លោក Trump និយាយថា ជិតឈានដល់កិច្ចព្រមព្រៀងសង្គ្រាមអ៊ុយក្រែន ប៉ុន្តែអឺរ៉ុបមានការប្រុងប្រយ័ត្ន
05-September-2026 / ព័ត៌មានអន្តរជាតិ
អាមេរិក៖ថ្ងៃទី២៥ ខែវិច្ឆិកា លោកត្រាំបានបង្ហោះសារនៅលើបណ្តាញទំនាក់ទំនងសង្គមថា លោកនឹងចាត់បញ្ជូនបេសកជនទទួលបន្ទុកបញ្ហាមជ្ឈិមបូព៌ារបស់អាមេរិកឱ្យទៅកាន់ទីក្រុងមូស្គូ រដ្ឋធានីប្រទេសរុស្ស៊ី ដើម្បីជួបសន្ទនាជាមួយលោកពូទីនប្រធានាធិបតីរុស្ស៊ី ដើម្បីសម្រេចផែនការសន្តិភាពដែលមានគោលបំណងបញ្ចប់វិបត្តិអ៊ុយក្រែន។
ប្រធានាធិបតីអាមេរិក លោក Donald Trump និយាយ ថា កិច្ចព្រមព្រៀងមួយដើម្បីបញ្ចប់សង្គ្រាមអ៊ុយក្រែនគឺ «ជិតឈានដល់ហើយ» ខណៈក្រុមមេដឹកនាំអឺរ៉ុបបានជំរុញឱ្យមានការប្រុងប្រយ័ត្ន និងមីស៊ីលរុស្ស៊ី បានបានបាញ់ស្រោចលើទីក្រុងគីវ ក្នុងអំឡុងពេលបាញ់ផ្លោងចុងក្រោយបំផុតក៏ដោយ។
លោក Trump ដែលបានសម្តែងការខកចិត្តម្តងហើយម្តងទៀតថា លោកមិនទាន់បានបំពេញតាមការសន្យាយុទ្ធនាការរបស់លោកក្នុងការបញ្ចប់ជម្លោះយ៉ាងឆាប់រហ័ស បាននិយាយថា ពួកលោកកំពុងខិតជិតដល់កិច្ចព្រមព្រៀងមួយហើយ។
ទន្ទឹមគ្នានោះដែរ ប្រព័ន្ធសារព័ត៌មានជាច្រើនរបស់អាមេរិកបានដកស្រង់ការអធិប្បាយរបស់មន្ត្រីពាក់ព័ន្ធរបស់អាមេរិកថា អ៊ុយក្រែនបានឯកភាពជាគោលការណ៍ហើយចំពោះកិច្ចព្រមព្រៀងសន្តិភាពដែលលើកឡើងដោយអាមេរិក ប៉ុន្តែមាត្រាមួយចំនួននៅតែត្រូវការពិភាក្សាថែមទៀត។នៅថ្ងៃដដែល លេខាធិការតែគណៈកម្មាធិការសន្តិសុខនិងការពារជាតិអ៊ុយក្រែនបានលើកឡើងថា គណៈប្រតិភូអ៊ុយក្រែននិងអាមេរិកបានឈានដល់គំនិតឯកភាពគ្នាលើមាត្រាស្នូលនៃកិច្ចព្រមព្រៀងសន្តិភាពដែលបានពិភាក្សានៅទីក្រុងហ្សឺណែវកាលពីពេលថ្មីៗនេះ៕
ផែនការដំបូងចំនួន ២៨ ចំណុចរបស់លោក ដែលត្រូវបានរិះគន់ថាស្របគ្នាយ៉ាងខ្លាំងទៅនឹងការទាមទាររបស់រុស្ស៊ី ត្រូវបានជំនួសដោយសំណើដែលបានកែសម្រួល ដោយរួមបញ្ចូលជំហរអ៊ុយក្រែនបន្ថែមទៀត។ មន្ត្រីអ៊ុយក្រែនមួយរូបបានប្រាប់សារព័ត៌មាន AFP ថា កំណែថ្មីនេះ ប្រសើរជាងមុនគួរឱ្យកត់សម្គាល់ ទោះក្រុមមន្ត្រីអាមេរិកបានទទួលស្គាល់ថា បញ្ហាដ៏ស្មុគស្មាញនេះ នៅតែមិនទាន់ដោះស្រាយបានក៏ដោយ។តាមសេចក្តីរាយការណ៍ អាមេរិក និងអ៊ុយក្រែន បានបង្រួមផែនការសន្តិភាពពី២៨ចំណុច មកត្រឹម ១៩ចំណុច។
ប្រធានាធិបតីបារាំង លោក Emmanuel Macron បាននិយាយថា ច្បាស់ណាស់ថាគ្មានឆន្ទៈរបស់រុស្ស៊ី ក្នុងការចូលទៅក្នុងបទឈប់បាញ់ ឬពិភាក្សាយ៉ាងម៉ត់ចត់អំពីសេចក្តីព្រាងដែលបានកែប្រែថ្មី និងកាន់តែងាយស្រួលសម្រាប់អ៊ុយក្រែននោះទេ។
ការពិភាក្សារវាងក្រុមអ្នកចរចាអាមេរិក និងអ៊ុយក្រែន នៅទីក្រុងហ្សឺណែវកាលពីចុងសប្តាហ៍មុន បានបង្កឱ្យមានប្រតិកម្មខាងការទូតយ៉ាងខ្លាំង ដោយកិច្ចប្រជុំបន្ថែមទៀតបានធ្វើឡើងនៅទីក្រុងអាប៊ូដាប៊ី (Abu Dhabi )រវាងប្រតិភូអាមេរិក និងរុស្ស៊ី។ ក្រុមមេដឹកនាំមកពីសម្ព័ន្ធមិត្តប្រហែល ៣០ ប្រទេសដែលគាំទ្រអ៊ុយក្រែន ក៏បានរៀបចំកិច្ចពិភាក្សាតាមអ៊ីនធឺណិតកាលពីថ្ងៃអង្គារនោះផងដែរ.។
យោងតាមទីភ្នាក់ងារ Reuters លោកហ្សេលេនស្គីបាននិយាយថា «យើងត្រៀមខ្លួនជាស្រេចដើម្បីបោះជំហានទៅមុខជាមួយគ្នា—ជាមួយសហរដ្ឋអាមេរិក តាមរយៈការចូលរួមផ្ទាល់របស់ប្រធានាធិបតីត្រាំ»។ ទោះជាយ៉ាងណាក៏ដោយ លោកបានព្រមានថា ការសម្រេចចិត្តផ្នែកសន្តិសុខ«ត្រូវតែរាប់បញ្ចូលទាំងអ៊ុយក្រែន និងអឺរ៉ុប»។
ទីក្រុងកៀវ និងវ៉ាស៊ីនតោន នៅតែមានការបែកបាក់គ្នាលើផ្នែកខ្លះនៃសំណើរបស់លោកត្រាំ ដែលបានបង្កឲ្យមានការព្រួយបារម្ភថា អ៊ុយក្រែនអាចនឹងត្រូវបានដាក់សម្ពាធឲ្យទទួលយកលក្ខខណ្ឌដែលរុស្ស៊ីមានប្រៀបជាង រួមទាំងការធ្វើសម្បទានទឹកដី។
លោកត្រាំ បានរៀបរាប់នៅលើបណ្ដាញសង្គមថា «ចំណុចមិនចុះសម្រុងគ្នាមួយចំនួនតូចប៉ុណ្ណោះដែលនៅសេសសល់» ហើយលោកបានចាត់បេសកជនលោក Steve Witkoff ទៅជួបប្រធានាធិបតីរុស្ស៊ី វ៉្លាឌីមៀរ ពូទីន ខណៈដែលរដ្ឋមន្ត្រីកងទ័ព Dan Driscoll ទៅជួបជាមួយមន្ត្រីអ៊ុយក្រែន។អ្នកការទូតអ៊ុយក្រែនម្នាក់បានប្រាប់ Reuters ថា បញ្ហាទឹកដីនៅតែជាឧបសគ្គដ៏លំបាកបំផុត។
យោងតាម Kyiv Post លោកហ្សេលេនស្គី បាននិយាយថា ផែនការសន្តិភាព«មិនមាន»២៨ចំណុចទៀតទេ ហើយឥឡូវវាបានឆ្លុះបញ្ចាំងពី«ចំណុចត្រឹមត្រូវជាច្រើន» ទោះបីជាលោកបានបន្ថែមថា អ្នកចរចានៅតែប្រឈមមុខនឹងការងារ«ដ៏លំបាកខ្លាំង» ដើម្បីបញ្ចប់ក្របខ័ណ្ឌនេះក៏ដោយ។
លោកហ្សេលេនស្គី បានរៀបរាប់ថា «អ៊ុយក្រែននឹងមិនក្លាយជាឧបសគ្គដល់សន្តិភាពឡើយ» ដោយបន្ថែមថា ទីក្រុងកៀវត្រៀមខ្លួនរួចជាស្រេចក្នុងការធ្វើការ«ឲ្យបានលឿនបំផុតតាមដែលអាចធ្វើទៅបាន» ដើម្បីឆ្ពោះទៅរកដំណោះស្រាយ«ប្រកបដោយសេចក្តីថ្លៃថ្នូរ»។
សូបញ្ជាក់ថាកាលពីថ្ងៃអាទិត្យ ទី២៣ ខែវិច្ឆិកា សេតវិមានបាននិយាយថា កិច្ចពិភាក្សានៅឯប្រទេសស្វីស ជុំវិញផែនការដើម្បីបិទបញ្ចប់សង្រ្គាមនៅអ៊ុយក្រែន ទទួលបានការបោះជំហានធំមួយឆ្ពោះទៅមុខ ហើយទីក្រុងវ៉ាស៊ីនតោន បានអះអាងថា កិច្ចព្រមព្រៀងសន្តិភាព នៅពេលសម្រេចបាន នឹងគោរពយ៉ាងពេញលេញ ចំពោះអធិបតេយ្យរបស់អ៊ុយក្រែន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។
រដ្ឋមន្រ្តីការបរទេសអាមេរិក លោក Marco Rubio បានដឹកនាំប្រតិភូអាមេរិក ជួបជាមួយក្រុមមន្រ្តីអ៊ុយក្រែននិងអឺរ៉ុប នៅទីក្រុងហ្សឺណែវ កាលពីថ្ងៃអាទិត្យ ដើម្បីព្យាយាមកំណត់ឱ្យបានច្បាស់ អំពីផែនការដើម្បីបញ្ចប់សង្រ្គាម ដែលបានផ្ទុះឡើងកាលពីខែកុម្ភៈ ឆ្នាំ២០២២ នៅពេលរុស្ស៉ីបើកការឈ្លានពានលើអ៊ុយក្រែន។
ប្រធានាធិបតីអាមេរិក លោក ដូណាល់ ត្រាំ បានទុកពេលឱ្យអ៊ុយក្រែន ដល់ថ្ងៃទី២៧ ខែវិច្ឆិកា ដើម្បីទទួលយកផែនការរបស់លោក។ ប៉ុន្តែទីក្រុងកៀវ ចង់ឱ្យមានការកែសម្រួលទៅលើសំណើផែនការដើមនោះ ដែលមានលក្ខខណ្ឌហាក់លម្អៀងទៅខាងរុស្ស៉ីខ្លាំង ដូចជាការតម្រូវឱ្យអ៊ុយក្រែនលះបង់ទឹកដីបន្ថែម កាត់បន្ថយកម្លាំងកងទ័ព និងសន្យាមិនចូលរួមក្នុងអង្គការ NATO ជាដើម។
សេចក្តីថ្លែងការណ៍របស់សេតវិមាន បានអះអាងថា លោក Rubio និងក្រុមមន្រ្តីអាមេរិក បានគូសបញ្ជាក់យ៉ាងមុតមាំ អំពីការប្តេជ្ញារបស់ទីក្រុងវ៉ាស៊ិនតោន ដើម្បីធានាថាអធិបតេយ្យ សន្តិសុខ និងវិបុលភាពនាពេលអនាគតរបស់អ៊ុយក្រែន នៅតែជារឿងសំខាន់បំផុត។
នៅក្នុងផែនការសន្តិភាពរបស់លោកត្រាំនេះដែរបើតាមទីភ្នាក់ងារព័ត៌មាន Reuters នាថ្ងៃសៅរ៍ ទី២២ ខែវិច្ឆិកា បានរាយការណ៍ថា សហរដ្ឋអាមេរិក បានគំរាមកាត់ផ្តាច់ការចែករំលែកព័ត៌មានសម្ងាត់ និងការផ្គត់ផ្គង់សព្វាវុធសម្រាប់អ៊ុយក្រែន ដើម្បីដាក់សម្ពាធឱ្យទទួលយកផែនការសន្តិភាពរបស់ប្រធានាធិបតី ដូណាល់ ត្រាំ។
Reuters បានរាយការណ៍ដូចខាងលើ ដោយផ្អែកលើប្រភពចំនួន២ ដែលដឹងស៊ីជម្រៅបញ្ហានេះ។ ដោយនិយាយក្នុងលក្ខខណ្ឌមិនបញ្ចេញអត្តសញ្ញាណ ប្រភពដដែលបានលើកឡើងថា ទីក្រុងកៀវកំពុងស្ថិតក្រោមសម្ពាធខ្លាំងបំផុតរបស់ទីក្រុងវ៉ាស៉ីនតោន ហើយអាមេរិកចង់ឱ្យអ៊ុយក្រែន ចុះហត្ថលេខាលើកិច្ចព្រមព្រៀងគោល នៅត្រឹមថ្ងៃព្រហស្បតិ៍សប្តាហ៍ក្រោយ។ ប្រភពមួយក្នុងចំណោមនោះ បាននិយាយយ៉ាងដូច្នេះថា «ពួកគេចង់បញ្ចប់សង្រ្គាម ហើយចង់ឱ្យអ៊ុយក្រែន ជាអ្នកទទួលរងផលវិបាក»។
