បន្ទាប់ពីរឿងអភិបាលស្រុកចេញស្សែកស្អុយអភិបាលរងស្រុកអូររាំងស្រវឹងស្រាដកអាវុធភ្ជង់មេនគរបាលនិងសឹករងស្រុក
19-February-2024 / ព័ត៌មានជាតិ
ខេត្តមណ្ឌលគិរី៖ រដ្ឋបាលស្រុកអូររាំង ខេត្តមណ្ឌលគិរី នៅថ្ងៃទី១៩ ខែកុម្ភៈ ឆ្នាំ២០២៤ បានចេញសេចក្តីប្រកាសព័ត៌មានថា ពាក់ព័ន្ធករណី អភិបាលរងស្រុកអូររាំងម្នាក់ ប្រើប្រាស់អាវុធខ្លីភ្ជង់មេបញ្ជាផ្នែកការសឹករងស្រុក និងអធិការស្រុកអូររាំង ត្រូវបានអភិបាលខេត្តមណ្ឌលគិរី ពិនិត្យ និងសម្រេច ដាក់វិន័យរដ្ឋបាលចំពោះបុគ្គល ដែលមានកំហុសឆ្គង ហើយអាវុធត្រូវបានដកហូត និងរក្សាទុកនៅស្នងការដ្ឋាននគរបាលខេត្ត មណ្ឌលគិរី។
សេចក្តីជូនដំណឹងបានឲ្យដឹងថា៖ ថ្មីៗនេះ មានបណ្តាគេហទំព័រព័ត៌មាន និងបណ្តាញទំនាក់ទំនងសង្គម Facebook បានចុះផ្សាយពាក់ព័ន្ធករណី អភិបាលរងស្រុកអូររាំងម្នាក់ ប្រើប្រាស់អាវុធខ្លីភ្ជង់មេបញ្ជាផ្នែកការសឹករងស្រុក និងអធិការស្រុកអូររាំង តាមដងផ្លូវ កាលពីថ្ងៃទី១៥ ខែកុម្ភៈ ឆ្នាំ២០២៤ នៅចំណុចមុខសាលាឃុំសែនមនោរម្យ ស្រុកអូររាំង ខេត្តមណ្ឌលគិរី ។ពាក់ព័ន្ធជាមួយករណីខាងលើ រដ្ឋបាលស្រុកអូររាំង បានកំពុងរៀបចំសំណើ ដើម្បីគោរពជូន ឯកឧត្តមអភិបាលខេត្តមណ្ឌលគិរី ពិនិត្យ និងសម្រេច ដាក់វិន័យរដ្ឋបាលចំពោះបុគ្គល ដែល មានកំហុសឆ្គងខាងលើ ។ ចំពោះ អាវុធត្រូវបានដកហូត និងរក្សាទុកនៅស្នងការដ្ឋាននគរបាលខេត្ត មណ្ឌលគិរី ដើម្បីចាត់វិធានការបន្តតាមនីតិវិធីច្បាប់ ។
សូមរំលឹកថា កាលពីវេលាម៉ោង១១យប់ថ្ងៃទី១៥ ខែ កុម្ភៈ ឆ្នាំ២០២៤ នៅត្រង់ចំណុច មុខសាលាឃុំសែនមនោរម្យ ស្រុកអូររាំង ខេត្តមណ្ឌលគិរីអភិបាលរងស្រុកអូររាំង និងជាប្រធានលេខាធិការដ្ឋានបង្ត្រាបបទល្មើស ស្រវឹងខ្លាំងលែងស្គាល់គ្នីគ្នា រហូតដល់ដកកាំភ្លើងប្រុងបាញ់មេទាហានស្រុក និងអធិការនគរបាលស្រុក តែត្រូវបានលាក់លៀមទើបតែបែកធ្លាយ។ទាក់ទងរឿងនេះលោក ខាត់ សាក់ មេបញ្ជាការមូលដ្ឋានកងទ័ពស្រុកអូររាំង បានឲ្យដឹងថា អភិបាលរងស្រុក ឈ្មោះ សុខ សុវណ្ណារិទ្ធ បានបើកឡានដេញខ្លួនពីក្រោយ និងបញ្ជាឲ្យឈប់ ព្រមទាំងដកកាំភ្លើ.ងខ្លីភ្ជង់មកលើរូបគាត់ ថែមទាំងប្រើពាក្យប្រមាថផ្សេងៗទៀតផង។
ករណីយ៍នេះលោកអភិបាលស្រុកអូររាំងបានបញ្ជាឲ្យលោកអធិការស្រុកអូររាំង ចុះទៅអន្តរាគមន៍សម្របសម្រួល តែក៏ត្រូវលោកសុខ សុវណ្ណារិទ្ធ រេកាណុងកាំភ្លើងភ្ជង់លោកអធិការទៀត។តែ លោក សុខ សុវណ្ណារិទ្ធ បានអះអាងប្រាប់អ្នកសែតថា នោះជាការយល់ច្រឡំ ។ តាមពិតពុំមានការបំផ្ទុះអាវុធ ឬក៏ភ្ជង់ស្អីទេ ព្រោះសុទ្ធតែគ្នាឯង ដោយខាងខ្ញុំមានកាំភ្លើង ហើយម្ខាងទៀតក៏មានកាំភ្លើង ដូច្នេះខាងប៉ូលីសគេសុំដកយកទៅរក្សាទុកសិន ហើយរឿងនេះក៏បានសម្របសម្រួលគ្នាបញ្ចប់អស់ហើយដែរ? ។
សូមបញ្ជាក់ថាកាលពីថ្ងៃទី ០១ សីហា ឆ្នាំ២០២៣កន្លងទៅនេះ សាលាដំបូងខេត្តមណ្ឌលគិរី បានសម្រេចឃុំខ្លួនបណ្ដោះអាសន្នអតីតអភិបាលស្រុកអូររាំងពីបទថា បានចេញសែកស្អុយ ឬមូលប្បទានបត្រ(ពុំមានសាច់ប្រាក់) និងលួចកាន់កាប់អចលនទ្រព្យអ្នកដទៃ ។ជនត្រូវចោទមានឈ្មោះ នង ទុណ្ណារី ត្រូវបានសមត្ថកិច្ចកង រាជអាវុធហត្ថឃាត់ខ្លួនកាលពីថ្ងៃ៣០ កក្កដា ចុងខែកន្លងទៅពាក់ព័ន្ធបទចោទប្រកាន់រឿងមិនបំពេញតាព្វកិច្ចចំពោះឧបករណ៍ដែលអាចជួញដូរបាន ។
លោក មាស ប្រុស អ្នកនាំពាក្យសាលាដំបូងខេត្ត មណ្ឌលគិរី បានឲ្យក្រុមអ្នករាយការណ៍ព័ត៌មានដឹងថា ច្បាប់ស្តីពីឧបករណ៍អាចជួញដូរបាន និង ប្រតិបត្តិការទូទាត់ ការចេញសែកស្អុយឬ មូលប្បទានបត្រ(ពុំមានសាច់ប្រាក់) ត្រូវផ្តន្ទាទោសពិន័យជាប្រាក់ពី២លានដល់៦លានរៀល និងត្រូវផ្តន្ទាទោសជាប់ពន្ធនាគារពី១ឆ្នាំ ទៅ៣ឆ្នាំ , នេះដោយមិនទាន់គិតដល់ កាតព្វកិច្ចទូទាត់សងចំនួនប្រាក់ នៃឧបករណ៍អាចជួញ ដូរបាននោះទៅជនរងគ្រោះផង ។មានការកត់សម្គាល់ថានៅក្នុងអាណចក្រស្រុកអូររាំងសម្បូររឿងអាស្រូវកើតឡើងជាបន្តបន្ទាប់តាំងពីរឿងដីធ្លីការកាប់បំផ្លាញព្រៃឈើជាដើម។
