ឡានបុកភេដែលទេសចរណ៍ស្រលាញ់ស្លាប់បាត់ហើយនៅកសិន្ធុទឹកប្រាសាទអង្គរវត្ត!

សៀមរាប៖ សត្វភេមួយក្បាល ដែលភាគច្រើននៅខាងកើតអង្គរវត្ត បានស្លាប់ ដោយសារឡានបុក។ កន្លងមក សត្វភេនេះគេបានដាក់ឈ្មោះថា «អាលាភ» ព្រោះវា បានទាក់ទាញអារម្មណ៍របស់ទេសចរជាតិ និងអន្តរជាតិ ឱ្យឈប់ថតលេងកម្សាន្តជាមួយ។ 

អ្នកនាំពាក្យអាជ្ញាធរជាតិអប្សរា លោក ជុំ សុភមករា បានឱ្យដឹងថា ភេខាងលើបានងាប់នៅរសៀលថ្ងៃទី១ ខែកុម្ភៈ នៅក្បែរកសិន្ធុទឹកប្រាសាទអង្គរវត្ត។ អ្នកនាំពាក្យបញ្ជាក់ថា ភេនេះមិនមែនជាហ្វូងភេដែលអាជ្ញាធរជាតិអប្សរា សហការជាមួយអង្គការសម្ព័ន្ធមិត្តសត្វព្រៃ (Wildlife Alliance Cambodia) ចិញ្ចឹមនៅក្នុងព្រៃអង្គរទេ។ វាត្រូវបានគេយកមកព្រលែងនៅតំបន់អង្គរ ទើបវាមិនចូលក្នុងហ្វូងសត្វភេទាំង១៥ផ្សេងទៀត។

លោក ជុំ សុភមករា បានបង្ហាញការសោកស្តាយចំពោះការបាត់បង់វត្តមានសត្វភេ ឈ្មោះអាលាភ ដែលកន្លងមកវាបានរួមចំណែកក្នុងការផ្សព្វផ្សាយតំបន់រមណីយដ្ឋានអង្គរមួយផ្នែក។ ជាមួយគ្នានេះ លោក សុភមករា បានអំពាវនាវឱ្យប្រជាពលរដ្ឋជាអ្នកដំណើរទាំងអស់ មានការប្រុងប្រយ័ត្ននៅពេលបើកបរ ដើម្បីរួមចំណែកកាត់បន្ថយគ្រោះថ្នាក់នានានៅក្នុងតំបន់រមណីយដ្ឋានអង្គរ។

ករណីនេះមានពត័មានថា សមត្ថកិច្ចបានឃាត់អ្នកបើកដើម្បីយកទៅសួរនាំ ប៉ុន្តែមិនទាន់មាន ការបញ្ជាក់លម្អិតជុំវិញករណីនេះពីអាជ្ញាធរពាក់ព័ន្ធនៅឡើយទេ។យ៉ាងណាត្រូវតែមានការពិនយ័ចំពោះសកម្មភាពគ្មានការប្រុងប្រយត្នឬមានចេតនាសម្លាប់សត្វដែលមានប្រយោជន៍ដល់សង្គមជាតិ។

បើតាមពលរដ្ឋខេត្តសៀមរាប សត្វភេនេះ ជាភេរបស់ពលរដ្ឋនៅខេត្តសៀមរាប ដែលបានយកមកលែងនៅខ្លោងទ្វារទន្លេអុំ ក្រុងអង្គរធំ។ ប៉ុន្តែសត្វភេនេះ បានបន្តដំណើរទៅរស់តែឯងនៅកសិន្ធុប្រាសាទអង្គរវត្ត៕