លោក សំ សុវណ្ណារិទ្ធ ឡើងតំណែងមេគយខេត្តព្រះសីហនុជំនួសលោក ទុំ ណូ កំពុងរៀបចំផែនការស្ដារស្រង់ដើមពីមធ្យោបាយដឹកជញ្ជូនផ្លូវកោគនិងទំនិញគេចពន្ធលើលំហរសមុទ្រ?
21-June-2023 / ព័ត៌មានជាតិ
ខេត្តព្រះសីហនុ៖ប្រភពពីក្រុងឈ្មួញបានឲ្យដឹងថានៅតែមានទំនិញគេចពន្ធ បានហូរចូលតាមស្នាក់ការគយនិងរដ្ឋាករទាំង៣ ដែលស្ថិតក្រោមការគ្រប់គ្រង របស់សាខាគយ និងរដ្ឋាករ ខេត្តព្រះសីហនុ ដែលជាវិធីធ្វើឲ្យរដ្ឋបាត់បង់ចំណូលពន្ធនាំចូលយ៉ាងច្រើនក្នុង១ខែៗ តែវាជាប្រភពសេដ្ឋកិច្ច របស់ ប្រធានសាខានិងស្នាក់ការ!។
សព្វថ្ងៃប្រធានសាខាគយ និងរដ្ឋាករ ខេត្តព្រះសីហនុ លោក សំ សុវណ្ណារិទ្ធ ដែលទើបឡើងតំណែងជំនួសកន្លែងលោក ទុំ ណូ បាននិងកំពុងរៀបចំផែនការស្ដារស្រង់ដើម ក្នុងការដោះដូរតូតំណែង តាមរូបភាពសំងំឃុបឃឹតជាមួយមធ្យោបាយដឹកជញ្ជូនទំនិញគេចពន្ធលើលំហរសមុទ្រ ហូរចូលតាមច្រកស្នាក់ការទាំង៣ យ៉ាងស្ងាត់ស្ងៀម ដោយយកគំរូ តាមប្រធានគយមុន ។ តាមសេចក្តីរាយការណ៍ស្នាក់ការគយ និងរដ្ឋាករ ទំនប់រលក មានច្រើនទំនិញគេចពន្ធលក្ខណ:ទ្រង់ទ្រាយធំដូចជាម៉ូតូទំនើបៗ គ្រឿងសំណង់ ទំនិញចាប់ហួយ មានរត់ពន្ធ មានបង់ពន្ធនាំចូលមិនគ្រប់ មានបង់ពន្ធពីទំនិញបង់ពន្ធនាំចូលខ្ពស់មកបង់ពន្ធនាំចូលទាប របៀប(ក្លែងភេទទំនិញ)ករណីខ្លះទៀតទំនិញតំលៃខ្ពស់មកបង់ពន្ធជាទំនិញ(ផ្សាធូប)ចាប់ហួយទៅវិញ។មន្ត្រីគយខ្លះដែលមិនបានលាភសក្ការៈ បានបង្ហើបថា អ្វីដែលរដ្ឋបាត់បង់ចំណូលពន្ធនាំចូលដ៏ច្រើនសន្ធឹកសន្ធាប់ក្នុង១ខែៗ គឺបញ្ហាប្រេងគេចពន្ធនេះតែម្តង បន្លំជាប្រេងនាំចូលស្របច្បាប់ជាដើមដែលជាប្រភពចំនូលមេគយទំនប់រលក។
ពត៍មានខាងលើបានលើកឡើងថា បើខាងគយទំនប់រលក ដែលមានលោក ណុប សំអាន ជាប្រធានការិយាល័យគយច្រកទំនប់រលក និងលោក ផាត់ សំណាង អនុប្រធានការិយាល័យគយច្រកទំនប់រលក និងមេសាខាខេត្ត មានវិធានទប់ស្កាត់ទំនិញគេចពន្ធ ប្រេងគេចពន្ធ អនុវត្តតាមផែនការ អគ្គនាយ នៃអគ្គនាយកដ្ឋាន គយនិរដ្ឋាករ កម្ពុជា និងការណែនាំពីក្រសួងសេដ្ឋកិច្ច និងហិរញ្ញវត្ថុ ក៏ដូចគោលនយោបាយរដ្ឋាភិបាល ធានាបានថា រដ្ឋនឹងទទួលបានចំណូលពន្ធនាំចូលក្នុងកម្រិតខ្ពស់ក្នុង១ខែៗ ។ កន្លងមកក៏ដូចបច្ចុប្បន្ន ប្រេងគេចពន្ធបានហូរចូលដោយគម្ហុកពីប្រទេសថៃ យកមកទុកលក់ចែកចាយបន្តនៅចំណុច កោះព្រាប ក្រោមការគ្រប់គ្រងដោយមេគយទំនប់រលក លោក ណុប សំអាន ។ដូច្នេះទាំងទូកតូច ទូកធំចរាចរណ៍លើដែនសមុទ្រត្រូវទិញប្រេងគេចពន្ធពីចំណុច កោះព្រាប មានតំលៃទាបសម្រាលដល់ការចំណាយរបស់ពួកគាត់ ពិសេសឡានឈ្មួញទាំងតូច ទាំងធំ បានទៅដឹកចេញពីកោះព្រាប យកមកចែកចាយតាមស្ថានីយ៍ប្រេងក្នុងក្រុងព្រះសីហនុ និងបណ្តាស្រុកមួយចំនួនទៀតយ៉ាងចំហរ ខណ:មេគយៗ មានភារកិច្ចបង្ក្រាបងប់ងល់និងទទួលលាភសក្ការៈពីមេឈ្មួញរកស៊ីទុច្ចរិតទាំងនោះ..?។
ទោះជាយ៉ាងណា រាល់ទំនិញគេចពន្ធទាំងនេះត្រូវឆ្លងកាត់ក្រុមគយចល័តដែនសមុទ្រ និងនគរបាល ព្រំដែនទឹកជាមុនសិនផងដែរ។ បានន័យថា គយចល័តដែនសមុទ្រ និងនគរបាលព្រំដែន អនុញ្ញាតអោយដឹកជញ្ជូនឬស៊ីលុយពីឈ្មួញហើយ ទើបខាងគយទំនប់រលក គយស្ទឹងហាវ គយកែវផុស បន្តយកលុយដូចគ្នា ទើបបទល្មើសរត់ពន្ធដែលក្លាយទៅជារឿងធម្មតាសម្រាប់មេគយៗនៅខេត្តព្រះសីហនុ និងមេគយស្នាក់ការទាំង៣ដែលថ្វើឲ្យពួគាត់ក្លាយជាសេដ្ឋីទៅហើយ ។ លោក ណុប សំអាន ប្រធានស្នាក់ការគយ និងរដ្ឋាករ ទំនប់រលក ត្រូវបានគេខ្សឹបប្រាប់ឱ្យដឹងទៀតថា មានមេឈ្មួញរកស៊ីគេចពន្ធធំៗ បានមកចរចារកកញ្ចប់ទុកអោយចៀសវាងបែកឆ្នាំងបាយពួកគេ។ក្រុមអ្នករកស៊ីបានរំលឹកថាបើសិនថ្នាក់លើមិនបានអើពើទប់ស្កាត់ទំនិញគេចពន្ធហូរចូលតាមស្នាក់ការគយទាំង៣ស្ថិតក្រោមការគ្រប់គ្រងរបស់ លោក សំ សុវណ្ណារិទ្ធ ទេ រដ្ឋនឹងត្រូវបាត់បង់ចំណូលពន្ធនាំចូលក្នុង១ខែរាប់សែនដុល្លារ បើទោះបីជារូបភាពឃើញមានចំណូលពន្ធច្រើនក៏ដោយ!។សង្ឃឹមថានឹងមានការបកស្រាយពីស្ថាបន័ពាក់ពន្ធ័ចំពោះសេចក្តីរាយការណ៍ខាងលើនេះថាតើពិតឬមិនពិត?៕
