បន្ទាប់ពីព្យុះនិងជំនន់ទឹកភ្លៀងទីក្រុងបុរាណរបស់វៀតណាមពោរពេញដោយសំរាមនិងល្បាប់ភក់

ប្រទេសវៀតណាម៖ភ្លៀងធ្លាក់ខ្លាំងបង្កជាទឹកជំនន់នៅភាគកណ្តាលប្រទេសវៀតណាមបានឆក់យកជីវិតមនុស្ស២៨ នាក់ បាត់ខ្លួន៦នាក់ និងរាប់ពាន់នាក់ត្រូវបានជម្លៀសចេញ ខណៈផ្ទះសម្បែងចំនួនជាង១១ម៉ឺនខ្នងនៅតែលិចលង់ ដែលភាគច្រើនស្ថិតនៅតំបន់ប្រវត្តិសាស្រ្តរបស់វៀតណាម ដូចជាទីក្រុងបុរាណ Hoi An និងHue ដែលត្រូវបានចុះបញ្ជីដោយអង្គការយូណេស្កូ។

បន្ទាប់ពីលិចលង់អស់រយៈពេលជាច្រើនថ្ងៃ ផ្លូវបុរាណនៃទីក្រុង Hoi An បានគ្របដណ្តប់ដោយដីភក់ សំរាមរាយប៉ាយ សំណល់កម្ទេចកម្ទី នៅតាមចិញ្ចើមផ្លូវ និងផ្ទះបុរាណ ហើយពលរដ្ឋចាប់ផ្តើមសម្អាតផ្ទះសម្បែងឡើងវិញ ខណៈតំបន់នេះជាទីតាំងទេសចរណ៍យ៉ាងសំខាន់ ហើយពលរដ្ឋពឹងផ្អែកខ្លាំងលើវិស័យនេះ។ នេះបើយោងតាមសារព័ត៌មានវៀតណាមVnExpress។ 

ទឹកជំនន់បានជន់លិចផ្លូវបុរាណ និងផ្ទះឈើអាយុរាប់សតវត្សនៃទីក្រុង Hoi An ហើយអ្នកស្រុកបាននិយាយថាពួកគេមិនដែលជួបប្រទះនឹងទឹកជំនន់ទ្រង់ទ្រាយធំបែបនេះពីមុនមកទេ។ ទឹកជំនន់បង្កឡើងដោយភ្លៀងធ្លាក់ខ្លាំងក្នុងកម្រិតបំបែកកំណត់ត្រាដែលបានកំណត់ក្នុងឆ្នាំ ១៩៦៤ ដោយបានលិចលង់ផ្នែកធំៗនៃទីក្រុងបុរាណ ខណៈតំបន់ខ្លះលិចលង់ទាំងស្រុងរហូតដល់ដំបូល។ យ៉ាងណានៅមិនទាន់បានចេញផ្សាយរបាយការណ៍ផ្លូវការអំពីការខូចខាតផ្នែកសេដ្ឋកិច្ចនៅឡើយទេ។

យោងតាមទីភ្នាក់ងារគ្រោះមហន្តរាយវៀតណាមបានឱ្យដឹងថា ភ្លៀងធ្លាក់ខ្លាំងបំផុតក្នុងរយៈពេលជាច្រើនថ្ងៃបានជន់លិចផ្ទះជាង ១១៦,០០០ ខ្នង និងលិចលង់ដំណាំសំខាន់ៗចំនួន៥,០០០ ហិកតា។ ការបំផ្លិចបំផ្លាញនេះមិនត្រឹមតែបានឆក់យកជីវិតមនុស្សប៉ុណ្ណោះទេ ប៉ុន្តែថែមទាំងបានរំខានដល់ជីវិតប្រចាំថ្ងៃ ខូចខាតហេដ្ឋារចនាសម្ព័ន្ធ និងនាំឱ្យវិស័យទេសចរណ៍របស់តំបន់នេះស្ទើរតែជាប់គាំង។

បើតាមអ្នកជំនាញ ភូមិសាស្ត្រវៀតណាមបានឱ្យដឹងថា ព្រោះមហន្តរាយទាំងនេះកើតចេញពីការប្រែប្រួលអាកាសធាតុ បូកផ្សំនឹងសំណង់ ការចាក់បេតុងគ្រប់ទីកន្លែងផងនោះជាកត្តាគួបផ្សំដែលធ្វើឱ្យប្រទេសនេះ រងគ្រោះកាន់តែខ្លាំង កាន់តែធ្ងន់ធ្ងរទៅថ្ងៃអនាគត៕