សម្តេចក្រឡាហោម ៖ក្រសួង-ស្ថាប័នទាំងអស់ គ្រប់គ្រងមន្ត្រីរបស់ខ្លួន កុំឱ្យប៉ះពាល់គ្រឿងញៀន បើមាន ប្រធានអង្គភាព ក៏រួមចំណែកក្នុងការទទួលខុសត្រូវដែរ!
30-March-2022 / សន្តិសុខសង្គម
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបាន ណែនាំដល់ក្រសួងស្ថាប័នទាំងអស់ ឱ្យប្រឹងប្រែងអនុវត្តការងារប្រយុទ្ធប្រឆាំងគ្រឿងញៀនខុសច្បាប់ ដោយចាត់ទុកការងារនេះជាលក្ខណៈសម្បត្តិមួយអាទិភាព។បើ ករណីមានមន្ត្រីប្រើប្រាស់គ្រឿងញៀន ប្រធានអង្គភាពក៏រួមចំណែកទទួលខុសត្រូវ ក៏ដូចជាការដាក់ពិន័យជាដើម។
ឱកាសអញ្ជើញជាអធីបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ២០២១ និងលើកទិសដៅការងារសម្រាប់ ឆ្នាំ២០២២ របស់អាជ្ញាធរជាតិប្រយុទ្ធប្រឆាំងគ្រឿងញៀន នារសៀលថ្ងៃទី៣០ ខែមីនា ឆ្នាំ២០២២សម្តេចក្រឡាហោម បានបញ្ជាក់ថា “ប្រសិនជាក្នុងវិស័យការពារជាតិ កងទ័ព កងពល វរសេនាតូច វរសេនាធំ រហូតដល់អនុសេនាតូច អនុសេនាធំឡើងទៅ បើពួកគាត់គ្រប់គ្រងខ្លួនមិនបាន ហើយប៉ះពាល់គ្រឿងញៀន មានន័យថា គាត់ប្រយុទ្ធប្រឆាំងគ្រឿងញៀនមិនបានជោគជ័យនោះទេ។ ទន្ទឹមនឹងនេះ ក្រសួងសំខាន់ៗក៏ដូចគ្នាផងដែរ គឺចាប់តាំងពីការិយាល័យ រហូតដល់នាយកដ្ឋាន អគ្គនាយកដ្ឋាន និងក្របខណ្ឌក្រសួងទាំងមូលត្រូវប្រឹងប្រែងអនុវត្តការងារប្រយុទ្ធប្រឆាំងគ្រឿងញៀន ដោយចាត់ទុកការងារនេះជាលក្ខណៈសម្បត្តិមួយ ករណីមានមន្ត្រីប្រើប្រាស់គ្រឿងញៀនប្រធានអង្គភាពក៏រួមចំណែកទទួលខុសត្រូវ ក៏ដូចជាការដាក់ពិន័យ។”
សម្តេចក្រឡាហោម បានណែនាំបន្ថែមទៀតថា ក្រសួង-ស្ថាប័ន អង្គភាព ជាសមាជិករបស់អាជ្ញាធរជាតិប្រយុទ្ធប្រឆាំងគ្រឿងញៀន ឬមិនមែនជាសមាជិក ជាពិសេសកងកម្លាំងប្រដាប់អាវុធគ្រប់ប្រភេទត្រូវបន្តអនុវត្តសកម្មភាពការងារប្រយុទ្ធប្រឆាំងគ្រឿងញៀនក្នុងវិស័យជំនាញរបស់ខ្លួនស្របតាមផែនការ និងគោលនយោបាយយុទ្ធសាស្ត្រ និងផែនការប្រយុទ្ធប្រឆាំងគ្រឿងញៀនខុសច្បាប់លើកទី៧ របស់រាជរដ្ឋាភិបាល។ ក្នុងនោះស្ថាប័ន អង្គភាព ទោះបីជាសមាជិករបស់អាជ្ញាធរជាតិប្រយុទ្ធប្រឆាំងគ្រឿងញៀន ឬមិនមែនជាសមាជិក ក៏ដូចជាវិស័យដទៃទៀតត្រូវការពារប្រយុទ្ធប្រឆាំងគ្រឿងញៀន ការពារបុគ្គលិកមន្ត្រីរាជការរបស់ខ្លួន ក្នុងអង្គភាពឱ្យបានល្អប្រសើរ គឺប្រៀបបាននឹងការចូលរួមប្រយុទ្ធប្រឆាំងគ្រឿងញៀនក្នុងក្របខណ្ឌទូទាំងប្រទេសដែរ។
យោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿង ក្នុងឆ្នាំ២០២១ លទ្ធផលនៃកិច្ចប្រតិបត្តិការបង្ក្រាបបទល្មើសគ្រឿងញៀនសរុប ៦,៣០៨ករណី ស្មើនឹង ៦០,៣០ភាគរយ ធៀបនឹងឆ្នាំ២០២០ មានចំនួន ១០,៤៦១ករណី មានចំនួនតិចជាង ៤,១៥៣ករណី ថយចុះ ៣៩,៧០ភាគរយ។
ការចាប់ខ្លួនជនសង្ស័យសរុបមានចំនួន ១៣,៩៧៩នាក់(ស្រី ៨៣១នាក់) ស្មើនឹង ៦៤,៨២ភាគរយ ធៀបនឹងឆ្នាំ២០២០ មានចំនួន ២១,៥៦៦នាក់។ ក្នុងនោះមានជនសង្ស័យជាជនជាតិខ្មែរចំនួន ១៣,៦១៤នាក់(ស្រី៧៨៩នាក់) និងជនបរទេស ៣៦៥នាក់(ស្រី៤២នាក់) ស្មើនឹង ១៥ជនជាតិ។ គ្រឿងញៀនសរុបរឹបអូសយកបានចំនួន ៤តោន ៦៨៩គីឡូក្រាម និង ៦១១,៤៧ក្រាម ស្មើនឹង១២១ភាគរយ ធៀបនឹងឆ្នាំ២០២០ មានចំនួន ៣តោន ៨៧៥គីឡូក្រាម និង៨៩៨,០០ក្រាម មានចំនួនច្រើនជាង ៨១៣គីឡូក្រាម និង ៧១៣,៤៧ក្រាម កើនឡើងប្រមាណ ២១ភាគរយ។
ដោយឡែកចំនួនអ្នកប្រើប្រាស់គ្រឿងស្ថិតក្រោមការគ្រប់គ្រងនៅឆ្នាំ២០២១ មានចំនួន ១៦,២៦៤នាក់ ក្នុងនោះរួមមានអ្នកញៀនគ្រឿងញៀន ដែលបានធ្វើសមារណកម្មចេញពីមណ្ឌល មានចំនួន ៧,៤៨២នាក់ អ្នកញៀនគ្រឿងញៀន ដែលកំពុងបន្តស្នាក់នៅក្នុងមណ្ឌលមានចំនួន ៣,០៣៨នាក់ អ្នកញៀនគ្រឿងញៀន ដែលបានទទួលសេវាកម្មក្នុងមូលដ្ឋានសុខាភិបាល មានចំនួន ៥,១២៤នាក់ និងអ្នកញៀនគ្រឿងញៀន ដែលបានបញ្ជូនទៅពន្ធនាគារ មានចំនួន ៦០៩នាក់។
លទ្ធផលការងារបង្ក្រាបទីតាំងកែច្នៃគ្រឿងញៀន និងការរឹបអូសសាធាតុគីមីផ្សំ ក្នុងឆ្នាំ២០២១ មន្ត្រីអនុវត្តច្បាប់បានធ្វើការបង្ក្រាបករណីកែច្នៃផលិតគ្រឿងញៀនខុសច្បាប់បានចំនួន ៩ករណី ឃាត់ខ្លួនជនសង្ស័យពាក់ព័ន្ធបានចំនួន ៣៤នាក់ និងចាប់យកសារធាតុគីមីផ្សំបានចំនួន ៦១,៧០០គីឡូក្រាម។
សម្រាប់នៅដើមឆ្នាំ២០២២ មន្ត្រីអនុវត្តច្បាប់បានធ្វើការបង្ក្រាបករណីកែច្នៃផលិតគ្រឿងញៀនខុសច្បាប់ចំនួន ៣ករណី និងចាប់សារធាតុគីមីផ្សំ បានចំនួន ១៦៥,៦០២គីឡូក្រាម ព្រមទាំងឧបករណ៍កែច្នៃផលិតជាច្រើនប្រភេទ។បើយោងតាមតួរលេខខាងលើគ្រឿងញៀនក្នុងស្រុកខ្មែរមិនមានការថយប៉ុន្មានឡើយ!។
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអះអាងថា កម្លាំងសមត្ថកិច្ចកម្ពុជាបានបង្ក្រាបបានសារធាតុផ្សំដើម្បីធ្វើជាគ្រឿងញៀន រហូតដល់ជាង៣០០តោន ហើយនៅពេលនេះស្ថាប័នជំនាញពាក់ព័ន្ធទាំងអស់ កំពុងតែរួមគ្នាគិតគូររកវិធីដើម្បីបន្សាបនូវសារធាតុផ្សំទាំងអស់នោះ មុនយកទៅកម្ទេចចោល។សម្ដេចក្រឡាហោម ស ខេង «យើងបង្ក្រាបបាននៅសល់ជាង៣០០តោន ដែលយើងបង្ខាំងទុកដើម្បីរកអ្នកបច្ចេកទេស ហើយរកសារធាតុដែលអាចបន្សាបនូវសារធាតុគីមីទាំងអស់នេះ មុនយកទៅកម្ទេចចោល»។
សម្ដេចក្រឡាហោម ស ខេង បានគូសបញ្ជាក់ទៀតថា សារធាតុផ្សំទាំងអស់នោះ ត្រូវបាននាំចូលមកប្រទេសកម្ពុជា ដោយស្របច្បាប់ផង និងមិនស្របច្បាប់ផង។ សម្ដេចបានពន្យល់ថា ការនាំចូលដោយស្របច្បាប់មានន័យថា មានអាជ្ញាប័ណ្ណនាំចូលត្រឹមត្រូវ ប៉ុន្ដែស្ថាប័នជំនាញមិនបានតាមដានពិនិត្យច្បាស់លាស់ នៅពេលយកទៅប្រើប្រាស់ឲ្យដល់គោលដៅ។ ចំណុចនេះសម្ដេចធ្លាប់បញ្ជាក់ថា សារធាតុផ្សំទាំងអស់នោះភាគច្រើនមានអាជ្ញាប័ណ្ណជាវត្ថុធាតុដើម ដើម្បីធ្វើជាជីកសិកម្មជាដើម។
សម្រាប់ ការនាំចូលដោយមិនស្របច្បាប់ សម្ដេចក្រឡាហោម ស ខេង បានដាក់ការសង្ស័យថា អាចលួចបន្លំជាមួយទំនិញដែលស្របច្បាប់ ដែលសមត្ថកិច្ចឆែកមិនទាន់ដល់កម្រិត ឬអាចនាំចូលតាមច្រករបៀងផ្សេងៗជាដើម។ ប៉ុន្ដែសម្ដេចគិតថា បើករណីនាំចូលតាមច្រករបៀង មិនបានច្រើនរាប់សិបគីឡូនោះទេ ដូច្នេះមានតែបន្លំជាមួយទំនិញដែលស្របច្បាប់ប៉ុណ្ណោះ។
