អធិការរងនគរបាលក្រុងព្រះសីហនុ ដែលរងរបួសជើងដោយសារត្រូវជនប្រដាប់អាវុធបាញ់បានអំណោយលើកទឹកចិត្តជាង១ម៉ឺនដុល្លារ!
16-June-2022 / សន្តិសុខសង្គម
ខេត្តព្រះសីហនុ៖ លោក គួច ចំរើន អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តព្រះសីហនុ នៅព្រឹកថ្ងៃទី១៦ ខែមិថុនា ឆ្នាំ២០២២ បានអញ្ជើញសួរសុខទុក្ខមន្ត្រីនគរបាលម្នាក់ដែលរងរបួសជើង ក្នុងពេលចុះបំពេញបេសកកម្មបង្ក្រាបជនប្រដាប់អាវុធ នៅយប់ថ្ងៃទី១៥ ខែមិថុនា ឆ្នាំ២០២២ នៅក្នុងភូមិសាស្ត្រសង្កាត់លេខ៤ ក្រុងព្រះសីហនុ។
មន្ត្រីនគរបាលដែលរងរបួសជើងបានកើតឡើង ក្នុងពេលចុះបំពេញបេសកកម្ម គឺលោកវរសេនីយិ៍ត្រី ងី បេឡា ជាអធិការរង នៃអធិការដ្ឋានក្រុងព្រះសីហនុ បានរងរបួសជើងខាងស្តាំ បច្ចុប្បន្នកំពុងសម្រាកព្យាបាលនៅគ្លីនិកសេតេ(ដើមស្វាយ)។លោក គួច ចំរើន អភិបាលបានពាំនាំនូវការផ្តាំផ្ញើសួរសុខទុក្ខពីសំណាកសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ ជានិច្ចកាលតែងតែយកចិត្តទុកអំពីសុខទុក្ខរបស់កងកំលាំងក្រោមឱវាទ។ ជាមួយគ្នានេះ លោកអភិបាលខេត្ត ក៏បានជូនពរដល់មន្ត្រីនគរបាលរបស់យើងដែលកំពុងសម្រាកព្យាបាលរបួស ឱ្យឆាប់បានជាសះស្បើយ ព្រមទាំងបានផ្តល់ជូនថវិកាឧបត្ថម្ភដូចខាងក្រោម៖-សម្ដេចក្រឡាហោម ស ខេង និងលោកជំទាវ ចំនួន ៥.០០០.០០០៛(ប្រាំលានរៀល)-លោកនាយឧត្តមសេនីយ៍ នេត សាវឿន និង លោកជំទាវ ចំនួន៥.០០០.០០០៛(ប្រាំលានរៀល)-លោក គួច ចំរើន អភិបាល នៃគណៈអភិបាលខេត្តចំនួន៣.០០០ដុល្លារ (បីពាន់ដុល្លារ)-លោកឧត្តមសេនីយ៍ទោ ជួន ណារិន្ទ និងលោកស្រីចំនួន៤.០០០.០០០៛(បួនលានរៀល)-លោកឧកញ៉ា ឡាវ កាំង និងលោកស្រីចំនួន១.០០០ដុល្លារ (មួយពាន់ដុល្លារ) ដើម្បីទុកព្យាបាលរបួស.។
សូមបញ្ជាកថា៖ អធិការរង នគរបាលក្រុងព្រះសីហនុលោកវរសេនីយ៍ឯក តី វិសាល បានរងរបួសធ្ងន់ ដោយសារការផ្ទុះអាវុធ បង្កឡើងដោយក្រុមជនជាតិវៀតណាម នៅម្តុំឆាយណាថោន ស្ថិតក្នុងសង្កាត់លេខ៤ កាលពីយប់ថ្ងៃទី ១៥ខែមិថុនាឆ្នាំ ២០២២។ អធិការនគរបាល ក្រុងព្រះសីហនុ បានប្រាប់អ្នកសារព័ត៌មានថា មុនពេលមានករណីផ្ទុះអាវុធលោកទទួលព័ត៌មានពីជនរងគ្រោះជាអ្នករត់តាក់ស៊ីថា មានជនជាតិវៀតណាម ដកកាំភ្លើងគំរាម។ ក្រោយពីទទួលបានគោលការណ៍ពីលោកឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុដើម្បីធ្វើការឆែកមុខសញ្ញា លោកបានដឹកនាំកម្លាំងសមត្ថកិច្ចចុះទៅដល់គោលដៅដើម្បីសុំឆែកឆេរជនសង្ស័យ ។ប៉ុន្តែពួកគេចំនួន ៥នាក់ មិនព្រមឲ្យសមត្ថកិច្ចឆែកឆេរឡើយ ជនសង្ស័យក៏បានដកអាវុធបាញ់មកលើសមត្ថកិច្ចបណ្ដាលឲ្យអធិការរងក្រុងម្នាក់រងរបួសជើងម្ខាង តែម្តង។
លោកវរសេនីយ៍ឯក តី វិសាល បានបន្ថែមថា ភក្រោយពេលមានការផ្ទុះអាវុធ សមត្ថកិច្ចបានឃាត់ខ្លួនជនជាតិវៀតណាម ចំនួន ៥នាក់ និងដកបានអាវុធខ្លី១ដើម នៅកន្លែងកើតហេតុ។ ជនជាតិវៀតណាម ទាំង៥នាក់ ត្រូវបានសមត្ថកិច្ច កសាងសំណុំរឿងបញ្ជូនទៅតុលាការ ហើយបន្តធ្វើការស្រាវជ្រាវរកមុខសញ្ញា ដែលផ្ដល់អាវុធឱ្យជនសង្ស័យ ដើម្បីចាត់វិធានការបន្តតាមនីតិវិធី។ក្រោយពីមានរឿងខាងលើនៅថ្ងៃទី១៦ខែមិថុនានេះក៏មានជនជាតិចិនម្នាក់បានរងរបួសដោយសារគ្រាប់កាំភ្លើងផងដែរ។
ករណីបាញ់បោះសេរីនេះបានកើតឡើងនៅវេលាម៉ោងប្រមាណជា១រំលងអធ្រាត្រស្ថិតនៅផ្លូវអន្ទង់អាំងសង្កាត់លេខ៣ ក្រុងព្រះសីហនុ។ជុំវិញករណីផ្ទុះអាវុធកក្រើកក្រុងព្រះសីហនុទាំងកណ្ដាលអធ្រាត្រនេះ បើតាមការឲ្យដឹងពីប្រជាពលរដ្ឋស្នាក់នៅក្បែរកន្លែងកើតហេតុ បានរៀបរាប់ឱ្យដឹងថា ពួកគាត់កំពុងតែសម្រាន្ដលង់លក់នៅក្នុងដំណេកក្បែរកន្លែងកើតហេតុនេះ ស្រាប់តែឮសំឡេងបាញ់ដោយកាំភ្លើងជាច្រើនគ្រាប់ ធ្វើឲ្យពួកគាត់ភ្ញាក់ពីដំណេក និងមានការតក់ស្លុតយ៉ាងខ្លាំង ហើយក៏ពុំហ៊ានចេញមកមើលជាចំហនោះទេ ។
ប្រជាពលរដ្ឋបានបន្តថា រហូតបានមួយសន្ទុះ ទើបនាំគ្នាលួចមើលតាមចន្លោះប្រហោងឃើញរថយន្តចំនួន៣គ្រឿង បានបើកចេញពីកន្លែងកើតហេតុ យ៉ាងលឿន ស្នូររថយន្តយ៉ាងកក្រើកដោយបន្សល់ទុកស្នាមឈាម និងសំបកគ្រាប់ជាច្រើនផងដែរ ។ស្រាប់តែមួយសន្ទុះក្រោយមកក៏ឃើញសមត្ថកិច្ចប៉ូលីិសមកដល់កន្លែងកើតហេតុ ពិនិត្យមើលនិងប្រមូលសំបកគ្រាប់ទុក។ក្រោយកើតហេតុ សមត្ថកិច្ច និងអាជ្ញាធរ បានប្រទះឃើញរថយន្តមួយគ្រឿងម៉ាកAudi ដែលគេសង្ស័យថា ជារថយន្តរបស់ក្រុមខ្មាន់កាំភ្លើង បានយកទៅប្លុងចោលនៅស្រុកព្រៃនប់ ដែលមានចម្ងាយប្រមាណ៤៣គីឡូម៉ែត្រពីក្រុងព្រះសីហនុ ។
