ចំណាប់ខ្មាំងត្រូវបានដោះលែង​ប្រជាជនប៉ាឡេស្ទីនវិលត្រឡប់ទៅផ្ទះសម្បែងវិញ ខណៈកងទ័ពអ៊ីស្រាអែលដកថយក្រោមបទឈប់បាញ់

ហ្កាហ្សា៖អ៊ីស្រាអែល បាននិយាយនៅថ្ងៃចន្ទ ទី១៣ ខែតុលា នេះថា ក្រុមហាម៉ាស បានប្រគល់ចំណាប់ថ្នូរ ៧នាក់ដំបូង ទៅឱ្យមន្រ្តីកាកបាទក្រហមរួចហើយ នៅក្នុងដំណាក់កាលទីមួយនៃបទឈប់បាញ់អ៊ីស្រាអែល-ក្រុមហាម៉ាស នៅដែនដីហ្កាហ្សាស្រ្ទីប។ 

 ចំណាប់ថ្នូរនៅសេសសល់ក្នុងដៃក្រុមហាម៉ាស ទាំងអស់មាន ៤៨នាក់ ហើយ ២០នាក់ ក្នុងចំណោមនោះ ដែលត្រូវគេជឿថានៅមានជីវិត គឺស្ថិតក្នុងការដោះលែងមុនគេ ខណៈសាកសពអ្នកស្លាប់នឹងត្រូវដោះដូរជាបន្តបន្ទាប់នៅពេលក្រោយទៀត។

វេទិកាគ្រួសារចំណាប់ថ្នូររបស់អ៊ីស្រាអែល បានឱ្យដឹងថា អ្នកដែលត្រូវបានដោះលែងទាំងនោះរួមមាន អ្នកទី១ ឈ្មោះ Eitan Mor អ្នកទី២ Gali, ទី៣គឺ Ziv Berman, ទី៤ឈ្មោះMatan Engerst, ទី៥ Omri Miran, ទី៦ Guy Gilboa Dalal និងអ្នកទី៧ឈ្មោះ Alon Ohel ។ ប្រជាជនអ៊ីស្រាអែល រាប់ម៉ឺននាក់កំពុងរង់ចាំមើលការដោះដូរនេះយ៉ាងអន្ទះសារតាមការចាក់ផ្សាយជាសាធារណៈនៅទូទាំងប្រទេស ដោយព្រឹត្តិការណ៍ដ៏សំខាន់មួយជាមួយនឹងការប្រមូលផ្ដុំគ្នាទ្រង់ទ្រាយធំ ត្រូវបានធ្វើឡើងនៅទីក្រុង Tel Aviv។

នៅក្រោមកិច្ចព្រមព្រៀងនេះ អ៊ីស្រាអែល នឹងដោះលែងអ្នកទោសប៉ាឡេស្ទីនពីពន្ធនាគាររបស់ខ្លួនដល់ទៅជិត ២ពាន់នាក់ ក្រោយការទទួលបានចំណាប់ថ្នូរ នៅល្ងាចថ្ងៃចន្ទដដែលនេះ។

ក្នុងថ្ងៃទី១៣តុលានេះដែរ ប្រធានាធិបតីអាម៉េរិក លោក ដូណាល់ ត្រាំ (Donald Trump) ធ្វើដំណើរទៅកាន់ទីក្រុងតែលអាវីវប្រទេសអ៊ីស្រាអែលហើយបន្ទាប់មកនិងទៅកាន់ទីក្រុងគែរ ប្រទេសអេហ្ស៊ីប ដើម្បីចូលរួមក្នុងពិធីចុះហត្ថលេខាលើកិច្ចព្រមព្រៀងសន្តិភាពសម្រាប់តំបន់ហ្គាហ្សា ។

លោកប្រធានាធិបតី បានអះអាងថា មានការឯកភាពគ្នារួចហើយលើចំណុចភាគច្រើន ហើយព័ត៌មានលម្អិតតិចតួចដែលនៅសេសសល់នឹងត្រូវបានដោះស្រាយយ៉ាងងាយស្រួលក្នុងអំឡុងកិច្ចប្រជុំនៅប្រទេសអេហ្ស៊ីប។ លោកត្រាំ ជឿជាក់ថា កិច្ចព្រមព្រៀងនេះ មានសារៈសំខាន់ខ្លាំងណាស់ ព្រោះវាជាជំហានដ៏ធំមួយឆ្ពោះទៅរកសន្តិភាពនៅតំបន់មជ្ឈិមបូព៌ា ។

សេចក្តីប្រកាសរបស់លោកបានធ្វើឡើងចំពេលដែលដំណាក់កាលទីមួយនៃកិច្ចព្រមព្រៀងបទឈប់បាញ់ រវាងអ៊ីស្រាអ៊ែល និងក្រុមហាម៉ាស់ បានចូលជាធរមានផ្លូវការនៅថ្ងៃទី១៣តុលា ដំណាក់កាលដំបូងនេះ រួមមាន បញ្ឈប់ការប្រយុទ្ធគ្នាជាបណ្ដោះអាសន្ន ដោះដូរចំណាប់ខ្មាំងអ៊ីស្រាអ៊ែលជាមួយអ្នកទោសប៉ាឡេស្ទីន និងដកទ័ពអ៊ីស្រាអ៊ែលត្រឡប់ទៅខ្សែបន្ទាត់ពណ៌លឿងដែលបានកំណត់ក្នុងតំបន់ហ្គាហ្សា ។

បទឈប់បាញ់នេះ គឺជាផ្នែកមួយនៃសំណើរបស់ប្រធានាធិបតីត្រាំ សម្រាប់ផែនការសន្តិភាព ២០ចំណុចក្នុងតំបន់ហ្គាហ្សា ដែលបានបង្ហាញកាលពីថ្ងៃទី ២៩ ខែកញ្ញា ជាមួយនាយករដ្ឋមន្ត្រីអ៊ីស្រាអ៊ែល លោក ប៊ែនចាមីន ណេតាន់យ៉ាហ៊ូ (Benjamin Netanyahu) ។

សូមបញ្ចាក់ថាប្រជាជនប៉ាឡេស្ទីនរាប់ពាន់នាក់ កាលពីថ្ងៃសុក្រទី១០តុលាបានចាប់ផ្តើមវិលត្រឡប់ទៅកាន់ផ្ទះសម្បែងនៅភាគខាងជើងតំបន់ហ្កាហ្សាវិញ បន្ទាប់ពីបទឈប់បាញ់រវាងអ៉ីស្រាអែល និងក្រុមហាម៉ាសបានចូលជាធរមាន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

យោងតាមកិច្ចព្រមព្រៀង ក្រុមហាម៉ាសត្រូវបានគេរំពឹងថា នឹងដោះលែងចំណាប់ខ្មាំងអ៉ីស្រាអែលចំនួន ២០នាក់ ក្នុងរយៈពេល ៧២ម៉ោង។ បន្ទាប់មក អ៉ីស្រាអែលនឹងដោះលែងអ្នកទោសប៉ាឡេស្ទីនចំនួន ២៥០នាក់ដែលជាប់ពន្ធនាគាររយៈពេលវែង និង ១,៧០០នាក់ផ្សេងទៀតដែលត្រូវបានឃុំខ្លួនក្នុងអំឡុងពេលសង្គ្រាម។ ប្រេសិតពិសេសអាមេរិក លោក ស្ទីវ វីតកូហ្វ (Steve Witkoff) បានបញ្ជាក់ថា ដំណាក់កាលដំបូងនៃការដកទ័ពបានចាប់ផ្តើមហើយ។

ទោះជាយ៉ាងណា ថ្លែងតាមទូរទស្សន៍ នាយករដ្ឋមន្ត្រី លោក Benjamin Netanyahu បាននិយាយថា កងកម្លាំងអ៊ីស្រាអែលនឹងបន្តស្ថិតនៅក្នុងតំបន់ហ្កាហ្សា ដើម្បីធានាថាទឹកដីនេះត្រូវបានដកហូតអាវុធនៅដំណាក់កាលបន្ទាប់។ អ្នកនាំពាក្យយោធាអ៊ីស្រាអែលក៏បានជំរុញឱ្យប្រជាជននៅហ្កាហ្សាជៀសវាងការចូលទៅក្នុងតំបន់ដែលស្ថិតក្រោមការគ្រប់គ្រងរបស់យោធាអ៉ីស្រាអែលផងដែរ។

សង្គ្រាមដែលបានចាប់ផ្តើមកាលពីខែតុលា ឆ្នាំ២០២៣ បានបណ្តាលឱ្យប្រជាជនស្ទើរតែទាំងអស់ក្នុងចំណោម ២.២លាននាក់នៅហ្កាហ្សា ត្រូវផ្លាស់ទីលំនៅ។ យោងតាមអាជ្ញាធរសុខាភិបាលក្នុងតំបន់ ការវាយប្រហាររបស់អ៊ីស្រាអែលបានសម្លាប់មនុស្សជាង ៦៧,០០០នាក់ និងបានបំផ្លាញតំបន់ហ្កាហ្សាភាគច្រើនទៅជាគំនរបាក់បែក៕