រដ្ឋមន្ត្រីក្រសួងការងារថៃបញ្ជាក់ថាពលករខ្មែរមានឬអត់អាជ្ញាបណ្ណ័អាចបន្តធ្វើការងារតទៀត!

ប្រទេសថៃ៖ថ្ងៃទី២៣ ខែធ្នូ ឆ្នាំ២០២៥ ហ្វេសប៊ុកផ្លូវការរបស់អគ្គនាយកដ្ឋានការងារថៃ បានចុះផ្សាយថា លោកស្រី Treenuch Thienthong រដ្ឋមន្ត្រីក្រសួងការងារ បានបកស្រាយបញ្ជាក់ក្រោយពីមានការចុះផ្សាយព័ត៌មានថា ពលករកម្ពុជាដែលកំពុងធ្វើការនៅក្នុងប្រទេសថៃ ត្រូវធ្វើដំណើរត្រឡប់ទៅប្រទេសវិញត្រឹមថ្ងៃទី១៣ ខែកុម្ភៈ ឆ្នាំ២០២៦ ដោយសារមិនមានការបន្តអាជ្ញាប័ណ្ណការងារ ក្រសួងការងារ សូមបំភ្លឺថា ព័ត៌មាននេះ គឺជាការយល់ច្រឡំទេ។ ចំពោះជនបរទេសដែលទទួលបានការអនុញ្ញាតឱ្យធ្វើការរហូតដល់ថ្ងៃទី១៣ ខែកុម្ភៈ ឆ្នាំ២០២៦ គឺមានតែជនបរទេសសញ្ជាតិឡាវ និងវៀតណាម ប៉ុណ្ណោះ។ 

យោងតាមសេចក្តីសម្រេចរបស់គណៈរដ្ឋមន្ត្រី កាលពីថ្ងៃទី៤ ខែកុម្ភៈ ឆ្នាំ២០២៥ ដែលសេចក្តីសម្រេចរបស់គណៈរដ្ឋមន្ត្រី កាលពីថ្ងៃទី២ ខែធ្នូ ឆ្នាំ២០២៥ បានអនុគ្រោះឱ្យជនបរទេសទាំងនោះ អាចរស់នៅ និងធ្វើការបានរយៈពេល ១ឆ្នាំបន្ថែមទៀត រហូតដល់ថ្ងៃទី១៣ ខែកុម្ភៈ ឆ្នាំ២០២៧។

លោកស្រីបានបន្តទៀតថា យោងតាមសេចក្តីសម្រេចរបស់គណៈរដ្ឋមន្ត្រី កាលពីថ្ងៃទី២៤ ខែកញ្ញា ឆ្នាំ២០២៤ ពលករកម្ពុជាមិនស្របច្បាប់ទទួលបានការអនុញ្ញាតឱ្យស្នាក់នៅ និងធ្វើការរហូតដល់ថ្ងៃទី៣១ ខែមីនា ឆ្នាំ២០២៦ ចំណែកពលករកម្ពុជាដែលបានបន្តអាជ្ញាប័ណ្ណការងារ (អាជ្ញាប័ណ្ណចាស់ផុតកំណត់នៅថ្ងៃទី១៣ ខែកុម្ភៈ ឆ្នាំ២០២៥) ទទួលបានការអនុញ្ញាតឱ្យស្នាក់នៅ និងធ្វើការងារហូតដល់ថ្ងៃទី១៣ ខែកុម្ភៈ ឆ្នាំ២០២៧ ហើយអាចបន្តបាន ២ឆ្នាំទៀត ដល់ថ្ងៃទី១៣ ខែកុម្ភៈ ឆ្នាំ២០២៩។

ដូច្នេះ មិនមានពលករសញ្ជាតិកម្ពុជាក្រុមណាមួយ ដែលអាជ្ញាប័ណ្ណការងារផុតកំណត់នៅថ្ងៃទី១៣ ខែកុម្ភៈ ឆ្នាំ ២០២៦ ឡើយ។ចំណែកលោក Somchai Morakotsriwan អគ្គនាយកនៃនាយកដ្ឋានការងារ បានបន្ថែមថា នាយកដ្ឋានការងារ កំពុងស្វែងរកវិធានការសមស្រប រួមជាមួយស្ថាប័នសន្តិសុខ ដើម្បីកំណត់គោលការណ៍សម្រាប់ពលករកម្ពុជាឱ្យបានហ្មតចត់និងល្អិតល្អន់ ដើម្បីរក្សាតុល្យភាពផ្នែកសេដ្ឋកិច្ច សង្គម និងសន្តិសុខជាតិ។មិនទាន់ឃើញមានប្រតិកម្មពីក្រសួងការងារកម្ពុជាលើបញ្ហាពលករខ្មែរនៅថៃនេះទេ៕