សហពន្ធ័កីឡាជឺជីតស៊ូកម្ពុជាសង្ឃឹមបានមេដាយមាសនៅស៊ីហ្កេម២០២៣បន្ទាប់ពីឈ្នះមេដាយមាសពិភពលោក
03-November-2022 / សុខភាពនិងកីឡា
ភ្នំពេញៈ ជោគជ័យរបស់កីឡាការិនីជម្រើសជាតិកម្ពុជាដែលជាកូនកាត់ពីរសាសន៍កញ្ញា ខាន់ ចេសា ក្នុងការប្រកួតកីឡាជឺជីតស៊ូជើងឯកពិភពលោក Ju-Jitsu World Championship – Abu Dhabi 2022 នៅទីក្រុងអាប៊ុយដាប៊ី ប្រទេសអេមីរ៉ាតអារ៉ាប់រួម ជាក្តីសង្ឃឹមរបស់សហពន្ធ័កីឡាជឺជីតស៊ូកម្ពុជា ក្នុងការឈានទៅដណ្តើមយកមេដាយមាស ពេលកម្ពុជាធ្វើជាម្ចាស់ផ្ទះស៊ីហ្គេម នៅឆ្នាំ ២០២៣។
តាមរយៈការប្រកួតលើវិញ្ញាសា Jiu Jitsu (Newaza) ប្រភេទទម្ងន់ក្រោម ៥២ គីឡូក្រាម កាលពីថ្ងៃទី ២ ខែវិច្ឆិកា ខាន់ ចេសា ធ្វើបានយ៉ាងល្អបំផុតដោយកីឡាការិនីខ្មែរ-អាមេរិករូបនេះ បានយកឈ្នះលើគូប្រកួត ដោយការផ្តួលឱ្យបោះបង់ចោលការប្រកួតដូចគ្នា មុនពេលបន្តយកឈ្នះកីឡាការិនីជើងខ្លាំងរបស់អេស្ប៉ាញ នៅវគ្គផ្តាច់ព្រ័ត្រ ដើម្បីក្លាយជាម្ចាស់មេដាយមាសលើប្រភេទទម្ងន់នេះដ៏គួរឱ្យភ្ញាក់ផ្អើលបំផុត។
ដោយចាប់ឆ្នោតឡើងទៅកាន់ជុំទី២ ដោយស្វ័យវត្តិ ខាន់ ចេសា បានចាប់ផ្តើមការប្រកួតរបស់នាង ដោយការផ្តួលកីឡាការិនីរបស់ហ្វីលីពីន Baluyot Ashley Jeraine ឱ្យបោះបង់ការប្រកួត ត្រឹមរយៈពេល ២ នាទី និង ២៣វិនាទីក្នុងគម្រោងនៃការប្រកួតសរុបចំនួន ៦ នាទី រួចបានបន្តយកឈ្នះលើកីឡាការិនីម្ចាស់ផ្ទះអេមីរ៉ាតអារ៉ាប់រួម Shraim Maitha ដោយការវ៉ៃឱ្យបោះបង់ចោលការប្រកួតដូចគ្នា ក្នុងវគ្គជម្រុះជុំទី៣។
ចំណែកការឡើងទៅជួបកីឡាការិនី Aronov Pnina នៅវគ្គពាក់កណ្តាលផ្តាច់ព្រ័ត្រ ខាន់ ចេសា នៅតែធ្វើបានយ៉ាងល្អ គឺកីឡាការិនីរបស់កម្ពុជារូបនេះ បានប្រើជំនាញចាប់ក្លេរបស់ខ្លួនរហូតលោកអាជ្ញាកណ្តាលបញ្ឈប់ការប្រកួតរបស់កីឡាការិនីរបស់អ៊ីស្រាអែល Aronov Pnina ដោយប្រើពេល៣នាទី និង ១៩ វិនាទី។យ៉ាងណាមិញ សម្រាប់ការប្រកួតវគ្គផ្តាច់ព្រ័ត្រជាមួយកីឡាការិនីជើងខ្លាំងរបស់អេស្ប៉ាញ Matthews Martin Naiomi ដែលបានឈ្នះគ្រប់គូប្រកួតទាំងអស់ដែរនោះ មិនអាចធ្វើអ្វីទៅលើ ខាន់ ចេសា បាននោះទេ ។
រយៈពេល២នាទីចុងក្រោយនេះ ម្ចាស់មេដាយមាសកីឡាអាស៊ី ខាន់ ចេសា បានព្យាយាមគាប និងក្លេ មិនឱ្យ Matthews Martin Naiomi រើបម្រះរួចនោះទេ គឺរហូតដល់ចប់ការប្រកួតតែម្តង ហើយការមានប្រៀបលើការចាប់ក្លេនេះ បានជួយឱ្យ ខាន់ ចេសា ទទួលបានជ័យជម្នះដោយពិន្ទុ និងក្លាយជាម្ចាស់មេដាយមាសយ៉ាងរំភើបបំផុត។សម្តេចនាយករដ្ឋមន្ត្រី ហ៊ុន សែន បានបង្ហោះសារអបអរសាទរទៅដល់វីរកីឡាការិនី ខាន់ ចេសា ភ្លាមៗ បន្ទាប់ពីកញ្ញាដណ្តើមបានមេដាយមាសពិភពលោកជូនជាតិលើកនេះ។ ចំណែកលោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់ ជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) និងលោក ស សុខា រដ្ឋលេខាធិការក្រសួងអប់រំ យុវជន និងកីឡា ក៏បានបង្ហោះសារអបអរសាទរដល់ ចេសា ដូចគ្នា។
ចំណែកប្រធានសហព័ន្ធកីឡាជឺជីតស៊ូកម្ពុជា លោក សេង ប៊ុនសុង បានចាត់ទុកការឈ្នះមេដាយមាសរបស់ ខាន់ ចេសា ថា ជាការបន្ថែមនូវភាពជឿជាក់មួយកម្រិតទៀត សម្រាប់ក្រុមកីឡាជឺជីតស៊ូកម្ពុជា ក្នុងការឈានទៅសម្រេចគោលដៅការឈ្នះបានមេដាយមាស នៅស៊ីហ្គេម ឆ្នាំ ២០២៣ បន្ទាប់ពីពួកគេ រកបានត្រឹមមេដាយសំរឹទ្ធ សម្រាប់ការប្រកួតស៊ីហ្គេម នៅវៀតណាម តែការប្រកួតកាលពីខែឧសភា ឆ្នាំ ២០២២ នេះ ខាន់ ចេសា មិនបានចូលរួមប្រកួតទេ ព្រោះលើសទម្ងន់កំណត់ចំនួន ២ ខាំ។
លោក សេង ប៊ុនសុង បានអះអាងថា ក្រុមជម្រើសជាតិកីឡាជឺជីតស៊ូកម្ពុជា បានប្រឹងប្រែងហ្វឹកហាត់ខ្លាំង សម្រាប់ត្រៀមការប្រកួតស៊ីហ្គេម ឆ្នាំ២០២៣ នៅកម្ពុជា ជាប្រវត្តិសាស្ត្រនេះ ដោយកម្ពុជា បានជួលគ្រូបរទេស មកជួយបង្ហាត់ពង្រឹងសមត្ថភាព និងបច្ចេកទេសដល់អត្តពលិក ដែលធ្វើឱ្យប្រភេទកីឡានេះ កាន់តែមានភាពជឿជាក់ ក្នុងការដណ្តើមយកមេដាយជូនជាតិ។លោក សេង ប៊ុនសុង បានបញ្ជាក់ថា៖ «យើងមានកីឡាករ កីឡាការិនីគ្រប់គ្រាន់ សម្រាប់ត្រៀមការប្រកួតស៊ីហ្គេម ឆ្នាំ ២០២៣ ហើយយើងក៏បានជួលគ្រូបង្វឹកថៃ មកជួយបង្ហាត់ដល់ក្រុមអត្តពលិករបស់យើងផងដែរអ៊ីចឹងយើងសង្ឃឹមថា ប្រភេទកីឡាជឺជីតស៊ូនេះ នឹងទទួលបានជោគជ័យច្រើនពេលស៊ីហ្គេមនៅកម្ពុជា ហើយ ខាន់ ចេសា ជាបេក្ខភាពដ៏ឆ្នើមរបស់យើងដែលអាចនឹងដណ្តើមបានមេដាយមាសជូនជាតិ»៕
