បញ្ជូនជនជាតិកូរ៉េជាង៦០នាក់ ជាប់ពាក់ព័ន្ធការឆបោកតាមអនឡាញ ឱ្យត្រឡប់ទៅស្រុកវិញ

ភ្នំពេញ៖ មន្ត្រីនៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃប្រទេស កម្ពុជានៅយប់ថ្ងៃទី១៧ ខែតុលា ឆ្នាំ២០២៥ បានបញ្ចូនជនជាតិកូរ៉េសរុបចំនួន ៦៤នាក់ ក្នុងនោះមានស្ត្រីចំនួន៥នាក់ ដែលជាប់ពាក់ព័ន្ធនឹងការឆបោកតាម ប្រព័ន្ធបច្ចេកវិទ្យា ឱ្យត្រឡប់ទៅប្រទេសដើមរបស់ពួកគេវិញ ដើម្បីឱ្យរដ្ឋាភិបាលសាធារណរដ្ឋកូរ៉េ ចាត់វិធានការ និងអនុវត្តនីតិវិធីបន្ត។  

លេខាធិការដ្ឋាននៃគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាហៅកាត់ថា គ.ប.ឆ.ប. បានបញ្ជាក់ថា ការបញ្ជូនជនជាតិ បរទេសឱ្យត្រឡប់ទៅប្រទេសខ្លួនវិញបន្ទាប់ពីសមត្ថកិច្ចរកឃើញថាមានការជាប់ពាក់ព័ន្ធនឹងការឆបោកអនឡាញ គឺជាផ្នែកនៃការអនុវត្តនីតិវិធីច្បាប់ និងប្រព្រឹត្តទៅក្នុងក្របខណ្ឌនៃយន្តការដែលបានដាក់ចេញដោយរាជរដ្ឋាភិបាលកម្ពុជា ហើយដែលក្រសួងស្ថាប័ន សមត្ថកិច្ចជំនាញ តែងតែអនុវត្តយ៉ាង ម៉ឺងម៉ាត់ ដើម្បីទប់ស្កាត់ និងប្រយុទ្ធប្រឆាំងការឆបោកតាម ប្រព័ន្ធបច្ចេកវិទ្យានេះ។

កន្លងមក កម្ពុជាបានបញ្ជូនជនជាតិកូរ៉េចំនួន ១៨០នាក់ ឱ្យត្រឡប់ទៅ សាធារណរដ្ឋកូរ៉េវិញរួចមកហើយ។ រាជរដ្ឋាភិបាលកម្ពុជាតែងតែ បានស្នើការសហការពីអាជ្ញាធរសមត្ថកិច្ចនៃរដ្ឋាភិបាលកូរ៉េ ដើម្បីមកទទួល ជនជាតិរបស់ខ្លួនដែលជាប់ពាក់ព័ន្ធនឹងការឆបោកតាមប្រព័ន្ធបច្ចេកវិទ្យាឱ្យត្រឡប់ទៅប្រទេសខ្លួនវិញ ដើម្បីបន្តចាត់វិធានការ។ ជាងនេះទៀត រាជរដ្ឋាភិបាលកម្ពុជា តាមរយៈលេខាធិការដ្ឋាន គ.ប.ឆ.ប. បានស្នើសុំ កិច្ចសហការជាមួយសមត្ថកិច្ចជំនាញនៃរដ្ឋាភិបាលសាធារណរដ្ឋកូរ៉េ ក្នុងការបន្តស្រាវជ្រាវស៊ីជម្រៅ ដើម្បីឆ្ពោះទៅវែកមុខបណ្តាញអង្គការចាត់តាំង និងប្រភពដែលនៅពីក្រោយការឆបោកអនឡាញនេះ ដោយផ្អែកលើវត្ថុតាង ដែលអាជ្ញាធរកម្ពុជារឹបអូសបាន ក្នុងប្រតិប្រតិបត្តិការពីបណ្តារាជធានីខេត្ត នៃព្រះរាជាណាចក្រកម្ពុជា។

សូមបញ្ជាក់ថាប៉ុន្មានថ្ងៃនេះប្រធានាធិបតីកូរ៉លោកលីចែម្យុងបានបញ្ជូនលោកស្រីគិមចេណាអនុរដ្ឋមន្ត្រីក្រសួងការបរទេសនិងអគ្គស្នងការរងនគរបាលកូរ៉េឲ្យមកជួបថ្នាក់ដឹកនាំកម្ពុជាដើម្បីរកកិច្ចសហប្រតិបត្តិការបង្ក្រាបបទល្មើសឆបោកតាមអនឡាញបន្ទាប់ពីមានយុវជកូរ៉េម្នាក់ត្រូវបានក្រុមឆបោកចិននាំមកធ្វើទារុណកម្មសម្លាប់នៅលើភ្នំបូកគោ។ទាក់ការបញ្ជូនក្រុមឧក្រឹដ្ឋជនឆបោកតាមអនឡាញចេញពីស្រុកខ្មែរនេះដែរលោកស សុខាឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានឲ្យដឹងថាកម្ពុជានឹងដាក់ចេញបញ្ជីរឈ្មោះហាមឃាត់ពួកគេមិនឲ្យវិលត្រឡប់ចូលស្រុកខ្មែរវិញផងដែរ។សូមបញ្ចាក់ថាកន្លងមកកម្ពុជាបានអះអាងថាបានបញ្ជូនមនុស្សចេញពីស្រុកខ្មែរជាង១ម៉ឺននាក់ហើយតែមិនមានដាក់ពូកគេក្នុងបញ្ជីខ្មៅហាមឃាត់មិនឲ្យចូលស្រុកខ្មែរវិញនោះទេ៕