៦ខែកម្ពុជានាំទំនិញទៅវៀតណាម បានតម្លៃជិត ២,២ពាន់លានដុល្លារ អ្នកធុរកិច្ចកម្ពុជា និង វៀតណាម ចុះអនុស្សរណៈ នៃការយោគយល់គ្នា
08-July-2026 / សេដ្ឋកិច្ច
ប្រទេសវៀតណាម៖ក្នុងឱកាស នៃសន្និសីទតភ្ជាប់រវាងធុរកិច្ចវៀតណាម-កម្ពុជា ឆ្នាំ២០២៥ ដែលប្រព្រឹត្តទៅនៅរសៀលថ្ងៃទី១៥ ខែកក្កដា ឆ្នាំ២០២៥នេះ នៅទីក្រុងហូជីមិញ ប្រទេសវៀតណាម អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា និងសមាគមសហព័ន្ធធុរកិច្ចវៀតណាម-កម្ពុជា បានចុះអនុស្សរណៈ នៃការយោគយល់គ្នា ស្តីពីការចូលរួមជំរុញកិច្ចសហប្រតិបត្តិការពាណិជ្ជកម្ម វិនិយោគ និងសេដ្ឋកិច្ចរវាងកម្ពុជា និងវៀតណាម។
គោលបំណង នៃកិច្ចសហប្រតិបត្តិការអនុស្សរណៈយោគយល់គ្នានេះ មានគោលបំណងពង្រឹងកិច្ចសហប្រតិបត្តិការជំរុញការតភ្ជាប់លើវិស័យ ពាណិជ្ជកម្ម វិនិយោគ សេដ្ឋកិច្ច និងធុរកិច្ចរវាងសភាពាណិជ្ជកម្មកម្ពុជា និងសមាគមសហព័ន្ធធុរកិច្ចវៀតណាម -កម្ពុជា តាមរយៈការលើកកម្ពស់ឱកាសអាជីវកម្ម ការផ្លាស់ប្តូរព័ត៌មាន និងការគាំទ្រសហគ្រិនរបស់ភាគីទាំងពីរ។
សូមបញ្ជាក់ថាបើតាមអគ្គនាយកដ្ឋានគយ និងរដ្ឋាករកម្ពុជា ការនាំចេញរបស់កម្ពុជាទៅកាន់ប្រទេសវៀតណាម បានឈានដល់តម្លៃទឹកប្រាក់ ២.១៩៣លានដុល្លារអាម៉េរិក នៅឆមាសទី១ ឆ្នាំ២០២៥ កើនឡើង ៨,២% បើធៀបនឹងរយៈពេលដូចគ្នាកាលពីឆ្នាំមុន។ក្នុងអំឡុងពេលដូចគ្នានេះ កម្ពុជាបាននាំចូលទំនិញពីប្រទេសវៀតណាមមានតម្លៃ ២.១៤៧លានដុល្លារអាម៉េរិក កើនឡើង ៦,៣% ធៀបនឹងរយៈពេលដូចគ្នាកាលពីឆ្នាំមុន។ លទ្ធផលនេះបានធ្វើឲ្យកម្ពុជា មានអតិរេកពាណិជ្ជកម្មចំនួន ៤៦លានដុល្លារអាម៉េរិក ក្នុងឆមាសទី ១ ឆ្នាំ២០២៥។ការនាំចេញសំខាន់ៗរបស់កម្ពុជាទៅកាន់ប្រទេសវៀតណាមរួមមាន ស្រូវ អង្ករ កៅស៊ូ ស្វាយចន្ទី ដំឡូងមី ពោត ចេក ស្វាយ និងថ្នាំជក់។ ទន្ទឹមនឹងនោះ ការនាំចូលសំខាន់ៗពីប្រទេសវៀតណាមរួមមាន សម្ភារសំណង់ គ្រឿងម៉ាស៊ីន ប្រេងឥន្ធនៈ បរិក្ខាអគ្គិសនី និងអេឡិចត្រូនិក ជី ចំណីសត្វ គ្រឿងទេស បន្លែ ត្រី សាច់ និងផ្លែឈើ។
វៀតណាម កំពុងក្លាយជាដៃគូពាណិជ្ជកម្មកាន់តែសំខាន់ឡើងជាមួយប្រទេសកម្ពុជា ក្នុងនាមជាប្រទសក្បែរខាងគ្នា ដែលមានទំនាក់ទំនងកាន់តែល្អប្រសើរជាមួយគ្នា ដែលកើតឡើងពីកិច្ចខិតខំប្រឹងប្រែងរបស់ថ្នាក់ដឹកនាំនៃប្រទេសទាំងពីរក្នុងការពង្រឹងកិច្ចសហប្រតិបត្តិការទ្វេភាគីលើវិស័យសេដ្ឋកិច្ច និងពាណិជ្ជកម្មទ្វេភាគី ជាពិសេសក្នុងគ្រាដែលកម្ពុជា កំពុងមានជម្លោះព្រំដែនជាមួយប្រទេសថៃ និងការបិទច្រកព្រំដែនដោយឯកតោភាគីពីភាគីថៃ។
កាលពីថ្ងៃទី ២៨ ខែមេសា ឆ្នាំ២០២៥រដ្ឋមន្ត្រីក្រសួងពាណិជ្ជកម្ម កម្ពុជា-វៀតណាម បានចុះហត្ថលេខាលើកិច្ចសម្របសម្រួលជំរុញពាណិជ្ជកម្មទ្វេភាគីដោយយកពន្ធសូន្យលើមុខទំនិញមួយចំនួនសម្រាប់អនុវត្ត ឆ្នាំ២០២៥-២០២៦ ដោយឯកភាពបង្កើតគណៈកម្មាធិការពាណិជ្ជកម្មចម្រុះ ដើម្បីបង្កើនទំហំពាណិជ្ជកម្មដល់គោលដៅ ២០ពាន់លានដុល្លាអាម៉េរិក និងដោះស្រាយបញ្ហាពាណិជ្ជកម្មនៅតាមបណ្តោយព្រំដែន។
ដើម្បីពង្រឹងទំនាក់ទំនងពាណិជ្ជកម្ម និងការវិនិយោគបន្ថែមទៀត រវាងកម្ពុជា និងវៀតណាម អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន-កម្ពុជា កំពុងដឹកនាំគណៈប្រតិភូធុរកិច្ចជាន់ខ្ពស់ទៅកាន់ទីក្រុងហូជីមិញ ប្រទេសវៀតណាម ចាប់ពីថ្ងៃទី ១៤ ដល់ថ្ងៃទី១៦ ខែកក្កដា ឆ្នាំ២០២៥។ ដំណើរទស្សនកិច្ចនេះ មានគោលបំណងពង្រឹងចំណងសេដ្ឋកិច្ច ជំរុញពាណិជ្ជកម្ម និងការវិនិយោគទ្វេភាគី ព្រមទាំងស្វែងរកទីផ្សារកាន់តែទូលំទូលាយសម្រាប់ផលិតផលកម្ពុជា។បេសកកម្ម ធុរកិច្ចនេះ គេរំពឹងថា នឹងជួយបើកច្រកថ្មីសម្រាប់អ្នកនាំចេញ និងវិនិយោគិនកម្ពុជា ដែលរួមចំណែកដល់ពិពិធកម្ម និងកំណើនសេដ្ឋកិច្ចជាតិ៕
