ក្រុមលេខាយោធាភូមិភាគ៤កម្ពុជានិងភូមិភាគ២ថៃជួបគ្នានៅអូរស្មាច់រៀប​ចំការប្រជុំមេភូមិភាគ

ឧត្តរមានជ័យ៖តបតាមការអញ្ជើញរបស់ប្រធានក្រុមលេខាធិការ យោធភូមិភាគទី៤ កម្ពុជា នៅព្រឹកថ្ងៃទី១០ ខែតុលា ឆ្នាំ២០២៥នេះ ក្រុមលេខានៃគណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ (RBC) រវាងយោធភូមិភាគទី៤ ភាគីកម្ពុជា និងកងទ័ពភូមិភាគទី២ ភាគីថៃ បានជួបប្រជុំគ្នាជាថ្មីទៀត នៅសាលប្រជុំក្រុមទំនាក់ទំនងកម្ពុជា-ថៃ ច្រកអន្តរជាតិអូរស្មាច់ ខេត្តឧត្តរមានជ័យ។ 

ក្រុមលេខាធិការរបស់កម្ពុជាដឹកនាំដោយ ឧត្តមសេនីយ៍ត្រី និត ណារ៉ុង នាយសេនាធិការរង យោធភូមិភាគទី៤ និងក្រុមលេខាធិការរបស់ថៃ ដឹកនាំដោយ ឧត្តមសេនីយ៍ត្រី កាំផាក់ណាក វ៉ាផាន់ស៊ុ នាយសេនាធិការ កងទ័ពភូមិភាគទី២។

ភាគីទាំងពីរបានប្រជុំពិភាក្សាគ្នាទៅលើការងារសំខាន់ៗចំនួនបី៖១. ការណែនាំសមាសភាពក្រុមការងារសម្របសម្រួល (Cordination Group) នៃភាគីទាំងពីរ

២. ការបន្តប្តេជ្ញាជំរុញការកាត់បន្ថយភាពតានតឹង។៣. ពិភាក្សាការងារត្រៀមរៀបចំកិច្ចប្រជុំគណៈកម្មាធិការព្រំដែនថ្នាក់យោធភូមិភាគ កម្ពុជា-ថៃ (RBC) ដែលគ្រោងនឹងប្រព្រឹត្តទៅនៅថ្ងៃទី១៥ ដល់ថ្ងៃទី១៧ ខែតុលា ឆ្នាំ២០២៥ ខាងមុខនេះ។

 កិច្ចប្រជុំនេះ ជាការអនុវត្តស្របតាមស្មារតីនៃការប្រគល់ភារកិច្ចរបស់ គណៈកម្មាធិការព្រំដែនទូទៅ GBC នៃប្រទេសទាំងពីរកម្ពុជា-ថៃ ក៏ដូចជាការដែលបានកំណត់ក្នុង កិច្ចប្រជុំវិសាមញ្ញលើកទី១ គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ កាលពីថ្ងៃទី២៧ ខែសីហា ឆ្នាំ២០២៥ រវាងយោធភូមិភាគទី៤ នៃព្រះរាជាណាចក្រកម្ពុជា និងកងទ័ពភូមិភាគទី២ នៃព្រះរាជាណាចក្រថៃ ដើម្បីជំរុញការបន្តអនុវត្តបទឈប់បាញ់រវាងកម្ពុជានិងថៃឱ្យបានពេញលេញ និងប្រកបដោយប្រសិទ្ធភាព ក៏ដូចជាការប្តេជ្ញាបន្តកាត់បន្ថយភាពតានតឹងតាមបណ្តោយព្រំដែន ព្រមទាំងស្វែងរកកិច្ចសហប្រតិបត្តិការជាក់ស្តែងសំដៅលើកកម្ពស់សន្តិភាព និងស្ថិរភាពរវាងប្រទេសទាំងពីរ ក៏ដូចជាការវិលត្រឡប់ទៅរកប្រក្រតីភាពឡើងវិញបានឆាប់រហ័ស។

សូមបញ្ជាក់ថាកាលពីព្រឹកថ្ងៃទី៣តុលាក៏មានការប្រជុំក្រុមលេខា (ក្រុមការងារបច្ចកទេស) RBC ដើម្បីត្រៀមប្រជុំផ្លូវការ RBC មួយនៅច្រកអន្តរជាតិអូស្មាច់ រវាងសេនាធិការភូមិភាគ៤កម្ពុជា និងសេនាធិការភូមិភាគ២ភាគីថៃ ដោយចាប់ផ្តើមនៅម៉ោង ១០ព្រឹកនិងបញ្ចប់ម៉ោង១១:១០នាទីព្រឹកក្នុងថ្ងៃដដែលដែរតែមិនមានលទ្ធផលអ្វីទេ។ព្រោះក្រោយពីការប្រជុំនេះរួចមេយោធាថ្មីភូមិភាគ២ថៃប្រកាសថាមិនចូលប្រជុំថ្ងៃទី១០តុលានេះទេ។ក្រៅពីនេះមេភូមិទាហ៊ានភូមិភាគ២ថែមទាំងបានប្រកាសថាប្រាសាទខ្នាស្ថិតក្នុងខេត្តឧត្តរមានជ័យដែលកំពុងត្រូវបានយោធាខ្មែរកាន់កាប់និងមានការជួយឧបត្ថម្ភសាសង់ជណ្ឌើរឡើងជាង១ពាន់កាំស្ថិតក្នុងទឹកដីថៃថែមទៀត។គេថានឹងទាមទារយកឲ្យបាន?។កម្ពុជាមិនមានប្រតិកម្មរឿងនេះទេ៕