គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥កម្ពុជាជាមួយបញ្ជាការដ្ឋានការពារព្រំដែនច័ន្ទបុរី-ត្រាត របស់ថៃ នឹងបន្តប្រជុំនៅថ្ងៃទី២៥ ខែសីហា នៅទឹកដីថៃ
22-January-2026 / ផ្សេងៗ
ភ្នំពេញ៖ កិច្ចប្រជុំវិសាមញ្ញគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ(RBC) រវាងយោធភូមិភាគទី៥ របស់កម្ពុជា និងបញ្ជាការដ្ឋានការពារព្រំដែនចន្ទបុរី-ត្រាត ខាងភាគីថៃ នឹងបន្តប្រជុំនៅថ្ងៃទី២៥ ខែសីហា ឆ្នាំ២០២៥ ដែលថៃធ្វើម្ចាស់ផ្ទះ។ នេះបើយោងតាមការឱ្យដឹងពី លោកស្រីឧត្តមសេនេយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា នៅល្ងាចថ្ងៃទី២៤ ខែសីហា ឆ្នាំ២០២៥។
បើតាមអ្នកនាំពាក្យក្រសួងការពារជាតិ កិច្ចប្រជុំនៅថ្ងៃស្អែកនេះ រំពឹងថានឹងទទួលបាលទ្ធផលវិជ្ជមានបន្ថែមទៀត ដែលអនុញ្ញាតឱ្យកម្ពុជា-ថៃ ជំរុញការអនុវត្តបទឈប់បាញ់ឱ្យកាន់តែមានប្រសិទ្ធភាពពេញលេញ ព្រមទាំងនាំមកវិញនូវសន្តិភាព ស្ថិរភាព និងប្រក្រតីភាពត្រលប់មកវិញកាន់ឆាប់រហ័ស ខណៈកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ធ្វើឡើងនៅខេត្តប៉ៃលិន ប្រទេសកម្ពុជា នៅថ្ងៃទី២៤ ខែសីហា ឆ្នាំ២០២៥ រវាងភាគីទាំងពីរទទួលបានលទ្ធផលល្អប្រសើរ។
លោកស្រីឧត្តមសេនេយ៍ឯក ម៉ាលី សុជាតា បានបញ្ជាក់ថា កម្ពុជានៅតែអំពាវនាវដល់ភាគីថៃយ៉ាងទទួចឱ្យអនុវត្តទៅតាមកិច្ចព្រព្រៀរវាងភាគីទាំងពីរ ដោយប្រគល់មកឱ្យកម្ពុជាវិញនូវកងកម្លាំងរបស់កម្ពុជាទាំង ១៨រូប ដែលថៃចាប់ទៅដោយខុសច្បាប់ក្រោយបទឈប់បាញ់ ដើម្បីឱ្យពួកគាត់អាចវិលត្រលប់មកជួបជុំគ្រួសារពួកគាត់វិញ។
សូមបញ្ជាក់ថា កិច្ចប្រជុំលេខាធិការដ្ឋាន នៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនច័ន្ទបុរី-ត្រាតរបស់ថៃ ដែលដឹកនាំដោយ ឧត្តមសេនីយ៍ទោ សរ គឹមប៉ាក់ ប្រធានក្រុមលេខាភាគីកម្ពុជា និងវរនា វីឯក គិទិផុន គុណសិរិប៉នញ៉ូ ប្រធានក្រុមលេខាភាគីថៃ។
ក្រោយបើកកិច្ចប្រជុំ ភាគីទាំងពីរបានពិនិត្យលើចំណុចលម្អិតលើកំណត់ហេតុព្រមព្រៀងដែលជាលទ្ធផលបន្ទាប់ពីកិច្ចពិភាក្សាគ្នារួចមក កិច្ចប្រជុំលេខាធិការដ្ឋាននៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥របស់កម្ពុជា និងបញ្ជាការដ្ឋាន ការពារព្រំដែនច័ន្ទបុរី-ត្រាតរបស់ថៃ បានប្រព្រឹត្តទៅដោយមានភាពរីកចម្រើនគួរឱ្យកត់សម្គាល់ ដើម្បីត្រៀមសម្រាប់កិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនច័ន្ទបុរី-ត្រាតរបស់ថៃ នៅថ្ងៃស្អែកទី២៥ ខែសីហា ឆ្នាំ២០២៥៕
យោធាថៃបដិសេធលទ្ធផលប្រជុំជាមួយកម្ពុជាដែលនិយាយដល់រឿងរាយបន្លាលួស?
ការិយាល័យអនុព័ន្ធយោធាថៃប្រចាំស្ថានទូតថៃក្នុងទីក្រុងភ្នំពេញ បានចេញលិខិតមួយនាពេលថ្មីៗនេះ បដិសេធចោលសេចក្តីថ្លែងការណ៍របស់ក្រសួងការពារជាតិកម្ពុជា ពាក់ព័ន្ធនឹងលទ្ធផលនៃកិច្ចប្រជុំវិសាមញ្ញរបស់គណៈកម្មាធិការកិច្ចការព្រំដែនថ្នាក់យោធភូមិភាគ (RBC) ដែលថា មានការពិភាក្សាអំពីវិធានការដែលអាចអនុវត្តបានចំពោះបញ្ហាបន្លាលួស និងការរារាំងផ្សេងៗទៀត ដើម្បីសម្រួលទុក្ខលំបាករបស់ពលរដ្ឋមូលដ្ឋាន។ តែក្រសួងការពារជាតិកម្ពុជាបានការពារសេចក្តីថ្លែងការណ៍របស់ខ្លួនកន្លងមកថាទុកជាបានការដដែល។ សម្រាប់អ្នកវិភាគ ថៃមិនដែលមើលឃើញកម្ពុជាក្នុងផ្លូវវិជ្ជមាននោះទេ និងមិនសូវមានភាពស្មោះត្រង់នឹងពាក្យសម្តីរបស់ខ្លួន។
បើតាមលិខិតរបស់វរសេនីយ៍ឯក ខុមវ៉ារ៉ាណុន គូឡាប់ព្រំសុវណ្ណ អនុព័ន្ធយោធាអមស្ថានទូតថៃ ក្នុងទីក្រុងភ្នំពេញចុះថ្ងៃទី២៣ ខែសីហា ការប្រជុំ RBC ដែលបានរៀបចំនៅខេត្តស្រះកែវប្រទេសថៃ កាលពីថ្ងៃទី ២២ ខែសីហា មិនមានការពិភាក្សាលើការស្វែងរកវិធានការដែលអាចអនុវត្តទៅបានដើម្បីដោះស្រាយបញ្ហាការរាយលួសបន្លា និងការបង្កឧបសគ្គផ្សេងៗ ក្នុងន័យសំដៅដល់ការបន្ធូរបន្ថយទុក្ខលំបាករបស់សហគមន៍មូលដ្ឋាន ការសម្របសម្រួលឲ្យមានការវិលត្រឡប់របស់ប្រជាជនដោយសុវត្ថិភាពទៅផ្ទះសម្បែងរបស់ពួកគេវិញ និងកាត់បន្ថយនូវរាល់ផលប៉ះពាល់លើជីវភាពរស់នៅរបស់ពួកគេឲ្យបានឆាប់បំផុតតាមដែលអាចធ្វើទៅបាននោះទេ។
តាមលិខិតដដែលរបស់លោក ខុមវ៉ារ៉ាណុន គូឡាប់ព្រំសុវណ្ណ ដែលបានចុះផ្សាយដោយកាសែតថៃ Khaosod Englishនៅថ្ងៃអាទិត្យ ទី២៤ ខែសីហានេះ យោធាថៃ តាមរយៈការិយាល័យអនុព័ន្ធយោធាប្រចាំស្ថានទូតថៃក្នុងទីក្រុងភ្នំពេញ សូមគូសបញ្ជាស់ថា កិច្ចប្រជុំ RBC គឺជាយន្តការទ្វេភាគីសម្រាប់កិច្ចការសន្តិសុខតាមព្រំដែន ពោលគឺវាមិនមែនជាវេទិកាសម្រាប់ភាគីសងខាង ផ្សព្វផ្សាយព័ត៌មានខុសពីការពិតទៅកាន់សាធារណជននោះទេ។ ការផ្សព្វផ្សាយចំណែកណាមួយដែលបង្កើតបាននូវការយល់ខុស ហើយធ្វើឲ្យខូចទំនុកចិត្តរវាងគ្នាពាក់ព័ន្ធនឹងបញ្ហាដែលមិនរាប់បញ្ចូលក្នុងកំណត់ហេតុផ្លូវការបស់កិច្ចប្រជុំគឺជាទង្វើមិនសមរម្យ។ ភាគីថៃ បានស្នើដោយក្តីគោរពឲ្យកម្ពុជាគោរពតាមកំណត់ហេតុផ្លូវការ ហើយបញ្ហាទាំងនោះអាចនឹងត្រូវលើកយកមកពិភាក្សាក្នុងកិច្ចប្រជុំគណៈកម្មាធិការព្រំដែនទូទៅ (GBC)។
នៅចំពោះមុខការចោទប្រកាន់របស់ភាគីថៃនេះ ក្រសួងការពារជាតិកម្ពុជានៅបន្តការពារសេចក្តីថ្លែងការណ៍ដែលចេញ ដោយភាគីកម្ពុជា ដែលបាននិយាយដល់បញ្ហានៃការរាយបន្លាលួស ការដាក់ពង្រាយកង់ឡាន និងការបង្កឧបសគ្គផ្សេងៗទៀត ដែលគួរត្រូវបានដោះស្រាយតាមវិធានការជាក់ស្តែង ហើយអនុវត្តទៅបានដើម្បីកាត់បន្ថយផលប៉ះពាល់នានា លើសហគមន៍មូលដ្ឋាន។
