ឧបការីរដ្ឋមន្ត្រីការបរទេសអាមេរិកដាក់ឱ្យដំណើរការពិព័រណ៍ «សារមន្ទីរស្ថាបនិកសេរីភាព២៥០» នៅខេត្តសៀមរាប ដើម្បីអបអរសាទរខួបអនុស្សាវរីយ៍លើកទី២៥០ នៃទិវាឯករាជ្យជាតិសហរដ្ឋអាមេរិកបន្ទាប់ពីបានប្រកាសផ្តល់ជំនួយ១២ម៉ឺនដុលា្លរសម្រាប់កម្មវិធីវប្បធម៍

សៀមរាប៖កាលពីថ្ងៃទី២៩ ខែសីហា ឆ្នាំ២០២៦ កម្មវិធីពិព័រណ៍ «សារមន្ទីរស្ថាបនិកសេរីភាព២៥០» (Freedom 250 Founders Museum) ត្រូវបានសម្ពោធដាក់ឱ្យដំណើរការជាផ្លូវការ នៅមជ្ឈមណ្ឌល American Corner នៃសាកលវិទ្យាល័យ សៅស៍អ៊ីសថ៍អេសៀ (USEA) ខេត្តសៀមរាប ដើម្បីអបអរសាទរខួបអនុស្សាវរីយ៍លើកទី២៥០ នៃទិវាបុណ្យឯករាជ្យជាតិរបស់សហរដ្ឋអាមេរិកក្រោមវត្តមានអញ្ជើញចូលរួមពី លោកស្រី Cate Dillon ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចការអប់រំ និងវប្បធម៌ និងវត្តមានឯកឧត្ដម លី សំរិទ្ធ ប្រធានក្រុមប្រឹក្សាខេត្តសៀមរាប លោក លី សារី អភិបាលរងខេត្ត និងលោកបណ្ឌិត មាស សុធី សាកលវិទ្យាធិការនៃសាកលវិទ្យាល័យ សៅស៍អ៊ីសថ៍អេសៀ។ 

ក្នុងអំឡុងពេលបំពេញទស្សនកិច្ចនៅកម្ពុជា ឧបការីរដ្ឋមន្ត្រីការបរទេសអាមេរិក លោកស្រី Cate Dillon បានអញ្ជើញទៅទស្សនាប្រាសាទសំបូរព្រៃគុក ក្នុងខេត្តកំពង់ធំ ។សហរដ្ឋអាមេរិក បានគាំទ្រតំបន់សំបូរព្រៃគុកតាមរយៈកម្មវិធីអប់រំសហគមន៍ និងកម្មវិធីពង្រឹងសន្តិសុខតំបន់នាពេលកន្លងមក។ ជាមួយគ្នានេះ ជំនួយថ្មីដែលបានប្រកាសមានទឹកប្រាក់ចំនួន ១៣២,០០០ ដុល្លារអាមេរិក ក្រោមកម្មវិធី Cultural Property Agreement Implementation Grant (CPAIG) នឹងរួមបញ្ចូលកំណត់ត្រាសារពើភណ្ឌរបស់អាជ្ញាធរជាតិសំបូរព្រៃគុក ទៅក្នុងមូលដ្ឋានទិន្នន័យបេតិកភណ្ឌឌីជីថលជាតិកណ្តាលមួយ ដែលនឹងជួយបង្កើនសមត្ថភាពរបស់តំបន់នេះក្នុងការតាមដាន និងការពារបេតិកភណ្ឌវប្បធម៌របស់ខ្លួន។

លោកស្រី Cate Dillon ឧបការីរដ្ឋមន្ត្រីការបរទេសអាមេរិក បានប្រកាសផ្តល់ជំនួយនេះ សម្រាប់ការអនុវត្តកិច្ចព្រមព្រៀងទ្រព្យសម្បត្តិវប្បធម៌ ជូនដល់ក្រសួងវប្បធម៌ និងវិចិត្រសិល្បៈកម្ពុជា។ ថវិកាជំនួយនេះនឹងត្រូវប្រើប្រាស់ដើម្បីអភិវឌ្ឍប្រព័ន្ធទិន្នន័យបេតិកភណ្ឌឌីជីថលថ្នាក់ជាតិ ដោយធ្វើការបូកបញ្ចូលកំណត់ត្រាសារពើភណ្ឌពីគ្រឹះស្ថានបេតិកភណ្ឌសំខាន់ៗរបស់កម្ពុជា ដើម្បីពង្រឹងសមត្ថភាពរបស់ប្រទេសក្នុងការកត់ត្រា ការពារ និងទាមទារយកមកវិញនូវទ្រព្យសម្បត្តិវប្បធម៌ចល័ត ក្នុងគោលបំណងគាំទ្រដល់កិច្ចព្រមព្រៀងទ្រព្យសម្បត្តិវប្បធម៌ទ្វេភាគីរវាងអាមេរិក និងកម្ពុជា។

នៅពេលសហគមន៍មូលដ្ឋានយល់ដឹងអំពីតម្លៃនៃបេតិកភណ្ឌវប្បធម៌របស់ខ្លួន និងទទួលបានសមត្ថភាពក្នុងការការពារ ពួកគេនឹងក្លាយជាខ្សែការពារដែលមានប្រសិទ្ធភាព និងមាននិរន្តរភាពបំផុត ប្រឆាំងនឹងការជីកកកាយខុសច្បាប់ ការលួច និងការជួញដូរខុសច្បាប់។ តាមរយៈកម្មវិធី CPAIG សហរដ្ឋអាមេរិកមានមោទនភាពក្នុងការផ្តល់អំណាចដល់សហគមន៍មូលដ្ឋានកម្ពុជា ឱ្យក្លាយជាអ្នកថែរក្សា និងអភិរក្សបេតិកភណ្ឌរបស់ពួកគេផ្ទាល់។

ដោយឡែកកម្មវិធីអាហារូបករណ៍ Fulbrightក៏​បាន ដើរតួជាកាតាលីករក្នុងការលើកកម្ពស់ទំនាក់ទំនងអាមេរិក-កម្ពុជាឱ្យកាន់តែរឹងមាំ និងបង្កើនឱកាសសម្រាប់ប្រជាជនកម្ពុជាក្នុងការសិក្សា ដឹកនាំ និងរួមចំណែកដល់អនាគតប្រទេសជាតិផងដែរ។

លោកស្រីភារធារី Aleks Zittle បានអមដំណើរលោកស្រី Cate Dillon ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចការអប់រំ និងវប្បធម៌ ក្នុងដំណើរបំពេញទស្សនកិច្ចលើកដំបូងរបស់លោកស្រីមកកម្ពុជា ដើម្បីផ្ដល់កិត្តិយសទទួលស្វាគមន៍អតីតនិស្សិតអាហារូបករណ៍ Fulbright កម្ពុជា សរុប ១៥០នាក់ រួមមានថ្នាក់ដឹកនាំជាន់ខ្ពស់ ដែលជាអតីតនិស្សិត Fulbright គឺ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ដើម្បីប្រារព្ធខួបលើកទី ៨០ នៃកម្មវិធីអាហារូបករណ៍ Fulbright។(ប្រភពស្ថានទូតអាមេរិក)