រដ្ឋបាលរាជធានីភ្នំពេញ ហៅពលរដ្ឋ៣គ្រួសារដែលរងផលប៉ះពាល់នៃគម្រោងសាងសង់ស្ពានឆ្លងទន្លេបាសាក ចាក់អង្រែក្រោម–ព្រែកប្រា មកសួរថាយកសំណងឬអត់?
08-July-2025 / សេដ្ឋកិច្ច
ភ្នំពេញ ៖ ជាង១ឆ្នាំហើយដែលរដ្ឋបាលរាជធានីភ្នំពេញ និងគណៈកម្មការអន្តរក្រសួងព្យាយាម ក្នុងការដោះស្រាយជាមួយប្រជាពលរដ្ឋដែលរងផលប៉ះពាល់នៃគម្រោងសាងសង់ស្ពានឆ្លងកាត់ទន្លេបាសាក ចាក់អង្រែក្រោម–ព្រែកប្រា។ មកដល់ពេលនេះ ផលប៉ះពាល់មួយចំនួនធំត្រូវបានដោះស្រាយបញ្ចប់ នៅតែប្រជាពលរដ្ឋចំនួន៣គ្រួសារប៉ុណ្ណោះ មិនទាន់ទទួលយកសំណងពីអាជ្ញាធក្នុងតម្លៃ ជាង៣លានដុល្លារនោះទេ។
នៅរសៀលថ្ងៃទី០៨ ខែកក្កដា ឆ្នាំ២០២៥ លោក ឃួង ស្រេង អភិបាលរាជធានីភ្នំពេញ បានកោះហៅពលរដ្ឋទាំង៣គ្រួសារមកប្រជុំពិភាក្សារកដំណោះស្រាយម្តងទៀតនៅសាលារាជធានីភ្នំពេញតែ មិនអាចទទួលយកបានដដែលព្រោះមិនដល់ថ្លៃ ។លោក អភិបាលរាជធានី និយាយថា ដីដែលរងផលប៉ះពាល់នេះ អាជ្ញាធរមិនមែនយកមកដើម្បីជាប្រយោជន៍ខ្លួនឯងនោះទេ គឺដើម្បីសាងសង់ស្ពាន និងធ្វើផ្លូវឱ្យប្រជាពលរដ្ឋទូទៅបានធ្វើដំណើរ និងដោះស្រាយការកកស្ទះចរាចរណ៍ ដូច្នេះសូមពលរដ្ឋទាំង៣គ្រួសារមេត្តាយោគយល់។ អាជ្ញាធរក្នុងនាមជាម្ដាយជាឪពុកប្រជាពលរដ្ឋ មិនចង់ប៉ះពាល់ជាមួយប្រជាពលរដ្ឋទេ សូមកុំទារសំណងថ្លៃខ្លាំងពេក រហូតរដ្ឋមិនអាចទទួលយកបាន។
លោក ឃួង ស្រេង បញ្ជាក់ថា តម្លៃដីរហូតដល់ជាង៣លានដុល្លារនេះ សមល្មមហើយ ។ ពលរដ្ឋអាចជួលក្រុមហ៊ុនអចលនៈទ្រព្យចំនួន២ក្រុមហ៊ុន មកសិក្សាពីតម្លៃនៅលើទីតាំងផ្ទាល់បាន ដោយរដ្ឋបាលរាជធានីភ្នំពេញ សុខចិត្តចេញសោហ៊ុយសេវាជូនក្រុមហ៊ុនឱ្យថែមទៀត បើនៅតែមិនត្រូវគ្នាទៀត រដ្ឋបាលរាជធានីភ្នំពេញ គ្មានជម្រើសអ្វីក្រៅពីអនុវត្តវិធានការរដ្ឋបាលដើម្បីរុះរើនោះទេ ព្រោះវាល្មមដល់ពេលហើយ មិនអាចបន្តដោះស្រាយទៅមុខទៀតទេ។ ក្រោយការអនុវត្តវិធានការរដ្ឋបាលដើម្បីរុះរើ ពលរដ្ឋក៏អាចបន្តប្តឹងទៅតុលាការបាន។
លោក ឃួង ស្រេង ឲ្យដឹងដោយបិទផ្លូវតវ៉ាថា ថវិកាជាង៣លានដុល្លារដែលនឹងប្រគល់ជូនពលរដ្ឋទាំង៣គ្រួសារ ក្រសួងសេដ្ឋកិច្ច និងហិរញ្ញវត្ថុ បានសម្រេចរួចហើយ មិនអាចបន្ថែមបានទៅតាមការទាមទារស្រេចតែចិត្តនោះទេ។ ចុងក្រោយនេះអាជ្ញាធររាជធានីភ្នំពេញមានជម្រើស២សម្រាប់ពលរដ្ឋ ទី១ ទាំង៣គ្រួសារអាចរុះរើដោយខ្លួនឯង រដ្ឋបាលរាជធានីភ្នំពេញនឹងប្រគល់ថវិកាជូនថ្លៃរុះរើចំនួន១០ម៉ឺនដុល្លារនិងទី២ រដ្ឋបាលរាជធានីភ្នំពេញនឹងជួលគេឱ្យមករុះរើ។
គួរបញ្ជាក់ថា ប្រជាពលរដ្ឋដែលរងផលប៉ះពាល់ មិនទទួលយកសំណងផលប៉ះពាល់នៃគម្រោងសាងសង់ស្ពានឆ្លងទន្លេបាសាក់ ចាក់អង្រែ-ព្រែកប្រា មាន១/ គ្រួសារ ឈ្មោះ ប៊ូ ឆាយ សំណងផលប៉ះពាល់ទឹកប្រាក់សរុបចំនួន ៩៣៩.៣៨០,៥២$ (ប្រាំបួនរយសាមសិបប្រាំបួនពាន់បីរយប៉ែតសិបដុល្លារអាមេរិក និងហាសិបពីរសេន) ២/ គ្រួសារឈ្មោះ ហុក សេងគឹម សំណងផលប៉ះពាល់ទឹកប្រាក់សរុបចំនួន ២.២០៩.៥៤៣,១៥$ (ពីរលានពីររយប្រាំបួនពាន់ប្រាំរយសែសិបបីដុល្លារអាមេរិក និងដប់ប្រាំសេន) និង៣/ គ្រួសារឈ្មោះ ហុក សេងជួរ សំណងផលប៉ះពាល់ទឹកប្រាក់ សរុបចំនួន ១៧១.៨៣៨,១៩ $ (មួយរយចិតសិបមួយពាន់ប្រាំបីរយសាមសិបប្រាំបីដុល្លារអាមេរិក និងដប់ប្រាំបួនសេន) សំណងទាំងនេះពលរដ្ឋទាំង៣គ្រួសារមិនទទួលយកនោះទេ។ ទីតាំងប៉ះពាល់នៃគម្រោងសាងសង់ស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា ស្ថិតនៅភូមិអូរអណ្តូង សង្កាត់ព្រែកប្រា ខណ្ឌច្បារអំពៅ។មិនអាចទាក់ទងសុំការបកស្រាយពីម្ចាស់ចលនៈវត្ថុដែលនៅចំផ្លូវសង់ស្ពានដើម្បីសួរនាំបានទេ។
