បន្ទាប់ពីជួបហ្សេឡិនស្គីនិងប្រទេសធំៗនៅអឺរ៉ុបត្រាំថាជំនួបពូទីននិងហ្សេឡិនស្គីអាចធ្វើនៅហុងគ្រីក្នុងពេលដែលរុស្ស៊ីនៅអលឯក!
20-August-2025 / ព័ត៌មានអន្តរជាតិ
អាមេរិក៖នៅតុប្រជុំអង្គុយទល់មុខគ្នានៅសេតវិមាន ដែលមានប្រធានាធិបតីបារាំង និងនាយករដ្ឋមន្ត្រីអ៊ីតាលីអង្គុយអមលោកដូណាល់ ត្រាំ និងក្រោមការតាមដានរបស់អ្នកសារព័ត៌មាន ថ្នាក់ដឹកនាំលោកខាងលិចបានបញ្ចេញយោបល់បន្តបន្ទាប់គ្នា ទាក់ទងនឹងការចង់បានរបស់ពួកគេ។បរិយាកាសនៅថ្ងៃប្រជុំនេះមានភាពកក់ក្តៅជាងការប្រជុំនៅការិយាល័យរាងពងក្រពើដែលលោក ត្រាំ និងអនុប្រធានាធិបតី JD Vance បានរិះគន់មេដឹកនាំអ៊ុយក្រែនជាសាធារណៈកាលពីខែកុម្ភៈ។ប៉ុន្តែ កិច្ចព្រមព្រៀងសន្តិភាព មើលទៅហាក់ដូចជានៅឆ្ងាយនៅឡើយ។
នៅពេលកិច្ចប្រជុំមិនទាន់ចប់សព្វគ្រប់ផង លោកដូណាល់ ត្រាំបានដកខ្លួនចេញទៅទូរស័ព្ទជាមួយលោកពូទីន ដើម្បីនាំយកពាក្យ ការទទូចចង់បានពីភាគីអ៊ុយក្រែន និងអឺរ៉ុប។ នៅក្រោយជំនួបតាមទូរស័ព្ទប្រមាណ ៤០នាទីមក លោកត្រាំបាននិយាយថា លោកពូទីនយល់ព្រមបើកការចរចាទ្វេភាគីជាមួយមេដឹកនាំអ៊ុយក្រែន។ បើតាមនាយករដ្ឋមន្ត្រីអាល្លឺម៉ង់ លោកដូណាល់ត្រាំបាននិយាយប្រាប់ថ្នាក់ដឹកនាំអឺរ៉ុបថា ជំនួបទ្វេភាគី រវាងលោកពូទីន និងលោកហ្សេឡេនស្គីនឹងអាចរៀបចំឡើងនៅ២សប្តាហ៍ខាងមុខ។
ប្រធានាធិបតីអ៊ុយក្រែន នៅក្នុងសន្និសីទកាសែតនៅក្រៅសេតវិមានបាននិយាយថា នៅក្នុងកិច្ចព្រមព្រៀងស្តីពីការធានាសន្តិសុខ អ៊ុយក្រែននឹងទិញសព្វាវុធ តម្លៃ៩០ពាន់លានដុល្លារពីអាមេរិក។ អ៊ុយក្រែននឹងប្រើកញ្ចប់លុយបានពីអឺរ៉ុបទៅទិញអាវុធរបស់អាមេរិក។ ផ្ទុយមកវិញ អាមេរិកនឹងទិញដ្រូនរបស់អ៊ុយក្រែន ដើម្បីបង្គ្រប់តម្រូវការរបស់កងទ័ពអាមេរិក៕
ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រាប់ប្រធានាធិបតី លោក Volodymyr Zelensky ថា សហរដ្ឋអាមេរិកនឹងជួយធានាសន្តិសុខរបស់អ៊ុយក្រែននៅក្នុងកិច្ចព្រមព្រៀងណាមួយដើម្បីបញ្ចប់សង្គ្រាមរបស់រុស្ស៊ីនៅអ៊ុយក្រែន ទោះបីជាវិសាលភាពនៃជំនួយនេះមិនទាន់ច្បាស់លាស់ភ្លាមៗក៏ដោយ។សូមបញ្ចាក់ថា តាំងពីដំបូងទី លោកដូណាល់ ត្រាំបានពន្លត់ក្តីស្រមៃរបស់អ៊ុយក្រែន ដោយថា អ៊ុយក្រែននឹងមិនអាចចូលជាសមាជិករបស់អូតង់បានទេ។ ប៉ុន្តែ ក្រោយជួបលោកពូទីន នៅអាឡាស្កា លោកត្រាំបាននិយាយប្រាប់ប្រធានាធិបតីអ៊ុយក្រែនថា អ៊ុយក្រែនអាចទទួលបានការធានាសន្តិសុខដែលមានលក្ខណៈស្រដៀងគ្នានឹងមាត្រាទី៥របស់អូតង់។
លោក ត្រាំ បានប្រាប់អ្នកយកព័ត៌មានថា៖ «នៅពេលនិយាយអំពីសន្តិសុខ នឹងមានជំនួយជាច្រើន»។ លោកបន្ថែមថា បណ្តាប្រទេសអឺរ៉ុបនឹងចូលរួមហើយ«ពួកគេជាខ្សែការពារទីមួយ ព្រោះពួកគេនៅទីនោះ ប៉ុន្តែយើងនឹងជួយពួកគេ»។លោក Zelensky បានសាទរចំពោះការសន្យានេះថាជា ជំហានទៅមុខដ៏សំខាន់ ដោយបន្ថែមថា ការធានានេះនឹងត្រូវចងក្រងជាលាយលក្ខណ៍អក្សរក្នុងរយៈពេលមួយសប្តាហ៍ទៅ១០ថ្ងៃខាងមុខ ហើយបាននិយាយថា អ៊ុយក្រែនបានយល់ព្រមជួយទិញអាវុធរបស់សហរដ្ឋអាមេរិកប្រមាណ ៩០ ពាន់លានដុល្លារ។
ទោះបីយ៉ាងណានៅមុនកិច្ចចរចាចាប់ផ្តើម ក្រសួងការបរទេសរុស្ស៊ីបានបដិសេធការដាក់ពង្រាយទ័ពពីបណ្តាប្រទេសណាតូដើម្បីជួយធានាកិច្ចព្រមព្រៀងសន្តិភាព ដែលបន្ថែមភាពស្មុគស្មាញដល់ការផ្តល់ជូនរបស់លោក ត្រាំ។
ទាំងលោក ត្រាំ និងលោក Zelensky បាននិយាយថា ពួកគេសង្ឃឹមថាការជួបជុំនៅថ្ងៃនេះនឹងនាំទៅរកការចរចាបីភាគីជាមួយលោក ពូទីន ដែលកងកម្លាំងរបស់លោកកំពុងបន្តឈានទៅមុខយឺតៗនៅភាគខាងកើតនៃអ៊ុយក្រែន។
នៅក្នុងការបង្ហោះលើបណ្តាញសង្គមនៅយប់ថ្ងៃចន្ទ លោក ត្រាំ បាននិយាយថា លោកបានទូរស័ព្ទទៅមេដឹកនាំរុស្ស៊ី និងបានចាប់ផ្តើមរៀបចំការជួបរវាងលោក ពូទីន និងលោក Zelensky ដែលនឹងត្រូវបន្តដោយកិច្ចប្រជុំកំពូលបីភាគីរវាងប្រធានាធិបតីទាំងបី។
ខណៈដែលវិមានក្រឹមឡាំងមិនទាន់បានប្រកាសជាសាធារណៈនូវការយល់ព្រមរបស់ខ្លួន មន្ត្រីជាន់ខ្ពស់របស់រដ្ឋបាលសហរដ្ឋអាមេរិកម្នាក់បាននិយាយថា ការជួបគ្នារវាងលោក ពូទីន និងលោក Zelensky អាចនឹងធ្វើឡើងនៅហុងគ្រី។ អ្នកទាំងពីរនឹងជួបគ្នាក្នុងរយៈពេលពីរសប្តាហ៍ខាងមុខ។ នេះបើយោងតាមអធិការបតីអាល្លឺម៉ង់ លោក Friedrich Merz៕ប្រធានាធិបតីសហរដ្ឋអាមេរិកលោក ដូណាល់ ត្រាំ បាននិយាយកាលពីថ្ងៃទី១៩ ខែសីហាថាលោកបានបដិសេធមិនដាក់កងទ័ពអាមេរិកចូលទៅក្នុងទឹកដីអ៊ុយក្រែនទេ ប៉ុន្តែសហរដ្ឋអាមេរិកអាចនឹងផ្តល់ជំនួយខាងផ្លូវអាកាសដែលជាផ្នែកមួយនៃកិច្ចព្រមព្រៀងដើម្បីបញ្ចប់សង្គ្រាមរបស់រុស្ស៊ីនៅក្នុងប្រទេសអ៊ុយក្រែន។
នៅក្នុងបទសម្ភាសន៍ជាមួយកម្មវិធី Fox News លោក ត្រាំ បាននិយាយថា នៅពេលនិយាយអំពីសន្តិសុខ មេដឹនាំអឺរ៉ុបមានឆន្ទៈក្នុងការដាក់កងទ័ពនៅលើដី។ ចំណែកយើងមានឆន្ទៈជួយពួកគេក្នុងរឿងខ្លះៗ ជាពិសេសប្រហែលជាការគាំទ្រតាមអាកាស។លោក ត្រាំ បានទទួលស្គាល់ថា ប្រធានាធិបតីរុស្ស៊ីលោក Vladimir Putin ប្រហែលជាមិនចង់ធ្វើកិច្ចព្រមព្រៀងនោះទេ ដោយលោកបាននិយាយ យើងនឹងស្វែងយល់អំពីប្រធានាធិបតី Putin ក្នុងរយៈពេលពីរបីសប្តាហ៍ខាងមុខនេះ។
ភាពជាក់លាក់នៃជំនួយយោធារបស់សហរដ្ឋអាមេរិកចំពោះអ៊ុយក្រែនក្រោមកិច្ចព្រមព្រៀងសន្តិភាពគឺនៅតែមិនច្បាស់លាស់។ការគាំទ្រតាមផ្លូវអាកាសអាចមានច្រើនទម្រង់ ដូចជាប្រព័ន្ធការពារមីស៊ីល ឬយន្តហោះចម្បាំងដែលពង្រឹងនៅតំបន់គ្មានការហោះហើរ។លោកស្រី Karoline Leavitt អ្នកនាំពាក្យរដ្ឋបាលលោក ត្រាំ បានបញ្ជាក់ថា ការគាំទ្រតាមផ្លូវអាកាសរបស់សហរដ្ឋអាមេរិកគឺជាជម្រើស និងលទ្ធភាពមួយដែលអាចធ្វើបាន ប៉ុន្តែលោក ត្រាំ មិនបានផ្តល់ព័ត៌មានលម្អិតណាមួយឡើយ។យ៉ាងណានៅក្នុងបទសម្ភាសន៍មួយផ្សេងទៀត លោក ត្រាំ បានពិពណ៌នារបៀបចរចារបស់ខ្លួន នៅក្នុងការប៉ុនប៉ងបញ្ចប់សង្គ្រាមថា «ប្រហែលជាសភាវគតិច្រើនជាងដំណើរការ»មានន័យធាគ្រាន់តែជាការគិត?។
កងទ័ពអាកាសអ៊ុយក្រែនបាននិយាយថា បន្ទាប់ពីកិច្ចប្រជុំកាលពីថ្ងៃទី១៨ ខែសីហា រុស្ស៊ីបានចាប់ផ្តើមការវាយប្រហារតាមផ្លូវអាកាសដ៏ធំបំផុតក្នុងរយៈពេលជាងមួយខែមកលើប្រទេសអ៊ុយក្រែន ដោយយន្តហោះគ្មានមនុស្សបើកចំនួន ២៧០គ្រឿង និងមីស៊ីលចំនួន ១០ គ្រាប់។ក្រសួងថាមពលបាននិយាយថា ការវាយប្រហារនេះបានបង្កឲ្យមានអគ្គិភ័យធំ នៅកន្លែងផលិតថាមពលក្នុងតំបន់ Poltava កណ្តាលប្រទេសអ៊ុយក្រែន ដែលជារោងចក្រចម្រាញ់ប្រេងតែមួយគត់របស់ប្រទេសអ៊ុយក្រែន។អ្នកវិភាគបាននិយាយថា មានមនុស្សជាង ១លាននាក់ត្រូវបានសម្លាប់ ឬរងរបួសនៅក្នុងសង្គ្រាមនេះ ដែលចាប់ផ្តើមតាំងពីការឈ្លានពានទាំងស្រុងរបស់រុស្ស៊ីលើអ៊ុយក្រែន នៅខែកុម្ភៈ ឆ្នាំ ២០២២៕
