កម្ពុជានាំស្វាយចន្ទីទៅកាន់ប្រទេសអ៊ីតាលី លើកដំបូង ប្រមាណ១៤តោនក្នងពេលជប៉៉ុនមានទឺប្សារដែរ
05-September-2026 / សេដ្ឋកិច្ច
ភ្នំពេញ៖ ប្រទេសអ៊ីតាលី បានក្លាយជាទីផ្សារថ្មីមួយទៀត ក្នុងការនាំចូលគ្រាប់ស្វាយចន្ទីរបស់កម្ពុជា ដែលជំហានដំបូងនេះ គឺចំនួន១៤តោន តាមរយៈក្រុមហ៊ុនអ៊ែបភល អាហ្គ្រោ ប្រដាក់ ឯ.ក ក្រោមការជួយសម្របសម្រួលពីគម្រោងនានា របស់សហភាពអ៊ឺរ៉ុប និងប្រទេសអង់គ្លេស ។
ក្នុងពិធីសម្ពោធការនាំចេញផលិតផលស្វាយចន្ទីជាកុងតឺន័រ លើកដំបូងទៅកាន់ប្រទេសអ៊ីតាលី នៅថ្ងៃទី៤ ខែកញ្ញា ឆ្នាំ២០២៥ លោកស្រី សម្បត្តិ កល្យាណ នាយកប្រតិ បត្តិក្រុមហ៊ុនអ៊ែបភល បានឲ្យដឹងថា សម្រាប់ស្វាយចន្ទីនាំទៅអ៊ីតាលី ជាជំហានដំបូងនេះ គឺជារសជាតិដើម ដែលភាគីខាងអ្នកនាំចូល នឹងធ្វើការចែកចាយបន្ត និងវេចខ្ចប់ប្រេនរបស់ពួកគេ លក់ដូរនៅលើទីផ្សារអ៊ីតាលី ។
លោកស្រីបន្តថា ផលិផលស្វាយចន្ទីរបស់ក្រុមហ៊ុនអ៊ែបភល បាននាំចេញទៅទីផ្សារអ៊ឺរ៉ុប បានប្រមាណជាង ១០០តោនហើយ ខណៈទីផ្សារអាស៊ីក៏បានច្រើនប្រទេសផងដែរ ហើយសម្រាប់ទីផ្សារអ៊ឺរ៉ុបនេះ ក៏គ្រោងនាំទៅកាន់ប្រទេសអង់គ្លេសនៅពេលឆាប់ៗខាងមុខ ។ឯកឧត្តម ឈរ ស៊ុនហុង អនុរដ្ឋលេខាធិការក្រសួងពាណិជ្ជកម្ម បានមានប្រសាសន៍ថា ស្វាយចន្ទី គឺជាដំណាំអទិភាពមួយរបស់កម្ពុជា ក្នុងចំណោមដំណាំចំនួន១២មុខ ដែលរាជរដ្ឋាភិបាលកំពុងយកចិត្តទុកដាក់ ក្នុងការបង្កើនផលិតភាព ការកែច្នៃ និងការប្រកួតប្រជែងនាំចេញ តាមរយៈការធ្វើពិពិធកម្មសេដ្ឋកិច្ច ដែលជំរុញឲ្យវិស័យនេះ អាចរកបាននូវប្រាក់កម្រៃខ្ពស់ ។
ឯកឧត្តម បានបន្តថា សម្រាប់ការនាំចេញផលិតផលស្វាយចន្ទី របស់កម្ពុជាទៅកាន់ទីផ្សារអ៊ីតាលីនេះ គឺជាជំហានយ៉ាងសំខាន់ ក្នុងការចូលរួម និងអនុវត្តគោលនយោបាយជាតិស្ដីពី ស្វាយចន្ទី ឆ្នាំ២០២២-២០២៧ ហើយរំពឹងថា ផលិតផលស្វាយចន្ទីរបស់កម្ពុជា នឹងមានតាំងលក់ក្នុងម៉ាត និងផ្សារទំនើបរបស់អ៊ីតាលី និងសហភាពអ៊ឺរ៉ុបទាំងមូល ។
លោក អាន តារា ប្រធានក្រុមប្រឹក្សាភិបាលសហព័ន្ធស្វាយចន្ទីកម្ពុជា បានលើកឡើងថា បច្ចុប្បន្នគ្រាប់ស្វាយចន្ទីរបស់កម្ពុជា បានជាប់ចំណាត់ថ្នាក់លេខ១ លើគុណភាព និងលេខ២ លើការផលិតគ្រាប់ចន្ទីស្រស់ច្រើនជាងគេ នៅលើពិភពលោក ។
គិតត្រឹមបំណាច់ខែមិថុនា ឆ្នាំ២០២៥ កម្ពុជាបាននាំគ្រាប់ស្វាយចន្ទី ដែលមិនទាន់ច្នៃទៅកាន់ប្រទេសវៀតណាម ចំនួនជាង៩១ម៉ឺនតោន គិតជាទឹកប្រាក់ជាង ១ពាន់លានដុល្លារអាមេរិក ខណៈដែលបច្ចុប្បន្នកម្ពុជាមានសិប្បកម្ម សហគ្រាស និងរោងចក្រកែច្នៃគ្រាប់ស្វាយចន្ទីសរុបចំនួន ៤២កន្លែង មានសមត្ថភាពកែច្នៃបានប្រមាណជា ១៥ភាគរយប៉ុណ្ណោះ នៃផលគ្រាប់ស្វាយចន្ទីទូទាំងប្រទេស ។
ឯកឧត្តម ដូមីនិក វីល្លៀម (Dominic Williams) ឯកអគ្គរាជទូតអង់គ្លេសប្រចាំកម្ពុជា និងឯកឧត្តម ឌ្រីសម៉ាន់ អ៊ីហ្គោរ៍ (Driesmans Igor) ឯកអគ្គរដ្ឋទូតសហភាពអ៊ឺរ៉ុបប្រចាំកម្ពុជា បានបង្ហាញនូវការអបអរសាទរ ចំពោះការនាំផលិតផលស្វាយចន្ទីទៅកាន់ប្រទេសអ៊ីតាលី ជាមួយនឹងការសន្យាបន្តនាំយកផលិតផលស្វាយចន្ទីរបស់កម្ពុជា ទៅកាន់ទីផ្សារអ៊ឺរ៉ុបបន្ថែមទៀត ។
សួមបញ្ជាក់ថាស្វាយចន្ទីកម្ពុជាក៏ កំពុងមានវត្តមានដាក់លក់ក្នុងផ្សារ Family Mart ដ៏ល្បី ក្នងប្រទេសជប៉ុនដែលមានចំនួន ១៦.៣២០ទីតាំង ក្រោមកិច្ចសហការយ៉ាងជិតស្និទ្ធរវាងក្រសួងពាណិជ្ជកម្ម និងក្រុមហ៊ុន Mirarth Holdings Inc. ព្រមទាំង ក្រុមហ៊ុន ITOCHU Corporatio។
នេះជាបើតាមលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ពេលជួបជាមួយលោក Taniguchi Kentaro អគ្គនាយកក្រុមហ៊ុន Mirarth Energy Solutions Inc., គណៈប្រតិភូ Mirarth Holdings, Inc. និងតំណាងក្រុមហ៊ុន ITOCHU Corporation កាលពីល្ងាចថ្ងៃទី៣ ខែកញ្ញា ឆ្នាំ២០២៥ នៅទីក្រុងអូសាកា តំបន់កាន់សៃ ប្រទេសជប៉ុន។
លោកស្រីរដ្ឋមន្ត្រី ក៏បានអបអរសាទរចំពោះការចុះហត្ថលេខាលើឯកសារ Letter of Intent រវាងក្រសួងពាណិជ្ជកម្ម និងក្រុមហ៊ុន Mirarth Holdings Inc. និងឯកសារអនុស្សរណៈយោគយល់គ្នារវាងក្រុមហ៊ុន Mirarth Holdings Inc. ជាមួយដៃគូចំនួន ៥ ក្នុងការជំរុញការនាំចូល និងចែកចាយស្វាយចន្ទីរកម្ពុជាមកទីផ្សារជប៉ុន នាឱកាសទិវាជាតិកម្ពុជា អមព្រឹត្តិការណ៍ពិព័រណ៍ពិភពលោក២០២៥ អូសាកា កាន់សៃ កាលពីថ្ងៃទី៥ ខែកក្កដា ឆ្នាំ២០២៥ កន្លងទៅ។
