អាមេរិកនិងអ៊ីរ៉ង់ប្រជែងគ្នាតាមរកអ្នកបើកយន្តហោះចម្បាំងF-15Eដែលបាត់ខ្លួន បន្ទាប់ពីត្រុវបាញ់ធ្លាក់

ប្រទេសអ៊ីរ៉ង់៖កងកម្លាំងសហរដ្ឋអាមេរិក និងអ៊ីរ៉ង់កំពុងស្វែងរកទាហានអាមេរិកម្នាក់ដែលបាត់ខ្លួន បន្ទាប់ពីយន្តហោះចម្បាំងអាមេរិកពីរគ្រឿងត្រូវបានបាញ់ទម្លាក់នៅក្នុងតំបន់ផ្សេងៗគ្នានៃតំបន់។ មន្រ្តីអាមេរិកម្នាក់បានប្រាប់ BBC ថា ការស្វែងរកទាហានអាមេរិកដែលបាត់ខ្លួនបន្ទាប់ពីលោតចេញពីយន្តហោះចម្បាំងអាមេរិកដែលត្រូវបានអ៊ីរ៉ង់បាញ់ទម្លាក់ គឺមានការរសើបខ្លាំងចំពោះពេលវេលា ខណៈដែលអ៊ីរ៉ង់ក៏កំពុងប្រណាំងប្រជែងដើម្បីស្វែងរកទាហាននោះ ដូចគ្នានឹងក្រុមស្វែងរក និងជួយសង្គ្រោះរបស់សហរដ្ឋអាមេរិក។ 

មន្ត្រីអាមេរិកបានទម្លាយថា ក្នុងយន្តហោះចម្បាំង F-15E Strike Eagle ដែលត្រូវបាញ់ទម្លាក់នោះ មានទាហាន២នាក់ ម្នាក់ជាអ្នកបើក និងម្នាក់ទៀតជាអ្នកជំនាញបាញ់អាវុធ។ យ៉ាងណា ក្នុងនោះ អ្នកបើកយន្តហោះត្រូវបានក្រុមសង្រ្គោះអាមេរិករកឃើញហើយ នៅឡើយតែអ្នកជំនាញបាញ់អាវុធប៉ុណ្ណោះ ដែលបាត់ដំណឹង។

បន្ទាប់ពីមានរបាយការណ៍ថា យន្តហោះចម្បាំងអាមេរិកមួយគ្រឿងត្រូវបានបាញ់ទម្លាក់នៅភាគខាងត្បូងនៃប្រទេស កងឆ្មាំបដិវត្តន៍អ៊ីរ៉ង់បានប្រកាសពីប្រាក់រង្វាន់ប្រហែល៦៦,១០០ដុល្លារអាមេរិក ដែលជាចំនួនទឹកប្រាក់ដែលខ្ពស់ ដល់ពលរដ្ឋណាដែលចាប់ខ្លួនទាហានអាមេរិកម្នាក់ដែលបាត់ខ្លួនទាំងរស់។ អ៊ីរ៉ង់ថាខ្លួនបានបាញ់ទម្លាក់យន្តហោះចម្បាំងអាមេរិកពីរគ្រឿង មួយគ្រឿងជាយន្តហោះចម្បាំង F-15E Strike Eagle ត្រូវបានបាញ់ទម្លាក់នៅខេត្ត Kohgiluyeh និង Boyer-Ahmad ភាគខាងត្បូងអ៊ីរ៉ង់ ហើយអ្នកបើកបរម្នាក់ត្រូវសង្រ្គោះនិងជោគវាសនាម្នាក់ទៀតមិនទាន់ដឹង។ ចំណែកមួយគ្រឿងទៀត គឺយន្តហោះ A-10 Warthog បានធ្លាក់នៅឈូងសមុទ្រពែរ្ស ខណៈអ្នកបើកបរត្រូវបានជួយសង្រ្គោះបន្ទាប់ពីលោតចូលសមុទ្រ។ រីឯ ឧទ្ធម្ភាគចក្ររបស់អាមេរិកដែលជួយសង្គ្រោះមួយគ្រឿងក៏ត្រូវបានបាញ់ទម្លាក់ផងដែរ។

យោងតាមមន្ត្រីអ៊ីរ៉ង់បីនាក់បាននិយាយថា កងឆ្មាំបដិវត្តន៍អ៊ីស្លាម បានបិទខ្ទប់តំបន់មួយនៃខេត្ត Kohgiluyeh និងខេត្ត Boyer-Ahmad ជាកន្លែងដែលពួកគេជឿថាយន្តហោះបានធ្លាក់ ដើម្បីស្វែងរកទាហានអាមេរិក។

លោក Jennifer Kavanagh សមាជិកជាន់ខ្ពស់ និងជានាយកផ្នែកវិភាគយោធានៅ Defense Priorities បាននិយាយថា«អាទិភាពលេខមួយរបស់ពួកគេ(ទាហានអាមេរិក) គឺត្រូវរស់រានមានជីវិត និងជៀសវាងការចាប់ខ្លួន។ ពួកគេត្រូវបានបណ្តុះបណ្តាល ដោយសន្មតថាពួកគេមានសមត្ថភាពរាកាយ និងមិនរងរបួសខ្លាំងពេក ដែលអាចឱ្យពួកគេរើបានដើម្បីព្យាយាមរត់ចេញពីកន្លែងបាញ់ចេញឱ្យបានលឿនតាមដែលអាចធ្វើទៅបាន និងលាក់ខ្លួនដើម្បីឱ្យពួកគេមានសុវត្ថិភាព។ ពួកគេក៏ត្រូវបានបណ្តុះបណ្តាលបច្ចេកទេសរស់រានមានជីវិតផងដែរ ដូច្នេះពួកគេអាចទៅដោយគ្មានអាហារ ឬទឹក ឱ្យបានយូរតាមដែលអាចធ្វើទៅបាន»។

ហេតុការណ៍យន្តហោះចម្បាំងអាមេរិកត្រូវបានបាញ់ទម្លាក់ដោយសត្រូវ គឺជាហេតុការណ៍ដ៏កម្រមួយ ដែលបានកើតឡើងតែពីរបីដងប៉ុណ្ណោះក្នុងរយៈពេលប៉ុន្មានទសវត្សរ៍ចុងក្រោយនេះ។ ការបាត់បង់យន្តហោះចម្បាំង និងកិច្ចខិតខំប្រឹងប្រែងជួយសង្គ្រោះ បានបង្កើតបញ្ហាប្រឈមផ្នែកយោធា និងការទូតសម្រាប់សហរដ្ឋអាមេរិក ដែលនឹងកាន់តែធ្ងន់ធ្ងរឡើងប្រសិនបើជនជាតិអាមេរិកដែលបាត់ខ្លួនត្រូវបានចាប់ខ្លួន។៕

យោធាអ៊ីរ៉ង់បានបង្ហាញថាខ្លួននៅតែមានសមត្ថភាពវាយប្រហារ ក្រោយបានបាញ់ទម្លាក់យន្តហោះចម្បាំង និងដ្រូនអាមេរិក ក្នុងពេលថ្មីៗនេះ។

យន្តហោះចម្បាំងម៉ូដែល F-15E Strike Eagle Fighter បានបង្ហាញខ្លួនជាលើកដំបូងនៅថ្ងៃទី ១១ ខែធ្នូ ឆ្នាំ ១៩៨៦។ តាមការផ្សាយរបស់The New York Time បានឱ្យដឹងថា គិតមកដល់ពេលបច្ចុប្បន្ន ម៉ូដែលនេះមានតម្លៃជិត១០០លានដុល្លារ។ បើប្រៀបធៀបទៅនឹងម៉ូដែលមុនៗ យន្តហោះ F-15E ត្រូវបានតំឡើងដោយមានមុខងារចំនួន២ ដើម្បីអនុវត្តប្រតិបត្តិការប្រយុទ្ធជាច្រើនប្រភេទ។

ពោលវា អាចធ្វើបេសកកម្មប្រយុទ្ធពីលើអាកាស និងវាយប្រហារពីអាកាសទៅដី ទាំងពេលយប់ទាំងថ្ងៃ ទោះក្នុងលក្ខខណ្ឌអាកាសធាតុបែបណាក៏ដោយ ដែលសមទៅនឹងឈ្មោះ ឥន្ទ្រីវាយប្រហារ (Strike Eagle)។ សមត្ថភាពរបស់យន្តហោះនេះក្នុងការហោះហើរចម្ងាយឆ្ងាយ និងផ្ទុកគ្រាប់រំសេវមួយចំនួនធំ បានធ្វើឱ្យវាដើរតួនាទីសំខាន់សម្រាប់សង្គ្រាមផ្លូវអាកាសរបស់សហរដ្ឋអាមេរិកលើប្រទេសអ៊ីរ៉ង់។

វាមានទំហំតូចជាង លឿនជាង និងរហ័សរហួនជាង ដែលធ្វើឱ្យវាក្លាយជាគោលដៅដ៏លំបាកសម្រាប់ការស្ទាក់ចាប់។ ប៉ុន្តែ F-15E Strike Eagle មិនមែនជាយន្តហោះចម្បាំងបំបាំងកាយ ដូចយន្តហោះចម្បាំងជំនាន់ថ្មីៗនោះទេ។ វាអាចឡើងដល់ល្បឿនជិត២ពាន់ម៉ាយក្នុងមួយម៉ោង និងផ្ទុកទម្ងន់លើសពី ២ម៉ឺនផោន។

យន្តហោះចម្បាំង Strike Eagle ត្រូវបានប្រើប្រាស់ក្នុងបេសកកម្មរបស់សហរដ្ឋអាមេរិកនៅក្នុងប្រទេសអ៊ីរ៉ាក់ ស៊ីរី និងលីប៊ី ក្នុងចំណោមកន្លែងផ្សេងៗទៀត។ យោងតាមឯកសារយោធា តួនាទីចម្បងរបស់យន្តហោះ F-15E គឺបេសកកម្មរារាំងផ្លូវអាកាស ដើម្បីបំផ្លាញ បន្សាប ឬពន្យារពេលកងកម្លាំងជើងគោក ឬកងទ័ពជើងទឹករបស់សត្រូវ មុនពេលពួកគេអាចត្រូវបាននាំយកមកប្រឆាំងនឹងកងកម្លាំងមិត្ត។

គួរឱ្យដឹងថា យោធាអាមេរិកបានប្រកាសពីការខាតបង់យន្តហោះជាច្រើនគ្រឿងក្នុងអំឡុងពេលប្រតិបត្តិការរបស់អ៊ីរ៉ង់ រួមទាំងយន្តហោះដឹកប្រេងមួយគ្រឿងដែលបានធ្លាក់នៅអ៊ីរ៉ាក់ និងយន្តហោះចម្បាំង F-15E ចំនួនបីគ្រឿងដែលត្រូវបានបាញ់ទម្លាក់ដោយការបាញ់ច្រលំរបស់គុយវ៉ែត។ សរុបការខូចខាតយន្តហោះចម្បាំង ៣ គ្រឿង អាចមានប្រមាណ ២៧០-៣០០ លានដុល្លារ ឬច្រើនជាងនេះ៕