នាយករដ្ឋមន្ត្រីម៉ាឡេស៊ី អំពាវនាវឱ្យប្រទេសក្នុងតំបន់អាស៊ានពង្រឹងពាណិជ្ជកម្មរវាងគ្នានិងគ្នា
10-July-2025 / ព័ត៌មានអន្តរជាតិ
ម៉ាឡេស៊ី៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) នៅថ្ងៃពុធ (ទី៩ ខែកក្កដា) បានជំរុញបណ្ដាប្រទេសក្នុងតំបន់អាស៊ីអាគ្នេយ៍ ហៅកាត់ថាអាស៊ាន ឱ្យពង្រឹងពាណិជ្ជកម្មរវាងគ្នានិងគ្នា ជាពិសេសនៅពេលដែលស្ថានភាពសេដ្ឋកិច្ចពិភពលោកកាន់តែមានភាពមិនច្បាស់លាស់ ។
ការអំពាវនាវរបស់លោកអាន់វ៉ា ធ្វើឡើងនៅខណៈរដ្ឋមន្ត្រីការបរទេសអាស៊ាន កំពុងជួបប្រជុំគ្នា ដោយកិច្ចប្រជុំនេះ ធ្វើឡើងនៅស្របពេលមានក្ដីព្រួយបារម្ភសារជាថ្មីអំពីពន្ធគយពាណិជ្ជកម្មរបស់សហរដ្ឋអាម៉េរិក និងភាពតានតឹងរវាងប្រទេសថៃ និងកម្ពុជាជុំវិញបញ្ហាព្រំដែន ដែលអាចប៉ះពាល់ដល់ការរួបរួមគ្នានៅក្នុងតំបន់ ។
ទោះបីជាលោកអាន់វ៉ា (Anwar) មិនបានលើកឡើងពីឈ្មោះរបស់សហរដ្ឋអាមេរិកដោយផ្ទាល់ក៏ដោយ ក៏លោកបានរិះគន់ចំពោះសកម្មភាពនៃការកំណត់ពន្ធគយ, ការរឹតបន្តឹងចំពោះការនាំចេញ និងការដែលត្រូវគេយកទៅធ្វើជាឧបករណ៍នៅក្នុងជម្លោះភូមិសាស្ត្រនយោបាយជាដើម ។
កិច្ចប្រជុំអាស៊ាន ត នឹងបន្តដោយកិច្ចប្រជុំបន្ថែមទៀតរវាងអាស៊ាន និងដៃគូពាណិជ្ជកម្មពិភពលោកសំខាន់ៗ រួមមានសហរដ្ឋអាម៉េរិក ចិន ជប៉ុន រុស្ស៊ី ឥណ្ឌា និងសហភាពអឺរ៉ុប ។ រដ្ឋមន្ត្រីការបរទេសអាមេរិក លោក ម៉ារកូ រ៉ូប៊ីយ៉ូ ត្រូវអញ្ជើញមកដល់ម៉ាឡេស៊ី នៅថ្ងៃព្រហស្បតិ៍ ទី១០ កក្កដាដើម្បីចូលរួមក្នុងកិច្ចប្រជុំអាស៊ាននេះដែរ ជាមួយបណ្តាសម្ព័ន្ធមិត្តផ្សេងទៀតដូចជាជប៉ុន កូរ៉េខាងត្បូង ព្រមទាំងចិន។ មុនពេលមកដល់ អ្នកទទួលខុសត្រូវអាមេរិករូបនេះ បានបញ្ជាក់ថា វ៉ាស៊ីនតោនចាត់ទុកអាស៊ីខាងកើត និងអាស៊ីអាគ្នេយ៍ជាអាទិភាព។ ប៉ុន្តែ ប្រទេសក្នុងតំបន់ភាគច្រើនមិនទុកចិត្តឡើយ។
សម្រាប់ប្រទេសម៉ាឡែស៊ីក្រៅពីការអំពាវនាវរបស់នាយករដ្ឋមន្ត្រីរដ្ឋមន្ត្រីពាណិជ្ជកម្មម៉ាឡេស៊ី លោក តេងគូ ហ្សាហ្វ្រាល់ អាហ្ស៊ីស (Tengku Zafrul Aziz) នៅថ្ងៃពុធ (ទី០៩ ខែកក្កដា)នៅក្នុងបទសម្ភាសន៍ក្នុងកម្មវិធី Reuters NEXT Asia summit នាប្រទេសសិង្ហបុរី មានប្រសាសន៍ថា ប្រទេសម៉ាឡេស៊ី មិនមានគម្រោងរៀបចំផែនការសងសឹកប្រឆាំងនឹងពន្ធគយបដិការ ២៥% លើទំនិញរបស់ខ្លួនដែលកំណត់ដោយសហរដ្ឋអាម៉េរិកនោះទេ ហើយម៉ាឡេស៊ីនៅតែមានសុទិដ្ឋិនិយមអំពីដំណើរការឈានដល់កិច្ចព្រមព្រៀងពាណិជ្ជកម្មប្រកបដោយភាពវិជ្ជមាន ។
ប្រទេសម៉ាឡេស៊ី ដែលជាអ្នកនាំចេញដ៏សំខាន់មួយនៃផលិតផលបន្ទះឈីប និងគ្រឿងអេឡិចត្រូនិក ត្រូវប្រឈមមុខនឹងពន្ធគយបដិការ ២៥% លើការនាំចេញរបស់ខ្លួនទៅកាន់ទីផ្សារសហរដ្ឋអាម៉េរិក ខណៈអត្រាពន្ធកំណត់ដោយសហរដ្ឋអាម៉េរិកកាលពីខែមេសា មានត្រឹមតែ ២៤% ប៉ុណ្ណោះ មុនពេលប្រធានាធិបតីអាម៉េរិក លោក ដូណាល់ ត្រាំ (Donald Trump) សម្រេចឱ្យពន្យារកតាព្វកិច្ចពន្ធពេញលេញក្នុងរយៈពេល ៩០ថ្ងៃ ។
ក្រសួងពាណិជ្ជកម្មម៉ាឡេស៊ី បាននិយាយថា ខ្លួនកំពុងបន្តពិភាក្សាជាមួយសមភាគីអាម៉េរិក ដើម្បីដោះស្រាយលើបញ្ហាដែលនៅសេសសល់ ស្វែងយល់ពីរបៀបដែលពន្ធគយនឹងប៉ះពាល់ដល់ភាគីទាំងពីរ និងស្វែងរកមធ្យោបាយដើម្បីបញ្ចប់ការចរចានាពេលឆាប់ៗនេះ ។
គួររម្លឹកថា ម៉ាឡេស៊ី និងប្រទេសផ្សេងទៀតនៅក្នុងតំបន់អាស៊ីអាគ្នេយ៍ ស្ថិតនៅក្នុងចំណោមប្រទេសដែលរងគ្រោះខ្លាំងបំផុតដោយពន្ធគយដ៏ច្រើនរបស់លោកត្រាំ (Trump) ខណៈដែលប្រទេសទាំងនេះ ពឹងផ្អែកខ្លាំងលើការផលិត និងការនាំចេញ ដើម្បីជំរុញសេដ្ឋកិច្ចដែលមានតម្លៃសរុបជាង ៣.៨ ពាន់ពាន់លានដុល្លារអាម៉េរិក ដោយប្រទេសមួយចំនួនក្នុងចំណោមប្រទេសទាំងនេះពីមុន ក៏ទទួលបានអត្ថប្រយោជន៍ផងដែរ ពីខ្សែសង្វាក់ផ្គត់ផ្គង់ដែលផ្លាស់ប្តូរចេញពីប្រទេសចិន ។
កាលពីថ្ងៃចន្ទ (ទី៧ ខែកក្កដា) ប្រធានាធិបតីអាម៉េរិក លោក ដូណាល់ ត្រាំ (Donald Trump) បានប្រកាសលើកាតព្វកិច្ចពន្ធគយថ្មីពី ២៥% ទៅ ៤០% លើទំនិញពីប្រទេសចំនួន៦ នៅក្នុងតំបន់អាស៊ីអាគ្នេយ៍។ ការណ៍នេះបានកើតឡើង បើទោះបីជាប្រទេសអាស៊ានមួយចំនួនបានព្យាយាមធ្វើការតវ៉ាលន់តួ និងចរចាសូមឱ្យមានអត្រាពន្ធទាបក៏ដោយ។ ក្នុងចំណោមប្រទេសអាស៊ាន មានតែប្រទេសវៀតណាមមួយប៉ុណ្ណោះដែលបានសម្រេចកិច្ចព្រមព្រៀងជាមួយសហរដ្ឋអាម៉េរិកដោយជោគជ័យ ដែលបានកាត់បន្ថយពន្ធគយពី ៤៦% មកនៅត្រឹម ២០% ។
សម្រាប់ប្រទេសឥណ្ឌូណេស៊ីវិញនៅរសៀលថ្ងៃពុធ ទី៩ ខែកក្កដា ឆ្នាំ២០២៥នេះ ក្រុមហ៊ុនប្រេងរដ្ឋរបស់ប្រទេសឥណ្ឌូណេស៊ី ហើយនិងក្រុមហ៊ុនកសិកម្មបានចុះហត្ថលេខាលើកិច្ចព្រមព្រៀងគ្នាមួយដើម្បីបង្កើនការទិញនូវផលិតផលពីសហរដ្ឋអាម៉េរិក ។ នេះជាការឲ្យដឹងពីរដ្ឋមន្ត្រីក្រសួងសេដ្ឋកិច្ចឥណ្ឌូណេស៊ីបានលើកឡើងប្រាប់ដល់ទីភ្នាក់ងារសារព័ត៌មានបារាំងAFP ។ឥណ្ឌូណេស៊ី ជាប្រទេសមានសេដ្ឋកិច្ចលូតលាស់ដ៏ធំសម្បើមរបស់អាស៊ាន បានសន្យាថានឹងបង្កើននូវនាំចូលផលិតផលមានដូចជាផលិតផលកសិកម្ម ថាមពល និងយន្តូបករណ៍នានាដើម្បីរក្សាគម្លាតឱ្យជិតជាមួយនឹងរដ្ឋការទីក្រុងវ៉ាស៊ីនតោន នៅមុនពេលដែលមានកិច្ចជាប់គាំងលើការព្រមព្រៀងទិញស្រូវសាលីបន្ថែមទៀតពីសហរដ្ឋអាម៉េរិកលើរង្វង់ទឹកប្រាក់ប្រមាណជា១.២៥ពាន់លានដុល្លារអាម៉េរិក។
លោកប្រធានាធិបតីអាម៉េរិក ដូណាល់ត្រាំ បានធ្វើការគំរាមកំហែងដល់រដ្ឋការទីក្រុងហ្សាកាតាទៅលើការដាក់កំហិតតារាងពន្ធគយប្រមាណជា៣២%លើសពីតារាងពន្ធគយមូលដ្ឋានចំនួន១០% ដែលអាចនឹងចូលជាធរមាននៅថ្ងៃទី១ ខែសីហាខាងមុខ។រដ្ឋមន្ត្រីសេដ្ឋកិច្ចឥណ្ឌូណេស៊ី ឈ្មោះ អ៊ែរឡាំងកា ហារតាតូ(Airlangga Hartarto) បានធ្វើដំណើរទៅកាន់ទីក្រុងវ៉ាស៊ីនតោនដើម្បីចរចាអំពីពាណិជ្ជកម្ម បានលើកឡើងថា ក្រុមហ៊ុនប្រេងរដ្ឋ បានចុះហត្ថលេខាលើអនុស្សរណៈនៃការយោគយល់គ្នាមួយ ដោយសន្យាថា នឹងទិញនូវផលិតផលមានដូចជាប្រេងបន្ថែមទៀត ពីសហរដ្ឋអាម៉េរិក។បើផ្អែកតាមទិន្នន័យពីការិយាល័យតំណាងពាណិជ្ជកម្មសហរដ្ឋអាម៉េរិកបង្ហាញថា ឱនភាពពាណិជ្ជកម្មទំនិញរបស់ក្រុងវ៉ាស៊ីនតោនជាមួយនឹងទីក្រុងហ្សាកាតាមានទំហំប្រមាណជា ១៧.៩ពាន់លានដុល្លារអាម៉េរិកកាលពីឆ្នាំ២០២៤ ឡើងដល់ទៅ៥.៤%លើសពីឆ្នាំមុន៕
