តៃកុងឡានចង្កូតស្តាំបានបង់ពន្ធនិងកែចង្កូតច្រណែនតវ៉ាសុំឲ្យធើស្មើភាពគ្នា!
07-July-2022 / ព័ត៌មានជាតិ
កំពង់ស្ពឺ៖ អ្នកបើកបររថយន្តដឹកដីកែចង្កូតនិងបានបង់ពន្ធហើយរាប់រយគ្រឿង បានធ្វើការប្រមូលផ្តុំចតតម្រៀតជួរគ្នាតាមបណ្តោយផ្លូវជាតិលេខ៤១ ក្នុងភូមិសាស្ត្រព្រំប្រទល់រវាងស្រុកអង្គស្នួល ខេត្តកណ្តាល និងស្រុកសំរោងទង ខេត្តកំពង់ស្ពឺ នៅព្រឹកថ្ងៃទី៧ ខែកក្កដា ឆ្នាំ២០២២ សុំឱ្យរាជរដ្ឋាភិបាលអនុវត្តឱ្យស្មើគ្នាសម្រាប់អ្នកប្រើប្រាស់រថយន្តចង្កូតស្តាំ និងគ្មានពន្ធនាំចូល ផ្សែងទៀតដែលលើកលែងមិនឲ្យចាំបាច់កែចង្កូតពីស្តាំមកឆ្វេង។
ក្រុមតៃកុងឡានរថយន្តខាងលើ បានលើកឡើងថា កន្លងមកពួកគាត់បានប្រើប្រាស់រថយន្តចង្កូតស្តាំ និងគ្មានពន្ធ ប្រកបរបរដឹកដីលក់។ តែក្រោយរាជរដ្ឋាភិបាលប្រកាសឱ្យចូលបង់ពន្ធ និងកែចង្កូតរួចមក ពួកគាត់ក៏បាននាំគ្នាចូលបង់ពន្ធ និងកែចង្កូតបានរួចរាល់ដើម្បីបំពេញតួនាទីជាពលរដ្ឋរស់នៅក្នុងប្រទេសនីតិរដ្ឋ។ គ្រាដែលរាជរដ្ឋាភិបាលប្រកាសឱ្យចូលបង់ពន្ធ និងកែចង្កូត ពួកគាត់បានទៅខ្ចីបុលធនាគារ ដើម្បីបង់ និងកែចង្កូតសម្រាប់បញ្ជាក់ពីភាពត្រឹមត្រូវតាមផ្លូវច្បាប់ ហើយបើមិនអនុវត្តតាមការណែនាំនេះទេ នាយកដ្ឋានគយ និងរដ្ឋាករ នឹងអនុវត្តតាមនីតិវិធីច្បាប់ជាធរមាន។
តែក្រោយមកនៅថ្ងៃទី៦ ខែកក្កដា ឆ្នាំ២០២២ រាជរដ្ឋាភិបាលកម្ពុជាក្នុងពិធីសំណេះសសំណាលជាមួយកីឡាករជនពិការ បានប្រកាសឱ្យរថយន្តចង្កូតស្តាំ និងគ្មានពន្ធ ឱ្យចូលបង់ពន្ធ ហើយបានលើកលែងការកែចង្កូត។ ការនេះ ក្រុមរថយន្តខាងលើបានបង្ហាញនូវការមិនពេញចិត្ត ដោយអះអាងថា ជាការអនុវត្តមិនស្មើភាពគ្នាចំពោះពួកគាត់។ ដូច្នេះ ពួកគាត់ស្នើសុំឱ្យរាជរដ្ឋាភិបាលពិនិត្យ និងពិចារណាឡើងវិញ ចំពោះការសម្រេចខាងលើ ហើយឱ្យរថយន្តគ្មានពន្ធនាំចូលទាំងអស់ចូលបង់ពន្ធជូនរដ្ឋឱ្យបានត្រឹមត្រូវ ហើយត្រូវតែកែចង្កូតដូចគ្នា។
ក្រុមរថយន្តនេះ ក៏បានលើកឡើងផងដែរពីការមិនយល់ព្រមចំពោះការលើកលែងនេះទេ ហើយរាជរដ្ឋាភិបាលគួរតែអនុវត្តឱ្យបានម៉ឺងម៉ាត់ដូចគ្នាដើម្បីឱ្យមានភាពស្មើគ្នារវាងអ្នកប្រើប្រាស់រថយន្តចង្កូតស្តាំ និងគ្មានពន្ធ ហើយបើមិនដូច្នេះទេ ពួកគាត់នឹងបន្តធ្វើកូដកម្មនេះរហូតមានដំណោះស្រាយ។សូមបញ្ជាក់ថាបើតាមសេចក្តីរាយការណ៍ពីលោកបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយ និងរដ្ឋាករកម្ពុជា នាព្រឹកថ្ងៃទី៧ ខែកក្កដា ឆ្នាំ២០២២នេះ បានឲ្យដឹងថា គិតចាប់ពីបើកយុទ្ធនាការ កាលពីខែកញ្ញា ឆ្នាំ២០២១ រហូតដល់ផុតឱសានវាទ ត្រឹមថ្ងៃទី៣០ ខែមិថុនា ឆ្នាំ២០២២កន្លងទៅនេះ ការប្រមូលពន្ធ និងអាករនាំចូល លើរថយន្តគ្មានពន្ធ ដែលមានស្រាប់នៅក្នុងប្រទេស អនុវត្តបានទាំងរថយន្តចង្កូតឆ្វេង ដែលចូលទៅបង់ពន្ធ និងរថយន្តចង្កូតស្តាំ ដែលចូលទៅបង់ប្រាក់កក់ សរុបមានរថយន្ត៩,៧៥៣គ្រឿង ស្មើនឹងថវិកា៧៦.៣៣លានដុល្លារ។
លោក គុណ ញឹម បានបញ្ជាក់ថា ក្នុងចំណោមរថយន្តទាំង៩,៧៥៣គ្រឿងនោះ មានរថយន្តចង្កូតស្តាំ ដែលចូលទៅបង់ប្រាក់កក់ មុនធ្វើការកែចង្កូត មានចំនួន៧,០៤០គ្រឿង ស្មើនឹងថវិកា៤១.៥៦លានដុល្លារ និងរថយន្តចង្កូតឆ្វេង ដែលចូលទៅបង់ពន្ធ មានចំនួន២,៧១៣គ្រឿង ស្មើនឹងថវិកា៣៥លានដុល្លារ។សម្រាប់ឡានចង្កូតស្តាំងដែលនៅសេសសល់lលោក គុណ ញឹម បញ្ជាក់ យ៉ាងដូច្នេះថា «យើងកំពុងគិតគូរ ប៉ុន្តែមានចំណាររបស់សម្ដេចតេជោរួចហើយ ក្នុងរង្វង់ចន្លោះពី៦០ថ្ងៃ ទៅ៩០ថ្ងៃ ការអនុគ្រោះការអនុញ្ញាតនេះ គឺមានរយៈពេលប៉ុណ្ណឹង ហើយយើងនឹងពិភាក្សាគ្នា សុំគោលការណ៍សម្រេច ពីលោកឧបនាយករដ្ឋមន្ដ្រី ក្រសួងសេដ្ឋកិច្ច និងហិរញ្ញវត្ថុ ជ្រើសរើសយក៩០ថ្ងៃ ឬ៦០ថ្ងៃ ដោយពិនិត្យមើលគ្រប់កត្តាពាក់ព័ន្ធទាំងអស់»។
លោកមេគយ បានបញ្ជាក់ផងដែរថា ការផ្ដល់ឲ្យនេះមិនមែនក្នុងចំណោម២៥៤៧គ្រឿងនោះទេ គឺផ្ដល់ឲ្យអ្នកដែលអត់ទាន់បានប្រកាស គឺអ្នកកាន់កាប់រថយន្តចង្កូតស្ដាំ ហើយដែលមិនប្រកាស ត្រឹមថ្ងៃទី៣០ ខែមិថុនា ដែលជាឱសានវាទចុងក្រោយ នៃការអនុវត្តយុទ្ធនាការប្រមូលពន្ធអាករ លើរថយន្តមានស្រាប់ក្នុងប្រទេស។លោក គុណ ញឹម បានគូសបញ្ជាក់ថា អគ្គនាយកដ្ឋានគយ កំពុងតែរៀបចំនីតិវិធី និងយុទ្ធនាការលម្អិតក្នុងការអនុវត្ត ហើយនឹងមានការផ្សព្វផ្សាយ ឬសេចក្ដីជូនដំណឹងនៅពេលឆាប់ៗ អាចថាល្ងាចថ្ងៃទី៨ ខែកក្កដា ឆ្នាំ២០២២នឹងមាននីតិវិធីលម្អិត ពីរយៈពេលដែលអនុញ្ញាតឲ្យបំពេញកាតព្វកិច្ចពន្ធអាករ សម្រាប់រថយន្តចង្កូតស្ដាំ ដែលសម្តេចតេជោ នាយករដ្ឋមន្ត្រី បានផ្តល់គោលការណ៍ឲ្យ។
សូមបញ្ជាក់ថាក្រៅពីការអនុញ្ញាតឲ្យបន្តប្រឡានចង្កូតស្តាំងបន្តបន្ទាប់ពីបង់ពន្ធហើយសម្តេចតេជោងបានប្រកាសហាមមិនឲ្យមានការនាំចូលឡានស្តាំចាប់តាំងពីថ្ងៃទី៦ក្កដាផងដែរ។តែមិនដឹងថាធើបានអត់ព្រោះលោកបានហាមរាប់ឆ្នាំមកហើយដែរ?៕
