នាយករដ្ឋមន្ត្រីថ្មីជម្រុញរឿងប្រាក់ឈ្នួល កម្មករ ឆ្នាំ២០២៤ឲ្យបានមុនភ្ជុំ
29-August-2023 / សេដ្ឋកិច្ច
ភ្នំពេញ៖នាយករដ្ឋមន្ដ្រីលោកពណ្ឌិត ហ៊ុន ម៉ាណែតនៅព្រឹកថ្ងៃទី២៩សីហា នាឱកាសអញ្ជើញចុះជួបកម្មករជិត២ម៉ឺននាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ បានធ្វើការណែនាំដល់ក្រសួងការងារ និងបណ្ដុះបណ្ដាល វីជ្ជាជីវៈត្រូវខិតខំសម្របសម្រួលការពិភាក្សាប្រាក់ឈ្នួលអប្បបរមារបស់ កម្មករ-និយោជិតសម្រាប់ឆ្នាំ២០២៤ តិច ឬច្រើន គឺត្រូវតែឡើង និងដឹងនៅមុនថ្ងៃភ្ជុំបិណ្ឌ។
«ត្រូវធ្វើឲ្យលឿន ធ្វើម៉េចឲ្យប្រជាពលរដ្ឋបានដឹងថា ឆ្នាំ២០២៤ បានឡើងពេលភ្ជុំបិណ្ឌ។ គាត់អាចទៅប្រាប់ឪពុកម្ដាយគាត់ ឆ្នាំក្រោយបានឡើងប៉ុនណោះ ឲ្យបានតិច ឬច្រើន ត្រូវតែឡើងជូនបងប្អូនកម្មករ-កម្មការិនី ត្រូវធ្វើឲ្យបានមុនភ្ជុំ»។ នេះជាប្រសាសន៍របស់នាយករដ្ឋមន្ដ្រី ហ៊ុន ម៉ាណែត។
លោកកិត្តិទេសាភិបាលបណ្ឌិតហ៊ុនម៉ាណែតនាយករដ្ឋមន្ដ្រីថ្មីនៃកម្ពុជា បានលើកឡើងថា វិធានការចំពោះមុខក្រសួងការងារ ត្រូវខិតខំសម្របសម្រួល ការពិភាក្សាប្រាក់ឈ្នួលអប្បបរឲ្យបានល្អ ដោយដោយឈរលើលក្ខណៈវិទ្យាសាស្ដ្រ និងលក្ខណៈវិនិច្ឆ័យ ដែលចែងក្នុងច្បាប់ស្ដីពីប្រាក់ឈ្នួលអប្បបរមាឲ្យបានមុនពេលឈប់សម្រាកបុណ្យភ្ជុំបិណ្ឌ។
សូមបញ្ជាក់ថានៅថ្ងៃទី២៨សីហាក្នុងកិច្ចប្រជុំលើកទី២ នៃការចរចាប្រាក់ឈ្នួលអប្បបរមា មិនទាន់កំណត់តួលេខប្រាក់ឈ្នួលអប្បបរមាជូនកម្មករនិយោជិត សម្រាប់ឆ្នាំ២០២៤ នៅឡើយទេ ដោយរង់ចាំប្រជុំផ្ទៃក្នុង និងពិភាក្សាគ្នាបន្ថែមទៀត សិន។ក្រុមប្រឹក្សាជាតិ ប្រាក់ឈ្នួលអប្បបរមា អាណត្តិទី៣ ដែលមានសមាសភាពស្មើៗគ្នាពីតំណាងភាគីរាជរដ្ឋាភិបាល ភាគីសហជីព និងភាគីនិយោជក បានបើកកិច្ចពិភាក្សាគ្នា១លើករួចមកហើយ កាលពីថ្ងៃទី១៦ ខែសីហា ឆ្នាំ២០២៣ ម្តងហើយនៅថ្ងៃទី២៨ ខែសីហា បានបកកិច្ចពិភាក្សារបស់ខ្លួនជាលើកទី២ ដោយកិច្ចប្រជុំនេះ ម្តងទៀតអស់រយៈពេល ៤ម៉ោង គឺចាប់ពីម៉ោង ៩:០០ព្រឹក ដល់ម៉ោង ១៣:០០នាទីរសៀល តែមិនទាន់មានលទ្ធផល ។
លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ មានប្រសាសន៍ថា ភាគីទាំង៣ដែលមានភាគីរាជរដ្ឋាភិបាល ភាគីសហជីព និងភាគីនិយោជក នោះមិនទាន់បញ្ចេញតួលេខណាមួយនៅឡើយទេ។ លោកបញ្ជាក់ថា ការមិនទាន់កំណត់តួលេខនេះ ដោយភាគីទាំងអស់រង់ចាំការវិភាគស្ថានភាពនៃវិស័យកាត់ដេរ និងតម្រូវការនៃការបញ្ជាទិញនៅតាមបណ្ដាប្រទេសនីមួយៗ ដែលស្ថិតក្នុងដំណាក់កាលចរន្ដសកលនៃការថយចុះតម្រូវការសម្លៀកបំពាក់ ស្បែកជើង និងកាបូបផងដែរ។
លោក អាត ធន់ ប្រធានសហភាពការងារកម្ពុជា បានឱ្យដឹងថាភាគីសហជីពបានកំណត់តួលេខរបស់ខ្លួនរួចហើយ លើតួលេខចំនួន២ គឺមានជាង១២ដុល្លារអាមេរិក និងតួលេខជាង២០ដុល្លារអាមេរិក។ លោកបានបន្ថែមថា នេះគ្រាន់តែជាតួលេខស្នើសុំក្នុងការពិភាក្សានោះទេ ដោយមិនដឹងថា ខាងនិយោជកឯកភាពប៉ុន្មាននោះដែរ គឺរង់ចាំពិភាក្សាគ្នាបន្ដទៀត។ក្រោយពីការពិភាក្សា និងការសម្របសម្រួលនេះហើយ អង្គប្រជុំបានឯកភាពគ្នាកំណត់កិច្ចពិភាក្សាបន្តទៀត នៅថ្ងៃទី៤ ខែកញ្ញា ឆ្នាំ២០២៣ ខាងមុខ។
សូមជម្រាបថា នៅក្នុង២០២៣នេះ ប្រាក់ឈ្នួលអប្បបរមារបស់កម្មករ និយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប គឺមានចំនួន២០០ដុល្លារក្នុងមួយខែ ប្រសិនបើបូក នឹងប្រាក់អត្ថប្រយោជន៍ផ្សេងៗបន្ថែម កម្មករនិយោជិតម្នាក់ អាចទទួលបានប្រាក់ឈ្នួលចន្លោះពី២១៧ទៅ២២៨ដុល្លារក្នុងមួយខែ ៕
