សាលារាជធានីភ្នំពេញថា នឹងរៀបចំសម្អាតអនាម័យ ជួសជុល និងកែលម្អហេដ្ឋារចនាសម្ព័ន្ធនៅតាមដងផ្លូវជុំវិញផ្សារដើមគ ឱ្យល្អប្រសើរឡើងវិញ តែឥឡូវអាជីវករលក់បន្លែ ចេញមកបិទផ្លូវ

ភ្នំពេញ៖ នៅថ្ងៃទី១៧ ខែមករានេះ គឺជាថ្ងៃចុងក្រោយហេីយ សម្រាប់អាជីវករដែលលក់ដូរនៅតាមចិញ្ចើមផ្លូវ និងទ្រូងផ្លូវ នៅតំបន់ជុំវិញផ្សារដើមគ។ ចាប់ពីថ្ងៃស្អែកនេះតទៅ អាជីវករទាំងអស់នេះ នឹងតម្រូវឱ្យទៅលក់ដូរនៅផ្សារដើម គ ថ្មី វិញ។ 

នេះបើតាមការបញ្ជាក់ពីលោកស្រី ដោ សម្ផស្ស នាយិការងរដ្ឋបាលរាជធានីភ្នំពេញ នារសៀលថ្ងៃសៅរ៍ ទី១៧ ខែមករា ឆ្នាំ២០២៦។លោកស្រី ដោ សម្ផស្ស បានបញ្ជាក់ក្នុង “នាមអ្នកនាំពាក្យរដ្ឋ បាល រាជធានីភ្នំពេញ សូមជម្រាបជូនសាធារណជនមេត្តា ជ្រាបថា ចាប់ពីថ្ងៃទី១៨ ខែមករា ឆ្នាំ២០២៦ ស្អែកនេះតទៅ រដ្ឋបាលរាជធានីភ្នំពេញ នឹងរៀបចំសម្អាតអនាម័យនៅតាមមហាវិថីម៉ៅសេទុង មហាវិថីព្រះមុនីរ៉េត ផ្លូវ២៣០ និងតំបន់ជុំវិញពាក់ព័ន្ធ ជាពិសេស គឺរៀបចំជួសជុល និងកែលម្អហេដ្ឋារចនាសម្ព័ន្ធឱ្យល្អប្រសើរឡើងវិញ ដែលអាចនឹងបង្កការកកស្ទះចរាចរណ៍នៅតំបន់ជុំវិញនោះ។

ដូចនេះ សូមបងប្អូន ចូលរួមសហការជាមួយអាជ្ញាធរ និងយោគយល់ អធ្យាស្រ័យ ដោយក្តីអនុគ្រោះបំផុត។”បន្ទាប់ពីការប្រកាសនេះដែរនៅល្ងាចថ្ងៃទី១៧ ខែមករា ឆ្នាំ២០២៦ ក្រុមអាជីវករជាច្រើននាក់ បានផ្ទុះការតវ៉ា រហូតមានការបិទផ្លូវធ្វើដំណើរចំណុចផ្លូវព្រះមុនីរ៉េត កែងនិងផ្លូវ២០៥ ក្នុងសង្កាត់ទួលស្វាយព្រៃ ខណ្ឌបឹងកេងកង នឹង ខណ្ឌទួលគោក រាជធានីភ្នំពេញ ។ ក្រុមអាជីវករលក់ដូរលើចំណីផ្លូវ ចេញតវ៉ា បន្ទាប់ពីសាលារាជធានីភ្នំពេញ ចេញសេចក្តីប្រកាសជូនដំណឹង ឱ្យពួកគាត់ផ្លាស់ប្តូរទៅលក់នៅទីតាំង ផ្សារដើមគថ្មីបឹងតាមោក ខណ្ឌព្រែកព្នៅត្រឹមថ្ងៃទី១៨មករា។ឡូវនេះនេះអាជ្ញាធរកំពុងធ្វើការសម្របសម្រួលជាមួយក្រុមអាជីវករ ៕

គួរបញ្ជាក់ដែរថា លោក ឃួង ស្រេង អភិបាលរាជធានីភ្នំពេញធ្លាប់បានបញ្ជាក់ក្នុងកិច្ចប្រជុំថា អ្នកលក់ដូរគ្មានសណ្តាប់ធ្នាប់ នៅលេីដងផ្លូវ លេីចិញ្ចើមផ្លូវ មហាវិថីម៉ៅសេទុង មហាវិថីព្រះមុនីរ៉េត និងផ្លូវនានានៅតំបន់ជុំវិញផ្សារដើមគរ មានចំនួនជាង ៧០០អាជីវកម្ម ហើយចាប់ពីថ្ងៃទី១៨ ខែមករា តទៅ ពួកគាត់មិនត្រូវបានអនុញ្ញាតឱ្យលក់ដូរបន្តទៀតទេ។ ពួកគាត់ ត្រូវបានរដ្ឋបាលរាជធានីភ្នំពេញ រៀបចំឱ្យទៅលក់នៅទីតាំងផ្សារដើមគរថ្មី ស្ថិតនៅតាមបណ្តោយមហាវិថីឈ្នះ ឈ្នះ ក្នុងខណ្ឌព្រែកព្នៅ។

លោក ឃួង ស្រេង បានបញ្ជាក់បន្ថែមថា រដ្ឋបាលរាជធានីភ្នំពេញ នឹងយកទ្រូងនិងចិញ្ចើមផ្លូវទាំងនេះ មកជួលជុលថែទាំ ដើម្បីឱ្យប្រជាពលរដ្ឋបានធ្វើដំណើរធម្មតាឡើងវិញ។ ចំពោះអាជីវករដែលផ្លាស់ទៅទីតាំងថ្មីនេះ នឹងមានទីតាំងលក់ដូរត្រឹមត្រូវទៅថ្ងៃអនាគត់ ព្រមទាំងទទួលបានអត្ថប្រយោជន៍ច្រើនថែមទៀតផង៕