នាយករដ្ឋមន្ត្រីលើកសំណួរថាតើការយកបញ្ហានយោបាយទៅលូកលាន់ជាមួយកិច្ចការបច្ចេកទេសខាងព្រំដែន អាចផ្តល់ផលវិបាកអ្វីខ្លះ?
19-February-2025 / សន្តិសុខសង្គម
ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា ក្នុងថ្មីៗនេះ ចលនាជំរុញស្មារតីជាតិនិយមនៅក្រៅប្រទេស កំពុងរុញចលនាជាច្រើនពាក់ព័ន្ធនឹងបញ្ហាព្រំដែនកម្ពុជា និងប្រទេសជិតខាង ដូចជាករណី CLV, កោះគត់ និងមកដល់ពេលនេះ ប្រាសាទតាមាន់។ សម្តេចបានផ្ដាំទៅអ្នកនយោបាយទាំងអស់ ទាំងខ្មែរ និងថៃ សូមកុំយករឿងនយោបាយទៅលូកលាន់លើកិច្ចការងារបច្ចេកទេសរបស់រាជរដ្ឋាភិបាល ដែលកំពុងអនុវត្តការងារទាំងអស់ដោយផ្អែកលើគោលការបច្ចេកទេស ផែនទី និងច្បាប់អន្តរជាតិ ពាក់ព័ន្ធនឹងរឿងព្រំដែននេះ។
នៅក្នុងពិធីប្រគល់សញ្ញាបត្រជូនដល់និស្សិតសាកលវិទ្យាល័យ អាស៊ី អឺរ៉ុប នៅព្រឹកថ្ងៃទី១៩ ខែកុម្ភៈ ឆ្នាំ២០២៥ ដែលប្រារព្ធឡើងនៅមជ្ឈមណ្ឌលសន្និបាតកោះពេជ្រ សម្តេចធិបតី ហ៊ុន ម៉ាណែត បានថ្លែងថា រឿងព្រំដែននេះដែរ អ្នកណាក៏គិតរឿងព្រំដែនដែរ ក្នុងនោះរាជរដ្ឋាភិបាល គឺជាអ្នកគិត និងទទួលខុសត្រូវធំបំផុតចំពោះមុខប្រជាពលរដ្ឋ ហើយការងារនេះ គឺផ្អែកទៅលើការដោះស្រាយស្របទៅតាមច្បាប់ជាតិនិងអន្តរជាតិ។
សម្តេចធិបតី ហ៊ុន ម៉ាណែត បានប្រកាសថា កម្ពុជារក្សាជំហរដោះស្រាយបញ្ហាព្រំដែនតាមសន្ដិវិធី ប៉ុន្ដែកម្ពុជា ក៏រក្សាសិទ្ធិការពារអធិបតេយ្យភាព និងបូរណភាពទឹកដីរបស់ខ្លួនមិនខ្លាចនឹងប្រើកម្លាំងប្រសិនបើមានអ្នកចូលមកឈ្លានពានប្រទេសកម្ពុជា។សម្តេចធិបតី ហ៊ុន ម៉ាណែត ក៏បានគូសបញ្ជាក់ថា បញ្ហាព្រំដែន គឺជាបញ្ហារសើប ដែលមានប្រទេស ជាច្រើននៅលើពិភពលោក មិនទាន់បានដោះស្រាយបញ្ហាព្រំដែននេះរួចរាល់ផង រួមទាំងកម្ពុជាផង ដែរ ដែលជាហេតុធ្វើឱ្យមានសង្គ្រាម និងជម្លោះប្រដាប់អាវុធ ជាក់ស្តែងបញ្ហាសមុទ្រចិនខាងត្បូងជាដើម។
សូមបញ្ជាក់ថាកាលពីថ្ងៃទី១៧កុម្ភៈ២០២៥មានកងទាហ៊ានថៃមួយក្រុមបានមកឃាត់ប្រជាពលរដ្ឋខ្មែរមួយក្រុមដែលកំពុងច្រៀងចម្រៀងជាតិឲ្យឈប់ច្រៀង។ករណីយ៍លោកឧ្តមតសេនីយ៍នាក់វង្សដែលគេស្គាល់ថាជាអតីតមេយោធាខ្មែរក្រហមបច្ចុប្បន្នជាមេបញ្ជាកការកងពលតូចលេខ៤២បានប្រតិកម្មដោយសម្តីធ្ងន់ៗថាបើវាចង់បាញ់គ្នាក៏បាន?។សម្តីលោកឧត្តមសេនីយ៍នាក់វង្សបង្ហាញពីស្មារតីស្នេហាជាតិដាច់ខាតតែជាំសម្តីមិនត្រូវប្រើក្នុងកាលៈទេសៈខ្មែរថៃកំពុងថ្នមសភាពគារណ៍ជាមួយគ្នានោះទេ។ចឹងហើយបានជាក្រោយពីមានព្រឹតិ្តការណ៍នេះលោក មាន ចាន់យ៉ាដា អភិបាលខេត្តឧត្ដរមានជ័យក៏ បានដឹកនាំមន្ទីរអង្គភាពពាក់ព័ន្ធចុះសួរសុខទុក្ខបងប្អូនកងកម្លាំងប្រដាប់អាវុធជួរមុខ និងត្រួតពិនិត្យសមិទ្ធផលតាមបណ្ដោយព្រំដែនកម្ពុជា-ថៃ នៅតំបន់ប្រាសាទតាមាន់ ស្ថិតនៅភូមិតាមាន់សែនជ័យ ឃុំគោកមន ស្រុកបន្ទាយអំពិល ខេត្តឧត្ដរមានជ័យ នារសៀលថ្ងៃទី១៨ ខែកុម្ភៈ ឆ្នាំ២០២៥ផងដែរ។លោកអភិបាលខេត្តក៏បានជួបនាយទាហ៊ានថៃដែលឈរជើងនិងបាននិយាយសម្រួលស្ថានការណ៍ផងដែរ។
ក្រៅពីនេះលោកចៅហ្វាយខេត្តក៏បានសម្តែងនូវការកោតសរសើរ និងដឹងគុណដល់បងប្អូនកងទ័ព នាយទាហាន ពលទាហានទាំងអស់ ដែលបានលះបង់កម្លាំងកាយ-ចិត្ត ហ៊ានពលីអាយុជីវិត ចូលរួមក្នុងសមរភូមិ ដើម្បីការពារជាតិ អធិបតេយ្យភាព បូរណភាពទឹកដី និងនាំមកនូវសុខសន្តិភាព ស្ថិរភាព ដែលជាការចាំបាច់ដល់ការសម្រេចបាននូវសមិទ្ធផលដ៏ធំធេងលើគ្រប់វិស័យ។
ក្នុងឱកាសនោះលោកអភិបាលខេត្ត ក៏បានប្រគល់អំណោយរបស់សម្ដេចធិបតីនាយករដ្ឋមន្ត្រី និងលោកជំទាវបណ្ឌិត ជាគ្រឿងឧបភោគបរិភោគដល់កងកម្លាំងការពារតាមបន្ទាត់ព្រំដែន កម្ពុជា-ថៃ ដោយកងពលតូចលេខ៤២ ទទួលបានទឹកសុទ្ធ៧៥កេះ ត្រីខ៣០កេះ មី៣០កេះ ទឹកត្រី២០កេះ ទឹកស៊ីអ៊ីវ២០កេះ និងកងកម្លាំងនគរបាលវរការពារព្រំដែនគោគលេខ៧០២ ទទួលបានទឹកសុទ្ធ៥៥កេះ ត្រីខ២០កេះ មី៤៥កេះ ទឹកត្រី២០កេះ និងទឹកស៊ីអ៊ីវ២០កេះផងដែរ។ដោយឡែកបើតាមកាសែតថៃបានឲ្យដឹងថាលោកស្រីនាយករដ្ឋមន្ត្រិថៃផៃតងតានស៊ីណាវ៉ាត្រាក៏បាននិយាយសម្រួលស្ថានការណ៍ថាបានវិលមកធម្មតាវិញហើយផងដែរ!៕
