ករណីយ៍ពលរដ្ឋប្តឹងដេញលោកបេនដាវិនលែងឲ្យអភិរក្សព្រៃភ្នំត្នោតអាជ្ញាធរកំពុងស្រាវជ្រាវ!
27-October-2024 / ព័ត៌មានជាតិ
ខេត្តព្រះវិហ៊ារកាលពីថ្ងៃទី១៩ ខែតុលា ពលរដ្ឋជិត១០០នាក់មកពីភូមិអង្គ្រង ភូមិស្វាយ និងភូមិតាសែងកណ្តាល ឃុំរណសិរ្ស ស្រុកសង្គមថ្មី ខេត្តព្រះវិហារបាននាំគ្នាផ្តិតសមេដៃប្តឹងអភិបាលខេត្តព្រះវិហារឲ្យចាត់វិធានការលើលោកបេន ដាវីស ដែលពួកគេចោទថា បានប្រើប្រាស់អំពើហិង្សា និងគំរាមកំហែងពលរដ្ឋ។
ពលរដ្ឋបានប្រាប់ថា លោកបេន(ជនជាតិអាមេរិក)បានគំរាមកំហែងពលរដ្ឋមិនឱ្យបង្កបង្កើនផលលើដីរបស់ពលរដ្ឋដែលមានជាយូរមកហើយ និងថាលោកបេនបានប្រើអំពើហិង្សាមកលើប្រជាពលរដ្ឋរហូតដល់បាក់ឆ្អឹងជំនី រួមនឹងការចាប់ពលរដ្ឋដើម្បីគំរាមយកប្រាក់ ។ បន្ថែមពីនេះ ពលរដ្ឋក៏ចោទលោកបេនទៀតថា បានដើរល្បាតហួសដែនអភិរក្សរបស់ខ្លួន ហើយពុំបានសហការជាមួយអាជ្ញាធរក្នុងមូលដ្ឋាន។តែលោក បេន ដាវីសដែលទទួលបានសិទ្ធពីរាជរដ្ឋាភិបាលឲ្យជួយអភិរក្សព្រៃនោះតំបនើភ្នំត្នោតបានសរសេរនៅលើបណ្តាញសង្គមហ្វេសប៊ុកថា លោកនិងក្រុមការងារពុំដែលរឹបអូស ឬចាប់ខ្លួនពលរដ្ឋណាម្នាក់នោះទេ។ បើតាមលោកបេន ក្នុងករណីនេះ ពលរដ្ឋទំនងជាត្រូវបាននរណាម្នាក់បង្គាប់បញ្ជាឱ្យមួលបង្កាច់លោក ខណៈពលរដ្ឋទាំងនោះនៅឆ្ងាយពីតំបន់អភិរក្សភ្នំត្នោត ភ្នំពក។
អ្នកស្រី ដាវិន សារិន យ៉ូសែប ភរិយាលោកបេនបានប្រាប់វិទ្យុបារាំងអន្តរជាតិថា អ្នកស្រីសោកស្តាយដែលមានពលរដ្ឋចោទប្រកាន់មកលើក្រុមការងាររបស់អ្នកស្រី។ សោកស្តាយត្រង់ថា សកម្មភាពរបស់ក្រុមការងារអ្នកស្រី ពុំមានចេតនាអាក្រក់ចំពោះប្រជាសហគមន៍ណាមួយឡើយ តែជាការសកម្មភាពការពារព្រៃឈើ និងសត្វព្រៃកម្ពុជា។ អ្នកស្រីបានឲ្យដឹងថា ក្រុមការងារអ្នកស្រីតែងស្វែងរកជំនួយដើម្បីជួយដល់សហគមន៍ក្នុងតំបន់អភិរក្ស ដោយធ្វើយ៉ាងណាឱ្យពួកគេបញ្ឈប់សកម្មភាពកាប់បំផ្លាញ់ព្រៃឈើ ហើយងាកមកចូលរួមសកម្មភាពអភិរក្សព្រៃឈើវិញ។
ទាក់ទងបញ្ហានេះដែរបន្ទាប់ពីទទួលបានទទួលសំណើអន្តរាគមន៍ពីប្រជាពលរដ្ឋ ដែលនៅរស់នៅជុំវិញតំបន់តំបន់ដែនជម្រកសត្វព្រៃភ្នំពក-ភ្នំត្នោត ប្រមាណជាជិត១០០នាក់ រដ្ឋបាលខេត្តខេត្តព្រះវិហារបានចាត់មន្ត្រីជំនាញឲ្យចុះទៅជួបជាមួយប្រជាពលរដ្ឋផ្ទាល់ ដើម្បីស៊ើបសួរបន្ថែមអំពីស្ថានភាពពិតប្រាកដ ដោយមានការចូលរួមពីប្រជាពលរដ្ឋនៅតំបន់ជុំវិញដែនជម្រកប្រមាណជាង ៣០០ នាក់ដោយក្នុងនោះមានទាំងអ្នកដែលបានដាក់សំណើ និងអ្នកដែលមិនបានដាក់សំណើ។ នេះបើយោងតាមការបញ្ជាក់របស់លោក ណុប វុទ្ធី អភិបាលរងខេត្តព្រះវិហារ។
លោកបញ្ជាក់បន្ថែមថា បញ្ហាដែលប្រជាពលរដ្ឋលើកឡើងភាគច្រើនគឺ ពាក់ព័ន្ធនឹងការអនុវត្តការងារលើសពីដែនសមត្ថកិច្ចរបស់លោក បេន ដេវីស និងក្រុមការងារ។ ចំណែកឯករណីប្រើអំពើហិង្សាពុំបានលើកឡើងមកជជែកគ្នាឡើយ ព្រោះវាជាបទល្មើសដែលស្ថិតក្នុងសមត្ថកិច្ចរបស់តុលាការ។ ហើយបច្ចុប្បន្ននេះតុលាការខេត្តព្រះវិហារក៏កំពុងអនុវត្តនីតិវិធីលើសំណុំរឿងនេះដែរ។
បើតាមអភិបាលរងខេត្តព្រះវិហារ លោក បេន ដេវីស និងក្រុមការងារអភិរក្សដែនជម្រកសត្វព្រៃភ្នំពក-ភ្នំត្នោត តែងសហការជាមួយអាជ្ញាធរក្នុងការចុះល្បាត និងបង្ក្រាបបទល្មើសបរិស្ថាននៅក្នុងរង្វង់ដែនជម្រក ហើយកន្លងមកការអនុវត្តការងាររបស់លោក និងក្រុមការងារ ធ្វើឡើងស្របតាមគោលការណ៍ និងច្បាប់។ទោះជាយ៉ាង លោក ណុប វុទ្ធី លើកឡើងថា បទល្មើសកាប់បំផ្លាញព្រៃឈើ និងបរបាញ់សត្វព្រៃនៅដែនជម្រកសត្វព្រៃភ្នំពក-ភ្នំត្នោត តែងកើតមានជារឿយៗ ប៉ុន្តែអាជ្ញាធរនៅតែបន្តអនុវត្តវិធានការអប់រំ ណែនាំដល់ជនល្មើស ដើម្បីឲ្យពួកគេកែប្រែខ្លួន ម្ដងជាពីរដង មុននឹងប្រើវិធានការតឹងរ៉ឹង គឺអនុវត្តិច្បាប់។
ចំណែកបញ្ហាដែលប្រជាពលរដ្ឋប្ដឹងសុំអន្តរាគមន៍ពីអភិបាលខេត្ត អាជ្ញាធរខេត្តព្រះវិហារ នៅមានឆន្ទៈក្នុងការប្រើយន្តការសម្របសម្រួល ដើម្បីឲ្យភាគីទាំងសងខាងមានភាពចុះសម្រុងនឹងគ្នា ជាជាងវែកញែករកខុសត្រូវរៀងៗខ្លួន។ក្រោយពីពលរដ្ឋក្នុងឃុំរណសិរ្ស ស្រុកសង្គមថ្មី ខេត្តព្រះវិហាររួមគ្នាផ្តិតមេដៃលើញត្តិ ផ្ញើទៅលោកអភិបាលខេត្តរួចមក គេនៅមិនទាន់ទទួលបានការឆ្លើយតបណាមួយពីរដ្ឋបាលខេត្តនៅឡើយទេ។ ប៉ុន្តែ គេកត់សំគាល់ថា ពលរដ្ឋអ្នកលេងបណ្តាញសង្គមវិញបាននាំគ្នាផ្តិតមេដៃគាំទ្រលោកបេនឱ្យនៅធ្វើសកម្មភាពអភិរក្សព្រៃឈើបន្តទៀត។
សូមជម្រាបថា តំបន់ដែនជម្រកសត្វព្រៃភ្នំត្នោត ភ្នំពក មានទីតាំងស្ថិតនៅក្នុងខេត្តព្រះវិហារ និងខេត្តសៀមរាបដោយមានទំហំផ្ទៃដីសរុប ៤២,០៩៧ហិកតា។ ក្នុងនោះ លោកបេន ដាវីស ដែលជាជនជាតិអាមេរិកកាំងបានទទួលការអនុញ្ញាតពីក្រសួងបរិស្ថាន ឲ្យគ្រប់គ្រងនិងអភិរក្សលើផ្ទៃដីជាង ៧ពាន់ហិកតា ដែលមានសក្តានុពលធនធានធម្មជាតិ និងជីវចម្រុះច្រើនប្រភេទប្រមាណ២០ឆ្នាំមកហើយ។អ្នកសារពត៍មានពុំទាន់អាចសុំការឆ្លើយតបពីលោក ឈីន ឆិម តំណាងប្រជាពលរដ្ឋភូមិអង្គ្រងបាននៅឡើយជុំវិញករណីយ៍នេះ។
