ដឹងមូលហេតដែលតុលាការផ្តន្ទាទោសនគរបាលរាជធានីភ្នំពេញលោក ដែលស្រវឹងបើកឡានបុកនុស្សស្លាប់ដាក់គុក១ឆ្នាំដោយសារ ជនរងគ្រោះអត់ប្តឹងនិងជនបង្ក មានជំងឺទឹកនោមផ្អែម !

ភ្នំពេញ៖ អ្នកនាំពាក្យសាលាដំបូងរាជធានីភ្នំពេញ នាយប់ថ្ងៃទី១៥ ខែតុលា ឆ្នាំ២០២៥នេះ បានចេញសេចក្តីប្រកាសព័ត៌មានស្រាយបំភ្លឺជុំវិញការរិះគន់ពាក់ព័ន្ធនឹងការផ្តន្ទាទោសលើអតីតនគរបាលរាជធានីភ្នំពេញ លោក ហ៊ុន ហេង ដែលបានបង្កគ្រោះថ្នាក់ចរាចរណ៍បណ្តាលឱ្យមានអ្នកស្លាប់ និងរបួស នៅមុខក្រសួង នៅមុខក្រសួងវប្បធម៌ និងវិចិត្រសិល្បៈ ដោយបញ្ជាក់ថា ជនរងគ្រោះទាំងអស់បានដកពាក្យបណ្តឹង ក្រោយទទួលសំណង ខណ:ជនបង្កមានជំងឺទឹកនោមផ្អែម និងលើសឈាម។ 

អ្នកនាំពាក្យសាលាដំបូងរាជធានីភ្នំពេញ បានគូសបញ្ជាក់ថា កាលពីថ្ងៃទី១៤ ខែតុលា ឆ្នាំ២០២៥ ចៅក្រមជំនុំជម្រះនៃសាលាដំបូងរាជធានីភ្នំពេញ បានប្រកាសជាសាធារណៈ នូវសាលក្រមព្រហ្មទណ្ឌលេខ ៣៨០៩ «ភ» ក្នុងសំណុំរឿងព្រហ្មទណ្ឌលេខ ២៧០៧ ចុះថ្ងៃទី១៧ ខែឧសភា ឆ្នាំ២០២៥ ដោយសម្រេចផ្តន្ទាទោសលើជនជាប់ចោទឈ្មោះ ហ៊ុន ហេង ភេទប្រុស អាយុ៦១ឆ្នាំ ដាក់ពន្ធនាគារ កំណត់រយៈពេល ០៣ (បី) ឆ្នាំ ដោយទោសនេះត្រូវអនុវត្តទោសក្នុងពន្ធនាគាររយៈពេល ១ឆ្នាំ ទោសសល់ពីនេះ ត្រូវព្យួរ និងពិន័យជាប្រាក់ចំនួន ៤ ០០០ ០០០ (បួនលាន) រៀល ពីបទ បើកបរបង្កគ្រោះថ្នាក់ចរាចរណ៍ បណ្តាលឱ្យស្លាប់ និងរបួសអ្នកដទៃ ប្រព្រឹត្តនៅចំណុចមុខក្រសួងវប្បធម៌ និងវិចិត្រសិល្បៈ មហាវិថីព្រះនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី១៥ ខែឧសភា ឆ្នាំ២០២៥ បទល្មើស ព្រហ្មទណ្ឌដែលមានចែង និងផ្តន្ទាទោសតាមមាត្រា ៨៣ កថាខណ្ឌទី២ ចំណុច គ និងមាត្រា ៨៥ កថាខណ្ឌទី១ នៃច្បាប់ស្តីពីចរាចរណ៍ផ្លូវគោក។

អ្នកនាំពាក្យសាលាដំបូងរាជធានីភ្នំពេញ បញ្ជាក់ថា ករណីគ្រោះថ្នាក់ចរាចរណ៍ខាងលើនេះតុលាការបានពិចារណាលើអំពើប្រព្រឹត្ត និងការទទួលខុសត្រូវរបស់ជនជាប់ចោទតាមកម្រិតទោសដែលមាន កំណត់ក្នុងច្បាប់ និងការទទួលខុសត្រូវចំពោះជនរងគ្រោះ, ដើមបណ្តឹងរដ្ឋប្បវេណីទាំងអស់, ស្ថានភាពរបស់ ជនជាប់ចោទដែលស្ថិតក្នុងវ័យចាស់, មានជំងឺប្រចាំកាយ និងស្មារតីភ្ញាក់រលឹកទទួលស្គាល់កំហុស, ចៅក្រម ជំនុំជម្រះបានសម្រេចផ្តន្ទាទោស ដោយយោងលើមូលហេតុដូចខាងក្រោម៖

១.ជនជាប់ចោទ ជាប់ចោទពីបទ បើកបរបង្កគ្រោះថ្នាក់ចរាចរណ៍បណ្តាលឱ្យស្លាប់ និងរបួសអ្នកដទៃ ដែលកម្រិតទោសក្នុងច្បាប់កំណត់ ពី ១ឆ្នាំ ទៅ ៣ឆ្នាំ។២.ជនជាប់ចោទមានអត្រាជាតិអាល់កុល ០.៣៥Mg/L (យោងតាមរបាយការណ៏របស់សមត្ថកិច្ច) ដែល ស្ថិតនៅក្រោមច្បាប់ហាមឃាត់ (អត្រាជាតិអាល់កុលចាប់ពី ០.៤០Mg/L ឡើងទៅ)។៣.ជនជាប់ចោទមានវ័យចាស់ ស្ថិតក្នុងស្ថានភាពមានជំងឺទឹកនោមផ្អែម និងលើសឈាម។៤. ជនរងគ្រោះទាំងអស់ បានដកពាក្យបណ្តឹង និងបានព្រមព្រៀងទទួលសំណងរដ្ឋប្បវេណី។

៥.តុលាការបានសម្រេចផ្តន្ទាទោស ៣ឆ្នាំ គឺក្នុងកម្រិតអតិបរមានៃទោស តែបានឱ្យអនុវត្តទោសក្នុង ពន្ធនាគារ ១ឆ្នាំ ទោសនៅសល់ ២ឆ្នាំ ឱ្យព្យួរ ដោយដាក់នូវកាតព្វកិច្ចមួយចំនួន រួមទាំងបានប្រកាសទោសពិន័យ ជាប្រាក់ចំនួន ៤លានរៀល និងបានប្រកាសទោសបន្ថែមហាមឃាត់ការបើកបរក្នុងរយៈពេល ៥ឆ្នាំ។ ការសម្រេច ឱ្យអនុវត្តព្យួរទោសមួយផ្នែកនេះ ធ្វើឡើងស្របតាមលក្ខខណ្ឌ និងបទប្បញ្ញត្តិច្បាប់ជាធរមាន។៦. បច្ចុប្បន្ន ជននេះកំពុងជាប់ឃុំបន្តការអនុវត្តទោសក្នុងពន្ធនាគារនៅឡើយ។

ការស្រាយបំភ្លឺរបស់អ្នកនាំពាក្យសាលាដំបូងរាជធានីភ្នំពេញ បន្ទាប់ពីមានផេកហ្វេសប៊ុកឈ្មោះ Kampuchea Thmey Daily, គណនីហ្វេសប៊ុកឈ្មោះ Meach Sovannara, បណ្តាផេក និងបណ្តាញសង្គមនានា បានផ្សព្វផ្សាយទាក់ទងនឹងការផ្តន្ទាទោសក្នុងករណី គ្រោះថ្នាក់ចរាចរណ៍បណ្តាលឱ្យស្លាប់ និងរបួសអ្នកដទៃ នៅមុខក្រសួងវប្បធម៌ និងវិចិត្រសិល្បៈ នៅថ្ងៃទី១៥ ខែតុលា ឆ្នាំ២០២៥ ។ ផេកហ្វេសប៊ុកឈ្មោះ Kampuchea Thmey Daily បានផ្សព្វផ្សាយ និង បានសរសេរបង្ហោះរៀបរាប់ថា «តុលាការផ្តន្ទាទោសអតីតនគរបាលរាជធានី ឈ្មោះ ហ៊ុន ហេង ស្រវឹងស្រា បើកបរបង្កគ្រោះថ្នាក់ចរាចរណ៍ឱ្យមនុស្សម្នាក់ស្លាប់ ៣នាក់របួស ជាប់ក្នុងពន្ធនាគារត្រឹម ១ឆ្នាំ» និងគណនី ហ្វេសប៊ុកឈ្មោះ Meach Sovannara បានផ្សព្វផ្សាយ និងបានសរសេរបង្ហោះរៀបរាប់ថា «តុលាការផ្តន្ទាទោស អតីតនគរបាលឈ្មោះ ហ៊ុន ហេង ស្រវឹងស្រា បើកបរបង្កគ្រោះថ្នាក់ចរាចរណ៍ឱ្យមនុស្ស១នាក់ស្លាប់ ៣នាក់ រងរបួស ឱ្យជាប់ក្នុងគុកត្រឹមតែ១ឆ្នាំ អយុត្តិធម៌ពេកទេដឹង ជីវិតមនុស្សទិញមិនបានទេ?»។ដឹងនៅចៅក្រមតុលាការស្រុកខ្មែរយើងសុទ្ធជាអ្នកមានមនុស្សធម៍ណាស់កុំចេះតែចោទចឹងត្រឹមសម្លាប់មនុស្សវាគ្មានអីធំដុំទេ។អ្នកនៅរស់មានចម្ងឺទេដែលត្រូវគិតនោះ៕