អត់ពីលោកសេដ្ឋាវីស៊ីនតើគណបក្សភឿថៃដាក់អ្នកណា?មានសម្លេងគាំទ្រគ្រប់អត់?។នយោបាយថៃជាប់គាំងអត់?
15-August-2024 / ព័ត៌មានអន្តរជាតិ
ប្រទេសថៃ៖រដ្ឋសភាថៃ នឹងជួបប្រជុំដើម្បីបោះឆ្នោតជ្រើសរើសនាយករដ្ឋមន្ត្រី ថ្មីនៅថ្ងៃសុក្រទី១៦ខែសីហាឆ្នាំ២០២៤បន្ទាប់ពីតុលាការធម្មនុញ្ញ(ដែលគេជឿថាមានការគាំទ្រពីវាំងនិងយោធា) ចេញសាលក្រម ដកតំណែងលោក សេដ្ឋា ថាវីស៊ីនពីតួនាទីនាយករដ្ឋមន្ត្រីដោយចោទថារំលោភរដ្ឋធម្មនុញ្ញ ព្រោះតែងតាំងអតីតទណ្ឌិតឲ្យធ្វើការក្នុងគណៈរដ្ឋមន្ត្រីរបស់លោកបើទោះបីជាបានលាលែងវិញក៏ដោយ។
ប្រធានរដ្ឋសភាលោកវ៉ាន់មូហាម៉ាដនូម៉ាថា( Wan Muhamad Noor Matha) បានផ្ញើលិខិតអញ្ជើញទៅតំណាងរាស្ត្រទាំងអស់រួចហើយ ដោយហៅមកប្រជុំនៅម៉ោង១០ព្រឹកថ្ងៃសុក្រ។មន្ត្រីជាន់ខ្ពស់នៃគណបក្សភឿថៃ លោក Wisuth Chainarun និយាយថា តំណាងមកពីរដ្ឋាភិបាលនិងគណបក្សប្រឆាំង ក៏ដូចជាគណៈរដ្ឋមន្ត្រីចាំផ្ទះ បានយល់ស្របថា ការបោះឆ្នោតគួរតែធ្វើឡើងឲ្យបានឆាប់តាមដែលអាចធ្វើទៅបាន។
បេក្ខជនដែលមានសិទ្ធិពេលនេះ គឺត្រូវតែជាអ្នកមានឈ្មោះក្នុងបញ្ជីដែលគណបក្សបានដាក់មុនការបោះឆ្នោតសកលខែឧសភាឆ្នាំ២០២៣ ហើយដោយសារពេលនេះ លោកសេដ្ឋា ត្រូវដកតំណែងហើយនោះ គណបក្សភឿថៃនៅសល់ជម្រើសពីរទៀត នោះគឺមេបក្សលោកស្រី ប៉ៃតងតានស៊ីណាវ៉ាត្រា(Paetongtarn Shinawatra) និងលោកឆៃកាសេមនីទីស៊ិរិ( Chaikasem Nitisiri)។
តែបើតាមភពពីគណបក្សភឿថៃបានបង្ហើបថា លោក Chaikasem អាយុ៧៥ឆ្នាំ មិនមានសុខភាពល្អឡើយ ។សម្រាប់លោកស្រីប៉ៃតងតាន( Paetongtarn) វ័យ៣៧ឆ្នាំដែលជាមេបក្សវិញភឿថៃវិញ គឺអាស្រ័យលើការសម្រេចចិត្តរបស់គ្រួសារ ព្រោះអ្នកនាងនឹងត្រូវប្រឈមមុខជាមួយសម្ពាធនយោបាយយ៉ាងខ្លាំងជាក់ជាមិនខានក្នុងពេលលោកថាក់ស៊ីនជាឪពុកនៅប្រឈមបទល្មើសប្រមាថព្រះមហាក្សត្រថៃមួយទៀតនាពេលថ្មីៗកន្លងមកនេះ។
ក្រៅពីអ្នកទាំងពីរ គេឃើញមានគូប្រជែងមានឥទ្ធិពល២រូបទៀតសម្រាប់តំណែងនាយករដ្ឋមន្ត្រី នោះរួមមានរដ្ឋមន្ត្រីថាមពលលោកពីរ៉ាផាន់សាលីរ៉ាថាវិផាចា( Pirapan Salirathavibhaga) ជាមេដឹកនាំគណបក្ស ថៃរក្សាជាតិ និងឧត្តមសេនីយ៍ប្រាវីតវង់សូវ៉ាន់( Prawit Wongsuwon) ប្រធានគណបក្ស Palang Pracharath ដែលចូលបក្សសម្ព័ន្ធយោធា។សូមបញ្ជាក់ថា ដើម្បីក្លាយជានាយករដ្ឋមន្ត្រី បេក្ខជនត្រូវការការគាំទ្រពីតំណាងរាស្ត្រលើសពាក់កណ្តាលឬ២៤៧សំឡេង នៃសមាជិកសភាបច្ចុប្បន្នដែលមាន៤៩៣រូប(គណបក្សភឿថៃមានសម្លេងមិនគ្រប់ទេគឺត្រូវរកដៃគូចម្រុះ។ប៉ុន្តែប្រសិនបើមិនគ្រប់ រដ្ឋសភាត្រូវតែកោះប្រជុំម្តងទៀតនៅពេលក្រោយ ហើយបោះឆ្នោតជាថ្មី ខណៈពេលនោះ អាចបើកឱកាសឲ្យបេក្ខជនថ្មីៗដាក់ពាក្យឈរឈ្មោះបានហើយគណបក្សភូមិចៃថៃក៏ចង់បានផងដែរ ។
សូមបញ្ជាក់ថានៅថ្ងៃពុធសប្តាហ៍នេះ (ទី១៤ ខែសីហា) តុលាការធម្មនុញ្ញថៃ សម្រេចដកលោក សេដ្ឋា ថាវីស៊ីន ចេញពីតំណែងនាយករដ្ឋមន្ត្រី ជាផ្លូវការហើយ បន្ទាប់ពីតុលាការរកឃើញថា លោកបានបំពានច្បាប់រដ្ឋធម្មនុញ្ញ ដោយតែងតាំងអតីតមេធាវីដែលធ្លាប់ជាប់ពន្ធនាគាររយៈពេលខ្លី កាលពី ១៦ ឆ្នាំមុន ឱ្យបំពេញតួនាទីជាមន្ត្រីមួយរូប នៅក្នុងគណៈរដ្ឋមន្ត្រីរបស់លោក ។ ទោះជាបែបណាក្តី សាលក្រមសម្រេចចុងក្រោយរបស់តុលាការថៃ ហាក់ធ្វើឱ្យស្ថានការណ៍នយោបាយក្នុងប្រទេសនេះ មានភាពរង្គោះរង្គើកាន់តែខ្លាំង ។សាលក្រមដកតំណែងរបស់លោកសេដ្ឋា ធ្វើឡើងត្រឹមតែជាងមួយសប្ដាហ៍ប៉ុណ្ណោះ បន្ទាប់ពីតុលាការប្រកាសសាលក្រមរំលាយគណបក្សកាវក្លៃ ឬ Move Forward ។តុលាការបានបោះឆ្នោតសម្រេច ៥ ទល់នឹង ៤ ចំពោះករណីរបស់ លោក Srettha។
កាលពីខែឧសភា ឆ្នាំនេះ អតីតសមាជិកព្រឹទ្ធសភាថៃប្រមាណជា៤០រូប បានដាក់សំណើទៅកាន់តុលាការធម្មនុញ្ញថៃ ក្រោមគោលបំណងចង់ឱ្យពិចារណាដក តំណែងនាយករដ្ឋមន្ត្រី របស់លោក សេដ្ឋា ក្រោមហេតុផលថាការតែងតាំងលោក Pichit Chuenban ដែលធ្លាប់ជាប់ពន្ធនាគាររយៈពេល៦ខែ កាលពីឆ្នាំ២០០៨ ឱ្យមានតួនាទីនៅក្នុងគណៈរដ្ឋមន្ត្រីរបស់លោក ថាជារឿងដែលបានបំពានចំពោះរដ្ឋធម្មនុញ្ញ ។ បន្ទាប់ពីនោះមក លោក Pichit ជាអតីតមេធាវីម្នាក់ ដែលមានទំនាក់ទំនងជាមួយអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ ក៏បានសម្រេចចិត្តលាលែងពីតួនាទី ដើម្បីអាចការពារតំណែងរបស់ លោក សេដ្ឋា ។ លោក សេដ្ឋា គឺជាមនុស្សរបស់គណបក្សភឿថៃ ដែលជាបក្សរបស់គ្រួសារ ស៊ីណាវ៉ាត់ ហើយបានក្លាយជានាយករដ្ឋមន្ត្រីថៃ ក្រោយបង្កើតរដ្ឋាភិបាលចម្រុះ ជាមួយក្រុមគណបក្ស ដែលមានទំនាក់ទំនងនឹងយោធា បន្ទាប់ពីការបោះឆ្នោតជាតិ ក្នុងឆ្នាំ២០២៣ ។
លោក Srettha បានតែងតាំង លោក Pichit Chuenban ជារដ្ឋមន្ត្រីមួយរូបនៃខុទ្ទកាល័យនាយករដ្ឋមន្ត្រីក្នុងការរុះរើគណៈរដ្ឋមន្ត្រីកាលពីខែមេសា។ លោក Pichit ត្រូវបានកាត់ទោសឱ្យជាប់ពន្ធនាគាររយៈពេល ៦ខែក្នុងឆ្នាំ ២០០៨ ពីបទមើលងាយការចោទប្រកាន់របស់តុលាការ បន្ទាប់ពីលោកបានព្យាយាមសូកប៉ាន់ចៅក្រមនូវទឹកប្រាក់ចំនួន ៥៥.០០០ ដុល្លារដាក់ក្នុងកាបូបគ្រឿងទេសមួយទាក់ទិននឹងករណីដែលពាក់ព័ន្ធនឹងអតីតនាយករដ្ឋមន្ត្រី លោក Thaksin Shinawatra ។លោក Pichit បានលាលែងពីតំណែងក្នុងរយៈពេលប៉ុន្មានសប្ដាហ៍បន្ទាប់ពីលោកឡើងកាន់តំណែង នៅពេលដែលមានបញ្ហាចម្រូងចម្រាសទាក់ទិននឹងឧប្បត្តិហេតុដែលបានកើតឡើង។
តុលាការបានឱ្យដឹងថា ថ្វីត្បិតតែលោកPichit បានជាប់ពន្ធនាគារក៏ពិតមែន ប៉ុន្តែតុលាការកំពូលបានចេញសាលក្រមថា អាកប្បកិរិយារបស់លោកគឺមិនស្មោះត្រង់។តុលាការសម្រេចថា លោក Srettha ក្នុងនាមជានាយករដ្ឋមន្ត្រី មានការទទួលខុសត្រូវតែម្នាក់គត់ក្នុងការពិនិត្យមើលលក្ខណៈសម្បត្តិនៃការតែងតាំងគណៈរដ្ឋមន្ត្រីរបស់ខ្លួន។ តុលាការនេះបានឱ្យដឹងទៀតថា លោក Srettha បានដឹងពីអតីតកាលរបស់ លោក Pichit ប៉ុន្តែលោកនៅតែតែងតាំងលោក Pichit ទៀត ហេតុដូច្នេះហើយតុលាការសម្រេចថាលោកបានបំពានក្រមសីលធម៌។
រដ្ឋាភិបាលថៃត្រៀមបញ្ចេញសាច់ប្រាក់ចំនួន ២៩,៩ពាន់លានបាត (៨១៤,៩៣៦,៤៦០ ដុល្លារអាមេរិក) ដើម្បីជួយឧបត្ថម្ភឱ្យប្រជាកសិករយកទៅទិញជីសម្រាប់ប្រើប្រាស់នៅក្នុងការធ្វើស្រែរបស់ពួកគេ នេះបើយោងតាមការចុះផ្សាយរបស់បណ្តាញសារព័ត៌មាន បាងកកប៉ុស្តិ៍ នៅក្នុងថ្ងៃទី១៥ ខែមិថុនា។ តាមគម្រោងគឺមានប្រជាកសិករថៃចំនួន ៤,៦៨លានគ្រួសារ ដែលនឹងទទួលបានបានអត្ថប្រយោជន៍ពីគម្រោងផ្តល់ប្រាក់ឧត្ថម្ភមួយនេះ។
ឡូវបញ្ហានៅត្រង់ថាតើគណបក្សភឿថៃអាចរកដៃគូរចម្រុះផ្សេងទៀតអត់បើគ្មានការគាំទ្រគ្រប់គ្រាន់?។ប្រសិនបើគណបក្សភឿថៃមិនមែនបានធ្វើនាយករដ្ឋមន្ត្រីតើកម្មវិធីចែកលលុយដែលលោកសេដ្ឋាទើបប្រកាសចែកជូនប្រជាពលរដ្ឋនាពេលថ្មីៗនេះអាចដំណើរការអត់?។ម្យ៉ាងទៀតបើមិនមែនបក្សភឿថៃធ្វើនាយករដ្ឋមន្ត្រីវានឹងមានផលប៉ះពាល់ដល់នយោបាយស្រុកខ្មែរអត់?។ឡូវកុំអាលញ៉ោកញ៉ាកចាំអ៊ុតមើលតិចមើល!។
