ទាហ៊ានចិននិងថៃធ្វើសមយុទ្ធរួមគ្នានៅភាគឥសាន្តប្រទេសបន្ទាប់ពីអាមេរិកឥណ្ឌូណេស៊ីទើបបញ្ចប់សមយុទ្ធ
15-August-2022 / ព័ត៌មានអន្តរជាតិ
ប្រទេសថៃឡង់ដ៍៖យោធារបស់ប្រទេសថៃនិងចិនបានបើកធើ្វសមយុទ្ធយោធាប្រចាំឆ្នាំរួមគ្នារបស់ខ្លួនដែលមានរយៈពេល ១០ថ្ងៃកាលពីថ្ងៃអាទិត្យកន្លងទៅនៅឯបន្ទាយកងទ័ពអាកាស ឧត្តរធានី (Udon Thani)។ នេះគឺសមយុទ្ធលើកទី១ បន្ទាប់ពីអាក់ខានផ្អាកធ្វើ ជាច្រើនខែឆ្នាំមក ព្រោះតែជំងឺកូវីដ១៩។ សមយុទ្ធចាប់ផ្តើមជាថ្មីនៅរដូវក្តៅនេះ គឺផ្តើមរៀបចំធ្វើ ចាប់ពីថ្ងៃទី១៤ រហូតដល់២៥ សីហា។ សមយុទ្ធ រយៈពេល១១ថ្ងៃជាប់គ្នានេះ មានវត្ថុបំណងពង្រឹងទំនាក់ទំនងនិងការយោគយល់គ្នា រវាងមហាយក្សចិននិងរាជអាណាចក្រថៃ។
មន្ត្រីក្រសួងការពារជាតិថៃលោក Chaiyasit Thantayakul បានបញ្ជាក់កាលពីពេលថ្មីៗនេះថា កងទ័ពរំដោះប្រជាជនចិន និងកងទ័ពអាកាសប្រទេសថៃ នឹងរួមគ្នាធ្វើសមយុទ្ធយោធាប្រចាំឆ្នាំលើកទីប្រាំរបស់ខ្លួនដែលមានឈ្មោះថា “ក្រញុំស្ទាំង ឆ្នាំ២០២២“ នៅឯមូលដ្ឋានទ័ពអាកាសឧត្តរធានី (Udon Thani) ។
លោកបានបន្ថែមថា សមយុទ្ធនេះអាចបង្កការរៀនសូត្រមួយបន្ថែមទៀតដល់កងទ័ពអាកាសរបស់ថៃឡង់ដ៍ ធើ្វការរៀនសូត្រនិងស្វែងយល់បន្ថែមទៀតអំពីសមត្ថភាពយន្តហោះចម្បាំងរបស់កងទ័ពអាកាសប្រទេសចិន ពាក់ព័ន្ធទៅនឹងប្រព័ន្ធរ៉ាដាក្នុងការកំណត់ទីតាំងរបស់សត្រូវ និងប្រព័ន្ធបញ្ជានៅក្នុងការប្រយុទ្ធផ្សេងៗ។ ដូចគ្នានេះដែរ លំហាត់យោធាខាងលើនេះក៏និងជួយឱ្យកងទ័ពរំដោះប្រជាជនចិនធើ្វការស្វែងយល់អំពីសមត្ថភាពប្រយុទ្ធរបស់សព្វាវុធលោកខាងលិច រួមនិងតាក់ទិចមួយចំនួនដែលកងយោធារបស់ប្រទេសថៃឡង់ដ៍បានរៀនសូត្រកាលពីអតីតកាល។
លោកក៏បានបន្ដឱ្យដឹងថា សមយុទ្ធយោធាមួយនេះនឹងផ្តោតទៅលើសមត្ថភាពប្រយុទ្ធគាំទ្ររបស់កងទ័ពអាកាស ទៅដល់កងទ័ពស្មើជើង នៅក្នុងប្រតិបត្តិការវាយប្រហារផ្សេងៗ។នៅក្នុងការធើ្វសមយុទ្ធនេះដែរ កងទ័ពរំដោះប្រជាជនចិន នឹងដាក់ពង្រាយនូវយន្តហោះចម្បាំងប្រភេទ J-10C/S ចំនួន ៦ គ្រឿង និងយន្តហោះទម្លាក់គ្រាប់បែកប្រភេទ JH-7AI មួយគ្រឿង រួមនិងយន្តហោះឈ្លបការណ៍ពិសេស (Shaanxi KJ-500) មួយគ្រឿងផងដែរ។ រីឯខាងកងទ័ពអាកាសរបស់ប្រទេសថៃឡង់ដ៍វិញ ក៏នឹងដាក់ពង្រាយយន្តហោះចម្បាំងប្រភេទ Gripen ចំនួន ៥ គ្រឿង យន្តហោះវាយប្រហារ Alphajet ចំនួន ៣ គ្រឿង រួមនិងយន្តហោះឈ្លបការណ៍ពិសេស SAAB 340 AEW មួយគ្រឿងផងដែរ។
ដោយឡែកខាងរដ្ឋាភិបាលទីក្រុងប៉េកាំងបាននិយាយថា "សមយុទ្ធយោធារួមគ្នាមួយនេះគឺធើ្វឡើងក្នុងគោលបំណងបង្កើនកិច្ចសហប្រតិបត្តិការរវាងយោធាប្រទេសទាំងពីរឱ្យកាន់តែស៊ីជម្រៅបន្ថែមទៀត ដើម្បីជំរុញការអភិវឌ្ឍជាបន្តបន្ទាប់នៃទំនាក់ទំនងជាដៃគូយុទ្ធសាស្ត្រគ្រប់ជ្រុងជ្រោយរវាងរដ្ឋាភិបាលចិននិងរដ្ឋាភិបាលថៃឡង់ដ៍។សហរដ្ឋអាមេរិកវិញ បានថ្លែងក្តីព្រួយបារម្ភពីការបង្កើនវត្តមានចិននៅក្នុងតំបន់។ អាមេរិកខ្លួនឯង ក៏បានផ្តើមសមយុទ្ធយោធារួមគ្នាជាមួយ កងទ័ពឥណ្ឌូនេស៊ី ដែលទើបតែចប់ថ្មីៗនេះ។ ថៃ គឺជាសម្ព័ន្ធមួយដៃគូរបស់សហរដ្ឋអាមេរិក តែ ថៃ ក៏បង្កើនចំណងទាក់ទងស្អិតខ្លាំងមួយចិន និងកាន់តែខ្លាំងឡើងនៅក្នុងអាណត្តិរបស់នាយករដ្ឋមន្ត្រី ឧត្តមសេនីយ ប្រាយុទ្ធ ចាន់អូចារ ដែលធ្វើរដ្ឋប្រហារឡើងកាន់អំណាចតាំងពីឆ្នាំ២០១៤។
ជាច្រើនឆ្នាំមកហើយ ដែលចិននិងថៃបានពង្រឹងទំនាក់ទំនងទ្វេភាគី ហើយ ថៃបានព្យាយាមទិញសម្ភារៈសឹកសង្គ្រាមពីចិន បន្ទាប់ពីបានចុះកិច្ចព្រមព្រៀងយោគយល់គ្នាមួយ នៅឆ្នាំ២០១៧។ នៅឆ្នាំ២០២០ ថៃបានគ្រោងទិញនាវាមុជទឹករបស់ចិន ចំនួន២គ្រឿង ក្នុងតម្លៃទឹកប្រាក់ ៧២៤លានដុល្លារ។ ការទិញដូរនេះត្រូវពន្យារពេល ដោយត្រូវរកការរិះគន់មិនសូវល្អពីសំណាក់ប្រជារាស្ត្រថៃ។នាវាមុជចិន ប្រភេទស៊ីប្រេងម៉ាស៊ូត អាចគ្រោងនឹងបញ្ចូនទៅស្រុកថៃ នៅឆ្នាំ២០២៤។ ថៃជាប្រទេសដំបូងៗទី១នៅអាស៊ីអាគ្នេយ៍ ជាមួយនឹងស្រីលង្កា ដែលទិញគ្រឿងសព្វាវុធពីចិន។ កងទ័ពជើងទឹកថៃ ប្រកាសដែរថា បើបាននាវាមុជទឹកចិនមក នឹងបានជាប្រយោជន៍ដើម្បីការពារចំពោះអំពើឈ្លានពាននៅឈូងសមុទ្រសៀម ហើយនិងរក្សាសន្តិសុខសុវត្ថិភាពក្នុងតំបន់៕
