ចិនប្រឆាំងគម្រោងការពារកាំជ្រួច Golden Dome របស់អាមេរិករុស្ស៊ីនិយាយឡប់ឡែ
24-May-2025 / ព័ត៌មានអន្តរជាតិ
អាមេរិក៖កាលពីថ្ងៃទី 21 ឧសភា អ្នកនាំពាក្យក្រសួងការបរទេសចិន អ្នកស្រី Mao Ning បានប្រកាសថា ប្រទេសចិនប្រឆាំងនឹងគម្រោងខែលការពារមីស៊ីល Golden Dome របស់សហរដ្ឋអាមេរិក។ អ្នកស្រី ម៉ៅ បាននិយាយោយចាត់ទុកថា គម្រោងនេះបង្កើនហានិភ័យនៃការប្រែក្លាយលំហអាកាសទៅជាសមរភូមិ លើកកម្ពស់ការប្រណាំងអាវុធ និងធ្វើឱ្យប៉ះពាល់ដល់សន្តិសុខអន្តរជាតិ។ចិនប្រឆាំងនឹងគម្រោងខែលការពារកាំជ្រួច Golden Dome របស់អាមេរិក ដោយនិយាយថា វាធ្វើឲ្យសន្តិសុខអន្តរជាតិអស្ថិរភាព។
សូមបញ្ជាក់ថាគម្រោងការពារដែនអាកាសនេះត្រូវបានប្រកាសដោយប្រធានាធិបតី Donald Trump កាលពីថ្ងៃទី២០ ខែឧសភា ដែលមានតម្លៃ១៧៨ពាន់លានដុល្លារអាមេរិកដែល មានសមត្ថភាពស្ទាក់ចាប់មីស៊ីលពីជុំវិញពិភពលោក និងអវកាស។ផែនការនេះប្រទេសរុស្ស៊ីក៏បានសម្តែងការព្រួយបារម្ភផងដែរ ដោយព្រមានថា Golden Dome អាចគំរាមកំហែងដល់តុល្យភាពនុយក្លេអ៊ែរ និងពង្រីកប្រតិបត្តិការក្នុងលំហអាកាស។ប៉ុន្តែក្រោយមក អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានកាលពីថ្ងៃពុធថា នេះគឺជាបញ្ហាអធិបតេយ្យភាពសម្រាប់សហរដ្ឋអាមេរិក
។ ប្រសិនបើសហរដ្ឋអាមេរិកជឿថា មានការគំរាមកំហែងដោយមីស៊ីលនោះ ជាការពិតណាស់ថានឹងអភិវឌ្ឍប្រព័ន្ធការពារមីស៊ីល ដែលនេះជាអ្វីដែលប្រទេសទាំងអស់ធ្វើ។ យ៉ាងណាលោកថា ដំណើរនៃព្រឹត្តិការណ៍នឹងទាមទារឱ្យមានទំនាក់ទំនងឡើងវិញ រវាងអាមេរិកនិងរុស្ស៊ី ដើម្បីស្ដារស្ថេរភាពជាយុទ្ធសាស្ត្រ។គម្រោងខែលអាកាសនេះត្រូវបានប៉ាន់ស្មានថាប្រើរយៈពេល៣ឆ្នាំដើម្បីសម្រេចបាន។ បើតាមលោកត្រាំ ខែលការពារមីស៊ីលដ៏ធំនេះ មានអនុភាពទប់ស្កាត់ មីស៊ីលដែលបាញ់ចេញពីផ្នែកម្ខាងទៀតនៃពិភពលោក ឬបាញ់ចេញពីលំហអាកាស។
អ្វីជាខែលការពារមីស៊ីលGolden Dome?៖ អាមេរិកបានប៉ុនប៉ងចង់បានខែលការពារមីស៊ីល ដែលមានមូលដ្ឋានលើលំហអាកាស រាប់ទសវត្សរ៍មកហើយ។ គំនិតផ្តួចផ្តើមការពារយុទ្ធសាស្ត្រនេះ ធ្លាប់ត្រូវបានស្នើឡើង តាំងពីជំនាន់អតីតប្រធានាធិបតីអាមេរិកលោកRonald Reagan ជាង៤០ឆ្នាំមុនមកម្ល៉េះ។ រនាំងការពារមីស៊ីលប្លោងរបស់លោក Reagan ត្រូវបានគេចំអកឱ្យមិនស្ទើរទេ នៅពេលដែលត្រូវបានស្នើឡើងក្នុងឆ្នាំ១៩៨៣ ចំពេលមានសង្គ្រាមត្រជាក់ ដោយសារតែគម្លាតនៃបច្ចេកវិទ្យា និងការចំណាយ។
ឡូវ រយៈពេលជាង៤០ឆ្នាំក្រោយ អាមេរិកក្រោមការដឹកនាំលោកដូណាល់ ត្រាំ បានចេញបទបញ្ជាប្រតិបត្តិ ឱ្យបង្កើតប្រព័ន្ធការពារមីស៊ីល ដែលមានមូលដ្ឋានលើលំហអាកាស ក្រោយលោកស្បថចូលកាន់តំណែងប្រធានាធិបតីអាមេរិក នៅថ្ងៃទី២៧ខែមករាឆ្នាំ២០២៥។Golden Dome គឺជាប្រព័ន្ធការពារពហុស្រទាប់ គ្រោងបង្កើតឡើងដើម្បីការពារ ការគំរាមកំហែងនៃមីស៊ីលប្លោង ល្បឿនលឿនជាងសំឡេង និងcruiseមីស៊ីល លើដីគោករបស់អាមេរិក។ កម្មវិធីនេះនឹងមានឧបករណ៍ស្ទាក់ចាប់ និងឧបករណ៍ចាប់សញ្ញា ដែលមានមូលដ្ឋានលើលំហអាកាស។
ក្នុងអំឡុងពេលនៃការប្រកាសនោះ លោកត្រាំបានរំលឹកពីគំនិតផ្តួចផ្តើមការពារយុទ្ធសាស្ត្រ របស់អតីតប្រធានាធិបតី Reagan ដែលត្រូវបានគេហៅថា Star Wars ដែលជាប្រព័ន្ធការពារប្រឆាំងនឹងការវាយប្រហារនុយក្លេអ៊ែរដែលមានសក្តានុពល។ លោកត្រាំបាននិយាយថា «យើងពិតជានឹងបញ្ចប់ការងារដែលប្រធានាធិបតី Reagan បានផ្តួចផ្តើមកាលពី ៤០ ឆ្នាំមុន ដោយបញ្ចប់ការគំរាមកំហែងដោយមីស៊ីល មកលើទឹកដីអាមេរិកជារៀងរហូត» ។
លោកត្រាំបានប្រកាសថា លោកឧត្តមសេនីយ៍ Michael Guetlein ដែលបច្ចុប្បន្នជាអនុប្រធានប្រតិបត្តិការអវកាស នឹងទទួលខុសត្រូវក្នុងការត្រួតពិនិត្យវឌ្ឍនភាពរបស់ Golden Dome។
ទាក់ទងនឹងពេលវេលានិងថវិកាចំណាយលើរនាំងការពារសុវត្ថិភាពនេះ បើតាមការិយាល័យថវិកាសភា បានប៉ាន់ប្រមាណថា រដ្ឋាភិបាលអាចចំណាយច្រើនជាងនេះរហូតដល់ ៥៤២ ពាន់លានដុល្លារឯណោះ ក្នុងរយៈពេល ២០ ឆ្នាំ។ ប្រព័ន្ធការពារដ៏ធំនេះ ត្រូវបានអ្នកជំនាញបរទេសនិយាយថា សហរដ្ឋអាមេរិកនឹងត្រូវដាក់ផ្កាយរណបជាច្រើន ឧបករណ៍ចាប់សញ្ញា និងឧបករណ៍ស្ទាក់ចាប់ ចូលទៅក្នុងលំហ ដូច្នេះពួកគេសន្និដ្ឋានថា គម្រោងនេះមិនអាចបញ្ចប់បានក្នុងរយៈពេល៣ឆ្នាំនោះទេ។
សេតវិមានមិនទាន់បានចេញផ្សាយព័ត៌មានលម្អិតបន្ថែមអំពី គម្រោងខែលការពារមីស៊ីលGolden Domeនៅឡើយទេ។ ប៉ុន្តែបើតាមការបើកបង្ហាញ ពីគម្រោងកសាងដោយលោកដូណាល់ ត្រាំ វាជាប្រភេទប្រព័ន្ធការពារមីស៊ីល មានលក្ខខណៈស្រដៀងទៅនឹងខែលការពារមីស៊ីល Iron Dome របស់អ៊ីស្រាអែល ដែលដាក់ដំណើរការ ស្ទាក់ចាប់រ៉ុក្កែតនិងមីស៊ីល តាំងពីឆ្នាំ២០១១អ៊ីចឹងដែរ។
មិនដឹងថាវាមានរូបរាងយ៉ាងណានៅឡើយ ប៉ុន្តែគម្រោងខែលការពារមីស៊ីលថ្មីGolden Dome មានភាពខុសគ្នាយ៉ាងខ្លាំងពី Iron Domeរបស់អ៊ីស្រាអែល ទាំងវិសាលភាពនិងទំហំ។ យោងតាមការចុះផ្សាយដោយសារព័ត៌មានCNN Iron Dome ជ្រើសរើសការពារតំបន់ដែលមានប្រជាជន ពីការគំរាមកំហែង នៅក្នុងប្រទេសដែលមានទំហំប៉ុនរដ្ឋ New Jerseyរបស់អាមេរិកប៉ុណ្ណោះ។ ប៉ុន្តែ ខែលការពារមីស៊ីលថ្មី ដែលលោកត្រាំប្រាថ្នាចង់បាន គឺជាប្រព័ន្ធការពារមីស៊ីល ដែលមានមូលដ្ឋាននៅលើលំហអាកាស មានសមត្ថភាពការពារប្រទេស ធំជាងIron Domeរបស់អ៊ីស្រាអែលជាច្រើនដង នឹងត្រូវបានរចនាឡើង ដើម្បីទប់ទល់នឹងការគំរាមកំហែងដ៏ធំទូលាយ រួមទាំងអាវុធដែលអាចផ្លាស់ទីបានលឿនជាងសំឡេង ក៏គេចមិនផុតពីវាដែរ។
កាលពីដើមខែឧសភា មន្ទីរបញ្ចកោណបានបញ្ជូនជម្រើស៣មាន ខ្នាតតូច មធ្យម និងធំ ទៅសេតវិមានសម្រាប់ការអភិវឌ្ឍន៍ Golden Dome។ ប៉ុន្តែនៅក្នុងការលាតត្រដាងគម្រោងកាលពីថ្ងៃអង្គារ លោកត្រាំមិនបានបញ្ជាក់ពីជម្រើសចុងក្រោយនោះទេ។ យ៉ាងណា លោកថា អ្វីដែលលោកបានជ្រើសរើស ជាស្ថាបត្យកម្មសម្រាប់ប្រព័ន្ធទំនើបនៃសិល្បៈនេះ។ ថ្លែងនៅក្នុងការិយាល័យ Oval Office កាលពីថ្ងៃអង្គារ លោកត្រាំអួតថា ប្រព័ន្ធនេះនឹងបំពាក់បច្ចេកវិទ្យាជំនាន់ថ្មី ក្តោបក្តាប់ចាប់តម្រុយនៅទូទាំងផ្ទៃដី សមុទ្រ និងលំហ រួមទាំងឧបករណ៍ចាប់សញ្ញា និងឧបករណ៍ស្ទាក់ចាប់តាមលំហអាកាសផងដែរ។ លោកបានបន្ថែមថា ប្រព័ន្ធនេះនឹងអាចស្ទាក់ចាប់មីស៊ីល ដែលបាញ់ចេញពីផ្នែកម្ខាងទៀតនៃពិភពលោក ឬបាញ់ចេញពីលំហអាកាស។
សមត្ថភាពរបស់Golden Dome ត្រូវបានគេរំពឹងថាអាចរកឃើញ និងបញ្ឈប់មីស៊ីលនៅគ្រប់ដំណាក់កាលសំខាន់ៗទាំងបួន នៃការវាយប្រហារដែលអាចកើតមានដូចជា ការរកឃើញ និងបំផ្លាញពួកវាមុនពេលបាញ់បង្ហោះ ស្ទាក់ចាប់ពួកវាក្នុងដំណាក់កាលដំបូងនៃការហោះហើរ បញ្ឈប់ពួកវាពាក់កណ្តាលអាកាស ឬបញ្ឈប់ពួកវានៅនាទីចុងក្រោយ នៅពេលហោះទៅដល់គោលដៅមួយ។ជាផ្នែកមួយនៃគម្រោង សហរដ្ឋអាមេរិកនឹងដាក់ពង្រាយឧបករណ៍ស្ទាក់ចាប់មីស៊ីលនៅក្នុងលំហ ដើម្បីការពារប្រឆាំងនឹងការគំរាមកំហែងមីស៊ីលប្លោង និងល្បឿនលឿនជាងសំឡេង។ លោក Gen Chance Saltzman ប្រធានកងកម្លាំងអវកាសអាមេរិក បានប្រាប់សមាជិកសភានៅក្នុងសវនាការកាលពីថ្ងៃអង្គារថា សព្វាវុធដែលមានមូលដ្ឋានលើលំហ ដែលរំពឹងថាបំពាក់នៅក្នុងគម្រោង Golden Dome តំណាងឱ្យតម្រូវការថ្មី និងលេចធ្លោសម្រាប់បេសកកម្ម ដែលមិនធ្លាប់មានពីមុនមកដោយអង្គការអវកាសយោធា។
ជាការពិត សហរដ្ឋអាមេរិកមានសមត្ថភាព ការពារមីស៊ីលជាច្រើនរួចមកហើយ ដូចជា Patriot ដែលអាមេរិកបានផ្តល់ឱ្យអ៊ុយក្រែន ដើម្បីការពារប្រឆាំងនឹងមីស៊ីលដែលសត្រូវបាញ់ចូលមក ក៏ដូចជាផ្កាយរណបនៅក្នុងគន្លងតារាវិថី ដើម្បីរាវរកមីស៊ីលដែលគំរាមកំហែង។ តែក្រុមមន្ត្រីអាមេរិកបានព្រមានថា ប្រព័ន្ធដែលមានស្រាប់ មិនអាចទប់ទល់ជាមួយនឹងអាវុធទំនើរបស់សត្រូវ ដែលមានសក្តានុពលនោះទេ។ មួយវិញទៀត ដូចដែលបានលើកលែងពីខាងដើម គម្រោងការពារយុទ្ធសាស្ត្រនេះ ត្រូវបានបំផុសដោយអតីតប្រធានាធិបតីមុនជាច្រើនឆ្នាំមកហើយ តាំងពីបច្ចេកវិទ្យាមិនទាន់រីកចម្រើន។
ទីភ្នាក់ងារស៊ើបការណ៍សម្ងាត់ការពារជាតិនាពេលថ្មីៗនេះ បានចេញផ្សាយការវាយតម្លៃដែលមិនមានការចាត់ថ្នាក់ដោយគូសបញ្ជាក់ ពីរបៀបដែលសត្រូវរបស់សហរដ្ឋអាមេរិកដូចជាចិន រុស្ស៊ី អ៊ីរ៉ង់ និងកូរ៉េខាងជើង អាចមានសក្តានុពលវាយប្រហារ លើដីគោករបស់អាមេរិក ជាមួយនឹងមីស៊ីលប្លោង មីស៊ីលរយៈចម្ងាយឆ្ងាយ យន្តហោះទម្លាក់គ្រាប់បែក និងមីស៊ីលល្បឿនលឿនជាងសំឡេង។ រយៈពេល៧ថ្ងៃ នៃការកាន់ដំណែងប្រធានាធិបតិដំបូង លោក ត្រាំបានបញ្ជាឱ្យក្រសួងការពារជាតិដាក់ចេញផែនការសម្រាប់ប្រព័ន្ធ ដែលនឹងរារាំងនិងការពារប្រឆាំងនឹងការវាយប្រហារតាមអាកាស ដែលសេតវិមានបាននិយាយថា នៅតែជាការគំរាមកំហែងដ៏មហន្តរាយបំផុត ដែលកំពុងប្រឈមមុខនឹងសហរដ្ឋអាមេរិក។
នៅក្នុងការត្រួតពិនិត្យការការពារមីស៊ីលឆ្នាំ ២០២២ បានចង្អុលបង្ហាញពីការគំរាមកំហែងកាន់តែខ្លាំងឡើងពីប្រទេសចិន និងរុស្ស៊ី។ ចិនរីកចម្រើនលើការអភិវឌ្ឍបច្ចេកវិទ្យាមីស៊ីលប្លោង និងលឿនជាងសំឡេង ខណៈទីក្រុងមូស្គូមានប្រព័ន្ធមីស៊ីលឆ្លងទ្វីបដ៏ទំនើបបំផុតមួយនៅក្នុងពិភពលោក។ បន្ថែមលើនេះ ការគំរាមកំហែងរបស់យន្តហោះគ្មានមនុស្សបើក ក៏មានការកើនឡើងដែរ ចំពេលមានការរីកចម្រើននៃបច្ចេកវិទ្យា។ចំណែករុស្ស៊ី ដំបូងឡើយក៏បញ្ចេញប្រតិកម្មខ្លាំងដែរ ចំពោះគម្រោងប្រព័ន្ធការពារមីស៊ីល Golden Domeដែលប្រកាសដោយលោកត្រាំ ថារំខានដល់ស្ថេរភាពតំបន់។ 
