បន្ទាប់ពីបញ្ជាឲ្យចុះបង្ក្រាបរឹបអូសមួយរយៈសម្តេចតេជោបញ្ជាឲ្យកាត់ឆ្វៀលដីលិចទឹកតំបន់ទន្លេសាបជូនប្រជាជនវិញ
ភ្នំពេញ៖ប្រមុខរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាឱ្យស្ថាប័នពាក់ព័ន្ធសិក្សាពីការកែសម្រួលផ្ទៃដីបឹងទន្លេសាប និងកាត់ឆ្វៀលដីជូនពលរដ្ឋដែលអាស្រ័យផលជាក់ស្ដែងយូរឆ្នាំតាមរូបមន្តស្បែកខ្លា និងប្រកាសប្រឆាំងដាច់ខាតចំពោះអ្នកមានអំណាចដែលទន្ទ្រានយកដីបឹងទន្លេសាប!។ថ្លែងតាមរយៈសារពិសេសរបស់លោកនាយករដ្ឋមន្ត្រី ស្ដីពីបឹងទន្លេសាប នៅថ្ងៃទី២៧ ខែឧសភានេះសម្តេចតេជោនាយករដ្ឋមន្ត្រីមានប្រសាសន៍ថា កន្លងទៅ ផ្ទៃដីបឹងទន្លេសាបត្រូវបានចែកជា៣តំបន់ រួមមាន តំបន់១ គឺតំបន់ដែលពលរដ្ឋរស់នៅ តំបន់២ គឺតំបន់ដែលពលរដ្ឋអាស្រ័យផល និងតំបន់៣ គឺព្រៃលិចទឹកដែលជាតំបន់ហាមឃាត់ការពារដាច់ខាត ប៉ុន្តែ តំបន់នេះនៅតែមានការរំលោភទន្ទ្រាន។
សម្តេចថ្លែងថា ដើម្បីអភិរក្សបឹងទន្លេសាប និងគិតគូរដល់ពលរដ្ឋដែលរស់នៅទីនោះ គឺស្ថាប័នពាក់ព័ន្ធចាំបាច់ត្រូវតែសិក្សាកែសម្រួល កាត់ដី ផ្ដល់កម្មសិទ្ធិដល់ពលរដ្ឋដែលអាស្រ័យផលជាក់ស្ដែងយូរឆ្នាំ ដោយកាត់ឆ្វៀលតាមរូបមន្តស្បែកខ្លា។សម្តេចបញ្ជាក់ថា «ខ្ញុំសង្ឃឹមថា លោកអភិបាលខេត្ត លោកអភិបាលស្រុក និងមេឃុំ ត្រូវទទួលខុសត្រូវចំពោះមុខរាជរដ្ឋាភិបាល ចំពោះមុខប្រជាពលរដ្ឋរបស់ខ្លួននៅក្នុងមូលដ្ឋាន»។
សម្តេចបានបន្តថា សម្តេចគឺជាជានាយករដ្ឋមន្ត្រី ដែលជាអ្នកមានសិទ្ធិតែមួយគត់ ក្នុងការចុះហត្ថលេខាលើអនុក្រឹត្យ សម្រាប់ការផ្តល់ដីជូនប្រជាពលរដ្ឋ តាមសំណើរបស់អភិបាលខេត្ត ហើយមេឃុំត្រូវស្នើមកស្រុក ស្រុកត្រូវស្នើមកខេត្ត ហើយលោកឧបនាយករដ្ឋមន្ត្រី ជា សុផារ៉ា ត្រូវគ្រប់គ្រងលើការងារនេះជាមួយស្ថាប័នពាក់ព័ន្ធដទៃទៀត។សម្តេចតេជោសង្កត់ធ្ងន់ថា៖ «យើងប្រឆាំងដាច់ខាតជាមួយនឹងការប្រើប្រាស់សិទ្ធិអំណាចរបស់អ្នកមានអំណាច និងប្រើប្រាស់ទឹកលុយរបស់អ្នកមានប្រាក់ ទៅជ្រកក្រោមផ្លាករូបភាពប្រជាពលរដ្ឋ ហើយដណ្ដើមកាន់កាប់ទន្ទ្រានយកដីផ្ទៃលិចទឹក ដើម្បីធ្វើជាផលប្រយោជន៍ផ្ទាល់របស់ពួកគេ»។
សូមបញ្ជាក់ដែរថា ព្រំប្រទល់តំបន់ដែលសម្រេចកែតម្រូវរួចហើយ គឺមានខេត្តកំពង់ធំ សម្រួលផ្ទៃដីចំនួន១០០១៤ហិកតា ចេញពីតំបន់២ បញ្ចូលមកក្នុងតំបន់១នៅបឹងទន្លេសាប ជូនពលរដ្ឋ៩ ១៤៤គ្រួសារ និងកែសម្រួលផ្ទៃដី៦ ៣៦៥ហិកតា ស្មើនឹង២ ០២៥ក្បាលដី ចេញពីតំបន់៣ បញ្ចូលក្នុងតំបន់២ នៃបឹងទន្លេសាប ជូនពលរដ្ឋចំនួន១ ៧៤៩គ្រួសារ។ នៅខេត្តបន្ទាយមានជ័យ កែសម្រួលផ្ទៃ៥៨ហិកតា១៦អា ពីតំបន់៣ បញ្ចូលមកតំបន់២ នៃបឹងទន្លេសាប ជូនពលរដ្ឋចំនួន២២គ្រួសារ និងខេត្តពោធិ៍សាត់ សម្រួលផ្ទៃដីចំនួន៣ ៤៤៨ ពីតំបន់៣ មកតំបន់២ នៃបឹងទន្លេសាប ជូនពលរដ្ឋចំនួន១ ៦៥៨គ្រួសារ។
ទោះជាយ៉ាងណា សម្តេចបានបញ្ជាឱ្យស្ថាប័នពាក់ព័ន្ធបោះបង្គោលព្រំក្នុងបឹងទន្លេសាបឱ្យបានមាំ ដោយថា បើមិនដូច្នេះទេ បង្គោលអាចនឹងចេះដើរ ដូចជាត្រូវគេដក ឬរំកិល ជាដើម។
ករណិយ៍ក្រៅពីការសាទរប្រជាសហគមន៍រស់នៅក្បែរបឹងទន្លេសាប ស្ថិតក្នុងស្រុកឯកភ្នំ ខេត្តបាត់ដំបង លោក ជា សារិន ប្រាប់កាសែតថា លោកសាទរ បើសិនរដ្ឋាភិបាលអនុវត្តឆ្វៀលដីដល់ដៃពលរដ្ឋដែលរស់នៅយូរឆ្នាំ ឬក្រីក្រ មែននោះ។ យ៉ាងណា លោកបារម្ភថា ដីនោះនឹងក្លាយជាកម្មសិទ្ធិរបស់ជនមានអំណាច ខណៈតាមបទពិសោធន៍ដែលលោកសង្កេតឃើញ គឺទិដ្ឋភាពជាក់ស្តែង ពលរដ្ឋបានត្រឹមជាអ្នករុករានឬអាស្រ័យផលតិចតួច តែអ្នកមានលុយទៅវិញទេដែលជាអ្នកទទួលផលប្រយោជន៍ធំពិតប្រាកដ។លោកថា ការឆ្វៀលដីតាមរូបមន្តស្បែកខ្លានេះអាចនឹងធ្វើឱ្យមានការទន្ទ្រានបន្ថែមទៀត បើពុំមានការផ្ទៀងផ្ទាត់ឱ្យហ្មត់ចត់ទេនោះ។
