ដោយចាត់ព្រឹត្តិការណ៍២៨វិច្ឆិកាជាករណិយ៍បាត់ដាននាយករដ្ឋមន្ត្រីប្រកាសចេញលុយ១០០លាននិងប្រកាស ផ្អាកការរៀបអាពាហ៍ពិពាហ៍ ឬ ការជួបជុំរយៈពេល១៥ថ្ងៃ
30-November-2020 / សុខភាពនិងកីឡា
ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ប្រកាសផ្អាកការរៀបអាពាហ៍ពិពាហ៍ ឬ ការជួបជុំដែលមានមនុស្សច្រើនរយៈពេល១៥ថ្ងៃ ។ នេះបើយោងតាមប្រសាសន៍របស់សម្តេច តាមរយៈសារសំឡេង នៅថ្ងៃទី៣០ ខែវិច្ឆិកា ឆ្នាំ២០២០ នេះ ។
សារសំឡេងដែលផ្ញើជូនអភិបាលរាជធានីភ្នំពេញ និង អភិបាលខេត្តសៀមរាប , សម្តេចតេជោ ហ៊ុន សែន ស្នើសុំការយោគយល់លើបញ្ហាទាំងអស់នេះ ដើម្បីទប់ស្កាត់ការរីករាលដាលជំងឺកូវីដ-១៩ ។សូមបញ្ជាក់ថាត្រឹមថ្ងៃទី៣០វិច្ឆិកាមាន មនុស្ស១៤នាក់ហើយបានរកឃើញវិជ្ជមានកូវីដ១៩ ក្នុងព្រឹត្តិការណ៍ «សហគមន៍២៨វិច្ឆិកា»។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសឲ្យដឹងព្រឹកថ្ងៃទី៣០ ខែវិច្ឆិកា ឆ្នាំ២០២០ ពីក្រុងសៀមរាបថា លទ្ធផលធ្វើតេស្តរកមេរោគកូវីដ១៩ ក្នុងព្រឹត្តិការណ៍២៨វិច្ឆិកា បានបង្ហាញថា សរុបមនុស្ស១៤នាក់ហើយបានរកឃើញមានជំងឺកូវីដ១៩ បន្ទាប់ពីរកឃើញចំនួន៦ករណីបន្ថែមទៀត។
សម្តេចតេជោ ហ៊ុន សែន បានថ្លែងថា អ្នកធ្វើតេស្តពាក់ព័ន្ធ «ព្រឹត្តិការណ៍សហគមន៍២៨វិច្ឆិកា» នៅទូទាំងប្រទេស មានចំនួន៣,៣៣២សំណាក មកពី៧ខេត្ត។
សម្តេចតេជោ ហ៊ុន សែន បានថ្លែងថា ប្រតិបត្តិការទប់ស្កាត់កូវីដ១៩ បានធ្វើលឿន ហើយក្នុងទ្រង់ទ្រាយធំ តែកន្លែងខ្លះមិនទាន់លឿននៅឡើយទេ។
សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានឲ្យដឹង អំពីការបញ្ចេញសាច់ប្រាក់ជាង ១០០០លានរៀល ទៅរាជធានីខេត្តនៅទូទាំងប្រទេស ក្នុងនោះសម្តេចក៏ជូនពរបងប្អូនជនរួមជាតិឃ្លាតចាកឆ្ងាយ ពីកូវីដ-១៩នេះ។
សម្តេចតេជោ ហ៊ុន សែន មានប្រសាសន៍ថា៖ បងប្អូនជនរួមជាតិ! ព្រឹកមុិញនេះខ្ញុំសំរេចឱ្យបញ្ចេញសាច់ ប្រាក់ជាង១០០០លានរៀលជូនទៅ រាជធានីខេត្តនៅទូទាំងប្រទេសសម្រាប់ជួយដល់គ្រួសារក្រីក្រដែលត្រូវធ្វើចត្តាឡីស័កដែលគ្រួសារនីមួយៗនឹងទទួលបាន២មុឺនរៀលក្នុងមួយថ្ងៃដែលមានរយៈពេល១៥ថ្ងៃដែលថវិកាសរុបទទួលបាន៣០មុឺនរៀលក្នុងមួយគ្រួសារ។សូមកុំមានការភាន់ច្រឡំថាខ្ញុំតម្រូវឱ្យធ្វើចត្តាឡីសក័១៥ថ្ងៃ។ការធ្វើចត្តាឡីស័កត្រឹមតែ១៤ថ្ងៃប៉ុណ្ណោះតែខ្ញុំផ្តល់ជូនថវិកាសម្រាប់១៥ថ្ងៃក្នុងបំណងជួយដល់ប្រជាពលរដ្ឋក្រីក្រតែប៉ុណ្ណោះ។សម្តេច ជូនពរបងប្អូនជនរួមជាតិឃ្លាតចាកឆ្ងាយពីកូវីដ-១៩។
បើតាមការប្រកាសរបស់លោកស្រីយកសម្បត្តិរដ្ឋលេខាធិការក្រសួងសុខាភិបាលកាលពីយប់ថ្ងៃទី២៨វិច្ឆិកាបានឲ្យដឹងពីការរកឃើញភរិយារបស់អគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ លោកឧត្តមសេនីយ៍ ឆែម សាវុធ ឆ្លងជំងឺកូវីដ១៩។ក្រុមគ្រូពេទ្យ បានចេញធ្វើការទាំងយប់ ដោយទៅយកអ្នកជំងឺនៅផ្ទះ ក្នុងបុរីប៉េងហួត តាមផ្លូវ៦០ម៉ែត្រ មកកាន់មន្ទីរពេទ្យមិត្តភាពខ្មែរ-សូវៀត ព្រមទាំងធ្វើតេស្តរកមេរោគកូវីដ១៩ លើ ក្រុមគ្រួសាររបស់គាត់ និង ស្រាវជ្រាវរកអ្នកពាក់ព័ន្ធ ផ្សេងទៀត។
លោកជំទាវ បាន បន្ថែមថា ក្រសួងសុខាភិបាល ក៏បាន ណែនាំឲ្យមន្ទីរសុខាភិបាល ខេត្តសៀមរាប បញ្ជូនគ្រូពេទ្យ ចេញធ្វើការទាំងយប់ដែរ ដើម្បីស្វែងរក អ្នកពាក់ព័ន្ធជាមួយ ស្ត្រីអ្នកជំងឺកូវីដនេះ ដោយសារគាត់មានផ្ទះនៅសៀមរាប។ គាត់បានទៅនៅសៀមរាប ដូចជា ៤ ទៅ ៥ថ្ងៃដែរ ។លោកជំទាវ យក់ សម្បត្តិ បញ្ជាក់ថា «ស្ត្រីអ្នកជំងឺកូវីដ១៩ ដែលជាភរិយា ឯកឧត្តម ឆែម សាវុធ មានរោគសញ្ញា តាំងពី ១០ថ្ងៃមុន។ កាលពីថ្ងៃសៅរ៍មុន គាត់ទៅញ៉ាំអី នៅផ្សារអ៊ីអន១ ហើយគាត់ឡើងចុះភ្នំពេញ-សៀមរាប ។ គាត់ឥឡូវនេះ នៅភ្នំពេញ។ ព្រឹកមិញ គាត់ឡើងជណ្តើរ ៣កាំ ក៏ហត់ដែរបានន័យថាគាត់ឆ្លងជម្ងឺនេះ១០ថ្ងៃហើយ។ប្តីនិងកូនគាត់ឆ្លងទាំងអស់ ។
ករណីយ៍នេះសម្តេចតេជោថា៖ខ្ញុំហៅថា ជាករណីបាត់ដាន។ ឥឡូវយើងអត់ដឹងថា ក្រុមគ្រួសាររបស់ឯកឧត្តម ឆែម សាវុធ ឆ្លងពីអ្នកណាទេ រកអត់ទាន់ឃើញក្បាលកន្ទុយ នៅកន្លែងណា។ នោះហើយជាការលំបាក ដែលយើងចាត់ទុកថា វាជាមហន្តរាយមួយសម្រាប់ប្រទេសរបស់យើង បើយើងទប់ស្កាត់មិនទាន់ពេលវេលា»។
សម្តេចតេជោ ហ៊ុន សែន បានចាត់ទុក «ព្រឹត្តិការណ៍សហគមន៍២៨វិច្ឆិកា» ដែលជាករណីរកឃើញការឆ្លងកូវីដ-១៩ ក្នុងសហគមន៍ជាលើកដំបូង គឺជាករណីបាត់ដាន ហើយសម្តេចបានព្រមានថា ព្រឹត្តិការណ៍នេះនឹងនាំមហន្តរាយដល់ប្រទេសជាតិ បើទប់ស្កាត់មិនទាន់ពេលវេលា។សម្តេចតេជោ ហ៊ុន សែន, សម្តេចបានកំណត់ពេលវេលា១៥ថ្ងៃ ក្នុងការប្រយុទ្ធជាមួយកូវីដ-១៩ ក្នុងព្រឹត្តិការណ៍សហគមន៍២៨វិច្ឆិកា។ សម្តេចតេជោ បានថ្លែងថា ដើម្បីឲ្យការប្រយុទ្ធបានជោគជ័យក្នុងរយៈពេល ១៥ថ្ងៃនេះ មិនអាចពឹងតែលើរាជរដ្ឋាភិបាល និងអាជ្ញាធរនោះទេ គឺត្រូវតែមានការចូលរួមពីប្រជាពលរដ្ឋ។
សម្តេចតេជោ ហ៊ុន សែន សង្កត់ធ្ងន់ៗថា ៖ «មេរោគដែលរកឃើញក្នុងព្រឹត្តិការណ៍សហគមន៍២៨វិច្ឆិកានេះ ជាប្រភេទមេរោគខ្លាំង ដែលត្រូវប្រើថ្នាំខ្លាំង»។ សម្តេចតេជោ បានថ្លែងទៀតថា ប្រតិបត្តិការរុករកជំងឺកូវីដ-១៩ ត្រូវធ្វើក្នុងល្បឿនលឿន និងទ្រង់ទ្រាយធំជាងពេលមុនៗទៅទៀត៕
