះតែរកស៊ីនិងធ្វើការពាក់ព័ន្ធនឹងយោធារុស្ស៊ី និងដែល សហរដ្ឋអាមេរិក យល់ថា ពួកគេរួមចំណែកជ្រោមជ្រែងបំពាក់បំប៉ន់«ម៉ាស៊ីនសង្គ្រាមរុស្ស៊ី»។
ទណ្ឌកម្មអាមេរិកនេះ ធ្លាក់មក ក៏ចួនឱកាសដែលសង្គ្រាមឈ្លានពានរុស្ស៊ីនៅអ៊ុយក្រែន ដល់ថ្ងៃគម្រប់ខួប ២ ឆ្នាំ ។ ក្នុងសប្តាហ៍ដែរនេះ ពួកប្រទេសបស្ចិមលោក នាំគ្នាសង្គ្រុប ប្រកាសទណ្ឌកម្មដាក់បន្ថែមប្រឆាំងរុស្ស៊ី។ ក្រសួងយុត្តិធម៌អាមេរិក បានប្រកាសចោទប្រកាន់ផ្លូវច្បាប់ ចំពោះមហាសេដ្ឋីរុស្ស៊ី ជាច្រើននាក់។ ដូចគ្នានេះដែរ អង់គ្លេស បានដាក់ទណ្ឌកម្មចំពោះក្រុមហ៊ុននិងបុគ្គលឯកជន ជាង ៥០។ ទន្ទឹមនោះ ប្រទេសជាច្រើនក្នុងរង្វង់សហភាពអឺរ៉ុប ក៏យល់ព្រមគ្នា ដាក់ទណ្ឌកម្ម ជាកញ្ចប់បន្ថែមទៀត ជាគម្រប់លើកទី១៣ ចំពោះរុស្ស៊ី៕
