អតីតប្រធានាធិបតីកូរ៉េលោក Yoon ត្រូវជាប់គុកអស់មួយជីវិត អតីតរដ្ឋមន្ត្រីការពារជាតិជាប់ទោស៣០ឆ្នាំបន្ទាប់ពីប្រពន្ធជាប់១ឆ្នាំកន្លះ
19-February-2026 / ព័ត៌មានអន្តរជាតិ
ប្រទេសកូរ៉េ៖អតីតប្រធានាធិបតីកូរ៉េខាងត្បូង លោកយន់សុកយឹល (Yoon Suk Yeol )ត្រូវបានតុលាការសម្រេចផ្ដន្ទាទោសដាក់ពន្ធនាគារអស់មួយជីវិត ទាក់ទងនិងទោសពីបទដឹកនាំការបះបោរ ក្នុងអំឡុងពេលប្រកាសច្បាប់អាជ្ញាសឹកកាលពីថ្ងៃទី៣ខែធ្នូឆ្នាំ២០២៤។ នេះបើតាមការផ្សាយរបស់ BBC នាថ្ងៃទី១៩ខែកុម្ភៈឆ្នាំ២០២៦។
សាលាដំបូងក្រុងសេអ៊ូលបានប្រកាសសាលក្រមជាប្រវត្តិសាស្ត្រនេះ ដោយសន្និដ្ឋានថា សកម្មភាពរបស់លោកយុន( Yoon )រួមទាំងការបញ្ជូនកងទ័ពប្រដាប់អាវុធទៅកាន់វិមានសភា គឺជាការវាយប្រហារដោយផ្ទាល់ទៅលើគ្រឹះប្រជាធិបតេយ្យរបស់ជាតិ ដើម្បីរារាំងដំណើរការសភា និងចាប់ខ្លួនគូប្រជែងនយោបាយ។
ជាមួយគ្នានឹងអតីតប្រធានាធិបតី មន្ត្រីជាន់ខ្ពស់ជាច្រើនរូបទៀតនៅក្នុងរដ្ឋបាលរបស់លោក ក៏ទទួលបានការផ្ដន្ទាទោសដាក់ពន្ធនាគារធ្ងន់ធ្ងរផងដែរ។ អតីតរដ្ឋមន្ត្រីការពារជាតិ លោកគិមយុងហ៊ីយុន(kim Yong-hyun)ក៏ ត្រូវបានកាត់ទោសដាក់ពន្ធនាគារ៣០ឆ្នាំ ចំណែកអតីតមេបញ្ជាការចារកម្ម លោករ៉ូសាងវ៉ុង( Roh Sang-won )ទទួលទោស១៨ឆ្នាំ។ ចំពោះមន្ត្រីប៉ូលិសវិញ មានអតីតអគ្គស្នងការនគរបាលជាតិ លោកចូជីហូ( Cho Ji-ho) ត្រូវកាត់ទោស១២ឆ្នាំ, អតីតស្នងការនគរបាលក្រុងសេអ៊ូល លោកគីមបុងស៊ិក( Kim Bong-sik )ទទួលទោស១០ឆ្នាំ និងលោកម៉ុកហ៊ីយុនតែ( Mok Hyun-tae) អតីតប្រធានសន្តិសុខសភា ជាប់ទោស៣ឆ្នាំ។
យោងតាម CNN ចៅក្រមប្រធានក្រុមប្រឹក្សាជំនុំជម្រះ លោក Ji Gwi-yeon បានសម្រេចថា ការប្រកាសរបស់លោក Yoon កាលពីថ្ងៃទី៣ធ្នូ ដែលមានការប្រើប្រាស់កងទ័ពប្រដាប់អាវុធ និងឧទ្ធម្ភាគចក្រដើម្បីសម្រុកចូលសភា គឺជាការប៉ុនប៉ងយ៉ាងច្បាស់ក្នុងការធ្វើឲ្យស្ថាប័ននីតិបញ្ញត្តិលែងដំណើរការ និងដើម្បីចាប់ខ្លួនគូប្រជែងនយោបាយ។ តុលាការក៏បានរកឃើញថា អតីតរដ្ឋមន្ត្រីការពារជាតិ លោក Kim Yong-hyun មានទោសផងដែរ ចំពោះតួនាទីយ៉ាងសំខាន់ក្នុងការអនុវត្តបទបញ្ជាយោធានេះ។
សាលក្រមនេះធ្វើឡើងបន្ទាប់ពីព្រឹត្តិការណ៍ដ៏ច្របូកច្របល់ក្នុងឆ្នាំ២០២៤ នៅពេលដែលលោក Yoon បានប្រកាសច្បាប់អាជ្ញាសឹកតាមកញ្ចក់ទូរទស្សន៍ទាំងកណ្តាលអាធ្រាត្រ ដោយលើកឡើងពីវត្តមាន «កម្លាំងប្រឆាំងរដ្ឋ» ដែលគាំទ្រកូរ៉េខាងជើង។ បទបញ្ជានេះត្រូវបានលុបចោលវិញក្នុងរយៈពេល៦ម៉ោង បន្ទាប់ពីពលរដ្ឋ និងសមាជិកសភាបាននាំគ្នាខ្ទប់ច្រកចូលសភា ហើយបោះឆ្នោតជាឯកច្ឆន្ទដើម្បីរារាំងបទបញ្ជានោះ។ ចៅក្រមបានកត់សម្គាល់ថា ចេតនារបស់លោក Yoon គឺចង់ចាប់ខ្លួនមេដឹកនាំគណបក្សប្រឆាំង និងសូម្បីតែមេដឹកនាំគណបក្សកាន់អំណាចរបស់លោកផ្ទាល់ គឺលោក Han Dong-hoon។
ក្រុមអ្នកគាំទ្រលោក Yoon បានប្រមូលផ្តុំគ្នានៅខាងក្រៅតុលាការក្រុងសេអ៊ូល ដើម្បីតាមដានការផ្សាយផ្ទាល់នៃសវនាការនេះ។ សេចក្តីសម្រេចរបស់តុលាការបានបញ្ជាក់ថា សកម្មភាពបញ្ជូនកងទ័ពប្រដាប់អាវុធទៅកាន់វិមានសភា គឺជាទង្វើបះបោរដែលធ្វើឲ្យប៉ះពាល់យ៉ាងធ្ងន់ធ្ងរដល់សសរស្តម្ភប្រជាធិបតេយ្យរបស់ជាតិ។
សាលក្រមនេះបានបិទបញ្ចប់ទំព័រដ៏ច្របូកច្របល់បំផុតនៃវិបត្តិរដ្ឋធម្មនុញ្ញ ដែលកូរ៉េខាងត្បូងមិនធ្លាប់ជួបប្រទះក្នុងរយៈពេលជាច្រើនទសវត្សរ៍មកនេះ។ តុលាការបានបញ្ជាក់ថា ជនជាប់ចោទទាំងអស់មានរយៈពេលមួយសប្តាហ៍ដើម្បីធ្វើការប្តឹងឧទ្ធរណ៍ប្រឆាំងនឹងសាលក្រមនេះ។
សូមបញ្ជាក់ដែរថាតុលាការកូរ៉េខាងត្បូងនាពេលថ្មីៗនេះក៏សម្រេចកាត់ទោសអតីតស្ត្រីទីមួយលោកស្រី គីម ឃុនហ៊ី (Kim Keon Hee ) ឲ្យជាប់ពន្ធនាគារមួយឆ្នាំ និងប្រាំបីខែ បន្ទាប់ពីរកឃើញថាលោកស្រីមានទោសពីបទទទួលយកសំណូកពីមន្ត្រីក្នុងព្រះវិហារ Unification ដើម្បីជាថ្នូរនឹងការអនុគ្រោះនយោបាយ។
យោងតាមសេចក្តីសម្រេចរបស់តុលាការលោកស្រីត្រូវបានចោទប្រកាន់ថាលោកស្រីបានទទួលយកកាបូប Chanel ប្រណីត និងខ្សែកពេជ្រពីព្រះវិហារ Unification Church របស់កូរ៉េខាងត្បូងដែលមានតម្លៃប្រមាណ ៨០ លានវ៉ុន (៥៦,១០៦ ដុល្លារ) ជាថ្នូរនឹងការអនុគ្រោះផ្នែកនយោបាយ។ករណីពុករលួយតូចមួយនេះហើយដែលអូសទាញលោកយូនសុខយឹលឲ្យបាត់ប្រជាប្រីយ៍ភាពនិងធ្លាក់ចូលក្នុងវិបត្តដែលចុងក្រោយនាំឲ្យលោកជាប់គុក។
សូមបញ្ជាក់ថានៅក្នុងប្រទេសកូរ៉េខាងត្បូងមានប្រធានាធិបតីជាច្រើននាក់ត្រូវបានជាប់គុកជាបន្តបន្ទាប់ដោយសារការប្រព្រឹត្តកំហុសពេលដឹកនាំដែលបង្ហាញពីការបែងចែកអំណាចគ្រប់គ្រងតាមបែបប្រជាធិបតេយ្យបានល្អ។
